Ba Ba Lukela ku Ba mwa Mubuso wa Mulimu

“Zeo ki sisupo sa katulo ya Mulimu, ye lukile; kuli mu be ba ba lukela mwa mubuso wa Mulimu.”—2 MATES. 1:5.

1, 2. Mulelo wa Mulimu kwa neku la ku atula ki ufi, mi ki mañi ya ka atula?

IBATA iba ka silimo sa 50 C.E., muapositola Paulusi na li mwa Atene. Ha bona kuli bulapeli bwa milimu ne bu atile hahulu mwa Atene, a fa bupaki bo bunde hahulu. Ku bonahala kuli manzwi a na unguzi ka ona na fitile hahulu kwa lipilu za mahedeni ba ne ba mu teelelize. Na ize: “[Mulimu] cwale u bulelela batu kaufela, mwa mabaka kaufela, kuli ba bake; kakuli u tomile lizazi l’a ka atula lifasi ka ku luka, ka Munna y’a beile ku eza seo; mi u file batu kaufela sisupo se si tiile, ka ku mu zusa kwa bafu.”—Lik. 17:30, 31.

² Ku butokwa hahulu kuli lu hupulange kuli Mulimu u tomile lizazi l’a ka atula batu kwapili! Katulo yeo i ka fitiswa ka mutu ya na si ka punda Paulusi mwa ngambolo ya na file mwa Atene kono ili ye lu izibela kuli ki Jesu Kreste ya na zuhile kwa bafu. Jesu ha ka atula, ba bañwi ba ka piliswa mi ba bañwi ba ka timezwa.

3. Ki kabakalañi Jehova ha na itamile bulikani ni Abrahama, mi ki mañi ya bu taleleza?

³ Lizazi la Katulo li kaba la lilimo ze 1,000. Jesu ki yena ya ka fitisa katulo yeo sina Mulena wa Mubuso wa Mulimu ya lumilwe ki Jehova, kono ha na ku ba a nosi. Jehova u ketile ba bañwi mwahal’a batu kuli ba yo busa ni ku atula ni Jesu ka lilimo zeo ze 1,000. (Mu bapanye Luka 22:29, 30.) Lilimo ze bat’o ba 4,000 kwamulaho k’o, Jehova na kalile ku lukisa za Lizazi la Katulo ha na itamile bulikani ni Abrahama mutang’a hae ya sepahala. (Mu bale Genese 22:17, 18.) Ku bonahala kuli bulikani b’o ne bu iswelwi ka 1943 B.C.E. Nihakulicwalo, Abrahama na si ka utwisisa ka ku tala kuli bulikani b’o ne bu ka ama cwañi batu kaufela. Kono luna kacenu lwa utwisisa kuli ka bulikani b’o, peu ya Abrahama i taleleza mulelo wa Mulimu wa ku atula batu kaufela.

4, 5. (a) Ki mañi ya na li kalulo ya pili ya peu ya Abrahama, mi na buleziñi ka za Mubuso? (b) Kolo ya ku yo busa mwa Mubuso wa Mulimu ne i filwe lili kwa batu?

⁴ Kalulo ya pili ya peu ya Abrahama ne i til’o ba Jesu. Ka 29 C.E., na tozizwe ka moya o kenile mi a ba yena Mesiya ya na sepisizwe, kamba Kreste. (Magal. 3:16) Jesu na tandile lilimo ze talu ni licika inz’a kutaza taba ye nde ya Mubuso kwa sicaba sa Majuda. Joani Mukolobezi ha sa tamilwe, Jesu na bonisize kuli  ne ku ka ba ni ba bañwi ba ne ba ka fiwa Mubuso, kakuli na ize: “Ku zwa kwa mazazi a Joani Mukolobezi ku tisa cwale, mubuso wa kwa lihalimu u kenwa ka ku eza ka tata, mi ba ba buhali ba u hapa.”—Mat. 11:12.

⁵ Kono nakonyana fela pili a si ka bulela kale manzwi ao a kuli ba bañwi ba ka “hapa” Mubuso wa kwa lihalimu, Jesu na ize: “Kaniti na mi bulelela, ni li: Ku ba ba pepilwe ki basali, ha ku na yo mutuna ku Joani Mukolobezi; nihakubacwalo, yo munyinyani ku ba ba mwa mubuso wa kwa lihalimu ki yo mutuna ku yena.” (Mat. 11:11) Ki kabakalañi ha na bulezi cwalo? Kakuli kolo ya ku yo busa mwa Mubuso wa Mulimu ne i si ka fiwa kale kwa batu ba ba sepahala ku fitela moya o kenile ha ne u suluzwi fa Pentekonta ya 33 C.E. Nako yeo ha ne i til’o fita, Joani Mukolobezi na sa timezi kale.—Lik. 2:1-4.

Peu ya Abrahama I Beiwa Ye Lukile

6, 7. (a) Peu ya Abrahama ne i ka ba “sina linaleli za lihalimu” ka nzila ifi? (b) Abrahama na filwe limbuyoti mañi, mi peu ya hae i fumana limbuyoti mañi?

⁶ Abrahama na taluselizwe kuli peu ya hae ne i ka ñatafala mi baikulu ba hae ne ba ka ba “sina linaleli za lihalimu” ni sina lishabati le li fa likamba la liwate. (Gen. 13:16; 22:17) F’o ki ku talusa kuli mwa miteñi ya Abrahama, batu ne ba sa koni ku ziba kuli baikulu ba Abrahama ne ba ka kuma kai luli. Nihakulicwalo, palo luli ya peu ya hae ya kwa moya ne i til’o zibahala hasamulaho. Kwand’a Jesu, ne ku ka ba ni ba bañwi hape ba 144,000 ba ne ba ka ba peu ya Abrahama ya kwa moya.—Sin. 7:4; 14:1.

⁷ Linzwi la Mulimu li bulela cwana ka za tumelo ya Abrahama, li li: “[Abrahama] a lumela ku [Muñ’a] Bupilo; mi a mu balela ku lumela kwa hae kuli ki ku luka.” (Gen. 15:5, 6) Ki niti kuli ha ku na mutu ya lukile ka ku tala. (Jak. 3:2) Kono bakeñisa kuli Abrahama na na ni tumelo ye tiile, Jehova na mu ngile kuli ki ya lukile mi mane a mu biza kuli ki mulikana hae. (Isa. 41:8) Ba ba li peu ya Abrahama ya kwa moya hamohocwalo ni Jesu ni bona ba ngiwa kuli ki ba ba lukile mi seo mane si ba tahiseza limbuyoti ze tuna ku fita za na fumani nihaiba yena Abrahama.

8. Ki lifi limbuyoti ze filwe kwa peu ya Abrahama?

⁸ Bakreste ba ba tozizwe ba beilwe ba ba lukile bakeñisa kuli ba na ni tumelo mwa sitabelo sa Jesu se si liulula. (Maro. 3:24, 28) Jehova u nga kuli sibi sa bona si felisizwe mi ba kona ku toziwa ka moya o kenile kuli ba be bana ba Mulimu ba kwa moya, ili banyani ba Jesu Kreste. (Joa. 1:12, 13) Ba mwa bulikani bo bunca mi ba mwa sicaba se sinca sa “Isilaele wa Mulimu.” (Magal. 6:16; Luka 22:20) Yeo luli ki tohonolo ye tuna! Bakeñisa lika zeo za ba ezelize Mulimu, Bakreste ba ba tozizwe ha ba libeleli ku pila ku ya ku ile fa lifasi fa. Ba itombozi bupilo bwa fa lifasi-mubu ilikuli ba yo ba ni tabo ye sa feli ya ku busa ni Jesu mwa lihalimu mwahal’a Lizazi la Katulo.—Mu bale Maroma 8:17.

9, 10. (a) Bakreste ne ba kalile lili ku toziwa ka moya o kenile, mi ki lifi ze ne ba ka talimana ni zona kwapili? (b) Ki ifi tuso ye ne ba filwe Bakreste ba ba tozizwe?

⁹ Fa Pentekonta ya 33 C.E., sikwata sa batu  ba bañwi ba ba sepahala ne si filwe kolo ya ku ba mwahal’a ba ba ka busa ni Jesu mwa Lizazi la Katulo. Balutiwa ba Jesu ba ba bat’o ba 120 ne ba kolobelizwe ka moya o kenile mi ne ba bile Bakreste ba pili ku toziwa ka moya. Kono ao ne li makalelo fela. Ku zwa honaf’o ne ba na ni ku bonisa busepahali bwa bona ku Jehova ku si na taba ni litiko zeo Satani na ka tahisa fahalimw’a bona. Ne ba na ni ku sepahala ku fitela lifu kuli ba fiwe kuwani ya bulena ya bupilo bwa kwa lihalimu.—Sin. 2:10.

¹⁰ Ka lona libaka leo, Jehova ka Linzwi la hae ni ka puteho ya Sikreste na file Bakreste ba ba tozizwe likelezo ni likupuliso ze ne ba tokwa. Ka mutala, muapositola Paulusi na ñolezi Bakreste ba ba tozizwe ba kwa Tesalonika kuli: “Sina mushemi mw’a ezeza bana ba hae; lu mi kutalize, lu mi tiisize lipilu, ne lu nze lu mi lemusa kuli mu zamaye ka mukwa o swanela Mulimu ya mi bizelize ku kena mwa mubuso wa hae, ni mwa kanya ya hae.”—1 Mates. 2:11, 12.

11. Jehova na lukiselize “Isilaele wa Mulimu” litaba mañi ze ñozwi?

¹¹ Hamulaho wa lilimo ze ñata ku zwa fo ne ba ketezwi Bakreste ba pili ba ba tozizwe, Jehova na boni teñi kuli kwa ñolwa litaba ka za bukombwa bwa Jesu bwa fa lifasi-mubu ni za misebezi ye ne ba petile Bakreste ba pili ba ba tozizwe hamohocwalo ni likelezo za na ba file ku latelela. Kacwalo Jehova na ekelize Mañolo a Sigerike kwa Mañolo a Siheberu a na li teñi ni kale. Mañolo a Siheberu kwa makalelo na ñolezwi sicaba sa Isilaele ka nako ye ne si li sicaba tota sa Mulimu. Mañolo a Sigerike ona na ñolezwi sihulu “Isilaele wa Mulimu,” bona ba ba tozizwe sina banyani ba Kreste ni sina bana ba Mulimu ba kwa moya. Kono ne ku sa talusi kuli ba ba si Maisilaele ne ba sa koni ku fumana tuso ka ku ituta Mañolo a Siheberu. Ka nzila ye swana, Bakreste ba ba si ka toziwa ka moya o kenile ba fumana limbuyoti ze ñata ka ku ituta ni ka ku latelela likelezo ze mwa Mañolo a Sigerike.—Mu bale 2 Timotea 3:15-17.

12. Paulusi na file Bakreste ba ba tozizwe kupuliso mañi?

¹² Bakreste ba pili ne ba beilwe ba ba lukile ni ku toziwa ka moya o kenile ilikuli ba yo amuhela sanda sa bona sa kwa lihalimu. Ku toziwa kwa bona ne ku sa talusi kuli ba ipahamise fahalimw’a Bakreste ba bañwi ba ba tozizwe fa lifasi. Kono ku bonahala kuli ba bañwi kwa Bakreste ba pili ne ba libezi yona taba yeo mi ne ba kalile ku bata libubo mwahal’a mizwale ba bona mwa puteho. Ki lona libaka Paulusi ha na bulezi kuli: “Mu se mu kusi, mu se mu fumile; mu se mu busa, luna lu li siyo kwateñi. Kabe mu busa luli, kuli ni luna lu buse ni mina!” (1 Makor. 4:8) Kacwalo, Paulusi na hupulisize Bakreste ba ba tozizwe ba mwa miteñi ya hae kuli: “Isikuli lu busa tumelo ya mina, kono lu lata ku mi tusa ze mi tabisa.”—2 Makor. 1:24.

Ku Kwanisa Palo ye Tomilwe

13. Ku toziwa kwa Bakreste ne ku zwezipili cwañi hamulaho wa 33 C.E.?

¹³ Palo ya Bakreste ba ba tozizwe ya 144,000 ne i si ka kwanelela mwa miteñi ya baapositola. Bakreste ba ba tozizwe ne ba zwezipili ku ketiwa mwa linako za baapositola kono ku bonahala kuli hamulaho wa f’o, ki ba sikai fela ba ne ba ketiwa. Nihakulicwalo, ku ketiwa ne ku zwezipili mwahal’a lilimo ze ne latelezi ku to fita ni mwa miteñi ya luna. (Mat. 28:20) Mi cwale Jesu ha sa kalile ku busa ka 1914, lika ne li kalile ku ezahala ka lubilo luli.

14, 15. Ku ezaheziñi mwa miteñi ye kwa neku la ku ketiwa kwa ba ba tozizwe?

¹⁴ Pili, Jesu na tanyezi lila kaufela ze ne lwanisa puso ya Mulimu kwa lihalimu. (Mu bale Sinulo 12:10, 12.) Kihona cwale a isa mamelelo ya hae kwa ku kubukanya batu ba bañwi kuli palo ya 144,000 ya ba ba ka busa mwa Mubuso i kwanelele. Mi ku bonahala kuli ha ku to fitwanga mwa ma-1935 palo yeo ne se i bat’o kwana kakuli buñata bwa batu ba ne ba  sweli ku ba Bakreste ne ba si na takazo ya ku ya kwa lihalimu. Moya ne u sa pakelani ni moya wa bona kuli ki bana ba Mulimu. (Mu bapanye Maroma 8:16.) Bona ne ba til’o iponahaza kuli ki “lingu ze ñwi” ba ba na ni sepo ya ku pila ku ya ku ile mwa paradaisi fa lifasi. (Joa. 10:16) Kacwalo, hamulaho wa 1935, mulelo wa musebezi wa ku kutaza, sihulu ne li wa ku kubukanya “buñata bo butuna bwa batu” ba na boni muapositola Joani mwa pono, bona ba ba ka punyuha “ñalelwa ye tuna.”—Sin. 7:9, 10, 14.

¹⁵ Nihakulicwalo, mwahal’a lilimo ze fitile ku zwa mwa ma-1930, batu ba sikai ba ketilwe kuli ba ye kwa lihalimu. Kabakalañi? Mwendi ba bañwi ba ketezwi ku yola ba ne ba ketilwe pili ili ba ba si ka sepahala. (Mu bapanye Sinulo 3:16.) Paulusi na kile a bulela za batu ba bañwi ba na izibela hande ba ne ba zwile mwa niti. (Mafil. 3:17-19) Jehova u kona ku keta bomañi kuli ba yole batu ba ba zwile mwa niti? Ku ziba yena Jehova. Kono ha ku bonahali kuli Jehova wa kona ku keta batu ba banca ba ba sa zo lumela. Ku bonahala kuli Jehova u keta mwahal’a batu be se ba bonisize kale busepahali bwa bona sina mwa na ezelize Jesu ha na tomile mukiti wa Kupuzo. *—Luka 22:28.

16. Lu itumelañi ka za ba ba tozizwe, mi lu swanela ku kolwa lika mañi?

¹⁶ Nihakulicwalo, ku bonahala kuli haki batu kaufela ba ba ketilwe ku ya kwa lihalimu ku zwa mwa ma-1930 ba ba ketezwi fela ku yola batu ba ba fulalezi niti. Ku bonahala kuli Jehova u lukisize kuli Bakreste ba ba tozizwe ba zwelepili ku ba mwahal’a luna mwa mazazi kaufela a, a maungulelo, ku fitela luli fa ka sinyeza “Babilona yo mutuna.” * (Sin. 17:5) Mi lu kolwa kuli palo kaufela ya 144,000 i ka kwanelela ka nako ya Jehova ye tomilwe ni kuli kaufel’a bona ba ka yo busa luli mwa Mubuso wa kwa lihalimu. Hape lu kolwa Linzwi la bupolofita la kuli buñata bo butuna bwa batu ba ka zwelapili ku sepahala ka sikwata. Hona cwale-cwale fa, ba ka “zwa mwa ñalelwa ye tuna” ye ka tulukela lifasi la Satani mi ba ka kena ka tabo mwa lifasi le linca la Mulimu.

Ba Ba Ka Busa mwa Mubuso wa Mulimu Ba Tuha Ba Kwana!

17. Ka ku ya ka 1 Matesalonika 4:15-17 ni Sinulo 6:9-11, ki sika mañi se si ezahezi kwa Bakreste ba ba tozizwe ba ba sepahalile ku isa lifu?

¹⁷ Ku zwa ka 33 C.E., Bakreste ba ba tozizwe ba likiti-kiti ba bile ni tumelo ye tiile mi ba itiisize ku isa lifu. Bakreste bao ba ngiwa kuli ba lukela ku fiwa Mubuso mi ku bonahala luli kuli ku zwa fela Jesu ha kala ku ba Mulena, Bakreste bao ba filwe mupuzo wa bona wa kwa lihalimu.—Mu bale 1 Matesalonika 4:15-17; Sinulo 6:9-11.

18. (a) Ba ba tozizwe ba ba sa li fa lifasi ba na ni sepo mañi? (b) Ba lingu ze ñwi ba nga cwañi mizwale ba bona ba ba tozizwe?

 ¹⁸ Bakreste ba ba tozizwe ba ba sa li fa lifasi-mubu ba kozwi ka ku tala kuli haiba ba zwelapili ku sepahala, hona cwale-cwale fa ba ka fiwa mupuzo wa busepahali bwa bona. Mi bolule-lule ba lingu ze ñwi ha ba nahana za tumelo ya mizwale ba bona ba ba tozizwe, ba fita fa ku lumelelana ni manzwi a muapositola Paulusi. Na bulezi cwana ka za mizwale ba ba tozizwe ba kwa Tesalonika: “Lu itumba ka mina mwa Likeleke za Mulimu, kabakala tiisezo ni tumelo ya mina, mwa manyando ni ñalelwa. Zeo ki sisupo sa katulo ya Mulimu, ye lukile; kuli mu be ba ba lukela mwa mubuso wa Mulimu, o mu utwa butuku kabakala ona.” (2 Mates. 1:3-5) Wa mafelelezo ku ba ba tozizwe ha ka ya kwa lihalimu, ibe kuli ku ka ba cwalo lili kamba lili, fo ba ba ka busa mwa Mubuso wa kwa lihalimu ba kabe ba kwanile. Mi luli yeo ikaba taba ye tabisa hahulu mwa lihalimu ni fa lifasi!

[Litaluso za kwatasi]

Kana Mwa Kona ku Talusa?

• Mulimu na patululezi Abrahama taba mañi ye ama Lizazi la Kutulo?

• Ki kabakalañi Abrahama ha na beilwe ya lukile?

• Ba ba li peu ya Abrahama ba ka fumanañi kabakala ku beiwa ba ba lukile?

• Bakreste kaufela ba na ni buikolwiso mañi?

[Lipuzo za Tuto]

[Siswaniso se si fa likepe 20]

Jesu na susuelize balateleli ba hae kuli ba eze ka t’ata kuli ba fiwe Mubuso

[Siswaniso se si fa likepe 21]

Fa Pentekonta ya 33 C.E., Jehova na kalile ku keta kalulo ya bubeli ya peu ya Abrahama

[Siswaniso se si fa likepe 23]

Ba lingu ze ñwi ba itebuha kuli ba bile ni Bakreste ba ba tozizwe mwa mazazi a maungulelo