Ba Ba Lukela ku Iswa kwa Maweluwelu A Mezi A Bupilo

“Ngunyana . . . u ka ba lisa, a ba ise kwa maweluwelu a mezi a bupilo.”—SIN. 7:17.

1. Linzwi la Mulimu li talusa cwañi Bakreste ba ba tozizwe, mi Jesu u ba file buikalabelo mañi?

LINZWI la Mulimu li bonisa kuli Bakreste ba ba tozizwe ba ba okamela liluwo la Kreste la fa lifasi ki bona “mutanga ya sepahala, ya na ni kutwisiso.” Kreste ha na til’o tatuba “mutanga” yo ka 1918, na fumani kuli Bakreste ba ba tozizwe bao ne ba zwelapili ku sula “lico [za kwa moya] ka nako ye lukela.” Kacwalo Jesu, yena Mulena, a ba keta ni ku ba “beya fa bukombwa bwa z’a luwile kaufela.” (Mu bale Mateu 24:45-47.) Ka nzila yeo, pili ba si ka amuhela kale sanda sa bona sa kwa lihalimu, ba ba tozizwe ba sebeleza balapeli ba bañwi ba Jehova fa lifasi-mubu fa.

2. Ki afi maluo a Jesu?

² Mulena u na ni m’ata fahalimw’a lika za luwile mi wa kona ku itusisa zona ka mwa latela. Maluo a Jesu Kreste, yena Mulena ya ketilwe ki Jehova, ki lika kaufela ze ama Mubuso ze fa lifasi-mubu. Maluo ao a kopanyeleza ni “buñata bo butuna” bwa na boni muapositola Joani mwa pono. Joani u talusa cwana buñata bo butuna bwa na boni, u li: “Na talima mi na bona buñata bo butuna bwa batu,  ku si na ya kona ku ba bala; ba zwa mwa macaba kaufela, ni mwa mishobo, ni mwa masika, ni mwa lipuo kaufela, ba yemi fapil’a Lubona ni fapil’a Ngunyana, ba apezi likubo ze sweu, ba sweli nzalu mwa mazoho a bona.”—Sin. 7:9.

3, 4. Ba buñata bo butuna ba na ni tohonolo ye tuna ka nzila ifi?

³ “Lingu ze ñwi” za na talusize Jesu li kopanyeleza cwalo ni buñata bo butuna. (Joa. 10:16) Ba buñata bo butuna ba na ni sepo ya ku pila ku ya ku ile mwa paradaisi fa lifasi-mubu. Ba na ni sepo ya kuli Jesu u ka ba ‘isa kwa maweluwelu a mezi a bupilo ni kuli Mulimu u ka takula miyoko kaufela kwa meto a bona.’ Ka lona libaka leo, ba “tapisize liapalo za bona, ba li sweufalize mwa mali a Ngunyana.” (Sin. 7:14, 17) Ba na ni tumelo mwa sitabelo sa Jesu, mi kona libaka Mulimu ha ba nga kuli ba apezi ‘liapalo ze sweu.’ Ba beilwe ba ba lukile sina balikani ba Mulimu ka ku swana ni Abrahama.

⁴ Mi bakeñisa kuli Mulimu u nga kuli ba buñata bo butuna bwa lingu ze ñwi ba ba sweli ku ekezeha ba lukile, ba kona ku ba ni sepo ya ku punyuha sinyeho ye ka tulukela lifasi le fa ñalelwa ye tuna. (Jak. 2:23-26) Ba kona ku sutelela ku Jehova, mi ka sikwata, ba na ni sepo ya ku punyuha Armagedoni. (Jak. 4:8; Sin. 7:15) Ha ba ikezezi lika mo ba latela kono ba ipeile kwatas’a Mulena wa kwa lihalimu ni banyani ba hae ba ba tozizwe ba fa lifasi-mubu.

5. Ba buñata bo butuna ba tusa cwañi banyani ba Kreste ba ba tozizwe?

⁵ Bakreste ba ba tozizwe ba ka zwelapili ku kopana ni twaniso ye t’ata mwa lifasi le la Satani. Nihakulicwalo, ba na ni sepo ya kuli mizwale ba bona ba buñata bo butuna ha ba na ku ba fulalela. Bakreste ba ba tozizwe se li ba ba nyinyani, kono ka silimo ni silimo ba buñata bo butuna ba sweli ba ekezeha. Ba ba tozizwe ha ba koni ku okamela liputeho kaufela za Sikreste ze bat’o ba 100,000 mwa lifasi kaufela. Kacwalo tuso ye ñwi ye ba fa lingu ze ñwi ku ba ba tozizwe ki ya kuli banna ba ba swanela ba buñata bo butuna ba sebeza sina maeluda mwa liputeho. Ba tusa ku babalela  bolule-lule ba Bakreste ba ba beilwe mwa pabalelo ya “mutanga ya sepahala, ya na ni kutwisiso.”

6. Ne ku polofitilwe cwañi kuli lingu ze ñwi ne li ka tusa Bakreste ba ba tozizwe?

⁶ Tuso ye ba sweli ku fa lingu ze ñwi kwa Bakreste ba ba tozizwe ne i kile ya bulelwa cimo ki mupolofita Isaya. Na ñozi kuli: “[Muñ’a] Bupilo s’a bulela ki se, u li: [Babeleki ba ba sa lifiwi ba kwa, NW] Egepita, ni ze lekilwe kwa Etopia, ni Masabea, banna ba siyemo se sitelele, li ka ta ku wena, li be za hao; macaba ao, a ka ku latelela.” (Isa. 45:14) Bakreste ba ba na ni sepo ya ku pila fa lifasi-mubu ba zamaya ka swanisezo mwamulaho wa Bakreste ba ba tozizwe ni Sitopa Se Si Etelela, ka ku latelela ketelelo ya bona. Ka ku ba “babeleki ba ba sa lifiwi,” ba lingu ze ñwi ba itatela ku beleka ka moyo kaufela ni ku itusisa maluo a bona kuli ba tuse ku eza musebezi wa ku kutaza mwa lifasi kaufela ili musebezi wa na file Kreste kwa balateleli ba hae ba ba tozizwe fa lifasi-mubu.—Lik. 1:8; Sin. 12:17.

7. Ba buñata bo butuna ba sweli ku lutiwañi?

⁷ Ha ba nze ba tusa cwalo mizwale ba bona ba ba tozizwe, ba buñata bo butuna ba lutiwa ku ba mutomo wa sicaba se sinca se si ka ba teñi hamulaho wa Armagedoni. Mutomo wo u swanela ku ba o tiile mi ba ba eza mutomo wo ba na ni ku latelela Mulena ka lipilu ze lata. Mukreste ni Mukreste u na ni kolo ya ku bonisa kuli wa kona ku itusiswa ki Mulena, Kreste Jesu. Ka ku ba ni tumelo ni ka ku bonisa busepahali cwale, Mukreste u ka bonisa kuli u ka latelela litaelo za ka fiwa ki Mulena mwa lifasi le linca.

Ba Buñata Bo Butuna Ba Bonisa Tumelo ya Bona

8, 9. Ba buñata bo butuna ba sweli ku bonisa cwañi tumelo ya bona?

⁸ Ba lingu ze ñwi ba ba sweli ku tusa puteho ya Bakreste ba ba tozizwe ba bonisa tumelo ya bona ka linzila ze fitana-fitana. Nzila ya pili ki ya kuli, ba tusa ba ba tozizwe mwa musebezi wa ku shaela taba ye nde ya Mubuso wa Mulimu. (Mat. 24:14; 28:19, 20) Nzila ya bubeli ki ya kuli, ba itatela ku latelela ketelelo ye fiwa ki Sitopa Se Si Etelela.—Maheb. 13:17; mu bale Zakaria 8:23.

⁹ Nzila ya bulalu ki ya kuli, ba buñata bo butuna ba tusa mizwale ba bona ba ba tozizwe ka ku latelela likuka ze lukile za Jehova. Ba lika ka t’ata ku bonisa ‘lilato, tabo, kozo, pilu-telele, musa, bunde, tumelo, buishuwo, ni buiswalo.’ (Magal. 5:22, 23) Kacenu, haki ba bañata ba ba lata ku bonisa tulemeno to. Buñata ba lata ku eza “misebezi ya nama.” Nihakulicwalo, ba buñata bo butuna ba eza ka t’ata ku ambuka ‘bubuki, buhule, mikwa ye masila, bubelete, ku lapela milimu, buloi, sitoyo, lifapano, lifufa, buhali, likañi, likauhano, lituto za buhata; muna, butahwa, ku ca maswe, ni ze ñwi ze cwalo.’—Magal. 5:19-21.

10. Ba buñata bo butuna ba lika ka t’ata ku ezañi?

¹⁰ Bakeñisa kuli ha lu si ka petahala, ku kona ku ba t’ata ku beya muselo wa moya, ku ambuka misebezi ya nama, ni ku tiyela sineneketo ye zwa kwa lifasi la Satani. Nihakulicwalo, lwa itiisa ilikuli lu si ke lwa tuhelela bufokoli bwa luna ni mapalelwi a luna kuli a lu zwafise ni ku fokolisa tumelo ya luna ni lilato la luna ku Jehova. Lwa ziba kuli Jehova u ka eza ka mw’a sepiselize; u ka punyusa buñata bo butuna kwa ñalelwa ye tuna.

11. Satani u itusisize linzila lifi kuli a fokolise tumelo ya Bakreste?

¹¹ Nihakulicwalo, lu na ni ku tona ka nako kaufela kakuli lwa ziba kuli sila sa luna se si lu lwanisa ki Diabulosi, mi yena ha liseli ku lu lwanisa. (Mu bale 1 Pitrosi 5:8.) U likile ku itusisa bakwenuheli ni linzila ze ñwi kuli a lu kolwise kuli lituto ze lu latelela ki za buhata. Kono u palezwi ku lu swasa ka nzila yeo. Mi nihaike kuli nyandiso fokuñwi i fokolisize musebezi wa luna wa ku kutaza, hañata i tiisize tumelo ya ba ba nyandiswa. Kacwalo, Satani  cwale s’a itusisa hahulu nzila ya bona kuli ki yona ye kona ku fokolisa hahulu tumelo ya luna. Satani u fokolisanga tumelo ya luna ka nako ye lu zwafile. Bakreste ba kwa makalelo ne ba lemusizwe za taba yeo ha ne ba taluselizwe kuli: ‘Mu lemuhe Kreste ya na itiisize niha na hanyezwa ki baezalibi.’ Kabakalañi? “Kuli mu si ke mwa katala ni ku fela pilu.”—Maheb. 12:3.

12. Kelezo ya Bibele i tiisa cwañi ba ba zwafile?

¹² Kana mu kile mwa bata ku tuhela ku sebeleza Jehova? Kana fokuñwi mu ikutwanga kuli mu bapalelwi? Haiba ki cwalo, mu si ke mwa tuhelela Satani ku itusisa maikuto a mina ao kuli a mi palelwise ku sebeleza Jehova. Ku ezanga tuto ya Bibele ye tungile, ku lapelanga litapelo ze zwelela kwatas’a pilu, ni ku fumanehanga kamita kwa mikopano ni ku eza siango ni balumeli ba bañwi ku ka mi tiisa ni ku mi tibela “ku fela pilu.” Jehova u sepisize ba ba mu sebeleza kuli u ka ba fa m’ata a manca, mi sepiso ya hae yeo ki ya niti. (Mu bale Isaya 40:30, 31.) Mu tundamene ku eza misebezi ya Mubuso. Mu ambuke lika ze mi sinyeza fela nako, mi mu eze lika ze tusa ba bañwi. Fohe mu ka ba ni m’ata a ku itiisa ku si na taba ni lika ze zwafisa.—Magal. 6:1, 2.

Ku Punyuha Ñalelwa ni ku Kena mwa Lifasi Le Linca

13. Ki ufi musebezi o ba ka eza ba ba ka punyuha Armagedoni?

¹³ Hamulaho wa Armagedoni, batu ba bañata-ñata ba ba ka zusiwa kwa bafu ba ka tokwa ku lutiwa linzila za Jehova. (Lik. 24:15) Ba ka tokwa ku ituta za sitabelo sa Jesu se si liulula; mi hape ba ka tokwa ku lutiwa ku ba ni tumelo mwa sitabelo seo ilikuli ba fumane tuso ku sona. Ba ka tokwa ku ambuka litumelo za bona za kale ni mupilelo wa bona wa kale. Ba ka tokwa ku ituta ku apala butu bo bunca bwa Bakreste ba niti. (Maef. 4:22-24; Makolo. 3:9, 10) Ba lingu ze ñwi ba ba ka punyuha Armagedoni ba ka ba ni musebezi o mutuna wa ku eza. Ikaba tabo ye tuna luli ku sebeleza Jehova ka nzila ye cwalo, ku si na ku katazwa ni ku yembululwa ki lifasi le li maswe le!

14, 15. Ba ba ka punyuha ñalelwa ye tuna ba ka tusana cwañi ni batu ba ba lukile ba ba ka zuha kwa bafu?

¹⁴ Batanga ba Jehova ba ba sepahala ba ne ba shwile pili Jesu a si ka taha kale fa lifasi-mubu ni bona ba ka ba ni ze ñata za ku ituta.  Ba ka tokwa ku ituta kuli Mesiya ya na sepisizwe ye ne ba nyolelwa ku bona na til’o ba mañi luli. Kwamulaho ha ne ba pila, ne ba bonisize kuli ne ba bata ku lutiwa ki Jehova. Ka mutala, mu nahane tabo ni tohonolo ya ku tusa Daniele ku utwisisa mo ne bu talelelizwe bupolofita bwa na ñozi kono ili bwa na si ka utwisisa!—Dan. 12:8, 9.

¹⁵ Kono nihaike kuli ba ba ka zusiwa kwa bafu ba ka ituta ze ñata ku luna, ni luna lu ka ba ni lipuzo ze ñata za ku ba buza. Ba ka lu taluseza litaba ze bulezwi mwa Bibele ze si ka taluswa ka butungi. Mu nahane fela mo ku ka tabiseza ku ituta ze ñata ka za Jesu ku Joani Mukolobezi ya na li muhabo yena! Ku si na ku kakanya, lika ze lu ka ituta kwa basepahali ba ba cwalo li ka lu tusa ku itebuha hahulu Linzwi la Mulimu ku fita mo lu itebuhela lona kacenu. Batanga ba Jehova ba ba sepahala ba ba shwile—ku kopanyeleza cwalo ni ba buñata bo butuna ba ba sweli ku shwa mwa mazazi a, a maungulelo—ba ka zusiwa mwa “zuho ya bafu ye nde ku fita.” Basepahali bao ne ba kalezi ku sebeleza Jehova mwa lifasi la Satani. Ba ka ba ni tabo ye tuna hahulu ha ba ka zwelapili ku sebeleza Jehova mwa muinelo o munde hahulu wa lifasi le linca!—Maheb. 11:35; 1 Joa. 5:19.

16. Ka ku ya ka bupolofita, lika li ka zamaya cwañi mwahal’a Lizazi la Katulo?

¹⁶ Mwahal’a Lizazi la Katulo, libuka li ka apulwa. Libuka zeo hamohocwalo ni Bibele li ka itusiswa kwa ku atula batu kaufela ba ba pila kuli ku bonwe nji ba swanela bupilo bo bu sa feli. (Mu bale Sinulo 20:12, 13.) Kwa mafelelezo a Lizazi la Katulo, mutu ni mutu u kabe a bonisize kwa yemi mwa taba ya bubusi bwa pupo kamukana. Kana u ka yema kwa lineku la Mubuso ni ku lumeleza Ngunyana ku mu isa kwa “maweluwelu a mezi a bupilo?” Kamba kana u ka hana ku yema kwa lineku la Mubuso wa Mulimu? (Sin. 7:17; Isa. 65:20) Nako yeo ha i ka fita, mañi ni mañi fa lifasi u kabe a ikatulezi kwa ku yema, ku si na ku palelwiswa ki sibi sa sihozo kamba muinelo o maswe. Ha ku na ya ka kakanya katulo ya Jehova ya mafelelezo. Ba ba ka timezwa ku ya ku ile ki batu fela ba ba maswe.—Sin. 20:14, 15.

17, 18. Bakreste ba ba tozizwe ni ba lingu ze ñwi ba libelezi Lizazi la Katulo inze ba nyolelwa lika mañi ka tabo?

¹⁷ Bakreste ba ba tozizwe, ba ba lukela ku fiwa Mubuso, ba nyolelwa ku yo busa mwa Lizazi la Katulo. Yeo ki tohonolo ye tuna hahulu ye ba ka ba ni yona! Ku nahana fela za teñi ku ba susueza ku latelela kelezo ya na file Pitrosi kwa mizwale ba mwa miteñi ya hae, ye li: “Mu tundamene hahulu mwa ku tiisa ku bizwa ni ku ketwa kwa mina; kakuli ha mu ka eza cwalo, ha mu na ku wa, ku ya ku ile; ha mu eza cwalo, mu ka fiwa sibaka se situna luli sa ku y’o kena mwa mubuso o sa feli wa Jesu Kreste, Mulena ni Mupilisi wa luna.”—2 Pit. 1:10, 11.

¹⁸ Ba lingu ze ñwi ba tabile kuli mizwale ba bona ba ba tozizwe ba ka ba ni tohonolo yeo. Ba bata ku zwelapili ku ba tusa. Ka ku ba balikani ba Mulimu kacenu, ba susuezwa ku sebeleza Mulimu ka mo ba konela kaufela. Mwahal’a Lizazi la Katulo, ba ka ba ni tabo ya ku latelela ka lipilu za bona kaufela litaelo za Mulimu, Jesu ha nz’a ba isa kwa maweluwelu a mezi a bupilo. Mi fo cwale ba ka ngiwa kuli ki ba ba swanela luli ku ba batanga ba Jehova ba fa lifasi-mubu kamita-ni-mita!—Maro. 8:20, 21; Sin. 21:1-7.

Kana Mwa Hupula?

• Maluwo a Jesu a kopanyelezañi?

• Ba buñata bo butuna ba tusa cwañi mizwale ba bona ba ba tozizwe?

• Ba buñata bo butuna ba na ni tohonolo ni sepo mañi?

• Mu nga cwañi Lizazi la Katulo?

[Lipuzo za Tuto]

[Siswaniso se si fa likepe 25]

Ba buñata bo butuna ba tapisize liapalo za bona mi ba li sweufalize mwa mali a Ngunyana

[Siswaniso se si fa likepe 27]

Mu nyolelwa ku itutañi kwa batu ba ba sepahala ba ba ka zusiwa?