Bakreste Ha Ba Uluswa Sina Buloto

NAKONYANA pili a si ka shwa kale, Jesu na lemusize balateleli ba hae kuli: “Satani u mi kupile kuli a mi uluse sina buloto.” (Luka 22:31) Ki sikamañi sa na talusa fo?

Mwa miteñi ya Jesu, ku kutula buloto ne ku tokwa nako ye ñata ni ku sebeza ka t’ata. Ka ku kala, bakutuli ne ba kubukanyanga hamoho makunka a buloto. Mi hamulaho, ne ba puputanga makunka a buloto ao fa lika ze tiile kamba ku fitisa silei fahalimw’a ona. Muezezo wo ne u tahisa kuli buloto bu zwe kwa makunka ni mwa makapi a bona. Ha se ku ezizwe cwalo, balimi ne ba ulusanga buloto. Bubeke bwa buloto ne bu welanga fafasi, mi muuku ne u fefulelwanga kwahule ki moya. Buloto bo cwale ne bu uluswanga lwa mafelelezo ilikuli muuku o ne u siyezi u zwelele.

Ku likana ni manzwi a Jesu, Satani na si ka tuhela ku taseza balutiwa ba Jesu ba mwa miteñi yeo, mi u taseza ni luna kacenu. (Maef. 6:11) Ki niti kuli, fokuñwi haki Satani luli ya tahisanga kuli lu kopane ni matata a mañwi mwa bupilo. (Muek. 9:11) Niteñi, Satani u bata ku eza ka mwa konela kaufela kuli a lu palelwise ku sepahala. Ka mutala, wa kona ku lu lika ka ku lu susueza ku pila bupilo bwa ku lata hahulu sifumu, ku lu susueza ku itabisa ka ku buha lika ze maswe, kamba ku lu susueza ku eza buhule. Hape wa kona ku itusisa balikani ba luna ba kwa sikolo kamba ba kwa musebezi ni bahabo luna ba ba si Lipaki za Jehova kuli ba lu susueze ku ndongwama hahulu lituto ni misebezi ye mwa lifasi. Ku zwa fo, Satani wa kona ku tahisa nyandiso kuli a lu palelwise ku sepahala ku Mulimu. Mi ku na ni linzila ze ñwi ze ñata ili za itusisanga Satani kuli a lu uluse ka zona ili ku lu palelwisa ku sepahala.

Lu kona ku hanyeza cwañi sila se si m’ata se? Ka ili luna ha lu koni ku si hanyeza. Satani u m’ata ku lu fita; kono lwa ziba kuli m’ata a Jehova a fitela kwahule-hule a Satani. Haiba lu sepa Jehova ka ku tala, ni ku tundamena ku mu kupa butali ni bundume kuli lu zwelepili ku sepahala, ni ku itinga ku yena kuli a lu etelele, u ka lu fa m’ata kuli lu kone ku tiyela litwaniso za Satani.—Samu 25:4, 5.

Ha lu li mwa miliko, lu tokwa ku “keta ze nde ku ze maswe” kuli lu si ke lwa lyanganiswa ki mano a Satani. (Maheb. 5:13, 14) Jehova wa kona ku lu tusa ku eza cwalo. Mi ha s’a lu tusize, lu swanela ku kumalela ku se si lukile ku pale ku mane. Haiba lu latelela ketelelo ya Jehova, u ka lu tusa ku zwelapili ku eza se si lukile.—Maef. 6:10.

Satani wa kona ku lika ku lu ulusa sina buloto. Kono ka tuso ya Jehova, lwa kona ku mu hanyeza ni ku siyala inze lu tiile mwa tumelo. (1 Pit. 5:9) Linzwi la Jehova li lu sepisa kuli: “Mu hanele Diabulosi, mi u ka saba ku mina.”—Jak. 4:7.