Hatiso ya Lipaki Ye Nca ya Tawala ya Mulibeleli

MAGAZINI ye mu bala ye ki yona ya pili kwa hatiso ya Lipaki ya Tawala ya Mulibeleli. Lu bata ku talusa lika ze nca ka za magazini ye.

Hatiso ya Lipaki i hatiselizwe Lipaki za Jehova ni baituti ba Bibele ba ba eza zwelopili. I ka hatiswanga hañwi ka kweli mi i ka banga ni litaba ze n’e kamba ze ketalizoho ze ka itutiwanga kwa mikopano. Tomahanyo ya fo li ka itutelwa litaba zeo i ka boniswanga fa likepe la fahalimu la magazini. Ka ku sa swana ni hatiso ya nyangela ya Tawala ya Mulibeleli, hatiso ya Lipaki ha i na ku banga ni maswaniso a shutana fa likepe la fahalimu, kakuli yona ha i na ku fiwanga mwa bukombwa bwa mwa simu.

Fa likepe la bubeli la magazini ye, ku ka banga ni litaba za butokwa hahulu ze shashulula ka bukuswani mulelo wa litaba ze ka itutiwanga kwa mikopano, mi ku ka boniswanga ni litaba ze ñwi. Shashululo yeo i ka tusa hahulu bazamaisi ba Tuto ya Tawala ya Mulibeleli ha ba nze ba itukiseza kuli ba yo zamaisa hande tuto kwa mukopano wa puteho.

Mu ka lemuha kuli litaba ze ka itutiwanga kwa mikopano li ka banga ze kuswani hanyinyani ku fita mo ne li belanga. Kona kuli ka nako ya Tuto ya Tawala ya Mulibeleli, nako ye ñata i ka itusiswanga kwa ku buhisana mañolo a talusa lisupo ze tuna za tuto. Lu mi susueza kuli mu balange mañolo kaufela a mwa tuto ye ka itutiwanga sunda ni sunda. Kwa mañolo a ka boniswanga, ku na ni a mañwi a ka ñolwanga kuli “mu bale” mi mañolo ao a swanela ku baliwa ni ku buhisanwa ka nako ya Tuto ya Tawala ya Mulibeleli. Mi haiba nako i lumeleza, mañolo a mañwi ni ona a kona ku baliwa. Mwa litaba ze ñwi ku ka banga ni mañolo a ñozwi kuli “mu bapanye.” Bakeñisa kuli mañolo a cwalo ha talusangi luli lisupo ze tuna za mwa paragilafu, hañata mañolo a cwalo ha swanelwi ku baliwa kwa mukopano wa puteho. Kono mañolo ao a banga ni lisupo ze nde ze ekelizwe, mi fokuñwi a talusanga lisupo ka ku sa nonga. Lu mi susueza kuli mu balange mañolo ao ha mu itukiseza Tuto ya Tawala ya Mulibeleli. Mwendi mu ka amanga ku ona ha mu fa likalabo.

Piho ya ka silimo ha i sa na ku banga mwa Tawala ya Mulibeleli. Ku kala ka silimo sa 2008, i ka banga mwa ñambeko ya Bukombwa bwa Luna bwa Mubuso hamohocwalo ni mwa Yearbook. Kono sina mo se ku taluselizwe, hatiso ya Lipaki i ka banga ni litaba ze ñwi ze ekelizwe. Nihaike kuli buñata bwa litaba zeo ha li na ku nyakisiswanga kwa mikopano ya puteho, lu mi susueza kuli mu li balange hande kuli mu li utwisise. Ni zona litaba zeo li na ni sico sa kwa moya se si suliwa ki “mutanga ya sepahala, ya na ni kutwisiso.”—Mat. 24:45-47.

Hatiso ya Lipaki ni hatiso ya nyangela ya Tawala ya Mulibeleli haki limagazini ze shutana. Lihatiso zeo kaufela li sa li Tawala ya Mulibeleli Ye Hasanya Mubuso wa Jehova. Fa likepe la bubeli la limagazini zeo, ku na ni paragilafu ye na ni litaba ze swana ze talusa mulelo wa Tawala ya Mulibeleli. Bubeli bwa limagazini zeo li ka beiwanga mwa volyumu i liñwi. Mi litaba ze ka ketiwanga mwa limagazini ze peli zeo li ka beiwanga mwa taba ye li “Kana Mwa Hupula?” ye ka banga mwa hatiso ya Lipaki.

Haisali ku zwa ka 1879, Tawala ya Mulibeleli i zwezipili ku shaela litaba za niti ka za Mubuso wa Mulimu, ku si na taba ni linako za lindwa, za bunjebwe, ni za nyandiso. Lu lapela kuli ka tuso ya Jehova, Tawala ya Mulibeleli i zwelepili ku peta mulelo wa yona niha se ku ezizwe licinceho ze. Mi lu lapela kuli haike Jehova a fuyaule mina babali, ha mu nze mu bala ni ku ituta hatiso ya Lipaki ye nca ya Tawala ya Mulibeleli.