Mu Itute ku “Luta ka Bukwala”

“Bulela Linzwi, . . . u nyaze, u kalimele, u kutaze ka pilu-telele kaufela, u nz’o [luta ka bukwala, NW].”—2 TIM. 4:2.

1. Ki ifi taelo ya na file Jesu kwa balutiwa ba hae, mi ki mutala mañi wa na tomile?

JESU niha na ezize misebezi ye komokisa mwa bukombwa bwa hae bwa fa lifasi, na si ka zibahala sina mualafi kamba muezi wa limakazo, kono na zibahalile sina muluti. (Mare. 12:19; 13:1) Musebezi wo no li wa butokwa hahulu ku Jesu ne li wa ku shaela taba ye nde ya Mubuso, mi ki wona musebezi wa butokwa hahulu ni kwa balateleli ba hae kacenu. Bakreste ba filwe musebezi wa kuli ba zwelepili ku tahisa balutiwa ka ku luta batu ku mamela lika kalufela za na laezi Jesu.—Mat. 28:19, 20.

2. Ki nto mañi ye lu swanela ku eza kuli lu pete musebezi wo lu filwe wa ku kutaza?

² Kuli lu pete musebezi wo lu filwe wa ku tahisa balutiwa, lu swanela ku tundamena ku ituta ku luta ka bukwala. Muapositola Paulusi ha na ñolezi Timotea ya na kutazanga ni yena,  na bonisize libaka ha lu swanela ku luta ka bukwala. Na ize: “Tokomela mizamao ya hao; tokomela ni tuto ya hao, u tundamene mwateñi. Kakuli ha u eza cwalo u ka ipilisa, u pilise ni ba ba ku utwa.” (1 Tim. 4:16) Mulutelo wa na bulela Paulusi haki mulutelo wa ku talusa fela litaba. Bakreste ba ba ziba ku luta hande ba fitanga batu kwa lipilu ni ku tahisa kuli batu bao ba cince mupilelo wa bona. Kuli mutu a eze cwalo, u tokwa ku ba ni bukwala. Kacwalo lu kona cwañi ku “luta ka bukwala” ha lu taluseza ba bañwi taba ye nde ya Mubuso wa Mulimu?—2 Tim. 4:2, NW.

Ku Ituta ku “Luta ka Bukwala”

3, 4. (a) Lu kona ku ituta cwañi ku “luta ka bukwala”? (b) Sikolo sa Bukombwa sa Teokratiki si lu tusa cwañi ku ba baluti ba bande?

³ Kuli mutu a be sikwala u tokwa ku ituta, ku itwaeza, ni ku ituta ku ba bañwi. Kuli lu be baluti ba bande ba taba ye nde, lu tokwa ku eza lika zeo kaufela ze talu. Lu kona fela ku utwisisa hande taba haiba lu ituta yona ni ku lapela kuli lu i utwisise. (Mu bale Samu 119:27, 34.) Ha lu bona mizwale ni likaizeli mo ba lutela hande ka bukwala, lu ka ziba mo ba lutelanga mi lu ka ba likanyisa. Mi ka ku itwaeza ku eza lika ze lu ituta, lu ka ba likwala.—Luka 6:40; 1 Tim. 4:13-15.

⁴ Jehova ki Muluti wa luna yo mutuna. U fa litaelo kwa batanga ba hae ka ku itusisa kopano ya hae ya fa lifasi ilikuli ba zibe mwa ku petela musebezi wo ba filwe wa ku kutaza. (Isa. 30:20, 21) Kona libaka liputeho kaufela li banga ni Sikolo sa Bukombwa sa Teokratiki sunda ni sunda, ili se si lukiselizwe ku luta baituti kaufela ku ziba mwa ku kutaleza hande taba ya Mubuso wa Mulimu. Buka ye itusiswa hahulu mwa sikolo seo ki Bibele. Linzwi la Jehova le li tahile ka moya li lu bonisa ze lu swanela ku luta. Hape li bonisa ni milutelo ye minde ye swanela. Sikolo sa Bukombwa sa Teokratiki kamita si lu luta kuli lwa kona ku ba baluti ba bande haiba lu luta lituto ze tomile fa Linzwi la Mulimu, lu itusisa hande lipuzo, lu luta ka nzila ye bunolo, ni ku iseza ba bañwi pilu. Ha lu nyakisiseñi lisupo zeo si li siñwi ka si li siñwi. Hamulaho kihona lu ka nyakisisa mo lu kona ku fitela muituti kwa pilu.

Mu Tome Lituto za Mina fa Linzwi la Mulimu

5. Lituto za luna li swanela ku toma fañi, mi ki kabakalañi?

⁵ Jesu, yena muluti yo mutuna hahulu ya fita baluti kaufela ba batu, na tomile lituto za hae fa Mañolo. (Mat. 21:13; Joa. 6:45; 8:17) Na si ka ipulelela litaba za hae, kono na bulezi litaba za ya na mu lumile. (Joa. 7:16-18) Ki yena ye lu swanela ku likanyisa. Kacwalo, litaba ze lu bulela kaufela ibe kuli ki mwa bupaki bwa fa ndu ni ndu kamba kuli ki fa tuto ya Bibele, li swanela ku toma fa Linzwi la Mulimu. (2 Tim. 3:16, 17) Niha lu ka ba ni butali lu mane ha lu koni ku tusa batu hande ka butali bwa luna ku fita Mañolo a tahile ka moya wa Mulimu mwa kona ku ba tuseza. Bibele i m’ata. Nto ya butokwa ye lu swanela ku eza nako ifi kamba ifi ye lu bata kuli muituti a utwisise sisupo, ki ku bala ni yena ze a talusa Mañolo ka za sisupo seo.—Mu bale Maheberu 4:12.

6. Muluti u kona cwañi ku tusa muituti kuli a utwisise lisupo ze nyakisiswa?

 ⁶ Fo ha ku talusi kuli kipeto muluti wa Mukreste ha sa swanela ku itukiseza tuto ya Bibele. Niteñi, muluti u swanela ku nyakisisa hande mañolo a bonisizwe ni ku keta a ka yo baliwa kwa tuto. Ki ko kunde kamita ku balanga mañolo fo ku tomile lituto za luna. Hape ki kwa butokwa ku tusa muituti ku utwisisa liñolo ni liñolo la bala.—1 Makor. 14:8, 9.

Mu Itusise Hande Lipuzo

7. Ki kabakalañi ku luta ka ku buza lipuzo ha ku li ko kunde?

⁷ Muluti ha itusisa hande lipuzo u ka susueza muituti ku nahanisisa mi ka ku eza cwalo wa kona ku fita muituti kwa pilu. Kacwalo ku fita kuli mu bulelele muituti ze a talusa mañolo, mina mu mu kupe kuli a mi taluseze ze a talusa. Fokuñwi mwa kona ku buza puzo ye ñwi kamba lipuzo ze ñata kuli mu tuse muituti wa mina ku utwisisa. Haiba mu luta muituti wa mina ka nzila ye, se mu eza fo, ha mu mu tusi fela kuli a zibe mabaka a litaba ze mu bulela kono hape mu mu tusa kuli a kolwe mabaka ao.—Mat. 17:24-26; Luka 10:36, 37.

8. Lu kona cwañi ku ziba ze mwa pilu ya muituti?

⁸ Mulutelo o mwa lihatiso za luna ki wa lipuzo ni likalabo. Ku si na ku kakanya, buñata bwa batu bo mu ituta ni bona Bibele ba fumananga ka bunolo likalabo mwa maparagilafu e ba balile. Niteñi, haiba muluti u bata ku fita muituti kwa pilu, ha na ku nga fela kuli muituti u utwisisize niha file kalabo ye nepahalile. Ka mutala, muituti wa kona ku talusa hande ze i bulela Bibele ka za buhule. (1 Makor. 6:18) Kono haiba muluti a buza lipuzo ze ñwi ka maseme, fohe u ka ziba mubonelo wa muituti ka za taba ye itutiwa. Kacwalo muluti wa kona ku buza muituti kuli: “Ki kabakalañi Bibele ha i hanisa batu ba ba si ka nyalana ku ba ni tobali? Mu bona cwañi mulao wa Mulimu wo? Kana mu nahana kuli kwa tusa ku latelela milao ya Mulimu?” Likalabo za ka fa muituti kwa lipuzo zeo, li ka bonisa ze mwa pilu ya hae luli.—Mu bale Mateu 16:13-17.

Mu Lute ka Nzila ye Bunolo

9. Ki nto mañi ye lu swanela ku hupula ha lu talusa litaba ze mwa Mañolo?

⁹ Buñata bwa litaba ze mwa Linzwi la Mulimu li bunolo ku li utwisisa. Kono fokuñwi mwendi batu bo lu ituta ni bona Bibele ba kana ba lyanganisizwe ki lituto za bulapeli bwa buhata. Ka ku ba baluti, lu swanela ku tusa batu kuli ba utwisise hande Bibele. Baluti ba bande ba talusanga litaba ka nzila ye bunolo, ye utwahala, ni ye nepahezi. Haiba lu luta ka nzila ye, ha lu na ku tatafaza niti. Mu si talusangi ka butungi litaba ze si za butokwa. Ha lu tokwi ku talusanga litaba kaufela ze mwa liñolo le lu bala. Lu tokwa ku talusanga fela litaba ze tokwahala kuli sisupo si utwahale. Muituti ha nze a zwelapili ku ituta, u ka utwisisa litaba ze tungile ze mwa Mañolo.—Maheb. 5:13, 14.

10. Lu kona ku ziba cwañi fo li swanela ku kuma litaba za ku nyakisisa fa tuto ya Bibele?

 ¹⁰ Ki litaba ze kuma kai ze swanelwa ku nyakisiswa fa tuto i liñwi? Kuli mu zibe fo li swanela ku kuma, mu tokwa ku lemuha lika ze ñwi. Buikoneli bwa muluti ni bwa muituti bwa shutana, kono kamita lu swanela ku hupulanga kuli musebezi wa luna baluti ki ku tusa muituti wa luna kuli a fite fa ku ba ni tumelo ye tiile. Kacwalo lu swanela ku fanga muituti nako ya ku bala, ku utwisisa ni ku lumela litaba ze mwa Linzwi la Mulimu. Ha lu swaneli ku itutanga litaba ze ñata za si ke a kona ku utwisisa muituti. Kono lu swanela ku bona teñi kuli tuto ya zwelapili. Haiba muituti wa luna a utwisisa sisupo, lwa kona ku shatukela ku se siñwi.—Makolo. 2:6, 7.

11. Ki mulutelo mañi o lu ituta ku Paulusi?

¹¹ Muapositola Paulusi ha na bulela taba ye nde kwa batu ba ne ba sa zibi niti, na i bulelanga ka nzila ye bunolo. Nihaike kuli na itutile hahulu, na sa itusisangi manzwi a matuna. (Mu bale 1 Makorinte 2:1, 2.) Litaba za mwa Mañolo ha li bulelwa ka nzila ye bunolo, li ka tabelwa ki batu ba lipilu ze nde. Mutu ha tokwi ku ba ya itutile hahulu kuli a kone ku li utwisisa.—Mat. 11:25; Lik. 4:13; 1 Makor. 1:26, 27.

Mu Tuse Baituti ku Sebelisa Ze Ba Ituta

12, 13. Ki sikamañi se si kona ku susueza muituti ku latelela za ituta? Mu fe mutala.

¹² Kuli lu be baluti ba bande, litaba ze lu luta li swanela ku fita muituti kwa pilu. Muituti u swanela ku utwisisa kuli tuto ya ituta i mu ama ni ku mu tusa cwañi, mi u swanela ku utwisisa mo bu kona ku cinceza bupilo bwa hae haiba a latelela milao ya mwa Mañolo.—Isa. 48:17, 18.

¹³ Ka mutala, lu kana lwa nyakisisa liñolo la Maheberu 10:24, 25, le li susueza Bakreste ku kopananga hamoho ni ba bañwi ilikuli ba susumezane ka Mañolo ni ka ku ba ni siango. Haiba muituti ha si ka kalisa kale ku fumanehanga kwa mikopano ya puteho, lwa kona ku mu taluseza ka bukuswani mo i ezezwanga ni ze ka yo nyakisiswa kwateñi. Lwa kona ku mu taluseza kuli nzila ye ñwi ye lu lapela ka yona ki ka mikopano ya puteho, ni ku mu bonisa kuli mikopano yeo ya lu tusa. Mi cwale lwa kona ku memela muituti yo kwa mikopano. Se si swanela ku mu susueza ku latelela milao ya mwa Mañolo ki ku bata ku utwa Jehova isi ku bata ku tabisa mutu ya mu luta.—Magal. 6:4, 5.

14, 15. (a) Muituti wa Bibele u kona ku itutañi ka za Jehova? (b) Ku ziba tulemeno twa Mulimu ku kona ku tusa cwañi muituti wa Bibele?

¹⁴ Baituti ba fumananga tuso ye tuna hahulu ka ku ituta Bibele ni ka ku latelela ze i bulela kakuli ba fitanga fa ku ziba Jehova ni ku mu lata. (Isa. 42:8) Jehova haki Ndate ya lilato fela ni Mubupi wa pupo kono hape u talusanga tulemeno twa hae ni buikoneli bwa hae kwa batu ba ba mu lata ni ba ba mu sebeleza. (Mu bale Exoda 34:6, 7.) Mushe ha na tuha a etelela sicaba sa Isilaele ku zwa mwa butanga bwa Egepita, Jehova na itibahalize ka ku bulela kuli: “Ni ka ba ze ni ka ba.” (Ex. 3:13-15, NW) Pulelo yeo ne i bonisa kuli Jehova na ka ba nto ifi kamba ifi ye ne tokwahala kuli a taleleze lisepiso za hae kwa sicaba sa hae. Kacwalo Maisilaele ne ba fitile fa ku ziba kuli Jehova ki yena Mulamuleli, Ndume wa ndwa, Mufani, ni Mutalelezi wa lisepiso za hae mi ne ba fitile fa ku ziba ni lika ze ñwi za na ba ezelize.—Ex. 15:2, 3; 16:2-5; Josh. 23:14.

¹⁵ Batu bo lu ituta ni bona ha ba na ku bona Jehova mwa bupilo bwa bona inz’a ba etelela ka limakazo sina mwa na ezelize ka Mushe. Nihakulicwalo, baituti ba luna ha ba nze ba tiya mwa tumelo ni ha ba nze ba zwelapili ku tabela lika ze ba sweli ku ituta ni ku li latelela, ku si na ku kakanya ba ka lemuha libaka ha ba swanela ku itinga ku Jehova ilikuli a ba fe bundume, butali, ni ketelelo. Ha ba nze ba eza cwalo, ni bona ba ka fita fa ku ziba kuli Jehova ki yena Muelezi ya butali ni ya sepahala, Musilelezi, ni Mufani yo mutuna ya ba fa lika kaufela ze ba tokwa.—Samu 55:22; 63:7; Liprov. 3:5, 6.

 Mu Iseze Ba Bañwi Pilu

16. Ki kabakalañi mutu niha si na buikoneli bwa ku luta, ha kona ku ba muluti yo munde?

¹⁶ Haiba mu ikutwa kuli ha mu na hande buikoneli bwa ku luta sina mo mu batela, mu si zwafi. Jehova ni Jesu ki bona ba ba sweli ku okamela musebezi wa ku luta o swelwi ku eziwa kacenu mwa lifasi. (Lik. 1:7, 8; Sin. 14:6) Ba kona ku lu tusa mwa musebezi wa luna ilikuli ze lu bulela li kone ku tusa mutu ya tabela taba ye nde. (Joa. 6:44) Muluti ha iseza pilu muituti wa hae ka lilato, wa kona ku peta ze ñata niha si na hande buikoneli. Muapositola Paulusi na bonisize kuli na ziba kuli ki kwa butokwa ku lata batu ba ba lutiwa.—Mu bale 1 Matesalonika 2:7, 8.

17. Lu kona ku iseza cwañi pilu muituti ni muituti wa Bibele?

¹⁷ Ka nzila ye swana, lwa kona ku iseza pilu muituti ni muituti wa Bibele ka ku mu ziba hande. Ha lu nze lu ituta ni yena likuka za mwa Mañolo, lu ka fita luli fa ku ziba mupilelo wa hae. Mwendi lu ka lemuha kuli kwa likuka ze ñwi za itutile mwa Bibele ku na ni ze ñwi za kalile ku latelela mwa bupilo bwa hae. Mi mwendi likuka ze ñwi u sa tokwa ku li latelela. Lwa kona ku tusa muituti ku ba mulutiwa wa niti wa Kreste haiba lu mu bonisa mwa swanela ku sebeliseza litaba za ituta ka nako ya tuto ya Bibele.

18. Ki kabakalañi ha kuli kwa butokwa ku lapelanga ni muituti ni ku mu beyanga mwa litapelo za luna?

¹⁸ Nto ya butokwa sihulu ye lu swanela ku eza, ki ku lapelanga ni muituti wa luna ni ku mu beyanga mwa litapelo za luna. Muituti u swanela ku iponela hande kuli mulelo wa luna ki wa ku mu tusa kuli a fite fa ku ziba hande Mubupi wa hae, kuli a sutelela ku Yena, ni kuli a fumane tuso kwa ketelelo ya Mulimu. (Mu bale Samu 25:4, 5.) Ha lu kupa Jehova mwa tapelo kuli a tuse muituti ku latelela za sweli ku ituta, muituti u ka lemuha kuli u swanela ku ba ‘muezi wa linzwi.’ (Jak. 1:22) Mi muituti ha nz’a teelezanga cwalo kwa litapelo za luna, ni yena u ka ituta mwa ku lapelela. Kwa tabisa luli ku susueza baituti ba Bibele ku tiisa silikani sa bona ni Jehova!

19. Lu ka nyakisisa likamañi mwa taba ye tatama?

¹⁹ Kwa susueza ku ziba kuli Lipaki ba ba fitelela 6.5 milioni mwa lifasi kaufela ba patehile ku itwaeza ku “luta ka bukwala,” ka mulelo wa kuli ba tuse batu ba ba tabela taba ye nde ku mamela lika kaufela za na laezi Jesu. Ki likamañi ze zwa mwa musebezi wa luna wa ku kutaza? Taba ye tatama i ka alaba puzo yeo.

Kana Mwa Hupula?

• Ki kabakalañi Bakreste ha ba swanela ku ituta ku “luta ka bukwala”?

• Lu kona cwañi ku ba baluti ba bande?

• Ki nto mañi ye kona ku lu tusa niha lu si na buikoneli bwa ku luta?

[Lipuzo za Tuto]

[Siswaniso se si fa likepe 9]

Kana mwa abananga mwa Sikolo sa Bukombwa sa Teokratiki?

[Siswaniso se si fa likepe 10]

Ki kabakalañi ha mu swanela ku kupanga muituti wa mina ku bala mwa Bibele?

[Siswaniso se si fa likepe 12]

Mu lapelange ni muituti wa mina mi mu mu beyange mwa litapelo za mina