‘Mu Tokomele Musebezi O Mu Filwe mwa Sebelezo ya Mulena’

“Tokomela musebezi w’o filwe mwa sebelezo ya Mulena, kuli u u pete.”—MAKOLO. 4:17.

1, 2. Bakreste ba na ni musebezi mañi kwa neku la batu?

LU NA ni musebezi wa butokwa hahulu wa ku tusa batu ba mwa silalanda sa luna. Likatulo ze ba eza cwale li ka ba pilisa kamba ku ba bulaisisa ka nako ya “ñalelwa ye tuna.” (Sin. 7:14) Ka ketelelo ya moya wa Mulimu, muñoli wa buka ya Liproverbia na ñozi kuli: “Lamulela ba ba iswa kwa lifu, mi ba ba ya kwa ku bulawa, u ba pilise.” Ao ki manzwi a’ tokwa ku nahanisiswa, nji cwañi? Haiba lu palelwa ku lemusa batu ze ka taha kwapili, mi batu bao ba timezwa, mali a bona a ka ba fahalimw’a litoho za luna. Muñoli wa buka ya Liproverbia na zwezipili ku bulela kuli: “Ha u ka li: Zeo ne lu sa li zibi! Ya likanyeza lipilu fa sikala kana a si ke a bona? Yena ya ku bonela moyo wa hao, a si ke a ziba? Mi a si ke a kutiseza ku mutu ni mutu ka musebezi wa hae?” Manzwi ao a bonisa kuli batanga ba Jehova ha ba koni ku bulela kuli ‘ha ba zibi’ kozi ye ka tulukela batu kwapili.—Liprov. 24:11, 12 .

² Ku Jehova, batu ki ba butokwa hahulu. Jehova u laela batanga ba hae kuli ba eze ka mo ba konela kaufela kuli ba pilise batu ba bañata. Mutang’a Mulimu kaufela u na ni ku shaela lushango lo lu pilisa lo lu fumaneha mwa Linzwi la Mulimu. Musebezi wa luna u swana ni wa mulibeleli ya huweleza ku zibisa batu za kozi ye taha. Ha lu bati kuli mali a ba ba ka bulaiwa a to ba fahalimw’a litoho za luna. (Ezek. 33:1-7) Kacwalo, ki kwa butokwa hahulu kuli lu tundamene ku ‘bulela linzwi.’—Mu bale 2 Timotea 4:1, 2, 5.

3. Lu ka itutañi mwa taba ye ni mwa litaba ze peli ze tatama?

³ Mwa taba ye, lu ka ituta mo lu kona ku tulela matata mwa musebezi wa luna wa ku pilisa batu ni mo lu kona ku tuseza batu ba bañata. Mwa taba ye tatama, lu ka nyakisisa mo lu kona ku lutela hande lituto za butokwa. Mi mwa taba ya bulalu mona lu ka ikutwela lika ze nde ze zwa mwa ku shaela taba ya Mubuso mwa bupala bwa lifasi. Kono pili lu si ka nyakisisa kale litaba zeo, kashe lu nyakisise libaka mazazi a luna h’a li a t’ata.

Libaka Batu Ba Bañata Ha Ba Si Na Sepo

4, 5. Batu ba talimana ni matata mañi, mi ba bañata ba ikutwa cwañi?

⁴ Lika ze sweli ku ezahala mwa lifasi li bonisa kuli lu pila mwa mazazi a maungulelo ni kuli mafelelezo sa li fakaufi hahulu. Batu ba katazwa ki miinelo ye ne bulezwi ki Jesu ni balutiwa ba hae kuli ne i ka ba teñi mwa “mazazi a maungulelo.” Ba ambekilwe ki “manyando” a cwale ka lindwa, lukupwe, lizikinyeho, ni matata a mañwi cwalo. Batu kai ni kai ha ba lateleli mulao, ba itata, mi ha ba lati za Mulimu. Ze luli ki “linako ze tata” nihaiba kwa batu ba ba lika ka t’ata ku latelela Bibele.—Mat. 24:3, 6-8, 12; 2 Tim. 3:1-5.

⁵ Kono batu ba bañata ba mwa simbwi—ha ba zibi taluso ya lika ze sweli ku ezahala mwa lifasi. Ka lona libaka leo, batu ba bañata ba ikalezwi za buino bwa bona ni bwa mabasi a bona. Batu ba bañata ba tomohile lipilu bakeñisa  ku shwelwa ki batu be ba lata ni ku sinyehelwa ki lika za bona. Bakeñisa kuli ha ba zibi hande libaka lika zeo ha li ezahala mi ha ba zibi kwa ku matela, batu bao ba pila ba si na sepo.—Maef. 2:12.

6. Ki kabakalañi “Babilona yo mutuna” ha si ka kona ku tusa balateleli ba hae?

⁶ “Babilona yo mutuna,” yona kopano ya lifasi ya bulapeli kamukana bwa buhata, ha i si ka eza se siñwi kuli i omba-ombe batu. Mane yona ka “veine ya buhule” bwa yona i tantalikisa batu ba bañata kwa moya. Mi ka ku eza lika sina lihule, bulapeli bwa buhata bu shemba “malen’a lifasi” ni ku ba zamaisa ka lituto za buhata ni za mioya kuli macaba a ipeye kwatas’a milonga ya lifasi. Mi ka ku eza cwalo, bulapeli bwa buhata bu ipumanezi m’ata ni libubo, kono eshe, bu fulalezi ka ku tala lituto za niti.—Sin. 17:1, 2, 5; 18:23.

7. Buñata bwa batu ba ka talimana ni nto mañi, kono ba bañwi ku bona ba kona ku tusiwa cwañi?

⁷ Jesu na lutile kuli buñata bwa batu ba zamaya mwa nzila ye atami ye liba kwa sinyeho. (Mat. 7:13, 14) Ba bañwi ba mwa nzila ye atami yeo kakuli ba hanile ka bomu ze i luta Bibele, kono ba bañata ba mwa nzila yeo bakeñisa kuli ba pumilwe, kamba ba mwa simbwi, mi ha ba zibi luli z’a tokwa Jehova kuli ba eze. Mwendi ba bañwi kwa batu bao ba kona ku cinca haiba ba talusezwa mabaka a utwahala a ka Mañolo ha ba swanela ku eza cwalo. Kono haili ba ba zwelapili ku ba mwa Babilona yo mutuna ni ku zwelapili ku hana ku latelela Bibele bona ha ba na ku pululeza “ñalelwa ye tuna.”—Sin. 7:14.

Mu Zwelepili ku Kutaza ‘Ku Si Na ku Lisela’

8, 9. Bakreste ba kwa makalelo ne ba ezize cwañi ha ne ba lwanisizwe, mi ki kabakalañi?

⁸ Jesu na bulezi kuli balutiwa ba hae ne ba ka kutaza taba ye nde ya Mubuso ni ku tahisa balutiwa. (Mat. 28:19, 20) Kacwalo, Bakreste ba niti ba nga kuli ku eza musebezi wa ku kutaza ki ku bonisa busepahali bwa bona ku Mulimu mi hape ki nzila ye tuna ye ba bonisa ka yona tumelo ya bona. Ki lona libaka balateleli ba Jesu ba kwa makalelo ha ne ba tundamezi ku kutaza niha ne ba lwanisizwe. Ne ba itingile ku Jehova, mi ne ba lapezi ku yena kuli a zwelepili ku ba tusa ku “bulela Linzwi la [hae] ba sa sabi.” Mi Jehova yena na ba file moya o kenile, mi ne ba shaezi ka bundume linzwi la Mulimu.—Lik. 4:18, 29, 31.

⁹ Twaniso ha ne i ekezehile hahulu, kana balateleli ba Jesu ne ba fokozi mwa musebezi wa bona wa ku kutaza? Kutokwa ni hanyinyani. Ba bahulu ba bulapeli ha ne ba boni kuli baapositola ne ba zwezipili ku kutaza, ba nyema hahulu mi ba tama baapositola, ba ba bemba, mi ba ba shapa. Nihakulicwalo, baapositola ne ba ‘si ka lisela ku luta batu, ni ku bulela kuli  Jesu ki Kreste.’ Ne ba utwisisize kuli ‘ki swanelo kuli ba utwe Mulimu ku fita batu.’—Lik. 5:28, 29, 40-42.

10. Ki litiko mañi ze ba talimananga ni zona Bakreste kacenu, kono ki lika mañi ze kona ku zwa mwa misebezi ya bona ye minde?

¹⁰ Batanga ba Mulimu ba bañata kacenu ha ba si ka talimana ni litiko za ku natakiwa kamba za ku lengiwa mwa litolongo bakeñisa musebezi wa bona wa ku kutaza. Kono Bakreste kaufela ba talimananga ni litiko ze ñwi. Ka mutala, lizwalo la mina le li lutilwe ka Bibele li kana la mi susueza ku eza lika ze ñwi ze kona ku tisa kuli ba bañwi ba mi toye kamba kuli mu shutane ni batu ba bañwi. Batu be mu beleka ni bona kamba be mu kena ni bona sikolo kamba be mu yahile mabapa ni bona ba kana ba sa mi utwisisi bakeñisa kuli mu latelela ze i bulela Bibele. Nihakulicwalo, mibonelo ya bona ha i swaneli ku mi fokolisa. Lifasi li mwa lififi la kwa moya, kono Bakreste ba swanela ku “benya sina mamonyi.” (Mafil. 2:15) Mwendi ba bañwi kwa batu ba ba mi bona ba ka ikumbuta misebezi ya mina ye minde ni ku lumba Jehova.—Mu bale Mateu 5:16.

11. (a) Ba bañwi ba kona ku lu nga cwañi bakeñisa musebezi wa luna wa ku kutaza? (b) Muapositola Paulusi na talimani ni twaniso mañi, mi na ezize cwañi?

¹¹ Lu tokwa ku ba ni bundume kuli lu tundamene ku kutaza taba ye nde ya Mubuso. Batu ba bañwi, nihaiba bahabo mina, ba kona ku mi sheununa kamba ku mi zwafisa ka linzila ze ñwi. (Mat. 10:36) Muapositola Paulusi na natakilwe bakeñisa musebezi wa hae wa ku kutaza. Ha mu utwe za na bulezi ka za miliko yeo. Na ize: “Niha ne lu utwisizwe butuku . . . ni ku shubulwa maswe, . . . lwa tiyela ku Mulimu wa luna, mi lwa mi bulelela Evangeli ya Mulimu mwa ndwa ye tuna.” (1 Mates. 2:2) Niti kikuli Paulusi na tokwa ku ba ni bundume kuli a zwelepili ku bulela taba ye nde niha na tamilwe, ku tubulwa, ku shapiwa, ni ku lengiwa mwa tolongo. (Lik. 16:19-24) Ki nto mañi ye ne mu file bundume bwa ku zwelapili ku kutaza? Ki takazo ya hae ya ku eza musebezi wa ku kutaza wa na filwe ki Mulimu.—1 Makor. 9:16.

12, 13. Ki matata mañi e ba talimana ni ona ba bañwi, mi ba a tula cwañi?

¹² Hape ku kona ku ba t’ata kuli lu kutaze ka mafulofulo haiba mwa kalulo ya luna batu ha ba fumanehi fa mandu kamba ha ba tabeli ku teeleza kwa taba ye nde ya Mubuso. Lu kona ku ezañi mwa miinelo ye cwalo? Mwendi neikaba hande ku ba ni bundume bwa ku kutazanga kwa batu ka linzila ze ñwi. Mwendi hape lwa kona ku kutaza ka linako li sili kamba ku yo kutaleza mwa libaka mo lu kona ku fumana batu ba bañata.—Mu bapanye Joani 4:7-15; Likezo 16:13; 17:17.

¹³ Hape batu ba bañata ba talimana ni matata a cwale ka busupali ni mapongo, ili a kona ku ba palelwisa ku kutaza hahulu sina mo ne ba kana ba tokwela. Haiba ni mina mu katazwa ki matata ao, mu si ke mwa zwafa. Jehova wa ziba matata e mu talimana ni ona mi wa itebuha lika ze mu kona ku eza. (Mu bale 2 Makorinte 8:12.) Ku si na taba ni matata e mu sweli ku talimana ni ona—ibe kuli ki twaniso, sheununo, kamba mapongo—mu eze ze mu kona ku eza ka m’ata a mina kuli mu bulelele ba bañwi taba ye nde.—Liprov. 3:27; mu bapanye Mareka 12:41-44.

‘Mu Tokomele Musebezi O Mu Filwe’

14. Muapositola Paulusi na tomezi Bakreste ba bañwi mutala mañi, mi na file kelezo mañi?

¹⁴ Muapositola Paulusi na tokomezi bukombwa bwa hae, mi na susuelize balumeli ba bañwi kuli ba eze cwalo ni bona. (Lik. 20:20, 21; 1 Makor. 11:1) Yo muñwi wa batu ba na susuelize hahulu Paulusi ne li Mukreste ya bizwa Arkipo. Mwa liñolo la na ñolezi ba kwa Kolose, Paulusi na ñozi kuli: “Mu bulelele Arkipo, mu li: Tokomela musebezi w’o filwe mwa sebelezo ya Mulena, kuli u u pete.” (Makolo. 4:17) Ha lu zibi kuli Arkipo ne li mañi mi ni miinelo ya hae ha lu i zibi, kono ku bonahala  kuli Arkipo na amuhezi musebezi wa ku kutaza. Haiba mu Bakreste ba ba ineezi, u zibe ni mina mu amuhezi musebezi wa ku kutaza. Kana mwa tokomela musebezi wo mu filwe kuli mu u pete?

15. Ku ineela ku Mulimu ku talusañi, mi nto yeo i zusa lipuzo mañi?

¹⁵ Pili lu si ka kolobezwa kale, ne lu lapezi ku Jehova ku mu taluseza kuli lu bata ku ineela ku yena. Seo si talusa kuli ne lu na ni tundamo ya ku eza tato ya hae. Kacwalo lu tokwa ku ipuza cwale kuli, ‘Kana nto ya butokwa ka ku fitisisa mwa bupilo bwa ka ki ku eza luli tato ya Mulimu?’ Mwendi lu na ni buikalabelo bo buñwi bwa tokwa Jehova kuli lu bu pete—inge cwalo bwa ku uta lubasi. (1 Tim. 5:8) Kono kwand’a ku lwala buikalabelo bwa luna b’o, lu itusisa cwañi nako ni m’ata a luna? Ki lifi lika za butokwa mwa bupilo bwa luna?—Mu bale 2 Makorinte 5:14, 15.

16, 17. Bakreste ba mikulwani ni ba ba si na hahulu buikalabelo ba kona ku singanyeka ku ezañi?

¹⁶ Kana mu Mukreste wa mwanana ya felize sikolo kamba ya tuha a feza? Haiba ki cwalo, mwendi ha mu si ka ba kale ni buikalabelo bwa ku uta lubasi. Kacwalo, mu lela ku ezañi mwa bupilo bwa mina? Ki lifi likatulo ze mu tokwa ku eza kuli mu taleleze sepiso ye ne mu ezize ya kuli mu ka eza tato ya Jehova? Ba bañata ba keni mwa sebelezo ya bupaina, mi ba bile ni tabo ye tuna ka ku eza cwalo.—Samu 110:3; Muek. 12:1.

¹⁷ Mwendi mu mitangana kamba mu likalibe. Mwendi mwa beleka kono ha mu na buikalabelo bo butuna mwa bupilo. Ku si na ku kakanya, mu ikolanga ku eza misebezi ya puteho ku likana ni nako ye mu na ni yona. Kana ne mu ka tabela ku ekeza kwa tabo ya mina? Kana mwa nahananga za ku yandulula bukombwa bwa mina? (Samu 34:8; Liprov. 10:22) Mwa libaka ze ñwi, ku sa na ni musebezi o mutuna wa ku eza kuli taba ye nde ye pilisa i kutazwe ku mañi ni mañi. Kana mwa kona ku eza licinceho mwa bupilo bwa mina ilikuli mwendi mu yo sebeleza ko ku tokwahala hahulu bashaeli ba Mubuso?—Mu bale 1 Timotea 6:6-8.

18. Ki lifi licinceho za na ezize muzwale yo muñwi ni musal’a hae, mi ku zwileñi mwateñi?

¹⁸ Ha lu nyakisiseñi ze ne ba ezize bo Kevin ni bo Elena ba kwa naha ya United States. * Ha ne ba sa zo nyalana, ne ba ikutwile kuli ne ba swanela ku leka ndu, ili nto ye ezwanga habo bona. Kaufel’a bona ne ba beleka mi ne ba ca  kobe ka muutwa. Kono bakeñisa ku patehiswa ki mibeleko ya bona ni misebezi ya fa lapa, ne ba si na hande nako ya ku zwelanga mwa simu. Ne ba fitile fa ku lemuha kuli ne ba sinyeza nako ni m’ata a bona kaufela kwa ku ikubukanyeza fela maluo. Kono ha ne ba boni mupilelo o bunolo ni tabo ya muzwale yo muñwi ni musal’a hae ba ne ba li mapaina, bo Kevin ni bo Elena ne ba ikatulezi ku cinca mupilelo wa bona. Ba lapela ku Jehova ku kupa ketelelo mi ba lekisa ndu ya bona ni ku tutela ku ye nyinyani. Bo Elena ba iketela ku sa belekanga hahulu mi ba ba mapaina. Bo Kevin ha ba bona bo Elena mo ne ba sweli ku ikolela bukombwa, ba tuhela musebezi mi ba kalisa bupaina. Hamulaho, bo Kevin ni bo Elena ba tutela kwa naha ye ñwi ya kwa South America ko ne ku tokwahala hahulu bakutazi ba Mubuso. Bo Kevin ba li: “Lu bile ni tabo kamita, kono ka ku eza lika ze ñata za kwa moya, tabo ya luna i ekezehile hahulu.”—Mu bale Mateu 6:19-22.

19, 20. Ki kabakalañi musebezi wa ku kutaza taba ye nde ha u li musebezi wa butokwa ka ku fitisisa kacenu?

¹⁹ Musebezi wa ku kutaza taba ye nde ki wona musebezi wa butokwa ka ku fitisisa o sweli ku eziwa mwa lifasi kacenu. (Sin. 14:6, 7) Musebezi wo u tusa ku bonisa kuli libizo la Jehova ki le li kenile. (Mat. 6:9) Lushango lwa Bibele lu tusa batu ba bañata ba ba lu amuhela silimo ni silimo kuli ba be batu ba bande mi hape lu ba libisa kwa puluso. Niteñi, muapositola Paulusi na buzize puzo ye li: “Ba ka utwa cwañi, mubuleli h’a li siyo?” (Maro. 10:14, 15) Ki niti, ba ka utwa cwañi? Kacwalo neikaba hande ku eza ka mo lu konela kaufela kuli lu pete bukombwa bwa luna.

²⁰ Nzila ye ñwi ye mu kona ku tusa ka yona batu kuli ba utwisise linako ze t’ata ze lu pila ku zona ni kuli ba zibe ze ba ka kutula ka likezo za bona ki ka ku ituta ku luta ka bukwala. Mwa taba ye tatama lu ka ituta mo mu kona ku ezeza cwalo.

[Litaluso za kwatasi]

Mu Kona ku Alaba Cwañi?

• Ki ufi musebezi wo ba na ni ona Bakreste kwa neku la batu?

• Lu swanela ku tiyela cwañi litiko mwa musebezi wa luna wa ku kutaza?

• Lu kona ku peta cwañi bukombwa bo lu amuhezi?

[Lipuzo za Tuto]

[Siswaniso se si fa likepe 5]

Lu tokwa ku ba ni bundume kuli lu kutaze niha lu lwaniswa

[Siswaniso se si fa likepe 7]

Mu kona ku ezañi haiba batu ha ba fumanehi fa mandu mwa kalulo mo mu kutalezanga?