Ne Ba Fumani Tabo mwa Bupilo bwa Bona—Mina Bo?

MARC, muzwale ya pila mwa Canada na beleka kwa kampani ye panga mishini ye itusiswa mwa mbyumbyulu. Na belekanga lihora li sikai mi na sebeza sina paina wa kamita. Cwale, mubelekisi wa hae a bata ku mu hulisa fa musebezi kuli a belekange lihora ze ñata ilikuli a holange mali a mañata. Muzwale Marc na ezize cwañi?

Amy, kaizeli wa kwa Philippines na sebeza sina paina wa kamita ka nako ya na feza sikolo. Ha na felize sikolo, a fumana musebezi o no mu cela hahulu nako ya hae kono ili o no mu fumanisa mali a mañata hahulu. Ki sikamañi sa na ezize kaizeli Amy?

Bo Marc ni bo Amy ne ba ezize likatulo ze shutana, mi ze ne zwile mwa likatulo za bona li bonisa buniti bwa kelezo ye kile ya fiwa Bakreste ba kwa Korinte. Muapositola Paulusi na ba ñolezi kuli: “Ba ba . . . itusisa ka za lifasi le, ba be inge ha ba itusisi ka zona.”—1 Makor. 7:29-31.

Mu Si Itusisi Hahulu za Lifasi

Pili lu si ka nyakisisa kale ze ne ba ezize bo Marc ni bo Amy, ha lu nyakisiseñi ka bukuswani se li talusa linzwi la “lifasi” (ili koʹsmos mwa Sigerike) la na itusisize Paulusi mwa liñolo la hae ku ba kwa Korinte. Linzwi la koʹsmos le li itusisizwe kwa 1 Makorinte 7:29-31 li talusa muinelo wa lifasi o lu pila ku ona mi li kopanyeleza ni lika ze tokwahala ka zazi ni zazi ze cwale ka makundamo, lico ni liapalo. Kuli lu fumane lika ze cwalo, buñata bwa luna lu  tokwa ku fumana mubeleko. Kaniti, lu tamehile ku itusisa za lifasi kuli lu kone ku peta buikalabelo bwa luna bwa ka Mañolo bwa ku ipabalela ni ku babalela mabasi a luna. (1 Tim. 5:8) Kono hape lwa ziba hande kuli “lifasi la fela.” (1 Joa. 2:17) Kacwalo, lwa itusisa za lifasi kono ha lu swaneli ku itusisa hahulu zona.—1 Makor. 7:31.

Kelezo yeo ya Bibele ya ku sa itusisa hahulu za lifasi i tusize mizwale ni likaizeli ba bañata ku tatuba miinelo ya bona, ku kupa kuli ba belekange ka lihora li sikai, ni ku nolofaza mipilelo ya bona. Ha se ba ezize cwalo, ne ba tilo lemuha kuli ne ba ezize lika za butokwa mwa bupilo kakuli ne se ba na ni nako ye ñata ya ku tolanga ni mabasi a bona ni ya ku sebeleza Jehova. Hape, ku nolofaza mupilelo wa bona ku ba tusize ku sa itinga hahulu ku za lifasi kono ba itingile hahulu ku Jehova. Mina bo, kana mwa kona ku nolofaza mupilelo wa mina kuli mu kone ku tanda nako ye ñata mwa ku zwisezapili Mubuso wa Mulimu?—Mat. 6:19-24, 33.

“Se Lu Ikutwa Hahulu ku Ba Bukaufi ni Jehova”

Bo Marc ba ba bulezwi kwa makalelo, ne ba utwile kelezo ya Bibele ya ku sa itusisa hahulu za lifasi. Ne ba hanile ku huliswa fa musebezi o no ka ba fumanisa mali a mañata. Hamulaho wa mazazinyana, mubelekisi wa bo Marc a ba sepisa kuli na ka ba holisanga mali a mañata hahulu, ilikuli ba kone ku amuhela musebezi o munca wo. Bo Marc ba li: “Ne li muliko, kono niteñi ne ni hanile.” Ba talusa libaka le ne ba hanezi, ba li: “Na ni musala ka Paula, ne lu bata ku sebeleza Jehova ka mo ne lu konela kaufela. Kacwalo ne lu ikatulezi ku nolofaza mupilelo wa luna. Ne lu lapezi ku Jehova kuli a lu tuse ku fita fa sikonkwani se ne lu itomezi, mi lwa toma lizazi la ku kalisa ku sebeleza hahulu Jehova.”

Bo Paula ba bulela kuli: “Ne ni sebezanga mazazi a malalu mwa sunda sina muñoli wa fa sipatela mi ne ni fumana mali a likani. Hape ne ni sebeza sina paina wa kamita. Kono sina bo Marc, ne ni bata ku yo sebeleza Jehova kwa sibaka sifi kamba sifi ko ne ku tokwahala hahulu bashaeli ba Mubuso. Niteñi, ha ne ni fitisize liñolo la ku tuhela musebezi, mubelekisi wa ka a ni taluseza kuli mane ne ni swanela ku ba muñoli yo mutuna ya na tokwahala. Kwa misebezi ya buñoli mwa sipatela, wo ne li ona musebezi wa mali a mañata, kono na kumalela katulo ya ka ya ku tuhela musebezi. Ha ne ni taluselize mubelekisi wa ka libaka ha ne ni si ka ñola liñolo la ku kupa musebezi wo, a ni babaza kabakala tumelo ya ka.”

Hamulaho wa nakonyana, bo Marc ni bo Paula ba amuhela tohonolo ya ku yo sebeza sina mapaina ba ba ipitezi mwa puteho ye nyinyani ye kwa kalulo ya kwahule mwa Canada. Ne ku zwileñi ha ne ba tutezi kwa puteho yeo? Bo Marc ba li: “Hamulaho wa ku tuhela musebezi wa mali a mañata o ne ni ezize ka lilimo ze ñata, ne ni ikalezwi mo ne ni ka pilela kwapili, kono Jehova na fuyauzi bukombwa bwa luna. Lu ikutwa ku ba ni tabo ye tuna ye zwa mwa ku tusa batu ba bañwi kuli ba sebeleze Mulimu. Bupaina hape bu tiisize linyalo la luna. Ze lu ambolanga li tomanga fa lika za butokwa hahulu  ze ama sebelezo ya luna ku Jehova. Se lu ikutwa hahulu ku ba bukaufi ni Jehova.” (Lik. 20:35) Bo Paula ba ekeza kuli: “Mutu ha tuhela musebezi ni ku zwa mwa sibaka sa twaezi, u swanela ku sepa Jehova ka ku tala. Ne lu sepile Jehova ka ku tala, mi na lu fuyauzi. Mizwale ni likaizeli ba mwa puteho ya luna ye nca ba lu bonisanga kuli ba lu lata. Cwale se ni itusisa m’ata e ne ni itusisanga kwa mubeleko wa ka kuli ni tuse batu ku ziba Mulimu. Ni ya tabile hahulu ku sebeza musebezi wo.”

‘Ne Ni Na ni Mali a Mañata, Kono Ne Ni Si Na Tabo’

Bo Amy be se lu bulezi kale, ne ba ketile nzila i sili. Bona ne ba lumezi ku kena musebezi wa ku hola mali a mañata hahulu. Bo Amy ba li: “Mwa silimo sa makalelo, ne ni cisehezi hahulu mwa bukombwa kono nako ha ne inze i ya, na isa hahulu pilu ku za musebezi ku fita za Mubuso. Ne ni amuhelanga matohonolo a ku huliswa fa musebezi mi ne ni kalile ku beleka ka t’ata kuli ni zwelepili ku huliswa fa musebezi. Buikalabelo bwa ka kwa musebezi ha ne bu nze bu ekezeha, nako ye ne ni tandanga mwa bukombwa ne inze i zwelapili ku kusufala. Mi mafelelezo na tuhela ku kutaza.”

Ha ba iheta, bo Amy ba li: “Ne ni na ni mali a mañata luli. Ne ni tamanga misipili ye miñata mi ne ni bubana kabakala musebezi wa ka. Kono ne ni si na tabo. Nihaike ne ni na ni mali a mañata, matata ni ona ne li a mañata. Ne ni komokanga se ne si tisa kuli ku be cwalo. Mi cwale se ni to lemuha kuli ku ndongwama misebezi ya lifasi ku batile ku ni ‘keluhisa tumelo.’ Mi sina fela mo li bulelela Linzwi la Mulimu, ze ne ni kutuzi ne li fela ‘manyando a mañata.’”—1 Tim. 6:10.

Bo Amy ne ba ezizeñi? Ba li: “Ne ni kupile maeluda kuli ba ni tuse kwa moya mi na kala ku fumanehanga kwa mikopano. Pina ha ne i opelwa, na kala ku lila. Ne ni hupuzi tabo ye ne ni na ni yona ka lilimo ze ketalizoho ze ne ni sebelize sina paina, nihaike ka nako yeo ne ni li mubotana. Na lemuha kuli ni swanela ku tuhela ku sinyeza nako kwa ku bata mali mi na kalisa ku beya za Mubuso mwa sibaka sa pili. Na ikupela ku zwa fa situlo sa ka kuli ni fiwe musebezi wa mali a manyinyani, mi na kalisa hape ku abana mwa musebezi wa ku kutaza.” Bo Amy ba bulela ka tabo kuli: “Ne ni li ya tabile ku sebeza sina paina ka lilimonyana. Cwale se ni na ni tabo ye tuna ku fita ye ne ni na ni yona ha ne ni belekela lifasi.”

Kana mwa kona ku cinca miinelo ya mina ni ku nolofaza mupilelo wa mina? Haiba mu eza cwalo ni mina mu ka fumana tabo mwa bupilo bwa mina.—Liprov. 10:22.

[Manzwi a fa likepe 19]

Kana mwa kona ku cinca miinelo ya mina ni ku nolofaza mupilelo wa mina?

[Mbokisi/Siswaniso se si fa likepe 19]

“Ki Kale Ni Bu Tabela!”

Bo David ba ba li maeluda ba Sikreste kwa United States, ne ba itakaleza ku eza bupaina hamoho ni basali ba bona ni bana ba bona. Ba ikupela kwa kampani ko ne ba beleka kuli ba sebezange lihora li sikai, mi ba kala ku sebeza sina paina wa kamita. Kana cinceho ye ne ba ezize ne i ba tusize ku pila bupilo bwa tabo? Hamulaho wa likwelinyana, bo David ne ba ñolezi balikani ba bona kuli: “Ha ku na nto ye tabisa hahulu ku fita ku sebeleza Jehova hamoho ni lubasi. Ne ni nahana kuli ne ku ka ni ngela nako kuli ni twaele bupaina, kono ki kale ni bu tabela! Bupaina bwa tabisa luli.”

[Siswaniso se si fa likepe 18]

Bo Marc ni bo Paula inze ba li mwa bukombwa