Mu Likanyise Mulumiwa Yo Mutuna ku Feleleza
Mu Likanyise Mulumiwa Yo Mutuna ku Feleleza
“Mu be ba ba ni likanyisa, sina na, ha ni li ya likanyisa Kreste.”—1 MAKOR. 11:1.
1. Ki kabakalañi ha lu swanela ku likanyisa Jesu Kreste?
MUAPOSITOLA PAULUSI na likanyisa Mulumiwa yo mutuna ku feleleza, Jesu Kreste. Paulusi hape na elelize Bakreste ka yena kuli: “Mu be ba ba ni likanyisa, sina na, ha ni li ya likanyisa Kreste.” (1 Makor. 11:1) Jesu a man’o tomela baapositola ba hae mutala wa buikokobezo ka ku ba tapisa kwa mahutu, a ba taluseza kuli: “Ni mi ezelize mutala, kuli mu eze mo ni mi ezelize.” (Joa. 13:12-15) Ni luna Bakreste ba kacenu, lu na ni buikalabelo bwa ku likanyisa Jesu Kreste ka manzwi ni likezo za luna ni ka tulemeno to lu bonisa mwa bupilo.—1 Pit. 2:21.
2. Nihaikaba kuli ha mu si ka ketiwa ku ba mulumiwa ki Sitopa Se Si Etelela, ki moya mañi o mu kona ku bonisa?
2 Mwa taba ye felile ne lu itutile kuli mulumiwa ki mutu ya lumilwe ku yo kutaza Evangeli—ya iseza ba bañwi taba ye nde. Paulusi na buzize lipuzo ze nde ka za taba yeo. (Mu bale Maroma 10:11-15.) Mu hupule kuli muapositola Paulusi na buzize kuli: “Ba ka utwa cwañi, mubuleli h’a li siyo?” Kihona a bulela manzwi a mwa bupolofita bwa Isaya, a li: “Ki a mande hahulu mautu a ba ba tisa Evangeli ya . . . litaba ze nde.” (Isa. 52:7) Nihaikaba kuli ha mu si ka ketiwa ni ku lumiwa sina mulumiwa kwa naha ye ñwi, mwa kona ku bonisa moya wa bubuleli bwa Evangeli, ka ku likanyisa Jesu ka ku tukufalelwa ku shaela taba ye nde. Ñohola, bakutazi ba Mubuso ba 6,957,852 ne ba ‘ezize musebezi wa mubuleli wa Evangeli’ mwa linaha ze 236.—2 Tim. 4:5.
“Lu Tuhezi Linto Kaufela mi Lu ku Latelezi”
3, 4. Jesu na tobohileñi kwa lihalimu, mi lu tokwa ku ezañi kuli lu mu latelele?
3 Kuli a feze musebezi wa na lumilwe ku to eza fa lifasi, Jesu “a itoboha ku s’a n’a li sona, ka ku nga sibupeho sa mutanga,” ili ku siya bupilo ni kanya za na na ni zona kwa lihalimu. (Mafil. 2:7) Ze lu ka eza kaufela kuli lu likanyise Kreste ha li koni ku bapanywa ku za na itobohile Jesu ha na tile fa lifasi. Kono lwa kona ku itiisa ku mu latelela, ka ku sa ikumbuta ze ne lu na ni mwa lifasi la Satani.—1 Joa. 5:19.
4 Ka nako ye ñwi, muapositola Pitrosi na bulelezi Jesu kuli: “A ku bone, luna lu tuhezi linto kaufela mi lu ku latelezi.” (Mat. 19:27) Bo Pitrosi, Andreasi, Jakobo, ni Joani ne ba tuhezi tunyandi twa bona kapili-pili Jesu ha na ba bizize kuli ba mu latelele. Ba siya musebezi wa bona wa ku yamba ni ku kala fela ku kutaza. Ka ku ya ka likande la mwa Evangeli ya Luka, Pitrosi na ize: “Bona, lu tuhezi za luna, mi lu ku latelezi.” (Luka 18:28) Buñata bwa luna ne lu si ka tokwa ku tuhela “za luna” kaufela kuli lu latelele Jesu. Kono ne lu tokwa ku “itoboha” ilikuli lu latelele Kreste ni ku sebeleza Jehova ka lipilu za luna kaufela. (Mat. 16:24) Mupilelo wo u lu fumanisize limbuyoti ze tuna. (Mu bale Mateu 19:29.) Moya wa ku tukufalelwa ku bulela Evangeli ka ku likanyisa Kreste u tisa tabo mwa lipilu za luna, sihulu haiba ne lu tusize kwateñi mutu yo muñwi nihaiba fela hanyinyani kuli a sutelele ku Mulimu ni Mwan’a hae ya latwa.
5. Mu kandeke taba ye ne ezahezi ye bonisa za kona ku eza muzwahule a man’o ituta niti ya mwa Bibele.
5 Valmir, munna ya zwa kwa Brazil ya pila mwa Suriname, na li mulafi wa gauda. Na kombelezwi ki bucwala hape na li muitamaeli. Ka nako ye ñwi ha na li mwa tolopo ye ñwi Lipaki za Jehova za kala ku ituta ni yena Bibele. Na ituta zazi ni zazi, a eza licinceho, mi kapili-pili a kolobezwa. Ha na lemuhile kuli musebezi wa na eza ne u mu palelwisa ku pila ka nzila ye lumelelana ni tumelo ya na sa zo fumana, Valmir a lekisa pisinisi ya hae ye ne mu ocolisa mali a mañata mi a kutela kwa Brazil habo yena kuli a yo tusa lubasi lwa hae ku fumana bufumu bwa kwa moya. Bazwahule ba bañata ha ba itutanga niti ya mwa Bibele ba ikatulelanga ku siya misebezi ya bona mwa linaha ze fumile ni ku kutela kwa linaha za habo bona ka mulelo wa ku yo tusa mabasi a habo bona ni batu ba bañwi kwa moya. Bakutazi ba Mubuso ba ba cwalo ba bonisa moya luli wa ku tukufalelwa ku bulela Evangeli.
6. Lu kona ku ezañi haiba luna ha lu koni ku tutela ko ku tokwahala hahulu bakutazi ba Mubuso?
6 Lipaki ba bañwi ba konile ku tutela kwa libaka ko ku tokwahala hahulu bakutazi ba Mubuso. Ba bañwi mane ba yo sebelezanga kwa linaha li sili. Mwendi luna kwateñi ha lu koni ku tuta kono lwa kona ku likanyisa Jesu ka ku eza ka mo lu konela kaufela mwa bukombwa kamita.
Jehova U Fa Tuto Ye Tokwahala
7. Ki likolo mañi ze li teñi ze lukiselizwe ku luta ba ba bata ku shemuna bukwala bwa bona bwa ku shaela Mubuso?
7 Sina Jesu mwa na lutezwi ki Ndat’ahe ni luna lwa kona ku itusisa lituto za sweli ku fa Jehova ka nako ya cwale. Jesu yena ka sibili na ize: “Mwa Bapolofita ku ñozwi kuli: Kamukana ba ka lutwa ki Mulimu.” (Joa. 6:45; Isa. 54:13) Kacenu le ku na ni likolo ze lukiselizwe ku tusa luna ka ku ba bakutazi ba Mubuso. Ku si na ku kakanya kaufela luna lu tusizwe ka nzila ye ñwi ki Sikolo sa Bukombwa sa Teokratiki mwa liputeho za habo luna. Mapaina ba na ni tohonolo ya ku kena mwa Sikolo sa Sebelezo ya Bupaina. Mapaina ba bañwi ba nako ye telele ba bile ni tohonolo ya ku kena lwa bubeli mwa sikolo seo. Maeluda ni batanga ba bukombwa ba keni mwa Sikolo sa Bukombwa bwa Mubuso kuli ba shemune bukwala bwa bona bwa ku luta ni ku peta hande sebelezo ya bona ye ba ezeza balumeli ka bona. Maeluda ni batanga ba bukombwa ba makwasha ba bañata ba keni mwa Sikolo sa Tuto ya Bukombwa se si ba luta hande mwa ku tuseza ba bañwi mwa musebezi wa ku kutaza. Mi mizwale ni likaizeli ba bañata ba ba lumilwe sina balumiwa kwa linaha li sili ba lutilwe mwa Sikolo sa Giliadi sa Bibele.
8. Mizwale ba bañwi ba itebuha cwañi tohonolo ya tuto ye fiwa ki Jehova?
8 Lipaki za Jehova ze ñata li ezize licinceho ze fitana-fitana kuli li kone ku kena mwa likolo ze. Kuli bo Yugu ba kwa Canada ba kene mwa Sikolo sa Tuto ya Bukombwa ne ba tuhezi musebezi kakuli babelekisi ba bona ne ba ba timile sibaka. Bo Yugu ba li: “Ha ni inyazi. Kakuli mane ha ne ba ka ni shemuba ka ku ni fa sibaka, ne ba ka swana ba libelela kuli ni ka bonisa buitebuho ka ku inelela mwa kampani ya bona. Kono cwale fa ni lukuluhile ku amuhela musebezi kaufela o ni sa kona ku fiwa ki Jehova.” Ba bañata ba itombozi lika ze ne ba nga ka butokwa ilikuli ba itusise kolo ye kwaluhile ya ku lutiwa ki Mulimu.—Luka 5:28.
9. Mu fe mutala o bonisa bunde bwa ku amuhela tuto ya Jehova ni ku eza buikatazo bo butuna ka butu?
9 Batu ba ezanga zwelopili ye tuna haiba ba amuhela tuto ye fiwa ki Jehova ni ku eza buikatazo bo butuna ka butu. (2 Tim. 3:16, 17) Mu nyakisise mutala wa ze ne ezahalile ku Saulo wa kwa Guatemala. Saulo na pepilwe ni kailwana, mi yo muñwi wa baluti ba hae a taluseza bom’ahe kuli ha ba swaneli ku mu hapeleza ku ituta ku bala, kakuli kuti ku eza cwalo ne ku ta mu zwafisa fela. Kabakaleo Saulo a tuhela sikolo a si ka ziba ku bala. Kono cwale Paki yo muñwi a luta Saulo ku bala ka ku itusisa broshuwa ya Mu Itute ku Bala ni ku Ñola. Ku kumbuluka, Saulo a kala ku eza hande hahulu kuli mane a kala ku fanga lingambolo mwa Sikolo sa Bukombwa sa Teokratiki. Nako ye ñwi bom’ahe Saulo ha ne ba kutaza fa ndu ni ndu ba katanana ni bo muluti wa Saulo. Bo muluti ha ba utwa kuli Saulo u itutile ku bala, ba kupa bom’ahe kuli ba tahe ni yena sunda ye ne tatama. Sunda yeo ha i fitile, bom’ahe Saulo ba ya ni yena kwa ndu ya bo muluti mi ba mu buza kuli: “Ki lika mañi ze u bata ku ni luta?” Saulo a kalisa ku bala paragilafu ye ñwi mwa buka ya Bibele I Lutañi Luli? Bo muluti ba li: “Ha ni utwisisi kuli luli ki wena ya sa ni luta la kacenu le.” Kiha ba lotisa mioko ni ku kumbata Saulo kabakala tabo.
Mulutelo O Fita Batu kwa Lipilu
10. Ki siitusiso mañi se lu na ni sa ku itusisa kwa ku luta batu niti ya mwa Bibele?
10 Jesu na luta batu ku likana fela ni mwa na mu lutezi Jehova ni ka litaelo ze mwa Linzwi la Mulimu le li ñozwi. (Luka 4:16-21; Joa. 8:28) Lu likanyisa Jesu ka ku latelela likelezo za hae ni ku kumalela kwa Mañolo. Kabakaleo kaufela luna lu bulela ni ku nahana ka nzila ye swana, mi seo si lu tusa ku swalisana hamoho. (1 Makor. 1:10) Lu itebuha hahulu kuli “mutanga ya sepahala, ya na ni kutwisiso” u lukisa libuka ze tomile fa Bibele kuli lu swalisane mwa mulutelo wa luna ni ku peta musebezi wa luna wa ku bulela Evangeli! (Mat. 24:45; 28:19, 20) Ye ñwi ya libuka zeo ki buka ya Bibele I Lutañi?, ye se fumaneha mwa lipuo ze 179.
11. Kaizeli yo muñwi kwa Ethiopia na tulile cwañi twaniso ka ku itusisa buka ya Bibele I Lutañi?
11 Ku ituta Mañolo ka ku itusisa buka ya Bibele I Lutañi? mane ku kona ku cinca lipilu za balwanisi. Ka nako ye ñwi, kaizeli wa paina ya bizwa Lula, wa kwa Ethiopia, ha na sweli ku zamaisa tuto ya Bibele, mwanahabo muituti a to hanyauka maswe ni ku bulela kuli ne ku si na tuso ya ku ituta Bibele ka nzila yeo. Bo Lula ba ambolisana ni yena musali yo ka musa, ka ku itusisa swanisezo ya masheleñi a buhata ye mwa kauhanyo 15 ya buka ya Bibele I Lutañi? Musali yo a ombala ni ku ba lumeleza ku zwelapili ni tuto ya bona. Mane yena musali yo a fumaneha fa tuto ye ne tatami mi a ikupela ku zamaisezwa tuto ya hae, mane ni ku sepisa kuli u ka lifela tuto yeo! Ne ku si ka fita nako a kala ku itutanga halalu mwa sunda mi a eza zwelopili ye nde ya kwa moya.
12. Mu fe mutala o bonisa ba banca mo ba kona ku lutela ba bañwi niti ya mwa Bibele hande?
12 Ba banca ni bona b’a kona ku tusa ba bañwi ka ku itusisa buka ya Bibele I Lutañi? Keanu, wa lilimo ze 11, ha na sweli ku bala buka yeo kwa sikolo, yo muñwi wa ba kena ni bona sikolo a mu buza kuli: “Ki kabakalañi ha mu sa ezangi mikiti ya mazazi a pumulo?” Keanu a mu balela kalabo ka mo i ñolezwi mwa buka ya Bibele I Lutañi? mwatas’a taba ye ekelizwe ye bulela kuli “Kana Lwa Swanela ku Ikenya mwa Mikiti ya Mazazi a Pumulo?” Kihona cwale a bonisa mwan’a sikolo yo linaneho ni ku mu kupa kuli a kete toho ya taba ya tabela hahulu. Mi tuto ya Bibele ya kaliswa. Lipaki za Jehova ñohola li zamaisize lituto za Bibele ze 6,561,426, mi buñata bwa zona ne li itusisize buka ya Bibele I Lutañi? Kana mwa itusisa buka yeo kwa ku zamaisa lituto za Bibele?
13. Ku ituta Bibele ku kona ku tusa cwañi batu?
13 Ku ituta Mañolo ka ku itusisa buka ya Bibele I Lutañi? ku kona ku tusa ba ba tabela ku eza tato ya Mulimu. Mapaina ba ba ipitezi ba babeli kwa Norway, ba ba nyalani, ne ba kalisize tuto ya Bibele ni lubasi lo luñwi lo lu zwa kwanu kwa Zambia. Bo mutu ni musal’a hae bao ba ba zwa kwanu kwa Zambia ne ba na ni bana ba basizana ba balalu mi ne ba sa tokwi mwana yo muñwi. Kacwalo wa musali ha na itwezi ba ikatulela ku yo zwisa mba yeo. Ha ne ku siyezi mazazi a sikai fela kuli ba yo bonana ni dokota se ba ituta kauhanyo ye bulela kuli “Mubonelo wa Sikreste wa Bupilo.” Siswaniso sa mbututu ye mwa mba se si mwa kauhanyo yeo sa fita kwa lipilu za bo mutu ni musal’a hae bao mi ba cinca mulelo wa bona wa ku yo zwisa mulwalo wo. Ba zwelapili ku eza hande kwa moya mi mwan’a bona yo ha pepiwa ba mu beya libizo la muzwale wa paki yo ye ba ituta ni yena.
14. Mu fe mutala o bonisa bunde bwa ku pila ka lituto za luna.
14 Mulutelo o muñwi wa butokwa wa na itusisa Jesu ne li wa ku pila ka lituto za na luta batu. Batu ba bañata ba fitanga fa ku tabela muzamao o munde wa Lipaki za Jehova, ze likanyisa Jesu ka ku pila ka lituto za zona. Kwa New Zealand ku na ni masholi ba ne ba keni mwa mota ya munna yo muñwi wa lipisinisi ni ku uzwa mukotana wa hae wa libuka. Munna yo a biha taba yeo kwa mapokola, mi mupokola a mu bulelela kuli: “Mu itobohe fela kwateñi, konji haiba u fumanwa ki yo muñwi wa Lipaki za Jehova.” Paki yo muñwi ya na isa mitende kwa bañi ba yona a fumana mukotana wo. Munna yo ha utwile cwalo a ya kwa ndu ya kaizeli yo ya na fumani mukotana wa hae. Na tabile hahulu ku fumana kuli pampili ye ñwi ya na ikalezwi hahulu kuli mwendi i yelezi ne i li teñi mwa mukotana. Kaizeli yo a mu taluseza kuli: “Ne ku si na mo kuñwi mwa ku ezeza kwand’a ku ku kutiseza mukotana wa hao, sihulu kakuli na ni yo muñwi wa Lipaki za Jehova.” Munna yo wa lipisinisi a komoka hahulu ha hupula manzwi a na taluselizwe ki mupokola lona lizazi leo kakusasana. Kwa iponahaza hande kuli Bakreste ba niti ba pila ka lituto za Bibele ni ka ku likanyisa Jesu.—Maheb. 13:18.
Mu Likanyise Moya wa Jesu kwa Batu
15, 16. Lu kona ku hohela cwañi batu kwa taba ye nde ye lu sweli ku kutaza?
15 Moya wa na bonisa Jesu kwa batu ne u tusize batu ku amuhela za na kutaza. Ka mutala, kabakala lilato ni buikokobezo bwa hae, batu ba ba shebile ne ba kona ku sutelela ku yena. Na bonisize mukekecima ku ba ne ba tile ku yena mi a ba omba-omba ka manzwi a mande, a folisa matuku a ba bañata. (Mu bale Mareka 2:1-5.) Luna ha lu koni ku eza limakazo kono lwa kona ku bonisa sishemo, buikokobezo, ni mukekecima—tona tulemeno to tu hohela batu kwa niti ya mwa Bibele.
16 Mukekecima ne u tusize paina ya ipitezi ya bizwa Tariua ha na li fa ndu ya munna wa musupali ya bizwa Beere ya pila ku se siñwi sa lioli za Kiribati kwa liwate la kwa mboela la Pacific. Nihaike kuli munna-muhulu yo na bonahalile ku sa tabela ku teeleza, Tariua a lemuha kuli mubili wa munna-muhulu yo ne u omelezi hanyinyani mi a mu utwela makeke. Tariua a mu buza kuli: “Kana mwa ziba ze i sepisa Bibele kwa bakuli ni basupali?” Kiha sa bala manzwi a mwa bupolofita bwa Isaya. (Mu bale Isaya 35:5, 6.) Munna-muhulu yo a komoka hahulu mi a li: “Ni balile Bibele ka lilimo ze ñata mi ni potezwi ki mulumiwa wa keleke ya hesu ka lilimo-limo, kono na li ku ba ni bone taba ye mwa Bibele.” Beere a amuhela tuto ya Bibele mi a eza zwelopili ye nde ya kwa moya. Ki niti ne li sihole, kono cwale u kolobelizwe, u tusa sikwata se si kwahule ni puteho, mi wa kona ku potoloha-potoloha mwa sooli kaufela a nz’a kutaza taba ye nde.
Mu Zwelepili ku Likanyisa Kreste
17, 18. (a) Mu kona ku ba cwañi mubuleli yo munde wa Evangeli? (b) Ku ka ba cwañi ku ba ba tukufalelwa bukombwa bwa bona?
17 Sina mo li kuta-kutela ku boniseza ze ezahala mwa bukombwa, lu kona ku ba babuleli ba bande ba Evangeli haiba lu hulisa ni ku bonisa tulemeno to ne tu bonisizwe ki Jesu. Kacwalo he kwa swanela kuli lu likanyise Kreste ka ku tukufalelwa ku bulela Evangeli!
18 Ba bañwi ha ne ba fetuhile ku ba balutiwa ba Jesu, Pitrosi na buzize kuli: “Ku ka ba cwañi ku luna?” Mi Jesu a mu alaba a li: “Mutu kaufela ya tuhezi mandu, kamba bahabo, kamba likaizeli, nihaiba ndat’ahe kamba m’ahe, kamba bana; kamba masimu, kabakala Libizo la ka, u ka amuhela hahulu ku fita, mi u ka ca sanda sa bupilo bo bu sa feli.” (Mat. 19:27-29) Ni luna ku ka ba cwalo ku luna haiba lu zwelapili ku likanyisa Mulumiwa yo mutuna ku feleleza, Jesu Kreste.
Mu Kona ku Alaba Cwañi?
• Jehova u lu luta cwañi ku ba babuleli ba Evangeli?
• Ki kabakalañi buka ya Bibele I Lutañi? ha i tusa hahulu mwa bukombwa bwa luna?
• Lu kona ku likanyisa cwañi moya wa Jesu kwa batu?
[Lipuzo za Tuto]
[Siswaniso se si fa likepe 17]
Jesu ha na bizize bo Pitrosi, Andreasi, Jakobo, ni Joani kuli ba mu latelele, ba mu latelela kapili-pili
[Siswaniso se si fa likepe 19]
Libuka ze cwale ka “Bibele I Lutañi?” li lu tusa ku zwelapili ku swalisana mwa mulutelo wa luna