Kana Mu Nga Ba Bañwi mwa Ba Ngela Jehova?

“Ku kauhana ku tokwahale mwa mubili . . . Lilama li babalelane.”—1 MAKOR. 12:25.

1. Ne mu ikutwile cwañi ha ne mu keni mwa paradaisi ya kwa moya?

HA NE lu zwile mwa lifasi le li maswe ni ku kala ku swalisana ni batu ba Jehova, mwendi ne lu tabile hahulu ku bona lilato le li mwahal’a Lipaki za Jehova. Batu ba Jehova ba shutanela kwahule ni batu ba ba zamaiswa ki Satani ba ba tezi sitoyo ni mifilifili! Ne lu keni mwa paradaisi ya kwa moya mo ku tezi kozo ni swalisano.—Isa. 48:17, 18; 60:18; 65:25.

2. (a) Ki sikamañi se si kona ku lu palelwisa ku nga ba bañwi hande? (b) Haiba ku cwalo, lu tokwa ku ezañi?

² Kono nako ha inze i ya, lu kana lwa kalisa ku ba ni mubonelo o fosahalile ka za mizwale ba luna kabakala ku sa petahala kwa luna. Ku sa petahala ku kona tahisa kuli lu kale ku tunafaza mafosisa a mizwale ba luna ku fita ku lemuha tulemeno twa bona to tu nde twa kwa moya. Fo kikuli, lu tuhela ku nga mizwale ba luna mwa ba ngela Jehova. Mi haiba ku ba cwalo, lu tokwa ku itekula kuli lu nge ba bañwi mwa ba ngela Jehova.—Ex. 33:13.

Jehova Mwa Ngela Mizwale Ba Luna

3. Bibele i bapanya puteho ya Sikreste kwa nto mañi?

³ Sina mo ku ñolezwi kwa 1 Makorinte 12: 2-26, muapositola Paulusi na bapanyize puteho ya Bakreste ba ba tozizwe kwa mubili o na ni “lilama ze ñata.” Sina fela lilama za mubili ha li shutana, mizwale mwa puteho ni bona ba na ni tulemeno ni buikoneli bo bu shutana. Kono mizwale bao kaufela ba amuhelwa ki Jehova. U lata mañi ni mañi. Kacwalo Paulusi ni yena u lu eleza kuli mizwale mwa puteho ba swanela ku ‘babalelana.’ Ku eza cwalo ku kona ku ba t’ata bakeñisa kuli ba bañwi ba na ni tulemeno to tu shutana ni twa luna.

4. Ki kabakalañi ha lu kana lwa tokwa ku cinca mo lu ngela mizwale ba luna?

⁴ Mwendi mane lwa kona ku hanelela ku landalala fela fa mifokolo ya mizwale ba luna. Ha lu eza cwalo, ku swana inge kuli lu talimela fela fa kalulonyana ya siswaniso kaufela. Kono Jehova yena u bona siswaniso kaufela. Lu kana lwa ndwandukela fela fa nto ye lu sa lati ku mutu, haili Jehova yena u bona mutu mwa inezi luli ku kopanyeleza ni tulemeno twa hae kaufela to tunde. Ha lu ka lika ka t’ata ku nga ba bañwi mwa ba ngela Jehova, lu ka tahisa kuli mwa puteho ku be ni lilato ni swalisano.—Maef. 4:1-3; 5:1, 2.

5. Ki kabakalañi ha lu sa swaneli ku nyaza ba bañwi?

⁵ Jesu na ziba hande kuli batu ba ba si ka petahala hañata ba na ni mukwa wa ku nyaza-nyaza ba bañwi. Na file kelezo ye li: “Mu si ke mwa nyaza, kuli mu si ke mwa nyazwa.” (Mat. 7:1) Mwa puo ya Sigerike, Jesu na si ka bulela kuli “mu si ke mwa nyaza,” kono na ize: “Mu tuhele ku nyaza.” Na ziba kuli buñata bwa bateelezi ba hae ne ba na ni mukwa wa ku nyaza-nyaza ba bañwi. Esi mwendi ni luna lu na ni mukwa wa ku nyaza-nyaza ba bañwi? Haiba ku cwalo, lu swanela ku cinca ilikuli lu si ke lwa nyaziwa hahulu. Kaniti luli, ha lu na tukelo ya ku nyaza mutu ya itusiswa ki Jehova kamba ku bulela kuli ha swaneli ku ba mwa puteho. Muzwale wa kona ku ba ni bufokoli bo buñwi cwalo, kono haiba Jehova u sa itusisa yena, kana ki hande kuli luna lu mu hane? (Joa. 6:44) Kana lwa lumela luli kuli Jehova ki yena ya etelela kopano ya hae ni kuli haiba ku tokwahala licinceho mwa kopano, u ka li eza ka nako ya hae?—Mu bale Maroma 14:1-4.

6. Jehova u nga cwañi batanga ba hae?

⁶ Jehova u ipitezi bakeñisa kuli u ziba Mukreste ni Mukreste mwa inezi luli mi u ziba ni mwa kona ku bela mutu muta a fita fa ku petahala mwa lifasi le linca. Hape wa ziba zwelopili ya kwa moya ya sa ezize mañi ni mañi ka ku itusisa lika za itutile mwa Bibele. Kacwalo Mulimu ha koni ku londoloza bufokoli kaufela bwa mutu bo bu tiswa ki ku sa petahala. Kwa Samu 103:12 lu bala kuli: “Upa sina mo i inezi kwahule ni Wiko, ni lifoso za luna, u li sutiseza kwahule cwalo.” Lu lukela ku itumela hahulu kwa taba yeo!—Samu 130:3.

7. Lu itutañi ka mo Jehova na ngezi Davida?

⁷ Mañolo a bonisa hande kuli Jehova u na ni buikoneli bwa ku bona lika ze nde za eza mutu. Mulimu na bizize Davida kuli “mutang’a ka Davida, ya ile ka milao ya ka, ya ni latelezi ka pilu ya hae kaufela, ku eza ze lukile  mwa meto a ka.” (1 Mal. 14:8) Kono lwa ziba kuli ne ku na ni lika ze ñwi za na ezize Davida ze ne fosahezi. Niteñi, Jehova na ketile ku talima fa lika ze nde za na ezize Davida kakuli na ziba kuli pilu ya Davida ne i lukile.—1 Makol. 29:17.

Mu Nge Mizwale Ba Mina Mwa Ba Ngela Jehova

8, 9. (a) Lu kona ku likanyisa cwañi Jehova? (b) Lu kona ku swaniseza cwañi taba yeo, mi ki lifi ze lu ituta?

⁸ Jehova wa kona ku bona ze mwa pilu ya mutu, kono luna ha lu koni. Kabakaleo ha lu swaneli ku nyaza-nyaza ba bañwi. Ha lu zibi milelo kaufela ye mwa pilu ya mutu yo muñwi. Lu swanela ku likanyisa Jehova ka ku sa landalala fa bufokoli bwa ba bañwi, ili bo bu kona ku fela hasamulaho. Kana ne ku si ke kwa ba hande ha ne lu ka itomela sikonkwani seo? Ku eza cwalo ku ka tisa kuli lu pilisane ka kozo ni mizwale ni likaizeli ba luna.—Maef. 4:23, 24.

⁹ Ka mutala, mu nahane ndu ye sinyehile, ye na ni situwa si bata ku fumpama ni mahaulo a pwacehile. Batu ba bañata ba kana ba bulela kuli neikaba hande ndu yeo ha ne i ka tubiwa bakeñisa kuli ha i bonahali hande. Kono mutu yo muñwi u kona ku hana muhupulo wa kuli ndu yeo i tubiwe. Yena ha na ku talima fela ponahalo ya fande ya ndu yeo kono u lemuha kuli ndu yeo i sa tiile mi ya kona ku lukiswa. U leka ndu yeo ni ku lukisa fo ku sinyehile, mi i kala ku bonahala hande. Hasamulaho, bo lifitanzila ba kala ku lumba ndu yeo. Kana lwa kona ku ba sina mutu yo ya lukisize sinca ndu yeo? Ku fita ku talima fela fa bufokoli bwa mizwale ba luna, kana lwa kona ku lemuha tulemeno twa bona to tunde ni zwelopili ya kwa moya ye ba kona ku eza? Ha lu eza cwalo, lu ka lata mizwale ba luna bakeñisa tulemeno twa bona twa kwa moya, sina mwa ba latela Jehova.—Mu bale Maheberu 6:10.

10. Kelezo ye kwa Mafilipi 2:3, 4 i kona ku lu tusa cwañi?

¹⁰ Muapositola Paulusi na file kelezo ye kona ku lu tusa ku sebelisana hande ni mizwale kaufela mwa puteho. Na susuelize Bakreste kuli: “Mu si ke mwa eza se siñwi ka kañi, kamba ka buipabazo kwa fela; kono ka buikokobezo mutu ni mutu a hupule kuli ba bañwi ba mu fita. Mutu mañi kamba mañi a si ke a tokomela za hae fela, kono a talime ni za ba bañwi.” (Mafil. 2:3, 4) Buikokobezo bu ka lu tusa ku nga ba bañwi hande. Ku iyakatwa ba bañwi ni ku talima fa lika ze nde ze ba eza ku ka lu tusa ku ba nga sina mwa ba ngela Jehova.

11. Lika ze sweli ku ezahala li amile cwañi liputeho ze ñwi?

¹¹ Mwa lilimo za cwanoñu fa, lika ze sweli ku ezahala mwa lifasi li tahiselize batu ba bañata hahulu ku tuta mwa libaka za bona. Mwa litolopo ze ñwi se ku yahile batu ba ba zwa mwa linaha ze shutana-shutana. Batu ba bañwi ba ba tutezi mwa libaka za luna ba tabezi niti ya mwa Bibele, mi se ba swalisana ni luna mwa ku lapela Jehova. Batu bao “ba zwa mwa macaba kaufela, ni mwa mishobo, ni mwa masika, ni mwa lipuo kaufela.” (Sin. 7:9) Kona libaka mwa liputeho ze ñata ha ku na ni batu ba ba zwa kwa linaha ze shutana-shutana.

12. Lu swanela ku nga cwañi batu ba bañwi, mi ki kabakalañi fokuñwi ha ku banga t’ata ku eza cwalo?

¹² Lu tokwa ku tokomela hahulu kuli lu nge ba bañwi hande mwa puteho. Kuli lu eze cwalo lu tokwa ku hupulanga kelezo ya muapositola Pitrosi ye li “mu latane ni banabahabo mina, mu si na buikeziso” ni kuli mu “latane hahulu, ka pilu ye sweu.” (1 Pit. 1:22) Ku bonisa lilato la niti mwa puteho ye na ni batu ba ba zwa kwa linaha ze shutana-shutana ku kona ku ba t’ata. Mizwale ba luna bao ba kona ku ba ni lizo ze shutana ni za luna, mi ku kona ku ba cwalo ni kwa tuto ya bona ya kwa sikolo ni sifumu se ba luwile. Kana ku mi belanga t’ata ku utwisisa mo ba nahanela ni mo ba ezeza lika? Mwendi ni bona ha ba mi utwisisangi. Niteñi, kaufela luna lu laelwa kuli: “Mu late banabahabo mina [kamukana, NW].”—1 Pit. 2:17.

13. Ki licinceho mañi ze lu tokwa ku eza ka mo lu nahanela?

 ¹³ Lu kana lwa tokwa ku cinca mo lu nahanela kuli lu atame ka ku bonisa hahulu lilato kwa mizwale ba luna kaufela. (Mu bale 2 Makorinte 6:12, 13.) Kana fokuñwi lwa bulelanga kuli “Haki kuli ni na saluluti, kono fela . . . ” mi kihona lu kala ku bulela lika ze maswe ka za batu ba lisimuluho ze ñwi? Haiba lu na ni maikuto a cwalo ki sisupo sa kuli lu sa na ni saluluti mi lu tokwa ku cinca. Lu kana lwa ipuza kuli, ‘Kana kamita na likanga ku zibana ni batu ba ba simuluha ku sili?’ Ku itatubanga hande cwalo ku ka lu tusa ku eza licinceho ilikuli lu late mizwale ba luna ba mwa lifasi kaufela.

14, 15. (a) Mu fe mitala ya batu ba ne ba cincize mibonelo ya bona ka mo ne ba ngela ba bañwi? (b) Lu kona ku ba likanyisa cwañi?

¹⁴ Mwa Bibele ku na ni mitala ye minde ya batu ba ne ba cincize mibonelo ya bona ka mo ne ba ngela batu ba bañwi, mi yo muñwi wa bona ne li muapositola Pitrosi. Ka ku ba Mujuda, Pitrosi na ka hana ku kena mwa ndu ya Mulicaba. Kono ha mu nahane mwa na ikutwezi ha na bulelezwi kuli a ye kwa ndu ya Kornele, Mulicaba ya na si ka ya kwa mupato! Pitrosi na ezize licinceho kakuli na utwisisize kuli ne li tato ya Mulimu kuli batu ba macaba kaufela ba be mwa puteho ya Sikreste. (Lik. 10:9-35) Saule, ya na til’o bizwa muapositola Paulusi, ni yena na ezize licinceho mi na tuhezi saluluti sa na na ni sona sapili. Na itumelezi kuli na toile hahulu Bakreste kuli mane na ‘nyandisize maswe Keleke ya Mulimu, ku i shandaula.’ Niteñi, Mulena Jesu ha na mu sikuluzi, Paulusi na ezize licinceho ze tuna mi mane a kala ku amuhela ketelelo ya batu ba na nyandisanga.—Magal. 1:13-20.

¹⁵ Ku si na kakanyo, ni luna lwa kona ku eza licinceho ka ku tusiwa ki moya wa Jehova. Haiba lu lemuha kuli lu sa na ni saluluti mwa lipilu za luna, lu lukela ku lika ka t’ata ku zwisa saluluti seo ni ku “buluka buñwi bwa moya ka tamo ya kozo.” (Maef. 4:3-6) Bibele i lu susueza kuli lu “apale lilato, kakuli ki tamo ye lu fa bupetehi.”—Makolo. 3:14.

Ku Likanyisa Jehova Ha Lu Li mwa Bukombwa

16. Tato ya Mulimu ka za batu ki ifi?

¹⁶ Muapositola Paulusi na ñozi kuli: “Ku Mulimu ha ku na sobozi.” (Maro. 2:11) Jehova u bata kuli batu ba ba zwa mwa macaba kamukana ba swalisane ku mu lapela. (Mu bale 1 Timotea 2:3, 4.) Kacwalo u lukisize kuli “Evangeli ya linako ze sa feli,” i bulelelwe ba “masika kamukana, ni mishobo, ni lipuo, ni macaba.”  (Sin. 14:6) Jesu na bulezi kuli: “Simu ki lifasi.” (Mat. 13:38) Taba yeo i mi ama cwañi ni lubasi lwa mina?

17. Lu kona ku tusa cwañi batu ba macaba kamukana?

¹⁷ Haki batu kaufela ba ba kona ku tutela kwa linaha li sili kuli ba yo taluseza batu ba bañwi lushango lwa Mubuso. Kono lwa kona ku kutaza kwa batu ba ba zwa kwa linaha kaufela za lifasi ba ba pila mwa kalulo ya luna ya simu. Kana lwa kutazanga kwa batu kaufela, ku fita ku kutazanga fela kwa batu ba ba swana ka lilimo-na-lilimo? Kana lwa kona ku ikatulela ku yo kutaza kwa batu ba ba si ka utwa kale taba ye nde?—Maro. 15:20, 21.

18. Jesu na bonisize cwañi kuli na iyakatwa batu?

¹⁸ Jesu na tabela hahulu ku tusa batu kaufela. Na si ka kutaleza fela mwa sibaka si li siñwi. Taba ye ñwi ya mwa Bibele i talusa kuli Jesu na “zamaya a potela minzi ni minzinyana.” Mi a mano “bona undi wa nyangela, a ba utwela butuku,” mi a ba tusa.—Mat. 9:35-37.

19, 20. Lu kona ku likanyisa cwañi Jehova ni Jesu mo ba ngela batu kaufela?

¹⁹ Lu kona ku bonisa ka linzila lifi moya o swana ni wa Jesu? Ba bañwi ba itatezi ku kutaleza mwa kalulo ya bona ya simu mo ku sa kutalezwangi hahulu. Likalulo zeo li kopanyeleza libaka za lipisinisi, li-parki, litishini ni libaka za miyaho mo ku sa konwi ku kutalezwa ka bunolo. Ba bañwi ba itutile puo ye ñwi kuli ba kone ku kutaza kwa batu ba ba bulela puo yeo ba ba pila mwa kalulo ya bona kamba kwa likwata za batu ba ba si ka kutazwa hahulu kwamulaho. Batu bao ba ka tabela hahulu ha mu ka ba lumelisa mwa puo ya bona mi ba ka ikutwa kuli mwa ba lata luli. Haiba ha lu koni ku ituta puo ye ñwi, kana lwa kona ku susueza ba ba eza cwalo? Kaniti, ha lu swaneli ku zwafisa kamba ku nyaza batu ba ba ituta puo ye ñwi kuli ba kutaze kwa batu ba ba zwa mwa naha i sili. Batu kaufela ki ba butokwa ku Mulimu, mi ni luna lu swanela ku ba nga cwalo.—Makolo. 3:10, 11.

²⁰ Ku nga batu mwa ba ngela Mulimu hape ku talusa kuli lu swanela ku kutaza kwa batu kaufela ku si na taba ni miinelo ya bona. Mwendi ba bañwi ba yambaela fela, ba bañwi ba bonahala busafa kamba mane ki ba mizamao ye maswe. Haiba batu ba bañwi ha ba lu ezi hande, ha lu swaneli ku nahana kuli batu ba mwa naha ko ba simuluha kamba ba mushobo wa bona kaufela kona mo ba inezi. Paulusi na si ka eziwa hande ki batu ba bañwi, kono seo ne si si ka mu palelwisa ku kutaza kwa batu ba mushobo wo. (Lik. 14:5-7, 19-22) Na na ni buikolwiso bwa kuli batu ba bañwi ku bona ne ba ka amuhela lushango lwa na kutaza.

21. Lu ka tusiwa cwañi haiba lu likanyisa Jehova mwa ngela batu?

²¹ Cwale lu iponezi hande kuli ku nga batu ba bañwi hande—sina mwa ba ngela Jehova—ki kwa butokwa hahulu ha lu nze lu sebelisana ni mizwale ba luna mwa puteho, mizwale ba mwa lifasi kaufela, ni batu be lu kutaza ku bona. Ha lu likanyisa hahulu Jehova mwa ngela batu, lu ka pilisana ka kozo ni batu bañwi mi lu ka swalisana hande ni bona. Mi hape lu ka tusa batu ba bañwi ku fita fa ku lata Jehova, Mulimu “ya sa yi ka sobozi” kono ya tabela batu kaufela “kakuli kaufel’a bona ki musebezi wa mazoho a hae.”—Jobo 34:19.

[Lipuzo za Tuto]

[Siswaniso se si fa likepe 26]

Mu kona ku zibana cwañi ni batu ba lisimuluho li sili?

[Maswaniso a fa likepe 28]

Mu kona ku kutaza cwañi kwa batu ba bañata?