Ku Kutaza Taba Ye Nde Mwa Malundu a Andes

SIKWATA sa luna sa batu ba 18 ne si inzi fafasi mwa ndu. Ne lu njanja silami mwa likubo za luna, mi bakeñisa pula ye ne suluha hahulu ne ku utwahala lilata le lituna fa masenge a situngu se ne lu li ku sona. Ne ku bonahala inge kuli ne li luna ba pili ku lobala mwa situngu seo bakeñisa mo ne si bonahalela mwahali.

Batu ba 18 kaufela kiñi ze ne ba yo bata kwa sibaka seo? Ne li bakeñisa takazo ya luna ya ku utwa taelo ya Jesu ya ku kutaza taba ye nde “ku isa kwa mafelelezo a lifasi.” (Lik. 1:8; Mat. 24:14) Ne lu ya kwa ku yo kutaza taba ye nde kwa sibaka sa kwahule hahulu sa mwa malundu a Andes a mwa naha ya Bolivia.

Ku Yo Fita Kwateñi Ne Ku Li T’ata

Musipili fela wa ku ya kwa sibaka seo ne li o t’ata luli. Ne lu taluselizwe kuli ne ku si na hande limota ze ne yanga kwa sibaka seo. Mbasi ya luna ha i punya lwa lemuha kuli ne li ye nyinyani mi ba bañwi ku luna ne ba na ni ku yema kabakala kuli ne lu sa kwani hande. Kono kaufela lwa yo fita ko ne lu ya.

Mulelo ne li kuli lu yo kutaza kwa batu ba ba pila mwa minzi ye mwa malundu a Andes mwa Bolivia. Kacwalo, ha se lu fitile, lwa lwala libyana za luna ni ku tama musipili inze lu zamaya mwa tunzila to tu fita kwatuko a malundu.

Nihaike kuli minzi ne i bonahala bunyinyani, mandu a mwateñi na shambaukani  hahulu, mi ne ku lu ngela lihora ze ñata ku kutaza mwa munzi ni munzi. Niha ne se lu zamaile musipili o mutelele ne ku sa bonahala ndu kwapili. Mi ne lu latehanga mwa mushitu kabakala tunzila to tu lyanganisa.

“Kiñi ha ne mu si ka taha kale lale?”

Musali yo muñwi na tabile hahulu ha bona musipili o ne lu zamaile kuli mane sa lu lumeleza ku tatehela lico za luna fa lapa la hae ka ku itusisa likota za hae. Hasamulaho wa ku ituta ze i luta Bibele ka za muinelo wa ba ba shwile, munna yo muñwi na buzize kuli, “Kiñi ha ne mu si ka taha kale lale?” N’a tabile hahulu kuli mane hamulaho a ku mu laeza a lu sindeketa inge a lu buza lipuzo ze ñwi. Munna yo muñwi na si ka utwa kale za Lipaki za Jehova mi na tabezi hahulu libuka za luna. Na itebuhile hahulu ku pota kwa luna mi a lu fa kii ya kwa situngu sa hae kuli lobale mwateñi.

Zazi le liñwi manzibwana ne lu katezi hahulu mi lwa toma litende za luna ka ku sa ziba fa sibaka fo ne ku tezi likokwani. Hañi-hañi likokwani zeo za kala ku lu lumaka. Ne lu sa koni ku shenyisa litende za luna bakeñisa kuli ne lu katezi hahulu, mi hasamulahonyana likokwani zeo za tuhela ku lu lumaka.

Ha lu lobala ne lu utwa butuku kwa mikokoto ni kwa makupo kakuli ne lu lobezi fafasi, kono ha se lu lobezi ka nako ye telele butuku bo bwa fela. Mi habusa ne se lu libezi za butuku bo ne lu utwile busihu kakuli ne lu ikola ku buha misindi ye minde ye ne bonahala ku ba ni malu kwa maneku, mi ne lu buha ni malundu a apesizwe ki litwa a na bonahalela  kwahule. Ne ku kuzize hande, mi ne ku utwahala fela mezi a na buba mwa milapo ni linyunywani ze ne cobila.

Hamulaho wa ku tapa mwa nukana, lwa nyakisisa liñolo mwa Bibele ni ku kushuka mi kihona lu kambama lilundu ku liba kwa minzi ye miñwi ya kwahule. Musipili wo nesi wa mbango. Ne lu katani musali-muhulu ya na lilile ha na zibile kuli libizo la Mulimu la Jehova, la fumaneha mwa Bibele. Taba yeo ne i mu fitile kwa pilu. Cwale na kona ku itusisa libizo la Mulimu mwa litapelo za hae!

Munna-muhulu yo muñwi na bulezi kuli Mulimu n’a mu hupuzi luli, mi a kalisa ku opela pina ye ne talusa kuli ki mangeloi a na lu lumile ku yo potela sibaka seo. Munna yo muñwi ya na sa koni ku zamaya bakeñisa makulanu, na lu taluselize kuli kwa batu ba mwahae ha ku na ya na ezize buikatazo bwa ku to mu potela. Na komokile hahulu ku utwa kuli ne lu zwelela kwa La Paz. Munna yo muñwi hape na tabisizwe hahulu ki taba ya kuli Lipaki za Jehova ba potelanga batu mwa mandu a bona, ha ba swani ni ba bulapeli bo buñwi ba ba bizezanga batu kwa likeleke ka ku liza milangu.

Kwa sibaka seo ha ku na malaiti, kacwalo batu ba lobalanga ku sa unsufala fela ni ku zuha kakusasana lizazi ha li pazula. Kacwalo ne lu na ni ku kalanga ku kutaza ka 6 kiloko ya kakusasana kuli lu fumane batu fa mandu. Hakusicwalo ne lu ka fumana kuli buñata bwa batu ki kale ba ya kwa masimu. Kono nihaiba be ne lu fumananga kwa masimu ne ba tabela ku teeleza kwa lushango lwa luna lwa mwa Linzwi la Mulimu, mi ne ba kona ku yemisa mapulu a na kekela ilikuli mwendi a pumule kwateñi hanyinyani. Buñata bwa batu be ne lu fumananga fa mandu ne ba lu fanga mikata ya lingu kuli lu ine fateñi, mi ne ba bizanga lubasi kaufela kuli lu to teeleza. Balimi ba bañwi ne ba lu fanga masaka a mbonyi sina nubu ili ku bonisa buitebuho bwa bona kwa lihatiso za Bibele ze ne lu ba fa.

“Ha Mu Si Ka Ni Libala”

Kono kuli batu ba fite fa ku ba ni zibo ya Bibele, ba tokwa ku potelwa hañata. Ba bañata ne ba lu kupile kuli ite lu kute hape kuli lu to zwelapili ku ituta ni bona. Kacwalo kuli lu tuse batu bao, ne lu kutezi kwa sibaka seo sa kwa Bolivia hañata-ñata.

Musali-muhulu yo muñwi na tabile hahulu ha ne lu kutile hape, mi na ize: “Mu swana fela sina bana ba ka. Ha mu si ka ni libala.” Munna yo muñwi na itumezi hahulu ku luna bakeñisa musebezi o no lu eza, mi a lu mema kuli ite lu to fitela mwa ndu ya hae fa musipili o tatama. Kono nto ye ne lu tabisize hahulu ni ku fita ki ku utwa kuli musali yo muñwi ye ne lu kutalize fa musipili o muñwi na tutezi kwa tolopo mi cwale sa kutaza taba ye nde.

Fa lizazi la mafelelezo la musipili wa luna wa pili ne lu felezwi ki palafini ye ne lu itusisanga mwa sitofu, mi ne se lu felezwi ki lico. Lwa lwalela likota za ku tatehisa ni ku tateha lico za luna za mafelelezo, mi kihona lu kala ku zamaya ku liba kwa sitishini. Musipili wa ku ya kwa tolopo ko ne lu kona ku yo kwelela mbasi ne u tanda likilomita ze ñata. Kwa nalule-lule, lwa yo fita ka swalala.

Ku Kuta Kwahae

Musipili wa ku kuta kwahae ni ona ne u na ni matata kakuli mbasi ne i shwezi fa nzila. Hasamulaho wa nako, lwa ba ni tohonolo ya ku longiwa mwa simbayambaya se ne si longile batu ba bañata.

Ku kwela simbayambaya seo ne ku lu konisize ku kutaza kwa bazamai ba ne ba bata hahulu ku ziba kuli ki sikamañi se ne lu yo bata kwa sibaka seo. Nihaike kuli batu ba mwa sibaka seo ha ba buleli hahulu, ba na ni silikani.

Ha se lu zamaile ka lihora ze 9 mwa simbayambaya seo, lwa punya kwahae inze lu kolobile ni ku mbumba maswe. Niteñi, musipili wa luna ne si wa mbango. Ha ne lu li mwa nzila, ne lu lumelelani ni musali yo muñwi ya na pila mwa tolopo kuli lu itutange ni yena Bibele.

Kaniti, ne li tohonolo ku yo kutaza taba ye nde kwa batu ba ba pila kwa libaka ze kwahule zeo. Ne lu kutalelize mwa minzi ye mine ni mwa tundiyana to tu ñata. Ne lu tabile hahulu mi lwa hupula manzwi a li: “Ki a mande cwañi fa malundu, mautu a ya tisa litaba ze nde, ya shaela kozo; ya tisa litaba ze nde, ya shaela za ku pilisa.”—Isa. 52:7; Maro. 10:15.

[Siswaniso se si fa likepe 17]

Ne lu itukisize ku kutaza taba ye nde.