Sepiso ya Butokwa Hahulu

N I SEPISIZE nto ya butokwa hahulu. Ni kalibe ya li me ya pila mwa naha ya Spain, mi kashe ni mi kandekele ze ne tisize kuli ni eze sepiso yeo.

Fa lapa la bashemi ba ka ne ku si na kozo ni kutwano. Lubasi lwa luna ne lu bile mwa maswabi a matuna munyan’a ka ha na shwezi mwa kozi a li wa lilimo z’e ne. Hape mikwa ye maswe ya bondate ne i tisize kuli boma ba si ke ba ba ni tabo. Kono niha ne ba li mwa muinelo o t’ata wo, boma ne ba zwezipili ku luta bahulwani ba ka ni na likuka ze nde za mwa bupilo.

Ha se ku fitile nako, bahulwani ba ka ba nyala, mi ni na hamulaho na nyalwa. Hamulaho fela wa fo, boma ba fumanwa ni butuku bwa kansa, mi hamulaho ba honiwa ki butuku bo mi ba timela. Kono pili ba si ka timela kale, boma ba lu siyela nto ya butokwa hahulu.

Musali yo muñwi ye ne ba zibana ni yena na ba ambotile za sepo ya mwa Mañolo ya zuho, mi boma ba lumela ku itutanga ni yena Bibele. Mi ha ne ba nze ba kula, pili ba si ka timela kale, lushango lwa mwa Bibele lo lu fa sepo lwa ba tiisa mi lwa ba tusa ku ba ni tabo.

Ha lu bona boma mo ne ba tusezwa ki lushango lwa mwa Bibele, na ni bahulwani ba ka ni luna lwa kalisa ku ituta Linzwi la Mulimu. Hamulaho fela wa kweli ku zwa fo ni kolobelezwa sina yo muñwi wa Lipaki za Jehova, na puluha silandamweli, ili musizana ya buheha, mi lwa mu shumwenena libizo la Lucía.

Lizazi le ni kolobezwa ne li la butokwa hahulu ku na. Libaka la pili ne li la kuli cwale ne se ni ifanile ku Jehova, kakuli ne ni neezi bupilo bwa ka ku yena kuli ni mu sebeleze ku ya ku ile. Mi libaka le liñwi ne li la kuli ne ni kona ku luta banake, ili mushimani ni musizana, Linzwi la Mulimu.

Kono eshee, tabo ya ka yeo ya ku luta bana ba ka ne i tuha fela. Mwanake Lucía ha na li wa lilimo z’e ne, a kala ku katazehanga hahulu mwa mba. Mi hamulaho wa litatubo li sikai, mualafi a talusa kuli kwa sibiti sa Lucía ne ku na ni sikoto se ne ni likana ni olonji kwa butuna. Mualafi a talusa kuli Lucía na na ni butuku bwa kansa, ye hula ka bubebe ye bizwa neuroblastoma. Kacwalo, ao ne li ona makalelo a manyando a Lucía a na tandile lilimo ze 7 a ku kula kansa. Mi fokuñwi, na tandanga nako ye telele mwa sipatela.

Bupilo Bwa Buitomboli

Mwahal’a zona lilimo ze t’ata zeo, Lucía na ni tiisanga ka ku ni kumbatanga ni ku ni tubeta ili ku bonisa kuli lika li ka ba hande. Hape moya wa tabo wa na bonisa ha na nze a kula, ne u komokisize hahulu baalafi. Kamita na tabelanga hahulu ku tusa manasi ka ku iseza banana ba bañwi ba ne ba kulela mwa mizuzu ye miñwi ya mwa sipatela mabisi, lino, ni lika ze ñwi. Manasi mane ba fita fa ku fa Lucía siapalo se si sweu ni kabaji ka ne ka mu zibahaza sina “mutusi wa manasi.”

Musali yo muñwi ya na beleka mwa sipatela ha iheta u li: “Lucía na ni susuelize hahulu. Ne li musizana wa manyamenyame, wa miswalo, ili ya na lata hahulu ku swanisa. Ne li mwanana wa makande, ya na eza lika ni ku nahana sina mutu yo muhulu.”

Lucía na tiiswa ni ku omba-ombiwa ki Linzwi la Mulimu. (Maheb. 4:12) Na kozwi sepiso ya mwa Linzwi la Mulimu ya kuli mwa lifasi le linca, “lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku.” (Sin. 21:4) Bakeñisa kuli na lata batu, kamita na ambolanga lushango lwa mwa Bibele ni bañwi. Nihaike na ziba hande kuli mwendi ha na ku fola, sepo ye tiile ya Lucía ya kuli bafu ba ka zuha ne i mu tusize kuli a ombale ni ku ba ni mwangalwa. (Isa. 25:8) Na zwezipili ku ba ni mwangalwa ku fitela butuku bwa kansa bu mu hona ni ku mu bulaya.

 Ne li fa lizazi la timela Lucía fo ne ni sepiselize nto ya butokwa hahulu. Zazi leo, Lucía na sa koni ku tona. Bondat’ahe ba mu swala kwa lizoho li li liñwi mi ni na na mu swala ku le liñwi. Na mu shobotela kuli: “U si ke wa bilaela, ha ni na ku ku siya. U buyele fela hanyinyani-hanyinyani. Ha u ka zuha ka nako ya zuho, u ka iketa hande. Ha u na ku utwa butuku hape, ni ka ba ni wena.”

Cwale ni na ni ku taleleza yona sepiso yani. Na ziba kuli nako ye ni ka libelela ku fitela a zuha i ka ba ye t’ata luli. Kono hape na ziba kuli haiba ni sepa Jehova ka pilu-telele mi ni zwelapili ku sepahala ku yena, ni ka ba teñi Lucía ha ka zuha kwa bafu.

Sanda Sa Lu Siyezi Lucía

Bundume bwa na bonisize Lucía, hamohocwalo ni tuso ya mizwale ni likaizeli ba mwa puteho, ne li fitile hahulu kwa pilu ya bo munn’a ka ba ne ba si Lipaki za Jehova. Zazi la timela Lucía, bo munn’a ka ne ba ni taluselize kuli ba ka nahanisisa hande za bupilo bwa bona. Hamulaho wa lisunda li sikai, ba kupa eluda yo muñwi mwa puteho kuli a ba lutange Bibele. Mi hasamulaho wa nakonyana, bo munn’a ka ba kala ku fumanehanga kwa mikopano kaufela. Ka tuso ya Jehova ba lisela ku zuba, ili nto ye ne ba palelwa ku eza sapili.

Fokuñwi ni sa utwanga butuku bakeñisa lifu la Lucía, niteñi, ni itebuha hahulu ku Jehova bakeñisa sanda sa siile Lucía. Na ni bo munn’a ka lwa tiisananga ka sepo ye nde ya kuli ku ka ba ni zuho ya bafu, mi mane lu nahananga ka za nako muta lu ka bona Lucía hape—ku bona manyamenyame a hae, meto a hae a matuna ni malama a mambobe ha seha.

Lifu la mwanake hape ne li fitile kwa pilu ya musali yo muñwi ye ne lu yahile ni yena. Zazi le liñwi la pelekelo kakusasana, pula ha ne i nze i nela, musali yo muñwi ya na na ni mwana ya na kena sikolo fa na kenanga Lucía na tile kwa ndu ya luna. Ni yena na na ni mwana wa lilimo ze 11 ya na bulailwe ki butuku bwa kansa. Ha na utwile kuli Lucía na bulailwe ki butuku bwa kansa, musali yo a buzisisa ko ne lu pila mi a to lu potela. Musali yo na bata ku ziba mo ne ni pilela hamulaho wa lifu la Lucía mi a akaleza kuli lu tome katengo ilikuli lu omba-ombange basali ba bañwi ba ba shwezwi ki bana ba bona ka nzila ye swana.

Na mu taluseza kuli na ni omba-ombilwe hahulu ki ye ñwi ya lisepiso za mwa Bibele, ili sepiso ye tusa hahulu ku fita nto ifi kamba ifi ye ba kona ku eza batu. Ha ne ni nze ni mu balela manzwi a Jesu a kwa Joani 5:28, 29, musali yo a bonahala ku tabela hahulu lushango lo. A lumela kuli ni itutange ni yena Bibele mi hamulaho a ikutwa ku ba ni “kozo ya Mulimu ye fita kutwisiso kaufela.” (Mafil. 4:7) Hañata ha lu itutanga Bibele hamoho ni musali yo, lwa kutumananga hanyinyani ni ku kala ku nahana inge lu mwa lifasi le linca mi lu amuhela balatiwa ba luna ha ba nze ba zusiwa kwa bafu.

Bupilo bwa Lucía bo bu kuswani bu lu siyezi sanda sa butokwa se si ka ina ku ya ku ile. Tumelo ya hae i tahisize kuli lubasi lwa luna lu sebeleze Mulimu hamoho, mi hape i ni tiisize kuli ni ikatulele ku zwelapili mwa tumelo. Kaniti luli, luna kaufela ba ba shwezwi ki balatiwa ba ba ka zusiwa kwa bafu lu sepisize nto ya butokwa hahulu.

[Siswaniso se si fa likepe 20]

Siswaniso sa paradaisi sa na swanisize Lucía