Mu Kete ku Sebeleza Jehova Ha Mu Sa Li Mikulwani

“U tiyele ku z’o itutile, ze ku kolisize.”—2 TIM. 3:14.

1. Jehova u nga cwañi sebelezo ya Lipaki ba mikulwani?

JEHOVA u itebuha hahulu sebelezo ye kenile ya mikulwani kuli mane na susumelize wa walisamu ku polofita ka za bona. Walisamu na opezi kuli: “Sicaba sa hao si kopana si nze si lata, mwa lizazi la hao la ku puma ndwa, ka ze kenile za mikabo. Micaha ya hao i ta ku wena, sina puka ya malungasiku.” (Samu 110:3) Kaniti, Jehova u tabela hahulu mikulwani ba ba mu sebeleza ka ku lata.

2. Mikulwani kacenu ba kopana ni likukuezo mañi ka za bupilo bwa bona bwa kwapili?

² Mina mikulwani ba ba mwa puteho ya Sikreste, kana mu ineezi ku Jehova? Mikulwani ba bañata ku ba belanga t’ata ku keta ku sebeleza Mulimu wa niti. Batu ba lipisinisi, baluti, mi fokuñwi ni ba mwa lubasi ni balikani ba susuezanga mikulwani ku ndongwama sifumu. Hañata batu ba bañwi ba sheununanga mikulwani ba ba itomela likonkwani za kwa moya. Kono niti fela kikuli, ku sebeleza Mulimu wa niti kona musebezi o munde ka ku fitisisa o mu kona ku eza mwa bupilo. (Samu 27:4) Kacwalo mu nyakisise lipuzo ze talu ze: Ki kabakalañi ha mu swanela ku sebeleza Mulimu? Mu kona cwañi ku zwelapili ku sebeleza Mulimu ku si na taba ni ze ba kana ba bulela ni ku eza ba bañwi? Ki ifi misebezi ye minde ye mu kona ku eza mwa sebelezo ye kenile?

Ku Sebeleza Jehova Kona Musebezi O Munde Ka ku Fitisisa

3. Pupo ya Jehova i swanela ku lu susueza ku ezañi?

³ Ki kabakalañi ha mu swanela ku sebeleza Mulimu wa niti ya pila? Libaka luli li fumaneha kwa Sinulo 4:11, ko lu bala kuli: “Mulena ni Mulimu wa luna, ki Wena ya lukela ku fiwa kanya, ni likute, ni mata; kakuli ki Wena ya ezize linto kamukana, mi ha li li teñi, niha ne li bupilwe, ki ka ku lata kwa hao.” Jehova ki yena Mubupi yo Mutuna ya bupile lika kaufela ze li teñi. Lifasi ki le linde luli! Ze ku lona kaufela; likota, lipalisa, lifolofolo, mawate, malundu, ni libuba ki Jehova ya li bupile. Samu 104:24 i li: “Lifasi li tezi maluwo a [Mulimu].” Lu swanela ku itumela hahulu kuli Jehova ka lilato u lu file mibili ni minahano ye lu konisa ku ikola ku pila mwa lifasi ni ku ikola lika ze nde ze ku lona. Kana buitebuho bwa luna kwa pupo ya hae ye makaza ha bu swaneli ku lu susueza ku mu sebeleza?

4, 5. Ki likezo mañi za Mulimu ze ne tahisize kuli Joshua a sutelele ku Jehova?

⁴ Libaka le liñwi ha lu swanela ku sebeleza Jehova lu li fumana mwa manzwi a na bulezi Joshua mueteleli wa sicaba sa Isilaele. Ha na tuha a timela, Joshua na bulelezi sicaba sa Mulimu kuli: “Mwa lipilu za mina kaufela, ni mwa maikuto a mina kamukana, mu ziba kuli kwa linto ze nde kaufela z’a mi sepisize [Muñ’a] Bupilo Mulimu wa mina, ha ku na niheba i li ñwi ye tokwahezi; kamukana li bonahalile ku mina.” Ki kabakalañi Joshua ha na bulezi cwalo?—Josh. 23:14.

⁵ Ha na sa li mwanana mwa Egepita, ku bonahala kuli Joshua na itutile za sepiso ya Jehova ya kuli u ka fa Maisilaele naha ya bona tota. (Gen. 12:7; 50:24, 25; Ex. 3:8) Ku tuha fo, Joshua na iponezi Jehova ha kala ku taleleza sepiso ya hae ka ku lenga naha ya Egepita ka Likoto ze Lishumi ni ku hapeleza Faro ya na tatafezi kuli a lukulule sicaba sa Isilaele. Joshua ne li yo muñwi wa batu ba ne ba pulusizwe fa Liwate Le Li Fubelu, mi na iponezi Faro  ni mpi ya hae ha ba lwela mwa liwate. Mwa musipili wa bona o mutelele wa ku pululeza “lihalaupa le lituna, le li sabisa” lona Lihalaupa la Sinai, Joshua na iponezi Jehova ha fa Maisilaele lika kaufela ze ne ba tokwa. Ha ku na nihaiba mutu a li muñwi ya na bulailwe ki linyolwa kamba tala. (Deut. 8:3-5, 14-16; Josh. 24:5-7) Maisilaele ha ne ba hapa macaba a tiile a Makanana ni ku luwa Naha ya Sepiso, Joshua na iponezi ka mo Mulimu ya na lapela yena hamoho ni Maisilaele ba bañwi, na ba tuselize mwa musebezi wo.—Josh. 10:14, 42.

6. Ki likamañi ze ka mi susueza ku sebeleza Mulimu?

⁶ Joshua na ziba kuli Jehova na talelelize lisepiso za hae. Ka lona libaka leo, Joshua na bulezi kuli: “Haili na, ni ba ndu ya ka, lu ka sebeleza [Muñ’a] Bupilo.” (Josh. 24:15) Mina bo? Ha mu nahana za lisepiso za Mulimu wa niti ze se talelelizwe ni ze ka talelezwa kwapili, kana mwa susuezwa ku mu sebeleza sina mwa na ezelize Joshua?

7. Ki kabakalañi kolobezo ya mwa mezi ha i li muhato wa butokwa hahulu?

⁷ Ku nahanisisa misebezi ya Jehova ya pupo ni ku hupulanga lisepiso za hae ze nde ni ze itingwa, ku swanela ku mi susueza ku ineela ku Jehova, mane ni ku bonisa buineelo bwa mina ka kolobezo ya mwa mezi. Kolobezo ki muhato wa butokwa hahulu o ba swanela ku nga ba ba bata ku sebeleza Mulimu. Jesu yena ye lu likanyisa, na ezize cwalo. Pili a si ka kalisa kale musebezi wa hae sina Mesiya, na ile ku Joani Mukolobezi ku yo kolobezwa. Ki kabakalañi Jesu ha na ngile muhato wo? Hamulaho na bulezi kuli: “Ni zwile kwa lihalimu ku eza, isi se si latwa ki na, kono se si latwa ki Ya ni lumile.” (Joa. 6:38) Kuli a bonise kuli na ifanile ku eza tato ya Ndat’ahe, Jesu a kolobezwa.—Mat. 3:13-17.

8. Ki kabakalañi Timotea ha na ketile ku lapela Mulimu, mi ki nto mañi ye mu tokwa ku eza?

⁸ Hape mu nyakisise mutala wa Timotea, Mukreste wa mutangana ili yo hamulaho wa nako na filwe misebezi ni matohonolo a mañata ki Jehova. Ki kabakalañi Timotea ha na ketile ku lapela Mulimu wa niti? Bibele i lu taluseza kuli ‘na itutile litaba mi na kolisizwe’ ku li lumela. (2 Tim. 3:14) Haiba mu itutile Linzwi la Mulimu mi mu kolwisizwe kuli litaba zeo ki niti, ni mina mu swana ni Timotea. Cwale mu tokwa ku eza keto. Mu ka eza hande ku taluseza bashemi ba mina ze mu bata ku eza. Bashemi ba mina ni maeluda ba mwa puteho ba kona ku mi tusa ku utwisisa ze mu tokwa ku eza ka ku ya ka Mañolo kuli mu kolobezwe.—Mu bale Likezo 8:12.

9. Ba bañwi ba kona ku ikutwa cwañi ha mu nga muhato wa ku kolobezwa?

⁹ Haiba mu kolobezwa, mu nga muhato o munde wa pili mwa sebelezo ya mina ku Mulimu wa niti. Ha mu eza cwalo, mu kena mwa siyano ye telele ili yeo mupuzo wa yona ki bupilo bwa ku ya ku ile ni tabo ye tiswa ki ku eza tato ya Mulimu. (Maheb. 12:2, 3) Hape mu ka tabisa ba mwa lubasi lwa mina ba se ba keni kale mwa siyano yeo ni balikani ba mina ba mwa puteho ya Sikreste. Mi sa butokwa ni ku fita, mu ka tabisa pilu ya Jehova. (Mu bale Liproverbia 23:15.) Ki niti kuli batu ba bañwi ha ba na ku utwisisa libaka ha mu ketile ku sebeleza Jehova, mi ba kona ku mi nyaza kamba  mane ku mi lwanisa. Kono mwa kona ku tiyela litwaniso zeo.

Ba Bañwi Ha Ba Mi Nyaza Kamba Ku Mi Lwanisa

10, 11. (a) Ki lipuzo mañi ze ba kana ba mi buza batu ka za keto ya mina ya ku sebeleza Mulimu? (b) Mu kona ku itutañi ka mo Jesu na alabezi lipuzo ka za bulapeli bwa niti?

¹⁰ Keto ya mina ya ku sebeleza Jehova i kona ku tahisa kuli be mu kena ni bona sikolo, be mu yahile ni bona, ni bahabo mina ba palelwe ku mi utwisisa. Ba kana ba mi buza libaka ha mu ngile muhato wo ni ku mi nyaza bakeñisa litaba ze mu lumela. Mu swanela ku ba alaba cwañi? Mu ka tokwa ku nahanisisa hande kuli mu kone ku ba taluseza libaka ha mu ezize keto yeo. Mi ha mu nze mu talusa mabaka a litaba ze mu lumela, mu likanyise mutala o munde wa Jesu.

¹¹ Baeteleli ba bulapeli bwa Majuda ha ne ba buzize Jesu ka za zuho ya bafu, Jesu na ba alabile ka ku itusisa liñolo le ne ba si ka nyakisisa kale. (Ex. 3:6; Mat. 22:23, 31-33) Yo muñwi wa bañoli ha na mu buzize kuli ki ufi mulao o mutuna kwa milao kaufela, Jesu na mu alabile ka ku mu bulelela manzwi a fumaneha mwa litimana ze ñwi za mwa Bibele. Munna yo na itumezi ku Jesu bakeñisa kalabo ya na filwe. (Liv. 19:18; Deut. 6:5; Mare. 12:28-34) Jesu mwa na itusiseza Mañolo ni mwa na taluseza litaba ne ku tisize “fapano mwa buñata bakeñisa hae,” mi ba ne ba mu lwanisa ba palelwa ku mu eza se siñwi. (Joa. 7:32-46) Ha mu alaba lipuzo ka za litaba ze mu lumela, mu itusise Bibele mi mu alabe “ka musa ni [ka] likute.” (1 Pit. 3:15) Haiba ha mu zibi kalabo kwa puzo ye ñwi, mu taluse kuli ha mu zibi mi mu ba taluseze kuli mu sa yo eza patisiso. Hamulaho, mu batisise taba yeo fa mukoloko wa litaba o fumaneha fa likepe 31 mwa Litawala za December 15 kamba mwa Watchtower Library haiba i teñi mwa puo ye mu ziba. Haiba mu itukiseza hande mu ka ziba “mo mu lukela ku alabela mutu kaufela.”—Makolo. 4:6.

12. Ki kabakalañi ha mu sa swaneli ku zwafiswa ki nyandiso?

¹² Keto ya mina ya ku sebeleza Mulimu ha i na ku tahisa kuli batu ba mi buze fela lipuzo ka za tumelo ya mina, kakuli Satani Diabulosi, sila sa Mulimu, ki yena ya busa lifasi. (Mu bale 1 Joani 5:19.) Ha mu swaneli ku libelela kuli mañi ni mañi u ka mi babaza kamba ku tabela keto ye mu ezize, mi mane mu kana mwa talimana ni twaniso. Batu ba bañwi ba kana ba ‘mi bulela maswe,’ mi ba kona ku zwelapili ku eza cwalo. (1 Pit. 4:4) Kono mu hupule kuli hasi mina mu nosi. Jesu Kreste na nyandisizwe. Muapositola Pitrosi ni yena na nyandisizwe, mi na ñozi kuli: “Balatiwa, ha mu inzi mwa mulilo wa miliko, mu si ke mwa komoka, inge mu tahezwi ki taba ye sa utwahali; kono mu tabe, kabakala kuli mu ngile siemba kwa manyando a Kreste.”—1 Pit. 4:12, 13.

13. Ki kabakalañi Bakreste ha ba kona ku taba ha ba nyandiswa?

¹³ Lu swanela ku taba ha lu nyandiswa kamba ku lwaniswa kabakala tumelo ya luna. Kabakalañi? Kakuli haiba lu tabelwa ki lifasi u zibe lu pila ka ku lumelelana ni likuka za Satani isiñi za Mulimu. Jesu na lemusize kuli: “Mu ka ba ni bumai, batu kaufela ha ba mi bulela hande; kakuli bokuku a bona ne ba eza bapolofita ba  buhata cwalo.” (Luka 6:26) Ku nyandiswa ki sisupo sa kuli Satani ni lifasi la hae ba bifile kabakala kuli mu sebeleza Jehova. (Mu bale Mateu 5:11, 12.) Mi lu swanela ku taba ha lu “nyefulelwa Libizo la Kreste.” 1 Pit. 4:14.

14. Ki lifi ze nde ze kona ku ba teñi haiba mutu a zwelapili ku sepahala ku Jehova ku si na taba ni nyandiso?

¹⁴ Ku na ni ze nde ze ne, ze tiswa ki ku sepahala ku Jehova ku si na taba ni twaniso. Mu fa bupaki ka za Mulimu ni Mwan’a hae. Buitiiso bwa mina bu susueza mizwale ni likaizeli ba mina. Batu ba bañwi ba ba sa zibi Jehova ha ba bona busepahali bwa mina ba ka susuezwa ku mu bata. (Mu bale Mafilipi 1:12-14.) Mi ha mu nze mu bona mo Jehova a mi tiiseza mwa litiko, mu ka zwelapili ku mu lata hahulu.

Mu Kwalulezwi “Munyako O Mutuna”

15. Ki “munyako o mutuna” ufi wa na kwalulezwi muapositola Paulusi?

¹⁵ Muapositola Paulusi ha na bulela za bukombwa bwa hae mwa Efese, na ñozi kuli: “Ni kwalulezwi . . . munyako o mutuna wa musebezi o zwelapili.” (1 Makor. 16:8, 9) Munyako wo, ne li tohonolo ya ku kutaza hahulu taba ye nde ni ku tahisa balutiwa mwa muleneñi wo. Ka ku kena mwa munyako wo, Paulusi na tusize batu ba bañata ku ituta za Jehova ni ku mu lapela.

16. Bomasiyaleti ba ba tozizwe ne ba keni cwañi mwa munyako wa ‘sikwalo se si kwaluzwi’ ka 1919?

¹⁶ Ka 1919 Jesu Kreste ya filwe kanya na tomile ‘sikwalo se si kwaluzwi’ fapil’a bomasiyaleti ba ba tozizwe. (Sin. 3:8) Ne ba keni mwa munyako wo mi ba kala ku kutaza taba ye nde, ba luta niti ya mwa Bibele ka tukufalelo ye tuna hahulu. Ki likamañi ze zwile mwa bukombwa bwa bona? Taba ye nde se i kutazwa ni kwa mafelelezo a lifasi, mi batu ba ba bat’o eza 7 milioni se ba na ni sepo ya ku pila ku ya ku ile mwa lifasi le linca la Mulimu.

17. Mu kona ku kena cwañi mwa “munyako o mutuna wa musebezi o zwelapili”?

¹⁷ Ni kacenu “munyako o mutuna wa musebezi o zwelapili” u sa kwalulezwi batanga ba Jehova kaufela. Ba ba kena ku ona ba fumana tabo ni mwangalwa ha ba nze ba abana hahulu mwa musebezi wa ku kutaza taba ye nde. Mina batanga ba Jehova ba mikulwani, kana mwa itebuha hahulu tohonolo ye tuna-tuna ye, ya ku tusa ba bañwi kuli ba “lumele Evangeli”? (Mare. 1:14, 15) Kana se mu nahanile za ku sebeza sina paina wa kamita kamba wa ku tusa? Matohonolo a mañwi a kwalulezwi buñata bwa mina ki ku kena mwa musebezi wa ku yaha Mandu a Mubuso, ku sebeleza fa Betele, ni ku sebeza sina mulumiwa. Bakeñisa kuli lifasi le li maswe la Satani li tuha li sinyiwa, ku eza misebezi yeo ya Mubuso se li kwa ka putako. Kana mu ka kena mwa “munyako o mutuna” ha ku sa na ni nako?

“Mu Lazwe, mi Mu Ka Bona Kuli [Muñ’a] Bupilo U Na Ni Sishemo”

18, 19. (a) Ki nto mañi ye ne tisize kuli Davida a be ni takazo ye tuna ya ku sebeleza Jehova? (b) Ki sifi se si bonisa kuli Davida na si ka inyaza bakeñisa ku sebeleza Mulimu?

¹⁸ Ka ketelelo ya moya wa Mulimu, walisamu na memile ba bañwi kuli “[ba] lazwe, mi [ba] ka bona kuli [Muñ’a] Bupilo u na ni sishemo.” (Samu 34:8) Mulena Davida wa Isilaele ya kwaikale ha na sa li mulisana wa mutangana, Jehova na mu pulusize kwa libatana. Mulimu na mu tusize ku tula Goliati mi na mu lamulezi kwa liñalelwa ze ñata. (1 Sam. 17:32-51; Samu 18:0-50; toho ya taba) Bakeñisa sishemo-tuna sa Mulimu, Davida na susumelizwe ku ñola kuli: “[Muñ’a] Bupilo, Mulimu wa ka;  ki ye miñata misebezi ye komokisa y’o ezize, ni z’o hupuzi ku lu ezeza; ha li konahali ku taluhanyezwa fapil’a hao; ha ni lika ku li talusa ni ku li bulela, palo ya zona ha i na mo i konelwa.”—Samu 40:5.

¹⁹ Davida na latile hahulu Jehova mi na bata ku mu lumbeka ka pilu ya hae ni munahano wa hae kaufela. (Mu bale Samu 40:8-10.) Hamulaho wa lilimo, Davida ni kamuta na si ka inyaza kuli na ketile ku lapela Mulimu wa niti mwa bupilo bwa hae. Ku sebeleza Mulimu ne li yona nto ya butokwa hahulu ku Davida, mi ne ku mu tahiselize tabo ye tuna hahulu. Ha sa supezi, Davida na ize:“Ki Wena ye ni sepile Mulimu [Muñ’a] Bupilo; ni ku sepile isali kwa bwanana bwa ka. Cwale niha ni ka supala, mi toho i ize pululu, Mulimu u si ke wa ni tuhela.” (Samu 71:5, 18) Nihaike kuli na felezwi ki m’ata bakeñisa busupali, Davida na zwezipili ku sepa Jehova ni ku ba ni silikani se si tiile ni yena.

20. Ki kabakalañi ku sebeleza Mulimu ha i li yona nto ye nde ka ku fitisisa mwa bupilo bwa mina?

²⁰ Bupilo bwa Joshua, Davida, ni Timotea bu bonisa kuli ku sebeleza Jehova ki yona nto ye nde ka ku fitisisa ye mu kona ku eza mwa bupilo bwa mina. Tutu ye tiswa ki ku ndongwama misebezi mwa lifasi le ha i koni ni hanyinyani ku bapanywa kwa limbuyoti ze tiswa ki ku ‘sebeleza Jehova ka pilu ya mina kaufela, ni maikuto a mina kaufela.’ (Josh. 22:5) Haiba ha mu si ka ineela kale ku Jehova ka tapelo, mu ipuze kuli, ‘ki sikamañi se si ni palelwisa ku ba yo muñwi wa Lipaki za Jehova?’ Haiba se mu kolobelizwe kale, kana mwa tabela ku ba ni tabo ye tuna mwa bupilo bwa mina? Haiba ku cwalo, mu tokwa ku eza ze ñata mwa bukombwa bwa mina, ni ku zwelapili ku hula kwa moya. Taba ye tatama i ka mi bonisa mo mu kona ku hulela kwa moya ka ku likanyisa mutala wa muapositola Paulusi.

Mu Kona Ku Alaba Cwañi?

• Mu fe mabaka a mabeli ha lu swanela ku sebeleza Mulimu.

• Ki sikamañi se ne si tisize kuli Timotea a kete ku sebeleza Mulimu?

• Ki kabakalañi ha mu swanela ku itiisa ha mu talimana ni nyandiso?

• Ki ifi misebezi ye minde ye mu kona ku eza?

[Lipuzo za Tuto]

[Siswaniso se si fa likepe 18]

Ku sebeleza Jehova ki yona nto nde ka ku fitisisa ye mu kona ku eza mwa bupilo

[Siswaniso se si fa likepe 19]

Kana mwa kona ku alaba lipuzo ka za litaba ze mu lumela?