Mu Zwelepili ‘Ku Ikenisa Ka Ku Saba Mulimu’

BIBELE i talusa kuli Jehova Mulimu ki ya kenile ka ku fitisisa, i li: “Ki Ya kenile, ki Ya kenile, ki Ya kenile, [Muñ’a] Bupilo.” (Isa. 6:3; Sin. 4:8) Manzwi a Siheberu ni Sigerike a talusa ku “ikenisa,” a fa muhupulo wa ku tweka kamba bukeni bwa bulapeli, ili ku ikauhanya kwa masila. Bukeni bwa Mulimu bu talusa kuli Mulimu ki ya petehile mwa lika kaufela.

Kana Jehova, Mulimu ya kenile, na si ke a libelela ba ba mu lapela kuli ba be ba ba kenile kwa mubili, mwa muzamao ni kwa moya? Bibele i bonisa hande kuli Jehova u bata kuli batu ba hae ba be ba ba kenile. Kwa 1 Pitrosi 1:16, lu bala kuli: “Mu be ba ba kenile, kakuli Na ni Ya-Kenile.” Kana luli batu ba ba si ka petahala ba kona ku ba ba ba kenile sina Jehova? Eni, kono isi ka ku tala sina Jehova. Mulimu u ka lu nga kuli lu ba ba kenile haiba lu mu lapela ka nzila ye kenile ni ku ba ni silikani se sinde ni yena.

Kacwalo, lu kona cwañi ku zwelapili lu li ba ba kenile mwa lifasi le, le li tezi mizamao ye maswe? Ki likezo mañi ze lu swanela ku ambuka? Mi ki licinceho mañi ze lu tokwa ku eza mwa lipulelo ni mwa mupilelo wa luna? Ka za taba ye, ha lu boneñi ze lu kona ku ituta kwa milao yeo Mulimu na file Majuda ba ne ba kutela habo bona ku zwa kwa Babilona ka 537 B.C.E.

‘Nzila ye Kenile I Ka Ba Teñi’

Jehova na polofitile kuli batu ba hae ba ne ba li mwa butanga bwa Babilona ne ba ka kutela habo bona. Mwa Bupolofita, Majuda ne ba sepisizwe kuli: “Likululu li ka ba teñi, ni nzila ye ka bizwa Nzila ye kenile.” (Isa. 35:8a) Manzwi a, a bonisa kuli Jehova na si ka lukisa fela kuli Majuda ba kutele habo bona, kono na sepisize ni ku ba sileleza mwahal’a musipili wa bona kaufela.

Mwa miteñi ye, Jehova na kwalulezi batanga ba hae ba fa lifasi “Nzila ye kenile” ka ku ba zwisa ku Babilona yo Mutuna, yona kopano ya mwa lifasi kaufela ya bulapeli bwa buhata. Ka 1919, Jehova na lukuluzi Bakreste ba ba tozizwe kwa bulapeli bwa buhata, mi ba zwezipili ku ikambusa kwa lituto za buhata kaufela. Ka ku ba balapeli ba Jehova kacenu, lu ikola ku ba mwa kopano ye kenile mo lu kona ku lapela Jehova ni ku ba ni silikani se si nde ni yena hamohocwalo ni batu ba bañwi.

Bakreste ba ba tozizwe, bona “mutapinyana” ni “buñata bo butuna” bwa “lingu ze ñwi” ba ba nze ba ekezeha ba ketile ku zamaya mwa nzila ye kenile mi ba sweli ku mema batu ba bañwi kuli ba swalisane ni bona. (Luka 12:32; Sin. 7:9; Joa. 10:16) “Nzila ye kenile” i kwalulezwi batu kaufela ba ba tabela ku ‘beela mibili ya bona, kuli ibe sitabelo se si  pila, se si kenile, se si kateleha ku Mulimu.’—Maro. 12:1.

“Mutu Ya Na Ni Masila H’a Na Ku Fita Mwateñi”

Ka 537 B.C.E., Majuda ba ne ba kutela habo bona ne ba tokwa ku latelela taelo ya butokwa ye ne ba filwe. Liñolo la Isaya 35:8b li talusa cwana ka za ba ne ba ka zamaya mwa “Nzila ye kenile,” li li: “Mutu ya na ni masila h’a na ku fita mwateñi; i ka ba ya ba ba kenile fela; ba ba ka zamaya ku yona, niheba likuba, ha ba na ku lateha.” Bakeñisa kuli mulelo wa Majuda wa ku kutela kwa Jerusalema ne li wa kuli ba yo toma sinca bulapeli bo bu kenile, Jehova na sa tokwi batu ba ne ba na ni milelo ye maswe, ba ne ba sa itebuhi lika za kwa moya, kamba ba ne ba eza lika ze masila. Majuda ba ne ba kutela kwa Jerusalema, ne ba lukela ku latelela likuka za Jehova ze pahami. Ni kacenu, batu ba ba bata ku shemubiwa ki Mulimu ba lukela ku eza cwalo. Ba lukela ku zwelapili ‘ku ikenisa ka ku saba Mulimu.’ (2 Makor. 7:1) Kacwalo, ki likezo mañi ze masila ze lu swanela ku tokolomoha?

Muapositola Paulusi na ñozi kuli: “Misebezi ya nama ya zibahala: Ki ku buka, ni buhule, ni mikwa ye masila, ni bubelete.” (Magal. 5:19) Buhule ki somano ya mifuta kaufela ye kopanyeleza ku swala-swala lilama za zwalo za mutu yo si ka nyalana ni yena. Bubelete bu ama “buitamaeli, kutokwa buiswalo, ku tokwa maswabi, ni muzamao o nyenyisa.” Buhule ni bubelete ki mikwa ye sa lumelelani ni bukeni bwa Jehova. Kacwalo, ba ba zwelapili ku eza mikwa ye cwalo ha ba lumelezwangi ku ba mizwale kamba likaizeli mwa puteho ya Sikreste, kamba ba zwisiwanga mwa puteho. Ki nto ye swana ni ku ba ba eza masila a matuna, ili “mikwa ye maswe kaufela ka takazo ye nz’e ekezeha.”—Maef. 4:19.

Pulelo ya kuli “mikwa ye masila” i kopanyeleza libi ze ñata. Linzwi la Sigerike le li tolokilwe kuli “mikwa ye masila” li supa kwa nto ifi kamba ifi ye si ka luka —ibe mwa muzamao, mwa lipulelo kamba mwa swalisano ya luna ni batu ba ba si balapeli. Pulelo yeo i kopanyeleza ni likezo ze sa tokwi katengo ka buatuli. * Kono kana ba ba eza mikwa ye masila yeo ba zamaya mwa nzila ye kenile?

Lu ngeni kuli Mukreste u kala ku buhanga maswaniso a mapunu kwa mukunda. Takazo ye maswe ha i nze i hula hanyinyani-hanyinyani, katulo ya hae ya ku zwelapili ku ba ya kenile fapil’a Jehova i fita fa ku fokola. Mwendi muzamao wa hae ha u si ka fita kale fa ku ba mukwa o maswe hahulu, kono sa tuhezi ku isa pilu ya hae kaufela kwa ‘linto kaufela ze kenile, ze na ni libubo le linde, ze na ni swanelo, ni ze lukela ku lumbwa.’ (Mafil. 4:8) Ku buha maswaniso a mapunu ki mukwa o masila mi u kona ku sinya silikani sa mutu ni Jehova. Mikwa ye masila kaufela ha i swaneli ku bulelwa nihaiba hanyinyani mwahal’a luna.—Maef. 5:3

Mutala o muñwi ki wo. Ha lu ngeni kuli Mukreste u na ni mukwa wa ku icukanga ibe  kuli u eza cwalo hamulaho a ku buha maswaniso a mapunu kamba ku tokwa. Nihaike kuli linzwi la ku “icuka” ha li fumanehi mwa Bibele, kana lwa swanela ku kakanya kuli mukwa wo u silafaza munahano ni maikuto a mutu? Mutu ha zwelapili ni mukwa o silafaza wo, kana silikani sa hae ni Jehova ha si koni ku sinyeha, ni ku tahisa kuli a be ya masila fapil’a Mulimu? Lu utwe kelezo ya muapositola Paulusi ya kuli “lu ikenise kwa masila kaufela a nama ni a moya,” ni kelezo ya kuli lu “bulaye lilama za [luna] ze mwa lifasi, kikuli buhule ni ze masila, ni maikuto a maswe, ni litakazo ze maswe, ni takazo ya ku fuma.”—2 Makor. 7:1; Makolo. 3:5.

Lifasi le, le li busiwa ki Satani li tuhelela mikwa ye masila, mi mane la i susueza. Ku kona ku ba t’ata hahulu kuli mutu a si ke a eza mikwa ye masila. Kono Bakreste ba niti ha ba swaneli ku “pila mo ba pilela bamacaba, ba ba zamaya ka mabubo a lingana za bona.” (Maef. 4:17) Jehova u ka lu lumeleza ku zwelapili ku zamaya mwa “Nzila ye kenile” haiba fela lu tokolomoha muzamao o masila ibe kwa mukunda kamba fa nyangela.

“Ku Yona Ha Ku Na Tau”

Kuli ba kone ku shemubiwa ki Mulimu ya kenile Jehova, batu ba bañwi ba swanela ku eza licinceho ze tuna mwa mizamao ni mwa lipulelo. Liñolo la Isaya 35:9 li bulela kuli: “Ku yona ha ku na tau; ha ku na sibatana se si ka hata mwateñi,” mona mwa “Nzila ye kenile.” Batu ba mifilifili ni ba lindwa ba swanisezwa kwa libatana. Kaniti, ha ba na ku fumaneha mwa lifasi le li nca la Mulimu la ku luka. (Isa. 11:6; 65:25) Kwa swanela he kuli batu kaufela ba ba bata ku shemubiwa ki Mulimu ba tuhele mikwa ya bubatana, mi ba zwelepili ku ba ba ba kenile.

Bibele i lu eleza kuli: “Ze baba kaufela, ni ku nyema, ni buhali, ni komano, ni matapa, ni lunya kaufela li zwiswe ku mina.” (Maef. 4:31) Kwa Makolose 3:8, lu bala kuli: “Mu tobohe linto zeo kaufela, ili buhali ni ku nyema, ni lunya ni linyefulo; mi linzwi le li swabisa li si ke la zwa mwa milomo ya mina.” Lipulelo za “lunya” ni “linyefulo” ze itusisizwe mwa litimana ze peli ze, ka mo ku inezi fela li supa kwa ku bulela lika ze maswe, ze si na tuso, kamba za bunyefuli.

Kacenu, lipulelo ze maswe ni za kashwau se li atile hahulu, mane nihaiba fa lapa. Batu ba ba nyalani ba hanyaukelananga ni ku halifela bana ba bona. Lipulelo ze maswe ze cwalo ha li swaneli ku ba teñi mwa malapa a Bakreste.—1 Makor. 5:11.

Ku Zwelapili “Ku Ikenisa Ka Ku Saba Mulimu” ku Tahisa Limbuyoti!

Ki tohonolo ye tuna ku sebeleza Mulimu ya kenile, Jehova! (Josh. 24:19) Paradaisi ya kwa moya ya lu file Jehova ki ya butokwa hahulu. Kaniti, ku zwelapili ku ba ni muzamao o kenile fapil’a Jehova ki wona mupilelo o munde ka ku fitisisa.

Ona cwale-cwale fa, Paradaisi ya lifasi ya sepisize Mulimu i ka ba teñi. (Isa. 35:1, 2, 5-7) Ba ba nyolelwa Paradaisi yeo ni ku zwelapili ku pila ka ku lumelelana ni za tokwa Mulimu ba ka pila mwateñi. (Isa. 65:17, 21) Kacwalo, haike lu zweleñipili ku lapela Mulimu ka nzila ye kenile ni ku ba ni silikani se si nde hahulu ni yena.

[Litaluso za kwatasi]

[Siswaniso se si fa likepe 26]

Majuda ne ba tokwa ku ezañi kuli ba zamaye mwa “Nzila ye kenile”?

[Siswaniso se si fa likepe 27]

Ku buha maswaniso a mapunu ku sinya silikani sa mutu ni Jehova

[Siswaniso se si fa likepe 28]

‘Likomano ni matapa kaufela li zwiswe ku mina’