Lipuzo Ze Zwa kwa Babali

Muapositola Paulusi na bulezi kuli “Maisilaele ba ka piliswa.” (Maro. 11:26) Kana fo na talusa kuli Majuda kaufela ka nako ye ñwi ne ba ka fetuha ku ba Bakreste?

Batili, Paulusi na sa talusi cwalo. Sicaba sa Isilaele, se ne si simuluha ku Abrahama, ne si hanile Jesu kuli ki Mesia. Mi mwa lilimo za hamulaho wa lifu la Jesu, ne ku iponezwi hande kuli Majuda kaufela ne ba si ke ba fetuha ku ba Bakreste. Niteñi, manzwi a Paulusi a kuli “Maisilaele ba ka piliswa” ne li a niti. Ka nzila ifi?

Jesu na bulelezi baluti ba bulapeli bwa Majuda ba mwa miteñi ya hae kuli: “Mu ka amuhiwa mubuso wa Mulimu, mi u ka fiwa sicaba si sili, se si ka beya lukau lwa ona.” (Mat. 21:43) Bakeñisa kuli sicaba sa Isilaele ne si hanile Jesu, Jehova na ka keta sicaba si sili, se si tozizwe ka moya wa hae. Paulusi na bizize sicaba seo kuli ki “Isilaele wa Mulimu.”—Magal. 6:16.

Litimana ze ñwi mwa Mañolo a Sigerike a Sikreste li bonisa kuli “Isilaele wa Mulimu” ki Bakreste ba ba tozizwe ka moya ba ba eza 144,000. (Maro. 8:15-17; Sin. 7:4) Buka ya Sinulo 5:9, 10 i bonisa kuli mwa sikwata seo ku na ni batu ba bañwi ba ba si Majuda, mi i bonisa kuli Bakreste ba ba tozizwe ba “zwa mwa masika kaufela, ni mwa lipuo, ni mwa mishobo, ni mwa macaba.” Bakreste ba ba tozizwe, ili Isilaele wa kwa moya, ne ba ketilwe kuli ba be “malena ni baprisita . . . , mi ba ka busa lifasi.” Nihaike kuli Jehova na hanile sicaba sa Isilaele, Maisilaele ba bañwi ne ba kona ku kutela ku Mulimu. Baapositola ni Bakreste ba bañata ba bañwi ba makalelo ne ba ezize cwalo. Ka ku swana ni batu kaufela, Majuda bao ne ba na ni ku lekiwa ka mali a Jesu Kreste.—1 Tim. 2:5, 6; Maheb. 2:9; 1 Pit. 1:17-19.

Nihaike kuli Majuda ba ka sipepo ba mwa linako za baapositola ne ba latehezwi ki tohonolo ya ku busa ni Jesu, mulelo wa Mulimu ona ne u si ka pala. Mulelo wa Mulimu ha u koni ku paleliswa, kakuli Jehova ka mupolofita wa hae na bulezi kuli: “Ki mo ku inezi ni kwa linzwi la ka, le li zwa mwa mulomo wa ka; ha li na ku kutela ku Na mukungulu, li si ka sebeza se si latwa ki Na, ni ku eza ze ni li lumezi.”—Isa. 55:11.

Ka ku ya ka manzwi ao, mulelo wa Mulimu wa kuli babusi ba 144,000 ba buse ni Mwan’a hae mwa lihalimu u ka petahala. Bibele i bonisa hande kuli Mulimu u ka toza batu ba ba kwanile ba ba eza 144,000. Ha ku na ya ka tondahala!—Sin. 14:1-5.

Kacwalo, Paulusi ha na ñozi kuli “Maisilaele ba ka piliswa,” na sa talusi kuli Majuda kaufela ne ba ka fetuha ku ba Bakreste. Kono na talusa kuli mulelo wa Mulimu wa kuli Maisilaele ba kwa moya ba 144,000 ba buse ni Mwan’a Hae Jesu Kreste mwa lihalimu ne u ka talelezwa. Ka nako ya ketile Mulimu, “Maisilaele” ba ka piliswa ni ku busa sina malena ni baprisita mwa mubuso wa Mesia.—Maef. 2:8.

[Maswaniso a fa likepe 28]

Ba ba tozizwe ba “zwa mwa masika kaufela, ni mwa lipuo, ni mwa mishobo, ni mwa macaba”