Mu Ipeye Kwatas’a Tamaiso ya Jehova
Mu Ipeye Kwatas’a Tamaiso ya Jehova
“Ku lata Mulimu, kiha lu mamela litaelo za hae; mi litaelo za hae ha li na bukiti.”—1 JOA. 5:3.
1, 2. (a) Ki kabakalañi batu ba bañata kacenu ha ba sa lati ku zamaiswa? (b) Kana ba ba ipapata kuli ha ba zamaiswi ki niti kuli luli ha ba zamaiswi? Mu taluse.
BATU ba bañata kacenu ha ba tabeli ku zamaiswa ki mutu yo muñwi. Ba ba ipapata kuli bona ha ba zamaiswi ba na ni moya wa kuli, “Na ha ku na ya kona ku ni bulelela ze ni swanela ku eza.” Kono kana ki niti kuli batu bao ha ba zamaiswi? Kutokwa! Buñata bwa bona ba latelela fela mupilelo wa batu ba bañwi ba bañata-ñata ba ba “likanyisa lifasi le.” (Maro. 12:2) Mi mane sina mwa boniseza muapositola Pitrosi, batu bao ki “batanga ba ku bola.” (2 Pit. 2:19) Ba ya “ka mukwa wa lifasi le, ka mukwa wa mulena [muñ’a] mata a’ inzi mwa sibaka sa mbyumbyulu,” yena Satani Diabulosi.—Maef. 2:2.
2 Muñoli yo muñwi na kile a itundumuna kuli: “Ha ni lumelezi bashemi ba ka kamba yo muhulu wa bulapeli . . . kamba Bibele ku ni ketela ze ni swanela ku eza.” Ki niti kuli ba bañwi ba kona ku itusisa maswe m’ata a bona mi kabakaleo lu kona ku sa ba utwa. Kono kana ku latula kuli ha lu tokwi ketelelo ku ka tatulula butata bo? Kuli mu bale fela ka bukuswani litoho za makande mwa mitende, mu ka fumana kuli batu ba tokwa tamaiso luli. Ki bumai kuli ka nako ye ba tokwa hahulu tamaiso batu, ba bañata ba bata ku eza lika mo ba latela.
Mo Lu Ngela Tamaiso
3. Bakreste ba mwa linako za baapositola ne ba bonisize cwañi kuli ne ba sa ezi fela ze ne ba laelwa kaufela ki batu?
3 Ka ku ba Bakreste, lu shutana ni lifasi ka mo lu ngela tamaiso. Fo, ha ku talusi kuli lu eza fela ze lu bulelelwa kaufela lu sa li nahanisisi. Fokuñwi lu swanela ku hana ku eza ze lu laelwa ki ba bañwi ku si na taba ni mayemo a bona. Bakreste ba mwa linako za baapositola ni bona ne ba ezize cwalo. Ka mutala, baapositola ha ne ba laezwi kuli ba tuhele ku kutaza, ne ba si ka saba muprisita yo mutuna ni batu ba bañwi ba ne ba na ni litulo mwa kuta ya Sanhedrini. Ne ba si ka tuhela ku eza ze lukile kuli ba latelele milao ya batu.—Mu bale Likezo 5:27-29.
4. Ki mitala ifi ya mwa Mañolo a Siheberu ye bonisa kuli batu ba Mulimu ba bañata ne ba si ka eza lika ze ne tabelwa ki batu?
4 Batanga ba Mulimu ba bañata ba ne ba pilile pili Bukreste bu si ka taha kale ni bona ne ba ikatulezi ku sa latelela fela ze ne ba bulelelwa ki babusi ba batu. Ka mutala, Mushe na “hanile ku bizwa mwan’a Mukwae mwan’a Faro; kono a iketela ku nyanda ni sicaba sa Mulimu,” nihaike ha na ezize cwalo na na ni ku baleha kabakala “buhali bwa mulena.” (Maheb. 11:24, 25, 27) Josefa na hanile ku fosa ni musal’a Potifaro ya na kona ku yolisa misuha ka ku eza Josefa maswe. (Gen. 39:7-9) Daniele ‘na lelile mwa pilu ya hae kuli h’a na ku isilafaza ka lico za mulena,’ nihaike ne ku li t’ata kuli kupo ya hae i amuhelwe ki nduna wa likombwa wa Babilona. (Dan. 1:8-14) Mitala yeo i bonisa kuli kwaikale, batu ba Mulimu ne ba tundamezi ze lukile, ku si na taba ni likozi ze ne ba tahezi kabakala ku eza cwalo. Ne ba si ka utwa batu kuli ba amuhelwe ki bona; ni luna lu swanela ku ba likanyisa.
5. Lu shutana cwañi ni lifasi mwa taba ya ku zamaiswa?
5 Ku tundamena ze lukile ka bundume ha ku talusi kuli lu na ni muñaña-toho; mi ha lu swani ni ba ba fetuhelanga babusi ba bona ka mulelo wa ku bonisa fela kuli ha ba lumelelani ni bona. Kono lu ikatulezi ku ipeya kwatas’a tamaiso ya Jehova ku fita ku utwa batu. Haiba milao ya batu i lwanisana ni ya Mulimu, lwa ziba ze lu swanela ku eza. Sina mo ne ba ezelize baapositola, ni luna lu utwa Mulimu ku fita batu.
6. Ki kabakalañi ha lu swanela ku mamela litaelo za Mulimu kamita?
6 Ki nto mañi y’e lu tusize ku ipeya kwatas’a tamaiso ya Mulimu? Lu lumela manzwi a kwa Liproverbia 3:5, 6 a li: “U sepe [Muñ’a] Bupilo ka pilu ya hao kaufela, mi u si ke wa tiyela fa butali bwa hao; u beye [Muñ’a] Bupilo mwa milelo ya hao kaufela, mi Yena u ka lukisa linzila za hao.” Lu na ni sepo ya kuli ku eza za tokwa Mulimu ku luna kaufela ku ka lu tusa. (Mu bale Deuteronoma 10:12, 13.) Kaniti, Jehova na taluselize Maisilaele kuli: “Ni ku luta se si ku swanela, ni ku zamaisa ka nzila y’o lukela ku zamaya ku yona.” Kihona a ekeza kuli: “Mawe, kabe n’o utwile milao ya ka! n’o kabe u pilile mwa kozo ye swana inge nuka; ze lukile za hao ne li kabe li bonahala sina mandinda a mwa liwate.” (Isa. 48:17, 18) Manzwi ao lwa a lumela. Lu na ni buikolwiso bwa kuli ku mamela litaelo za Mulimu ku ka lu tusa kamita.
7. Lu swanela ku ezañi haiba lu sa utwisisi hande taelo ye ñwi ye bonisizwe mwa Linzwi la Mulimu?
7 Lu ipeya kwatas’a tamaiso ya Jehova ni ha lu sa utwisisi hande libaka Linzwi la hae ha li lu laela ku eza nto ye ñwi. F’o ha ku talusi kuli lu batu ba ba lumela-lumela fela lika; ku talusa kuli lu sepile Mulimu. Lu na ni buikolwiso bwa kuli Jehova u lu ezezanga ze nde. Hape ku utwa Mulimu kwa luna ku bonisa kuli lwa mu lata, kakuli muapositola Joani na ñozi kuli: “Ku lata Mulimu, kiha lu mamela litaelo za hae; mi litaelo za hae ha li na bukiti.” (1 Joa. 5:3) Kono hape ku na ni nzila ye ñwi ye lu kona ku bonisa ka yona kuli lwa ipeya kwatas’a tamaiso ya Mulimu.
Ku Twaelisa Kutwisiso ya Luna
8. ‘Ku twaelisa kutwisiso’ ya luna ku zamaelela cwañi ni ku ipeya kwatas’a tamaiso ya Jehova?
8 Bibele i lu bulelela kuli lu swanela ku twaelisa ‘kutwisiso ya luna ya ku keta ze nde ku ze maswe.’ (Maheb. 5:14) Kacwalo mulelo wa luna hasi wa ku mamela fela milao ya Mulimu lu sa i nahanisisi; kono lu bata ku “keta ze nde ku ze maswe” ka ku itusisa likuka za Jehova. Lu bata ku bona mo li kona ku lu tuseza linzila za Jehova kuli ni luna lu kone ku bulela sina walisamu ya na ize: “Mulao wa hao u mwa pilu ya ka.”—Samu 40:8.
9. Lu kona ku ezañi kuli lizwalo la luna li lumelelane ni likuka za Jehova, mi ki kabakalañi ha lu swanela ku eza cwalo?
9 Kuli lu utwisise butokwa bwa milao ya Mulimu sina mwa na ezelize walisamu, lu tokwa ku nahanisisa ze lu bala mwa Bibele. Ka mutala, ha lu ituta ka za taelo ye ñwi ya Jehova, lwa kona ku ipuza kuli: ‘Ki kabakalañi sikuka se kamba mulao wo ha u li o tusa? Ki kabakalañi ha ni swanela ku u mamela? Ki likozi mañi ze tahezi batu ba ba keshebisize kelezo ya Mulimu ye?’ Haiba lizwalo la luna li lumelelana ni linzila za Jehova, likatulo za luna li ka ba ze lumelelana ni tato ya hae. Lu ka ‘utwiseza se si latwa ki Mulena,’ Jehova, ni ku zwelapili ku ipeya ku utwa. (Maef. 5:17) Hañata ku eza cwalo hasi nto ye bunolo.
Satani U Lika ku Lwanisa Tamaiso ya Mulimu
10. Ki ifi nzila yeo Satani a likile ku lwanisa ka yona tamaiso ya Mulimu?
10 Satani u kalile kale ku lwanisa tamaiso ya Mulimu. Moya wa hae wa buipanguli u iponahaza mwa linzila ze ñata. Ka mutala, ha mu nyakisise taba ya ku sa kuteka tukiso ya Mulimu ya linyalo. Batu ba bañwi ba iketela ku pila hamoho ba si ka nyalana, mi ba bañwi bona ba bata ku felisa manyalo a bona. Batu bao kaufela ba kona ku lumela manzwi a mubapali wa musali ya tumile ya na ize: “Ha ku konahali kuli munna kamba musali a nyalane fela ni mutu a li muñwi.” Na ekelize kuli: “Ha ku na mutu ye ni ziba ya kona ku nyalana fela ni mutu a li muñwi, mi ha ku na ya bata ku eza cwalo.” Mubapali yo muñwi wa munna ya tumile ni yena na bulezi taba ye swana ha na hupula za manyalo a hae a na palile. Na ize: “Ha ni sepi kuli kona mo ne lu bupezwi luli kuli lu nyalanange fela ni mutu a li muñwi mwa bupilo bwa luna kaufela.” Lu swanela ku ipuza kuli: ‘Kana na ipeya kwatas’a tamaiso ya Jehova mwa taba ye ya linyalo, kamba kana ki kale ni anya moya wa lifasi wa kuli linyalo ki la swalelele fela?’
11, 12. (a) Ki kabakalañi ba banca ha ku kona ku ba bela t’ata ku ipeya kwatas’a tamaiso ya Jehova? (b) Mu taluse ze ne ezahezi ku Mukreste yo muñwi ze bonisa kuli ku keshebisa milao ni likuka za Jehova ki bukuba.
11 Kana mu ba banca ba ba sebeleza Jehova mwa kopano ya hae? Haiba ku cwalo, mu zibe kuli Satani sihulu u bata kuli mu ikutwe kuli ha mu tokwi tamaiso ya Jehova. “Litakazo za kwa bucaha,” ku kopanyeleza cwalo ni kukuezo ya litaka, za kona ku mi nahanisa kuli milao ya Mulimu i bukiti. (2 Tim. 2:22) Mu si ke mwa tuhelela nto yeo ku ezahala. Mu ikataze ku latelela likuka ze nde za Mulimu. Ka mutala, Bibele i mi bulelela kuli “mu sabe buhule.” (1 Makor. 6:18) Ka za taba yeo hape, mu ipuze kuli: ‘Ki kabakalañi taelo ye ha i li ye nde? Ku i mamela ku ni tusa cwañi?’ Mwendi mwa ziba ba bañwi ba ne ba tahezwi ki kozi kabakala ku keshebisa likelezo za Mulimu. Kana batu bao ba tabile luli cwale? Kana se ba pila hande ku fita mo ne ba pilela ha ne ba swalisana ni kopano ya Jehova? Kana luli ba fumani tabo ye ba si ka fumana batanga ba bañwi ba Mulimu?—Mu bale Isaya 65:14.
12 Ha mu nyakisise manzwi a’ kile a bulela Mukreste ya bizwa Sharon: “Bakeñisa ku sa mamela mulao wa Jehova, ni yambuzi butuku bo bu bulaya bwa AIDS. Ni sa hupula lilimo ze ñata ze tabisa ze ni ikozi ku sebeleza Jehova.” Sharon na lemuhile kuli ne li bukuba luli ku loba milao ya Jehova ni kuli na swanela ku lemuha butokwa bwa yona. Milao ya Jehova i tomezwi ku lu sileleza. Ku zwa fa ñolela manzwi a fahalimu ao, ne ku fitile fela lisunda ze supile, mi Sharon a timela. Sina mo li boniseza ze ne ezahezi ku Sharon, Satani h’a na ze nde za kona ku fa batu ba lifasi la hae le li maswe. Ka ku ba “ndat’ahe lishano,” Satani u sepisa lika ze ñata, kono u palelwa ku li taleleza sina mwa na palelezwi ku taleleza sepiso ya hae ku Eva. (Joa. 8:44) Kaniti, ku ipeya kwatas’a tamaiso ya Jehova kamita kwa tusa luli.
Mu Tokomele Moya wa Buipanguli
13. Lu swanela ku tokolomoha cwañi moya wa buipanguli?
13 Kuli lu ipeye kwatas’a tamaiso ya Jehova, lu tokwa ku tokolomoha moya wa buipanguli. Bakeñisa ku ikuhumusa lu kona ku nahana kuli ha lu tokwi ku zamaiswa ki mutu ufi kamba ufi. Ka mutala, lu kana lwa hanyeza kelezo ye fiwa ki ba ba zamaisa mwahal’a batu ba Mulimu. Mulimu u tomile tukiso ya kuli mutanga ya sepahala, ya na ni kutwisiso a lukise lico za kwa moya ka nako ye lukela. (Mat. 24:45-47) Lu swanela ku lemuha kuli Jehova u itusisa mutanga ya sepahala, ya na ni kutwisiso kuli a babalele batu ba hae kacenu. Mu likanyise baapositola ba ne ba sepahala. Balutiwa ba bañwi ha ne ba sitatalisizwe, Jesu na buzize baapositola kuli: “Mina bo, kikuli ha mu lati ku ikela ni mina?” Pitrosi na alabile kuli: “Mulena, lu ka ya ku mañi? U na ni manzwi a bupilo bo bu sa feli.”—Joa. 6:66-68.
14, 15. Ki kabakalañi ha lu swanela ku mamela likelezo ze tomile fa Bibele?
14 Ku ipeya kwatas’a tamaiso ya Jehova ku kopanyeleza ku mamela likelezo ze tomile fa Linzwi la hae. Ka mutala, mutanga ya sepahala, ya na ni kutwisiso u zwezipili ku lu lemusa kuli lu “tone mi lu iswale.” (1 Mates. 5:6) Kelezo yeo ya swanela luli mwa mazazi a, a maungulelo ili mo ba bañata ki “baitati, ba ba lata mali.” (2 Tim. 3:1, 2) Kana mikwa yeo ya kona ku lu tahiseza butata? Eni ya kona. Ku ndongwama likonkwani za lifasi ku kona ku tisa kuli lu lobale kwa moya, kamba mane ku lata bufumu. (Luka 12:16-21) Kacwalo lu eza ka butali ha lu mamela likelezo za Bibele ni ku ambuka moya wa buitati o yambile lifasi le la Satani!—1 Joa. 2:16.
15 Lico za kwa moya ze zwa ku mutanga ya sepahala, ya na ni kutwisiso li abelwa kwa liputeho ki maeluda ba ba ketilwe. Bibele i lu susueza kuli: “Mu utwe bazamaisi ba mina, mi mu ipeye kwatas’a bona; kakuli ba tonela mioya ya mina, hailifo ba ka buzwa za yona. Mu ba utwe; kuli ba eze musebezi wo ka tabo, isi ka ku tonga ko ku si na ku mi tusa se siñwi.” (Maheb. 13:17) Kana manzwi ao a talusa kuli maeluda mwa puteho ba petahalile? Batili! Mulimu u bona mifokolo ya bona hande ku fita mutu ufi kamba ufi. Kono u sa lu tokwa kuli lu ba utwe. Ku swalisana ni maeluda niha ba si ka petahala ku bonisa kuli lwa ipeya kwatas’a tamaiso ya Jehova.
Butokwa bwa Buikokobezo
16. Lu kona ku kuteka cwañi Jesu, yena Toho ya puteho ya Sikreste?
16 Lu swanela ku hupulanga kuli Jesu ki yena Toho luli ya puteho. (Makolo. 1:18) Leo ki le liñwi la mabaka ha lu mamela likelezo ze ba lu fa maeluda ba ba ketilwe, mi ku eza cwalo ki ku ba ‘kuteka hahulu.’ (1 Mates. 5:12, 13) Mi maeluda mwa puteho ni bona ba swanela ku bonisa kuli ba ipeya kwatasi ka ku tokomela hahulu kuli ba lute puteho linzwi la Mulimu, isiñi mihupulo ya bona ka sibili. Ba swanela ku “buluka milao mo i ñolezwi” ilikuli ba si ke ba hasanya litaba za bona za ku ikupulela.—1 Makor. 4:6; Bibele ye Kenile, hatiso ya 1984.
17. Ki kabakalañi moya wa ku bata libubo ha u li o maswe?
17 Ba ba mwa puteho kaufela ba swanela ku tokomela moya wa ku bata libubo. (Joa. 5:44) Ku bonahala kuli wo kona moya o ne u kenezi mulutiwa yo muñwi ya na kopani ni yena muapositola Joani. Joani na ñozi kuli: “Diotrefi ya lata ku ipeya kwapili h’a lu amuheli. Cwale, ha ni taha, ni ka mi hupulisa misebezi ya hae, y’a eza h’a lu sebanga ka manzwi a’ na ni lunya.” (3 Joa. 9, 10) Ni luna lwa kona ku ituta se siñwi mwa taba yeo. Haiba lu lemuha kuli se lu kenelwa ki minahano ya ku bata libubo, lu swanela ku i ambuka. Bibele i lu bulelela kuli: “Buikuhumuso bu zamaya shandauko kwapili, mi ku izinika ku isa kwa ku wa.” Ba ba ipeya kwatas’a tamaiso ya Mulimu ba swanela ku ambuka lilaba la buikuhumuso, bakeñisa kuli bu tisa maswabi.—Liprov. 11:2; 16:18.
18. Ki nto mañi ye ka lu tusa kuli lu ipeye kwatas’a tamaiso ya Jehova?
18 Kaniti, mu eze buikatazo bwa ku hanyeza moya wa lifasi wa ku ipangula mi mu ipeye kwatas’a tamaiso ya Jehova. Ka linako ze ñwi, mu kengeyelange tohonolo ye tuna ye mu na ni yona ya ku sebeleza Jehova. Ku ba kwa mina mwahal’a batu ba Mulimu ki bupaki bwa kuli Jehova u mi bizize ka moya wa hae o kenile. (Joa. 6:44) Mu si ke mwa keshebisa bulikani bwa mina ni Mulimu. Mu ikataze ku bonisa mwa bupilo bwa mina kaufela kuli mwa hanyeza moya wa buipanguli ni kuli mwa ipeya kwatas’a tamaiso ya Jehova.
Kana Mwa Hupula?
• Ku ipeya kwatas’a tamaiso ya Jehova ku kopanyelezañi?
• Ku twaelisa kutwisiso ya luna ku swalisana cwañi ni ku ipeya kwatas’a tamaiso ya Jehova?
• Satani u lika cwañi ku lwanisa tamaiso ya Mulimu?
• Ki kabakalañi ha lu tokwa ku ba ni buikokobezo kuli lu ipeye kwatas’a tamaiso ya Jehova?
[Lipuzo za Tuto]
[Siswaniso se si fa likepe 18]
“Ki swanelo kuli lu utwe Mulimu ku fita batu”
[Siswaniso se si fa likepe 20]
Lu bonisa kuli lu na ni butali ha lu latelela likuka za Mulimu kamita