“Ki Mulimu Ya Melisa”!
“Ki Mulimu Ya Melisa”!
“Ya na ni taba, hasi yena ya cala, kamba ya selaela; kono ki Mulimu ya melisa.”—1 MAKOR. 3:7.
1. Lu “ba ba sebeza ni Mulimu” ka mukwa ufi?
MUAPOSITOLA PAULUSI na talusize kuli kaufela luna lwa kona ku ba ni tohonolo ya ku ba “ba ba sebeza ni Mulimu.” (Mu bale 1 Makorinte 3:5-9.) Paulusi fo, na talusa musebezi wa ku luta batu kuli ba be balutiwa. Na bapanyize musebezi wo kwa musebezi wa ku cala ni ku selaela peu. Kuli lu kondise mwa musebezi o butokwa wo, lu tokwa tuso ya Jehova. Paulusi u lu hupulisa kuli “ki Mulimu ya melisa.”
2. Ki kabakalañi ku ziba kuli ‘Mulimu ki yena ya melisa’ ha ku lu tusa ku ba ni mubonelo o munde wa bukombwa bwa luna?
2 Ku ziba kuli Mulimu ki yena ya melisa ku lu tusa ku ba ni mubonelo o munde wa bukombwa bwa luna. Lu kana lwa sebeza ka t’ata mwa ku kutaza ni ku luta batu, kono kwa mafelelezo Jehova ki yena ya fiwa tumbo kaufela haiba mutu yo muñwi a ba mulutiwa yo munca. Ki kabakalañi ha ku li cwalo? Kakuli niha lu ka sebeza ka t’ata, ha ku na ni yo mukana ku luna ya kona ku utwisisa hande mo ku tahelanga kuli mutu a be mulutiwa kamba ku tahisa kuli ku be cwalo. Mulena Salumoni na talusize hande taba yeo ha na ñozi kuli: “Ha u zibi musebezi wa Mulimu ya eza linto kaufela.”—Muek. 11:5.
3. Musebezi wa ku cala peu u swana cwañi ni musebezi wa ku luta batu kuli ba be balutiwa?
3 Kana lwa swanela ku zwafa mwa musebezi wa luna wa ku kutaza bakeñisa kuli ha lu koni ku utwisisa mo ku telanga luli kuli mutu a be mulutiwa? Batili. Mane lu swanela ku ba ni tabo. Mulena Salumoni na ize: “Cala peu ya hao isali kakusasana, mi u si ke wa pumulisa mazoho a hao ka swalala; kakuli ha u zibi kuli ku ka mela peu ifi, kamba ye, kamba yani, kamba mwendi li ka mela hande ze peli.” (Muek. 11:6) Kaniti, ha lu cala peu, ha lu zibangi peu ye ka mela kuli ki ifi, kamba mane nihaiba kuli i ka mela kamba cwañi. Ku na ni lika ze ñata ze lu sa koni ku zamaisa. Musebezi wa ku luta batu kuli ba be balutiwa ni ona u cwalo. Jesu na talusize niti yeo mwa linguli za hae ze peli ze n’e ñolezwi luna mwa kauhanyo ya bune ya Evangeli ya Mareka. Ha lu boneñi ze lu kona ku ituta kwa linguli ze peli zeo.
Mibu ya Mifuta-Futa
4, 5. Mu taluse ka bukuswani nguli ya Jesu ye kwa Mareka 4:1-9.
4 Sina mo ku ñolezwi kwa Mareka 4:1-9, Jesu u talusa za mucali ya hasa peu ye yo wela mwa mibu ya mifuta-futa. U li: “A mu teeleze: Mucali n’a zwile ku y’o cala. Ha nz’a cala, peu ye ñwi ya wela mwa nzila, mi linyunywani za taha, za i ca. Peu ye ñwi ya wela mwa mubu o kopani ni macwe, mo ku si na mubu o muñata; ya mela kapili kakuli n’e si ka kena hahulu mwa mubu; kono lizazi ha li pahama, ze melile za letuka: mi kakuli ne li tokwile mili, za oma. Ye ñwi peu ya wela mwa mikakani; mikakani ha i hula ya i pukutisa, mi peu ya tokwa ku beya. Peu ye ñwi ya wela mwa mubu o munde, mi ya beya lico ze ñata, inze i mela ni ku tiya; peu i liñwi ya beya ze mashumi a malalu; ye ñwi ya beya ze mashumi a keta-lizoho ka li li liñwi; ye ñwi ya beya mwanda.”
5 Mwa miteñi ye ne ñolwa Bibele, peu ne i caliwanga ka ku i hasa. Mucali na lwalanga peu mwa kalulo ye putilwe ya siapalo sa hae kamba mwa mukotana ni ku i hasa ka lizoho. Kacwalo mwa nguli ye, mucali ha cali peu mwa mibu ya mifuta-futa ka mabomu. Kono peu ye hasizwe i wela mwa libaka ze fitana-fitana.
6. Jesu na talusize cwañi nguli ya mucali?
6 Ha lu tokwi ku nuha taluso ya nguli yeo. Jesu na zwezipili ku i talusa sina mo ku ñolezwi kwa Mareka 4:14-20. Na ize: “Mucali ki ya cala Linzwi. Ba ba inzi mabapa ni nzila, ki bona be Linzwi li calilwe ku bona; ba sin’o li utwa, Satani u pakisa ku taha mi u feza Linzwi le li calilwe ku bona. Kamukwaocwalo, ba bañwi ki ba ba amuhezi Linzwi mwa mubu o kopani ni macwe; mi ha ba utwa Linzwi ba pakisa ku li amuhela ka tabo; kono ha ba na mili ku bona; ba tundamena nako ye nyinyani fela; mihe butata, kamba manyando h’a taha kabakala Linzwi, ba pakisa ku fumana mwateñi libaka la ku wa. Ba bañwi hape ki ba ba amuhezi Linzwi mwa mikakani; ki ba ba utwile Linzwi, kono lipilaelo za lifasi, ni ku pumwa ki bufumu, ni ku lakaza ze ñwi, ha li kena ku bona, li pukutisa Linzwi, mi li tokwa ku beya. Kono ba ba amuhezi peu mwa mubu o munde, ki ba ba utwa Linzwi, ba li amuhela mi ba beya; peu i liñwi i beya ze mashumi a malalu; ye ñwi ze mashumi a keta-lizoho ka li li liñwi; ye ñwi i beya mwanda.”
7. Peu ni mibu ya mifuta-futa li yemelañi?
7 Mu lemuhe kuli Jesu ha buleli kuli mucali u itusisa peu ya mifuta-futa. Kono u bulela za peu ya mufuta u li muñwi ye wela mwa mibu ya mifuta-futa, ili ku beya siselo ka ku shutana-shutana. Mubu wa pili u t’ata; wa bubeli ha u si ka tunga; wa bulalu u tezi mikakani; mi wa bune ki mubu o munde ili o beya lico ze ñata. (Luka 8:8) Peu yeo ki nto mañi? Ki taba ya Mubuso ye mwa Linzwi la Mulimu. (Mat. 13:19) Mibu ya mifuta-futa yona i yemelañi? I yemela batu ba lipilu ze shutana-shutana.—Mu bale Luka 8:12, 15.
8. (a) Mucali u yemela bomañi? (b) Ki kabakalañi batu ba ba bulelelwa taba ya Mubuso ha b’a nganga mihato ye shutana-shutana?
8 Mucali u yemela bomañi? U yemela ba ba sebeza ni Mulimu, bona ba ba zibahaza taba ye nde ya Mubuso. Sina mo ne ba ezelize bo Paulusi ni Apolosi, ba cala peu ni ku i selaela. Kono niha ba sebeza ka t’ata cwalo, ze ba peta za shutana. Libaka? Kakuli Lipilu za ba ba utwa taba ya Mubuso za shutana. Mwa nguli ye, mucali ha na m’ata fahalimu a ze petiwa zeo. Yeo ki taba ye omba-omba luli, sihulu kwa mizwale ni likaizeli ba luna ba ba sebelize ka lilimo na lilimo ku si na ze ñata ze zwile mwa ku eza cwalo! * Ki kabakalañi taba yeo ha i li ye omba-omba?
9. Ki taba ifi ye susueza ya na talusize muapositola Paulusi ni Jesu?
9 Busepahali bwa mucali ha bu boniswi ka za peta mwa musebezi wa hae. Paulusi na amile kwa taba yeo ha na ize: ‘Yo muñwi ni yo muñwi u ka amuhela mupuzo wa hae luli, ka tikanyo ya musebezi wa hae.’ (1 Makor. 3:8) Mucali u fumana mupuzo ka mwa ezeza musebezi wa hae, isiñi ka ze petwa ki musebezi wo. Jesu ni yena na talusize taba yeo balutiwa ba hae ha ne ba kutile ku zwa mwa ku kutaza. Ne ba tabile hahulu kakuli ne ba tuzi mioya ye maswe ka libizo la Jesu. Niha ne ba tabile cwalo, Jesu na ize ku bona: “Mu si ke mwa taba kakuli mu kona mioya; kono mu tabe kakuli mabizo a mina a ñozwi mwa lihalimu.” (Luka 10:17-20) Musebezi wa mucali niha u sa tahisi balutiwa ba banca ba bañata, fo ha ku talusi kuli mucali ha si ka sebeza ka t’ata kamba ku sepahala sina bacali ba bañwi. Ze petwa sihulu li itingile fa lipilu za batu ba ba utwa taba ya Mubuso. Kono kwa mafelelezo, Mulimu ki yena ya melisa peu!
Ze Ba Swanela ku Eza Ba Ba Utwa Linzwi
10. Ki nto mañi ye bonisa kuli mutu ya utwa linzwi u ka swana sina mubu o munde kamba ku tokwa?
10 Ba ba utwa linzwi ba swanela ku ezañi? Kana muhato o ba nganga wa zibelwanga cimo? Batili. Ki bona ka sibili ba ba ka iketela ku ba sina mubu o munde kamba ku tokwa. Kaniti, pilu ya mutu ya kona ku fetuha ku ba ye nde. (Maro. 6:17) Mwa nguli ya hae, Jesu na bulezi kuli ba bañwi ‘ba sin’o utwa linzwi,’ Satani u pakisa ku taha mi u feza kamba ku zwisa linzwi leo mwa lipilu za bona. Kono taba yeo ya kona ku tibelwa kuli isike ya ezahala. Kwa Jakobo 4:7, Bakreste ba susuezwa kuli ba “hanele Diabulosi,” mi u ka saba ku bona. Jesu u talusa kuli ba bañwi ba ka pakisa ku amuhela linzwi ka tabo; kono bakeñisa kuli “ha ba na mili ku bona,” ba pakisa ku fumana mwateñi libaka la ku wa kamba ku sitatala. Kono batanga ba Mulimu ba susuezwa ku “tiya” ilikuli ba kone ku utwisisa hande “fo ku kuma bupala bwa linzwi, ni butelele bwa lona, ni butungi bwa lona, ni butelele bwa lona bwa ku ya kwahalimu, mi [ba] zibe lilato la Kreste le li fita zibo kamukana.”—Maef. 3:17-19; Makolo. 2:6, 7.
11. Mutu u kona ku tibela cwañi lipilaelo za bupilo ni bufumu kuli li si ke za pukutisa linzwi?
11 Ba bañwi ba ba utwile linzwi ba taluswa kuli ba tuhelela “lipilaelo za lifasi, ni ku pumwa ki bufumu, ni ku lakaza ze ñwi” ku kena ku bona ni ku pukutisa linzwi, mi li tokwa ku beya. (1 Tim. 6:9, 10) Ba kona ku ambuka cwañi butata bo? Muapositola Paulusi u alaba kuli: “Mwa mukwa wa mina, lilato la ku lata bufumu li be siyo; mu kolwe ki se mu na ni sona; kakuli Mulimu u ize: Ha ni na ku ku tuhela, ha ni na ku ku fulalela.”—Maheb. 13:5.
12. Ki kabakalañi ba ba swana sina mubu o munde ha ba beya ka ku shutana-shutana?
12 Ka ku feza nguli ya hae, Jesu u bulela kuli peu ye cezwi mwa mubu o munde ya beya, “peu i liñwi i beya ze mashumi a malalu; ye ñwi ze mashumi a keta-lizoho ka li li liñwi; ye ñwi i beya mwanda.” Nihaike kuli ba bañwi ba ba amuhela linzwi ba na ni lipilu ze nde mi ba beya lico, ze ba kona ku eza mwa musebezi wa ku zibahaza taba ye nde li itingile fa miinelo ya bona. Ka mutala, busupali kamba butuku bo bu fokolisa bu kona ku palelwisa ba bañwi ku peta ze ñata mwa musebezi wa ku kutaza. (Mu bapanye Mareka 12:43, 44.) Hape mucali u kona ku eza ze nyinyani ka za matata ao kamba mane ha ku na za kona ku eza ka za teñi, kono u ba ni tabo ha bona kuli Jehova u melisize peu.—Mu bale Samu 126:5, 6.
Mucali wa Peu Ya Lobezi
13, 14. (a) Mu taluse ka bukuswani nguli ya Jesu ye kwa Mareka 4:1-9. (b) Mucali u yemela bomañi mi peu ki nto mañi?
13 Kwa Mareka 4:26-29, lu fumana kwateñi nguli ye ñwi ya mucali. Ko lu bala kuli: “Za mubuso wa Mulimu li swana inge mutu ya calile peu mwa mubu; nih’a lobala kamba a tona, busihu ni musihali, peu inz’e hula mw’a sa zibi. Kakuli mubu ili ona wa beya, pili ki mitungo, kwapili ki sikunka, kiha ku taha bubeke bo bu inzi mwa sikunka. Mi mabele ha s’a buzwize, ku iswa licekesi kapili; kakuli se li nako ya ku kutula.”
14 Mucali yo ki mañi? Ba bañwi ba bulapeli bo bu ipala kuli ki bwa Sikreste ba bulelanga kuli Jesu ki yena mucali. Kono ku konwa ku bulelwa cwañi kuli Jesu wa lobalanga mi ha zibi mo i hulela peu? Kaniti Jesu wa ziba mo i hulela peu! Mucali yo u swana ni ya bulezwi kwa makalelo, mi u yemela bakutazi ba taba ye nde ya Mubuso, ba ba cala peu ya Mubuso ka ku tukufalelwa musebezi wa bona wa ku kutaza. Peu ye hasezwa fafasi ki linzwi le ba kutaza.
15, 16. Jesu na talusize taba ifi ya niti mwa nguli ya hae ya mucali ka za mo i hulela peu ni mwa hulela mutu kuli a be mulutiwa?
15 Jesu u bulela kuli mucali u ‘lobala kamba ku tona, busihu ni musihali.’ Fo ha ku talusi kuli mucali u keshebisa musebezi wa hae. Ku bonisa fela mupilelo wa batu ba bañata wa ka zazi ni zazi. Mubulelelo o ñozwi mwa timana yeo u bonisa mukwa wa ku sebezanga musihali ni ku lobala busihu. Jesu na talusize ze ne ezahezi ka nako yeo. U bulela kuli “peu [ne] inz’e hula mw’a sa zibi” mucali. Jesu fo na bonisa kuli peu ne i sweli ku hula ka ili yona.
16 Ki taba ifi ya na luta Jesu fo? Mu lemuhe kuli u talusa za kulo ya peu ni mo i ezahalelanga hanyinyani-hanyinyani kulo yeo. ‘Kakuli mubu ili ona wa beya, pili ki mitungo, kwapili ki sikunka, kiha ku taha bubeke bo bu inzi mwa sikunka.’ (Mare. 4:28) Kulo yeo i ezahala hanyinyani-hanyinyani. Ha i konwi ku hapelezwa ku ezahala kamba ku akufiswa. Batu ni bona ba banga balutiwa ka nzila ye swana. Kulo ya bona i ezahalanga hanyinyani-hanyinyani Jehova ha nze a tuhelela niti ku hula mwa pilu ya mutu ya tabela linzwi.—Lik. 13:48; Maheb. 6:1.
17. Ki bomañi ba ba banga ni tabo muta peu i beya siselo?
17 Mucali u abana cwañi mwa kutulo “mabele ha s’a buzwize”? Jehova ha hulisa niti ya Mubuso mwa lipilu za balutiwa ba banca, ba fitanga fa ku neela bupilo bwa bona ku Mulimu kabakala lilato la bona ku yena. Ba bonisa buineelo bwa bona ka ku kolobezwa mwa mezi. Mizwale ba ba zwelapili ku hula mwa tumelo ba fiwanga buikalabelo bo buñata mwa puteho. Muselo wa Mubuso u kutulwanga ki ya na cezi peu ni bahasanyi ba bañwi ba Mubuso ba ba si ka abana mwa ku cala peu ye tahisize mulutiwa yo. (Mu bale Joani 4:36-38.) Kaniti, ‘ya cala ni ya kutula, ba taba hamoho.’
Ze Lu Ituta Kacenu
18, 19. (a) Linguli za Jesu ze lu nyakisisize ka bukuswani li mi susuelize cwañi ka sibili? (b) Lu ka nyakisisañi mwa taba ye tatama?
18 Lu itutileñi kwa linguli ze peli ze lu nyakisisize ka bukuswani ze ñozwi kwa Mareka kauhanyo 4? Lu itutile kuli lu na ni musebezi o mutuna o lu swanela ku peta, wona wa ku cala peu. Ha lu lukeli ku tuhela musebezi wo kabakala ku ikutwa kuli ha lu koni kamba kabakala matata a’ lu tahela. (Muek. 11:4) Kono hape lwa ziba kuli lu na ni tohonolo ya ku ba ba ba sebeza ni Mulimu. Jehova ki yena ya tahisa kuli batu ba be balutiwa, ili ka ku fuyaula buikatazo bwa luna ni buikatazo bwa ba ba amuhela taba ya Mubuso. Lwa ziba hande kuli ha lu koni ku hapeleza mutu ufi kamba ufi kuli a be mulutiwa. Mi hape lwa ziba kuli ha lu swaneli ku zwafa kamba ku nyefa haiba mutu a liyeha ku hula kuli a be mulutiwa. Kwa omba-omba luli ku ziba kuli ku kondisa mwa bukombwa ku itingile fa busepahali bwa luna ku Jehova ni mo lu ngela tohonolo ya lu file ya ku bulela ‘Evangeli ya mubuso, kuli ibe bupaki mwa macaba kamukana.’—Mat. 24:14.
19 Jesu hape na lu lutileñi ka za ku hula kwa balutiwa ba banca ni kekezo ya musebezi wa Mubuso? Kalabo kwa puzo yeo i fumanwa mwa linguli ze ñwi ze ñozwi mwa litaba za Evangeli. Lu ka nyakisisa ze ñwi za linguli zeo mwa taba ye tatama.
[Litaluso za kwatasi]
^ para. 8 Mu nyakisise bukombwa bwa Muzwale Georg Fjölnir Lindal bwa mwa naha ya Iceland, sina mo ku bihezwi mwa 2005 Yearbook of Jehovah’s Witnesses, makepe 210-211, ni litaba za batanga ba ba sepahala ba ne ba itiisize mwa Ireland ka lilimo ze ñata ku si na ze ne zwile mwateñi honafo, sina mo ku bihezwi mwa 1988 Yearbook of Jehovah’s Witnesses, makepe 82-99.
Kana Mwa Hupula?
• Ku cala peu ku swana cwañi ni ku kutaza taba ya Mubuso?
• Ki Mukutazi wa Mubuso ya cwañi w’a nga Jehova kuli wa sepahala?
• Jesu na talusize cwañi ku hula kwa peu mo ku swanela ni ku hula kwa mutu kuli a be mulutiwa wa hae?
• ‘Ya cala ni ya kutula, ba taba hamoho’ ka mukwa ufi?
[Lipuzo za Tuto]
[Maswaniso a fa likepe 13]
Ki kabakalañi Jesu ha na bapanyize mukutazi wa Mubuso wa Mulimu kwa mucali wa peu?
[Maswaniso a fa likepe 15]
Ba ba swanisezwa ki mubu o munde ba abana mwa musebezi wa ku kutaza Mubuso ka pilu ya bona kaufela ku likana ni miinelo ya bona
[Maswaniso a fa likepe 16]
Ki Mulimu ya melisa