Sitopa sa bu-124 si Kwaza Sikolo sa Giliadi

Balumiwa ba Bapanyiwa ni Linziye

HABELI ka silimo ni silimo, Sikolo sa Bibele sa Giliadi si banga ni mukiti wa ku kwaza sikolo ili ko ku memelwanga lubasi lwa Betele kaufela lwa United States. Ka la 8 March, 2008, baenyi ba ba zwa kwa linaha ze fitelela 30, ne ba putehile ni lubasi lwa Betele kwa mukiti wo wa baituti ba sitopa sa bu-124 sa Sikolo sa Bibele sa Giliadi. Ba ne ba li teñi kaufela ba 6,411 hamoho ni baituti ne ba ikozi mukiti wo.

Muina-situlo wa tukiso yeo, Stephen Lett, ili yo muñwi wa ba Sitopa Se Si Etelela, a shaba tukiso ka ngambolo ye li “Mu Ye ni Batoziwa ba Jehova ba ba Swana Sina Linziye.” Sinulo 9:1-4 i bapanya sikwatanyana sa Bakreste ba ba tozizwe ba ne ba kalisize ku kutaza hape ka 1919 ni sikutu sa linziye ze kalisa ku sebeza. Baituti ne ba hupulisizwe kuli sina ba bañwi ba “lingu ze ñwi,” ba swalisani ni Bakreste ba ba tozizwe ba ba swana sina sikutu sa linziye.—Joa. 10:16.

Hamulaho wa ngambolo yeo, Muzwale Lon Schilling, yo muñwi wa ba Katengo ka Mutai wa United States, a fa ngambolo ye li “Mu Sebeze Hamoho.” Ngambolo yeo ne i tomile fa mutala wa mwa Bibele wa Akila ni musal’a hae Prisila, Bakreste ba ne ba pila mwa linako za baapositola. (Maro. 16:3, 4) Ba ne ba li mwa sitopa sa Giliadi ne li mizwale ni likaizeli ba ba nyalani ba 56. Ne ba hupulisizwe kuli ne ba tokwa ku tiisa manyalo a bona kuli ba kondise musebezi wa bona wa bulumiwa. Mwa Bibele, fo ku fumaneha libizo la Akila kaufela ku fumaneha ni la musal’a hae, Prisila. Kacwalo muapositola Paulusi ni ba mwa puteho ne ba ba nga kuli ne ba swalisana luli. Ka mukwa o swana, balumiwa ba ba nyalani kacenu ba lukela ku sebeza hamoho, ku lapela hamoho, ni ku tatulula hamoho matata e ba talimana ni ona mwa sebelezo ya bona, ili ku tusana ka linzila zeo.—Gen. 2:18.

Ngambolo ye ne tatami, ye li “Mu Likanyise Bunde bwa Jehova,” ne i filwe ki muzwale Guy Pierce, yo muñwi wa ba Sitopa Se Si Etelela. Muzwale Pierce na talusize kuli ku ba mutu yo munde ha ku talusi fela ku ambuka bumaswe. Mutu yo munde ki mutu ya ezeza ba bañwi lika ze nde. Jehova Mulimu ki yena yo munde ka ku fitisisa. Bunde bwa Mulimu ni lilato la hae za kona ku lu susumeza ku ezeza ba bañwi lika ze nde. Ka ku babaza baituti, Muzwale Pierce a ungula ngambolo ya hae ka ku bulela kuli: “Mu ezize hande. Lu na ni buikolwiso bwa kuli mu ka zwelapili ku likanyisa bunde bwa Mulimu ka ku eza hande mwa musebezi ufi kamba ufi wa ka mi fa Jehova Mulimu kwapili.”

Mubuleli ya na tatami, Muzwale Michael Burnett, ya na banga mulumiwa ili ya sa zo ketiwa sina muluti wa sikolo sa Giliadi, na file ngambolo ye li “Mu Itame Zona Inge Lwamuhelo fa Pata Mwahal’a Meto a Mina.” Ka ku eza inge ba ba itamile “lwamuhelo fa pata” mwahal’a meto a bona, Maisilaele ne ba swanela ku hupula mwa na ba lukululezi Jehova ka makazo mwa Egepita.  (Ex. 13:16) Baituti ne ba susuelizwe ku hupula lituto ze ñata ze ne ba lutilwe kwa Sikolo sa Giliadi inge kuli ba itamile lwamuhelo fa pata mwahal’a meto a bona. Muzwale Burnett na koñomekile balumiwa kuli ba swanela ku ikokobeza ni ku sebelisa likuka za Bibele ha ba tatulula lifapano ze zuha mwahal’a bona ni balumiwa ba bañwi ku beya cwalo ni batu ba bañwi.—Mat. 5:23, 24.

Muzwale Mark Noumair, ya li muluti wa kale wa sikolo sa Giliadi, na file ngambolo ye li “Ki Lika Mañi Ze Ba Ka Opela Batu ka za Mina?” Kwa ikale, ne ku banga ni sizo sa ku eza mukiti wa lipina ze opelelwa ba ba tuzi mwa ndwa. Ye ñwi ya lipina zeo i patalaza masika a Rubeni, Dani, ni Asere sina masika a na sa lati ku sebeza ka t’ata, kono lusika lwa Zabuloni lona lwa lumbiwa kabakala moya wa lona wa ku itombola. (Baat. 5:16-18) Sina batu mo ba kona ku zibela manzwi a pina, likezo za Mukreste li fitanga fa ku zibiwa ki  ba bañwi. Mutu ya tukufalelwa musebezi wa Mulimu ni ku mamela ka busepahali litaelo ze fiwa ki kopano ya Jehova u ikezeza libizo le linde ni Jehova mi u tomela mizwale ba hae mutala o munde. Ba bañwi mwa puteho ha ba nze ba teeleza kwa pina ye ñozwi ki likezo za luna, ka nguli, ba ka susuezwa ku likanyisa mutala wa luna o munde.

Ka ku ba kalulo ya bona ya tuto ya Giliadi, sitopa sa bu-124 ne si tandile lihora ze bat’o eza 3,000 mwa musebezi wa ku kutaza. Mwa ngambolo ya na file Muzwale Sam Roberson wa Likolo le li Talima za Likolo za Teokratiki, ili ye na ni toho ya taba ye li “Ku Latelela Ketelelo ya Moya o Kenile,” baituti ne ba talusize ze ñwi za ze bonwi mwa bukombwa bwa bona, mi ne ba ezize liponiso za ze ñwi ze bonwi zeo. Hamulaho wa ze bonwi, Muzwale Patrick LaFranca, yo muñwi wa ba Katengo ka Mutai wa United States a buhisana ni ba ba felize kale sikolo sa Giliadi ba se ba sebeleza mwa linaha li sili cwale. Bana ba sikolo ne ba itebuhile hahulu likelezo ze ne ba filwe ki mizwale bao.

Muzwale Anthony Morris, yo muñwi wa ba Sitopa Se Si Etelela, na file ngambolo ya mafelelezo ye li, “Mu Hupule Kuli Ze Bonahala ki za Nako I Liñwi.” Mañolo a lu eleza ku libelela limbuyoti za kwapili ze ka zwa ku Jehova ku fita ku isa hahulu pilu kwa butata bwa nakonyana fela bo lu talimana ni bona cwale. (2 Makor. 4:16-18) Bubotana bo butuna, bumaswe, buhateleli, makulanu, ni lifu ki lika ze lu iponela kacenu. Balumiwa ba kona ku tahelwa ki matata ao. Kono ku hupula kuli lika zeo ki za nakonyana fela ku ka lu tusa ku zwelapili ku beya Jehova mwa sibaka sa pili ni ku pila ka sepo.

Tukiso ne i felile baituti kaufela ba ba kwazize sikolo inze ba inzi fa libulelelo ku teeleza kwa manzwi a mafelelezo a Muzwale Lett. Na ba susuelize kuli ba si ke ba zwafa mi a li: “Ku si na taba ni miliko ye lu kopana ni yona, lwa kona ku itiisa ni ku zwelapili ku sepahala haiba Jehova a lu tusa.” Na susuelize balumiwa ba banca ku ba sina linziye, ku tundamena mwa sebelezo ya Jehova ni ku zwelapili ku ba ni tukufalelo, ku sepahala, ni ku ipeya ku utwa ku ya ku ile.

[Mbokisi fa likepe 30]

LITABA ZA SITOPA

Palo ya linaha ko ba zwa baituti: 7

Palo ya linaha ko ba lumezwi: 16

Palo ya baituti kaufela: 56

Avareji ya lilimo za ku pepwa: 33.8

Avareji ya lilimo za ku ba mwa niti: 18.2

Avareji ya lilimo za ku ba mwa sebelezo ya nako kaufela: 13.8

[Siswaniso se si fa likepe 31]

Sitopa sa bu-124 Se Si Felize Sikolo sa Giliadi sa Bibele

Mwa mukoloko o kwatasi, milaini i baliwa ku zwa kwapili ku kuta kwamulaho, mi mabizo a kolohanyizwe ku zwa kwa bunzohoto ku ya kwa bulyo mwa mulaini o muñwi ni o muñwi.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Siswaniso se si fa likepe 32]

Sikolo sa Bibele sa Giliadi si fumaneha kwa Watchtower Educational Center