Ki Sika Mañi Se Mu Ka Fa Kuli Mu Fumane Bupilo Bo Bu Sa Feli?

“Mutu moya wa hae, ku na ni s’a ka fa kuli a ipumanele ona?”—MAT. 16:26.

1. Ki kabakalañi Jesu ha na hanile kalimelo ya Pitrosi?

MUAPOSITOLA PITROSI na komokile hahulu manzwi a na utwile. Jesu Kreste, Mulen’a hae ya na lata, na bulela “patalaza” kuli Na tuha a nyandiswa ni ku bulaiwa! Ka mulelo o munde, Pitrosi a kalimela Jesu, a li: “U ikutwele butuku, Mulena; ze cwalo li si ke za ku tahela.” Jesu a fulalela Pitrosi mi a talima balutiwa ba hae ba bañwi. Mwendi ni bona ne ba na ni muhupulo wo o fosahalile. Cwale a li ku Pitrosi: “Zwa ku na, Satani, u sitataliso ku na; kakuli ha u utwi za Mulimu, konji za batu fela.”—Mare. 8:32, 33; Mat. 16:21-23.

2. Jesu na bonisize cwañi se ba swanela ku eza balutiwa ba niti?

² Manzwi a na bulezi Jesu mwamulaho mwendi na tusize Pitrosi ku bona libaka Jesu ha na hanile kalimelo ya hae. Jesu a “biza nyangela, hamoho ni balutiwa ba hae” mi a li: “Mutu h’a lata ku ni latelela, haisi kuli a itobohe, a lwale sifapano sa hae, mi a ni siyale mwamulaho. Kakuli mutu kaufela ya lata ku pilisa moya wa hae, u ka sinyehelwa ki ona; kono ya ka sinyehelwa ki moya wa hae kabakala ka ni la Evangeli, u ka u pilisa.” (Mare. 8:34, 35) Jesu ha na bulela ka za “moya,” na talusa “bupilo.” Kaniti, Jesu na tuha a fa bupilo bwa hae sina sitabelo mi na bata kuli balateleli ba hae ni bona ba late ku fana bupilo bwa bona mwa sebelezo ya Mulimu. Ha ne ba ka eza cwalo, ne ba ka fumana mupuzo o mutuna.—Mu bale Mateu 16:27.

3. (a) Ki lipuzo lifi za na buzize Jesu bateelezi ba hae? (b) Bateelezi ba Jesu mwendi ne ba hupuziñi kabakala puzo ya hae ya bubeli?

³ Ka nako ye swana yeo, Jesu na buzize lipuzo ze peli ze nahanisa. Na i ze: “Tuso ki ifi, mutu nih’a ka luwa lifasi kamukana, mi a sinyehelwa ki moya wa hae?” Hape a li: “Mutu, moya wa hae, ku na ni s’a ka fa kuli a ipumanele ona?” (Mare. 8:36, 37) Batu ba kona ku utwisisa ka bunolo kalabo ya puzo ya pili. Ha ku na tuso mutu niha ka luwa lifasi kamukana ni ku sinyehelwa ki bupilo bwa hae. Maluwo a kona fela ku tusa mutu ha sa pila. Puzo ya Jesu ya bubeli ye li: “Mutu, moya wa hae, ku na ni s’a ka fa  kuli a ipumanele ona?” mwendi ne i hupulisize bateelezi ba hae manzwi a na bulezi Satani mwa linako za Jobo, kuli: “Mutu s’a sweli kaufela wa si fana, kuli a pilise bupilo bwa hae!” (Jobo 2:4) Ba bañwi ba ba sa lapeli Jehova ba kona ku lumela kuli manzwi a Satani ao ki a niti. Ba bañata ba kona ku eza nto ifi kamba ifi, nihaiba ku loba likuka za muzamao kuli ba bukeleze fela bupilo bwa bona. Kono Bakreste ba na ni muhupulo o shutana.

4. Ki kabakalañi lipuzo za Jesu ha li na ni taluso ye tuna kwa Bakreste?

⁴ Lwa ziba kuli Jesu na si ka taha fa lifasi ku to lu fa buikangulo bo bunde, bufumu, kamba bupilo bo butelele mwa lifasi le. Na tile ku to lu fa sepo ya ku pila ku ya ku ile mwa lifasi le linca, mi sepo yeo ki yona nto ya butokwa hahulu ku luna. (Joa. 3:16) Kacwalo Mukreste u kona ku utwisisa kuli puzo ya Jesu ya pili i talusa kuli, “Tuso ki ifi, mutu niha ka luwa lifasi kamukana, mi a latehelwa ki sepo ya hae ya bupilo bo bu sa feli?” Kalabo kikuli, Ha ku na tuso ni ye kana. (1 Joa. 2:15-17) Kuli lu alabe puzo ya Jesu ya bubeli, lu ipuzeñi kuli, ‘Ki lika mañi ze ni lata ku itombola cwale kuli sepo ya ka ya ku pila mwa lifasi le linca i talelezwe?’ Kalabo ya luna kwa puzo yeo i ka bonisa mo i tiyezi sepo yeo mwa lipilu za luna, mi i zibwa ka mo lu pilela bupilo bwa luna.—Mu bapanye Joani 12:25.

5. Lu kona ku fumana cwañi mpo ya bupilo bo bu sa feli?

⁵ Kaniti Jesu na sa talusi kuli bupilo bo bu sa feli bwa kona ku belekelwa. Bupilo ki mpo; nihaiba bupilo bwa luna bo bukuswani bwa mwa lifasi le ki mpo. Ha lu koni ku bu leka kamba ku bu belekela. Nzila fela inosi ye lu kona ku fumana ka yona mpo ya bupilo bo bu sa feli ki ku “lumela ku Jesu Kreste” ni Jehova, “Yena ya fa ba ba mu bata mupuzo.” (Magal. 2:16; Maheb. 11:6) Nihakulicwalo, tumelo i swanela ku boniswa ka likezo, kakuli “tumelo, ha i si na misebezi, i shwile.” (Jak. 2:26) Kacwalo, ha lu nahanisisa puzo ya Jesu, lu swanela ku itatuba ka tokomelo kuli lu bone ze lu itatela ku itoboha mwa lifasi le ni ze lu lata ku itombola ku eza mwa sebelezo ya Jehova kuli lu bonise kuli tumelo ya luna ya pila luli.

“Kreste H’a Si Ka Bata Se Si Mu Tabisa Ili Yena”

6. Ki nto mañi ye ne li ya butokwa hahulu ku Jesu?

⁶ Mwa sibaka sa ku lakaza lika za lifasi ze ne li teñi mwa miteñi ya hae, Jesu na isize pilu kwa lika za butokwa mi na hanyelize muliko wa ku bata ku ikubukanyeza maluwo kuli a pile mwa mbombolelwa. Na pilile bupilo bwa ku itombola ni ku utwa Mulimu. Ku fita ku bata se si mu tabisa ili yena, na ize: “Kamita ni eza ze . . . tabisa” Mulimu. (Joa. 8:29) Jesu na ikatalize cwañi kuli a tabise Mulimu?

7, 8. (a) Ki nto mañi ya na itombozi Jesu, mi na filwe mupuzo mañi? (b) Ki puzo mañi ye lu swanela ku ipuza?

⁷ Nako ye ñwi Jesu na bulelezi balutiwa ba  hae kuli: “Mwan’a mutu [ha] si ka taha kuli a sebelezwe, kono ili ku sebeleza, ni ku fa bupilo bwa hae, kuli a liulule ba bañata.” (Mat. 20:28) Kwamulaho, Jesu ha na kalisize ku lemusa balutiwa ba hae kuli na tuha a “fa bupilo bwa hae,” Pitrosi na mu elelize kuli a ikutwele butuku. Kono Jesu na si ka keluswa mwa nzila ye lukile ki kelezo yeo. Na fanile bupilo bwa hae bo bu petehile ka ku lata kuli a liulule batu. Bakeñisa bupilo bwa hae bwa buitomboli, ha ku na nto ye ne ka mu palelwisa ku fumana bupilo kwapili. Na zusizwe kwa bafu ni ku “kambamisezwa kwa lizoho la bulyo la Mulimu.” (Lik. 2:32, 33) Ka nzila yeo, Jesu u lu tomezi mutala o munde hahulu.

⁸ Muapositola Paulusi na elelize Bakreste ba mwa Roma kuli ba si ke ba eza ze ba “tabisa . . . fela” ba nosi, mi na ba hupulisize kuli nihaiba “Kreste h’a si ka bata se si mu tabisa ili yena.” (Maro. 15:1-3) Kacwalo, ki lika mañi ze lu ka itombola ilikuli lu likanyise Kreste?

Jehova U Bata Kuli Lu Mu Fe Ze Nde ka ku Fitisisa

9. Ki nto mañi luli ya eza Mukreste ha ineela ku Mulimu?

⁹ Mwa Isilaele wa kwakale, Mulao wa Mushe ne u bonisa kuli Maheberu ba batanga ne ba swanela ku lukululwanga mwa silimo za bu 7 sa ku ba mwa butanga kamba mwa mwaha wa Jubile. Niteñi, ne ba kona ku ikezeza keto. Haiba mutanga na lata hahulu muñ’a hae, na kona ku iketela ku zwelapili ku ina mwa ndu ya hae sina mutanga bupilo bwa hae kaufela. (Mu bale Deuteronoma 15:12, 16, 17.) Ni luna lu ezanga keto ye swana muta lu ineela ku Mulimu. Lu ikatulelanga ku eza tato ya Mulimu, isike ku eza ze lu bata luna. Ka ku eza cwalo, lu bonisa lilato la luna le lituna ku Jehova ni takazo ya luna ya ku mu sebeleza ku ya ku ile.

10. Lu luilwe ki Mulimu ka mukwa ufi, mi taba yeo i swanela ku ama cwañi mihupulo ni likezo za luna?

¹⁰ Haiba mu sweli ku ituta Bibele ni Lipaki za Jehova, ku kutaza taba ye nde, ni ku fumanehanga kwa mikopano ya Sikreste, fo mu eza hande. Lu sepa kuli mu tuha mu ineela ku Jehova ni ku buza puzo yeo munna wa Muetopia na buzize Filipi, ye li: “Kiñi se si ka ni hanisa ku kolobezwa?” (Lik. 8:35, 36) Ha mu ka eza cwalo, bulikani bwa mina ni Mulimu bu ka swana sina bwa Bakreste ba na ñolezi Paulusi kuli: ‘Ha mu ituwi, kakuli mu lekilwe ka teko ye tuna.’ (1 Makor. 6:19, 20) Haiba lu ineezi ku Mulimu, Jehova ki yena Muñ’a luna ibe kuli sepo ya luna ki ya ku pila kwa lihalimu kamba fa lifasi. Kacwalo, ki kwa butokwa hahulu ku bulaya litakazo ze maswe ni ku tuhela ku ba “batanga ba batu”! (1 Makor. 7:23) Ki tohonolo ye tuna luli ku sebeleza Jehova ka busepahali ilikuli a itusise luna ka mwa latela!

11. Bakreste ba susuezwa ku fa matabelo mañi, mi taba yeo i talusañi luli ka ku ya ka mo u boniseza Mulao wa Mushe ka za matabelo a na swanelwa ku fiwa?

¹¹ Paulusi na elelize balumeli ba bañwi kuli: “Mu beele mibili ya mina, ibe sitabelo se si pila, se si kenile, se si kateleha ku Mulimu; ki yona sebelezo ye mi lukezi.” (Maro. 12:1) Mwendi manzwi ao na hupulisize Bakreste ba Majuda matabelo a ne ba itusisanga mwa bulapeli bwa bona pili ba si ka ba kale balateleli ba Jesu. Ne ba ziba kuli mwa Mulao wa Mushe, lifolofolo ze ne fiwa sina matabelo fa aletare ya Jehova ne li swanela ku ba ze nde ka ku fitisisa. Folofolo ye nyazahala ne i sa amuhelwi. (Mala. 1:8, 13) Lu swanela ku eza nto ye swana ha lu fa mibili ya luna sina “sitabelo se si pila.” Lu fa Jehova ze nde ka ku fitisisa, isi fela ze siyezi lu mano feza ku eza ze lu tokwa kaufela. Ha lu ineela ku Mulimu, lu mu fa “bupilo” bwa luna kaufela—ku kopanyeleza mata a luna, maluwo a luna, ni buikoneli bwa luna. (Makolo. 3:23) Lu kona ku eza cwañi taba yeo mwa bupilo bwa luna?

Mu Itusise Nako ya Mina Hande

12, 13. Ki ifi nzila ye ñwi ye lu kona ku fa ka yona Jehova ze nde ka ku fitisisa?

¹² Nzila ye ñwi ye lu kona ku fa ka yona Jehova ze nde ka ku fitisisa, ki ka ku itusisa hande nako ya luna. (Mu bale Maefese 5:15, 16.) Ku  eza cwalo ku tokwa buiswalo. Bakeñisa lifasi ni ku sa petahala ko lu hozize, mihupulo ya luna ki ya ku itusisa fela nako ya luna kuli lu itabise kamba ku fumana se siñwi se si ka lu tusa. Ki niti kuli “nto ni nto i na ni nako ya yona,” ku kopanyeleza cwalo ni nako ya ku itabisa mane ni ya ku beleka ilikuli lu kone ku peta buikalabelo bwa luna bwa Sikreste. (Muek. 3:1) Nihakulicwalo, Mukreste ya ineezi u swanela ku ba ni buitikaneleli ni ku itusisa hande nako ya hae.

¹³ Paulusi ha na il’o pota kwa Atene, na lemuhile kuli “Maatene kaufela, ni basili ba ba t’o pota mwateñi, ha ba ezi se siñwi, konji ku bulela litaba ze nca, kamba ku teeleza kwateñi.” (Lik. 17:21) Ba bañata kacenu ba sinyanga nako ya bona ka nzila ye swana. Kacenu, batu ba itabisanga ka lika ze cwale ka ku buha TV, ku eza lipapali za fa kompyuta kamba fa TV, kamba ku talima-talima fela litaba za fa Intaneti. Lika ze kona ku lu sinyeza nako ki ze ñata mi li sweli za ekezeha. Ku li latelela ku kona ku lu palelwisa ku bata zibo ya Jehova. Mane lu kona ku fita fa ku ikutwa kuli lu patehile hahulu mi ha lu na nako ya ku eza “linto ze nde ku fita”—zona lika ze ama sebelezo ya luna ku Jehova.—Mafil. 1:9, 10.

14. Ki lipuzo lifi ze lu swanela ku nahanisisa?

¹⁴ Kacwalo, ka ku ba mutang’a Jehova ya ineezi, mu ipuze kuli, ‘Kana lika ze ni ezanga zazi ni zazi li kopanyeleza ni ku bala Bibele, ku yeya, ni ku lapela?’ (Samu 77:12; 119:97; 1 Mates. 5:17) ‘Kana na banga ni nako ya ku itukiseza mikopano ya Sikreste? Kana na susuezanga ba bañwi ka ku alabanga ka nako ya mikopano?’ (Samu 122:1; Maheb. 2:12) Linzwi la Mulimu li bulela kuli Paulusi ni balikani ba hae ne ba tandile “mazazi a mañata, ba bulela ba sa sabi; ba tiyela ku Mulena.” (Lik. 14:3) Kana mwa kona ku cinca miinelo ya mina ilikuli mu kone ku tandanga ‘nako ye ñata’ mwa musebezi wa ku kutaza, kamba mane ku sebeza sina paina?—Mu bale Maheberu 13:15.

15. Maeluda ba itusisa cwañi nako ya bona hande?

¹⁵ Muapositola Paulusi ni banna ba bañwi ba ba sepahala ha ne ba il’o potela puteho ya Sikreste ya mwa Antioke, “ba ina ni balutiwa mazazi a mañata” ilikuli ba ba susueze. (Lik. 14:28) Kacenu, maeluda ba ba lilato ni bona ba tandanga nako ye ñata ku tiisa ba bañwi. Kwand’a ku yanga mwa simu, maeluda ba sebezanga ka t’ata ku lisa mutapi, ku bata lingu ze latehile, ku tusa ba ba kula, ni ku peta buikalabelo bo buñwi bo buñata mwa puteho. Haiba mu muzwale ya kolobelizwe, kana mwa kona ku eza zwelopili ilikuli mu amuhele buikalabelo bo bu ekezehile bo?

16. Ki lifi linzila ze ñwi ze lu kona ku eza hande ka zona “banabahabo luna ba balumeli”?

¹⁶ Ba bañata ba fumani tabo ka ku tusa batu ba bañwi ba ba sinyehezwi kabakala likozi za ka taho kamba ze tiswa ki batu. Ka mutala, kaizeli yo muñwi wa lilimo za mwa ma-60, ili ya sebeleza fa Betele, sa zamaile misipili ye sikai ye mitelele ku yo abana mwa musebezi wa ku tusa batu ba ba tahezwi ki likozi. Ki kabakalañi ha na itusisize mazazi a hae a pumulo ka nzila yeo? U talusa kuli: “Nihaike kuli ha ku na musebezi o ni ziba hande hahulu, ne ni na ni tohonolo  ya ku eza se ne si tokwahala kaufela. Ne ni susuelizwe hahulu ku bona tumelo ye tiile ya mizwale ni likaizeli ba ka ba ne ba sinyehezwi maswe.” Hape ku na ni mizwale ni likaizeli ba bañata-ñata mwa lifasi kaufela ba ba sweli ku tusa mwa musebezi wa ku yaha Mandu a Mubuso ni Mandu a Mikopano. Ha lu abana mwa misebezi ye cwalo, lu bonisa kuli lu itatela ku eza hande “banabahabo luna ba balumeli.”—Magal. 6:10.

“Ni Inzi ni Mina ka Mazazi Kaufela”

17. Ki sika mañi se mu ka fa kuli mu fumane bupilo bo bu sa feli?

¹⁷ Nyangela ya batu ba ba ikauhanyize ku Mulimu i tuha i yunda. Ha lu zibi nako luli fo i ka ezahalela taba yeo. Kono lwa ziba kuli nako ye siyezi “ki ye kuswani” mi “mukwa wa lifasi le wa fela.” (Mu bale 1 Makorinte 7:29-31.) Taba yeo i tahisa kuli puzo ye ya na buzize Jesu i be ya butokwa ni ku fita: “Mutu, moya wa hae, ku na ni s’a ka fa kuli a ipumanele ona?” Kaniti, lu ka itombola ku eza nto ifi kamba ifi ya tokwa Jehova ku luna ilikuli lu fumane “bupilo bo bu sa feli.” (1 Tim. 6:19) Ki kwa butokwa hahulu ku utwa kelezo ya Jesu ya kuli lu mu “siyale mwamulaho” ni kuli lu “bate pili mubuso.”—Mat. 6:31-33; 24:13.

18. Ki buikolwiso mañi bo lu kona ku ba ni bona, mi ki kabakalañi?

¹⁸ Ki niti kuli ku latelela Jesu haki nto ye bunolo hañata, mi sina mwa na lemuselize Jesu, ba bañwi ba latehezwi ki bupilo bwa bona mwa lifasi le kabakala ku mu latelela. Kono sina Jesu, lu hanyeza muliko wa ku ‘ikutwela butuku.’ Lu kolwa sepiso ya na file balateleli ba hae ba ba tozizwe ba mwa miteñi ya hae, ye li: “Ni inzi ni mina ka mazazi kaufela, ku isa kwa mafelelezo a lifasi.” (Mat. 28:20) Kacwalo, ha lu itusiseñi nako ni buikoneli bwa luna kaufela mwa sebelezo ya Mulimu. Ha lu eza cwalo, lu bonisa kuli lu na ni buikolwiso bwa kuli Jehova u ka lu bukeleza mwahal’a ñalelwa ye tuna kamba ku lu zusa kwa bafu mwa lifasi le linca. (Maheb. 6:10) Mi fo lu ka be lu bonisize mo lu itebuhela mpo ya bupilo.

Mu Kona ku Alaba Cwañi?

• Jesu na bonisize cwañi kuli na lata hahulu ku sebeleza Mulimu ni batu?

• Ki kabakalañi mutu ha swanela ku itoboha, mi u itoboha cwañi?

• Mwa Isilaele wa kwakale, ki matabelo fela a cwañi a na kona ku amuhelwa, mi taba yeo i lu lutañi kacenu?

• Lu kona ku itusisa nako ya luna hande ka linzila lifi?

[Lipuzo za Tuto]

[Maswaniso a fa likepe 26]

Jesu na ezize lika ze tabisa Mulimu kamita

[Siswaniso se si fa likepe 28]

Maisilaele ba ne ba na ni buitebuho ne ba file matabelo ni linubu ze nde ka ku fitisisa kuli li itusiswe mwa bulapeli bwa niti

[Maswaniso a fa likepe 29]

Lu tabisa Mulimu ka ku itusisa nako ya luna hande