“Litaku Za Meto” a Jehova Li Tatuba Batu Kaufela

“Litaku za meto a [Jehova] li tatuba bana ba batu.”—SAMU 11:4.

1. Ki batu ba ba cwañi bo lu tabela ku sutelela ku bona?

MU IKUTWANGA cwañi ka za batu ba ba mi tokomela luli? Ha mu ba buza ka za taba ye ñwi, ba mi taluseza niti. Ha mu tokwa tuso, ba mi fa yona ka ku lata. Mi ha mu tokwa ku elezwa, ba mi eleza ka lilato. (Samu 141:5; Magal. 6:1) Kana ha mu tabeli ku sutelela kwa batu ba ba cwalo? Jehova ni Mwan’a hae ba mi tokomela luli. Mane ba mi tokomela ku fita mutu ufi kamba ufi, mi ba mi lata hahulu; ba bata ku mi tusa ku “amuhela bupilo bo bu sa feli.”—1 Tim. 6:19; Sin. 3:19.

2. Jehova u tokomela cwañi batanga ba hae?

² Walisamu Davida na bonisize kuli Jehova wa lu tokomela hahulu. Na ize: “Meto a [Jehova] a talima; litaku za meto a hae li tatuba bana ba batu.” (Samu 11:4) Kaniti, Mulimu ha lu talimi fela; kono wa lu tatuba. Davida hape na ñozi kuli: “U likile pilu ya ka, u i lekuzi ni busihu . . . Ibo ha u si ka fumana se siñwi.” (Samu 17:3) Kwa iponahalela hande kuli Davida na ziba kuli Jehova na mu tokomela luli. Na ziba kuli na ka swabisa Jehova ni ku latehelwa ki sishemo sa Hae ha na si ke a ambuka litakazo ze maswe. Kana Jehova ki wa luli ku mina sina mwa na bezi ku Davida?

Jehova U Talima Pilu

3. Jehova u bonisa cwañi sishemo ka mwa ngela mifokolo ya luna?

³ Nto ya talima hahulu Jehova ki mutu wa mwahali—seo lu li sona mwa pilu. (Samu 19:14; 26:2) Ka lilato, ha londolozangi lifoso ze nyinyani. Ka mutala, Sara musal’a Abrahama, ha na si ka bulela niti ku lingeloi le ne li fetuhile mutu, ku bonahala kuli lingeloi leo ne li lemuhile kuli Sara na sabile mi na ikutwa maswabi, kacwalo la mu kalimela hanyinyani. (Gen. 18:12-15) Toho ya lusika Jobo ha na tiisize kuli “h’a na mulatu ku Mulimu,” Jehova na si ka tuhela ku mu fuyola kakuli na ziba kuli Jobo na nyandile hahulu kabakala Satani. (Jobo 32:2; 42:12) Mi Jehova na si ka nyemela mbelwa wa kwa Sarepta kabakala manzwi a na bulezi ku mupolofita Elia. Mulimu na utwisisize kuli musali yo na swabile hahulu kabakala ku shwelwa ki mwan’a hae wa libanda.—1 Mal. 17:8-24.

4, 5. Jehova na bonisize cwañi sishemo ku Abimeleki?

⁴ Kabakala kuli Jehova u tatuba lipilu, u bonisize sishemo ni ku ba ba sa mu lapeli. Mu nyake mutala wa Abimeleki, mulena wa munzi wa Gerari wa Mafilisita. Abimeleki na ngile Sara kuli a mu nyale kakuli na sa zibi kuli ki musal’a Abrahama. Kono Abimeleki a si ka fosa kale ni Sara, Jehova a li ku yena mwa tolo: “Ni Na, na ziba kuli u ezize cwalo ka pilu ye kenile, mi mane ni ku tibezi kuli u si ke wa ni foseza: kikabakaleo ni si ka ku tuhela kuli u mu swale. Cwale u kutiseze musali ku munn’a hae, kakuli ki mupolofita, mi u ka ku lapelela kuli u pile.”—Gen. 20:1-7.

⁵ Kaniti, Jehova na ka be a bulaile Abimeleki ya na lapela milimu ya buhata. Kono Mulimu na boni kuli Abimeleki na ezize ka pilu ye kenile ka nako yeo. Ka sishemo Jehova a lumela kuli na zibile taba yeo mi a bulelela mulena yo sa na swanela ku eza kuli a swalelwe ni “kuli [a] pile.” Kana ha mu tabeli ku lapela Mulimu ya cwalo?

6. Jesu na likanyisize cwañi Ndat’ahe?

 ⁶ Jesu na likanyisize Ndat’ahe ka ku petahala, ka ku isa pilu kwa bunde bwa balutiwa ba hae ni ku ba swalela mafosisa a bona ka ku lata. (Mare. 10:35-45; 14:66-72; Luka 22:31, 32; Joa. 15:15) Manzwi a kwa Joani 3:17 a talusa hande moya wa Jesu: “Mulimu h’a si ka luma Mwan’a hae mwa lifasi kuli a atule lifasi; kono, kuli lifasi li piliswe ki yena.” Kaniti, Jehova ni Jesu ba lu lata ka lilato le lituna hahulu, mi ha li feli. Sisupo se si bonisa lilato leo kikuli ba shukelwa kuli lu pile. (Jobo 14:15) Lilato leo li lu tusa ku utwisisa libaka Jehova h’a lu tatuba, libaka ha isa pilu kwa bunde bwa luna, ni libaka ha lu kalimelanga ka ku ya ka lika za bona ku luna.—Mu bale 1 Joani 4:8, 19.

Jehova U Lu Tatuba ka Lilato

7. Jehova u lu tatubanga ka mulelo ufi?

⁷ Kabakaleo, ku fosahalile hahulu ku nahana kuli Jehova ki mupokola wa kwa lihalimu ya lu talimisisa kuli a lu swale inze lu eza sibi! Satani ki yena ya lu tama litaba ni ku pihelela kuli lu baitati. (Sin. 12:10) Mane batu niha ba si na milelo ye maswe, Satani yena u li ba na ni yona! (Jobo 1:9-11; 2:4, 5) Walisamu na ñozi ka za Mulimu kuli: “[Muñ’a] Bupilo, ha u ka londoloza bumaswe, Mulena, ku ka pila mañi?” (Samu 130:3) Kalabo kikuli, Ha ku na ni yo mukana ya ka pila! (Muek. 7:20) Kono Jehova u lu talimela ka sishemo sina ndate ya lilato ya bata ku sileleza bana ba hae kwa likolofalo. Hañata wa lu tusanga ku lemuha lifoso ni mifokolo ya luna ilikuli lu si ke lwa ikolofaza.—Samu 103:10-14; Mat. 26:41.

8. Jehova u lutanga ni ku kalimela cwañi batanga ba hae?

⁸ Lilato la Mulimu li bonahala ka tuto ni kalimelo ya lu fa mwa Mañolo ni mwa libuka ze tomile fa Bibele ni mikopano ye lukisizwe ki “mutanga ya sepahala, ya na ni kutwisiso.” (Mat. 24:45; Maheb. 12:5, 6) Jehova hape u lu tusa ka puteho ya Sikreste ni ka “banna ba ba li limpo.” (Maef. 4:8, NW) Mi Jehova u lu talimela kuli a bone mo lu ngela tuto ya hae, mi u zwelapili ku lu tusa ha lu nze lu latelela tuto yeo. Samu 32:8 i li: “Ni ka ku talifisa, ni ku lute nzila y’o swanezi ku zamaya; ni ka ku eleza, meto a ka inz’a ku shalimile.” Kacwalo, ki kwa butokwa hahulu ku teeleza ku Jehova kamita! Lu lukela ku ikokobeza fapil’a hae, kakuli lwa ziba kuli ki yena Muluti ni Ndat’a luna ya lu lata.—Mu bale Mateu 18:4.

9. Ki ifi mikwa ye lu swanela ku ambuka, mi ki kabakalañi?

⁹ Kono lu si ke lwa itatafaza lipilu ka ku ikuhumusa, ka ku tokwa tumelo, kamba “ka ku shongwa ki sibi.” (Maheb. 3:13; Jak. 4:6) Hañata mutu u kalisanga ku ba ni mikwa yeo ha latelela mihupulo kamba litakazo ze maswe. Mane kwa mafelelezo u kona ku hana kelezo ya Mañolo. Mi nto ye maswe ni ku fita kikuli u kona ku hanelela mikwa ya hae ye maswe kuli mane u ikeza sila sa Mulimu—ili nto ye sabisa luli! (Liprov. 1:22-31) Mu nyakisise mutala wa Kaine, mweli wa bo Adama ni Eva.

 Jehova U Bona Lika Kaufela mi U Atula ka ku Likana ni Za Bona

10. Ki kabakalañi Jehova ha na si ka amuhela nubu ya Kaine, mi Kaine na ezize cwañi?

¹⁰ Kaine ni Abele ha ne ba tiselize Jehova linubu za bona, Jehova na si ka isa fela pilu kwa limpo za bona kono na talimela ni milelo ya bona. Kamukwaocwalo, Mulimu a amuhela nubu ya Abele, ye ne filwe ka tumelo, kono a hana nubu ya Kaine, ye ne bonisize ka nzila ye ñwi kuli na si na tumelo. (Gen. 4:4, 5; Maheb. 11:4) Ku fita ku ituta tuto ku ze ne ezahezi ni ku cinca moya wa hae, Kaine a halifela munyan’a hae.—Gen. 4:6.

11. Kaine na bonisize cwañi pilu ye puma, mi lu itutañi kwa taba yeo?

¹¹ Jehova na lemuhile moya o maswe wo wa Kaine mi a mu eleza ka sishemo kuli ha na ka eza hande, na ka lumelelwa. Kono ka bumai, Kaine a keshebisa kelezo ya Mubupi wa hae mi a bulaya munyan’a hae. Pilu ye maswe ya Kaine hape ne i bonahezi ka mwa na alabezi Mulimu ha na mu buzize kuli: “Munyan’a hao, Abele, u kai?” Kaine a alaba ka kashwau, a li: “Ha ni zibi; kana ki na mulisan’a munyan’a ka?” (Gen. 4:7-9) Kaniti, pilu ya puma—mane i kona ku keshebisa kelezo ye zwa ku Mulimu ka sibili! (Jer. 17:9) Kacwalo, lu itute kwa makande a cwalo mi lu pakise ku hana mihupulo ni litakazo ze maswe. (Mu bale Jakobo 1:14, 15.) Ha lu fiwa kelezo ye tomile fa Mañolo, lu itebuhe yona ni ku i nga sina sisupo sa kuli Jehova wa lu lata.

Ha ku Na Sibi Se Si Kona ku Patelwa Jehova

12. Jehova u nganga muhato o cwañi ka za bufosi?

¹² Ba bañwi ba kona ku ikutwa kuli haiba ba eza sibi ku si na ya ba bona, ha ba na ku fiwa koto. (Samu 19:12) Kono niti kikuli ha ku na sibi se si kona ku patelwa Jehova. “Lika kaufela li inzi fande, mi li atami, mwa meto a hae Yena ye lu na ni ku ikalabela ku Yena.” (Maheb. 4:13) Jehova ki Muatuli ya tatuba milelo ya lipilu za luna, mi muhato wa nganga ka za bufosi u lumelelana ni katulo ya hae ye petehile. “Ki Mulimu ya na ni makeke ni musa, ya sa akufi ku halifa, ya tezi sishemo, ya na ni niti.” Kono “ki ya sa latuli mulatu” wa batu ba ba fosize ba ba sa baki, ili ba ba “eza sibi ka bomu” kamba ba ba bonisa moya o maswe, wa bupumi. (Ex. 34:6, 7; Maheb. 10:26) Taba yeo ne i bonisizwe ka mo Jehova na atulezi Akani, Ananiasi, ni Safira.

13. Pilu ye maswe ni takazo ya ku fuma ne li tisize cwañi kuli Akani a fose?

¹³ Akani na tuzi mulao wa Mulimu ha na ngile kwa lika ze ne hapilwe mwa munzi wa Jeriko ni ku li pata mwa tende ya hae, mi ku bonahala kuli lubasi lwa hae ne lu swalisani ni yena mwa kezo yeo. Sibi sa hae ha ne si patuluzwi, Akani na bonisize kuli na lemuhile butuna bwa bufosi bwa hae, kakuli na ize: “Ni foselize [Muñ’a] Bupilo.” (Josh. 7:20) Pilu ya Akani ne i fetuhile ye maswe sina ya Kaine. Nto ye tuna ye ne tisize kuli Akani a pume ne li takazo ya ku fuma. Bakeñisa kuli lika ze ne hapilwe mwa Jeriko ne li za Jehova, Akani na uzwelize Mulimu, mi kabakaleo yena hamoho ni lubasi lwa hae ba bulaiwa.—Josh. 7:25.

14, 15. Ki kabakalañi Mulimu ha na si ka katelwa bo Ananiasi ni Safira, mi lu itutañi kwa taba yeo?

¹⁴ Ananiasi ni musal’a hae Safira, ne ba li ba bañwi ba puteho ya Sikreste ya mwa Jerusalema. Hamulaho wa mukiti wa Pentekonta wa 33 C.E., kwa lukiswa sikwama si  li siñwi sa mali a na ka itusiswa kwa ku babalela balumeli ba banca ba ne ba zwa kwa linaha ze kwahule ili ba ne ba sa siyezi mwa Jerusalema. Balumeli ne ba beyanga linubu za ku itatela mwa sikwama seo. Ananiasi a lekisa simu ya hae mi a nga kwa mali ni ku a fa sina nubu. Kono a puma kuli na file mali kaufela, mi musal’a hae na ziba taba yeo. Kaniti, Ananiasi ni musal’a hae ne ba bata ku lumbiwa hahulu mwa puteho. Kono ne ba pumile ka ze ne ba ezize. Ka makazo, Jehova a patulula bupumi bwa bona ku muapositola Pitrosi, ya na buzize Ananiasi libaka ha na pumile. Hona fo, Ananiasi a wela fafasi mi a shwa. Hasamulahonyana, Safira ni yena a shwa.—Lik. 5:1-11.

¹⁵ Bufosi bwa Ananiasi ni Safira ne bu si ka tiswa ki bufokoli bwa ka nakonyana fela. Kono ne ba lelisani mi ne ba bata ku puma baapositola. Mane nto ye maswe ni ku fita kikuli ne ba ‘pumile moya o kenile ni Mulimu.’ Muhato wa na ngile Jehova u bonisa hande-ndende kuli u tabela ku sileleza puteho kwa baipi. Luli, “ku wela mwa mazoho a Mulimu-Ya-Pila, kwa sabisa”!—Maheb. 10:31.

Mu Sepahale ka Nako Kaufela

16. (a) Satani u lika cwañi ku silafaza batu ba Mulimu? (b) Ki ifi mikwa ya itusisa Diabulosi mwa silalanda sa mina kuli a silafaze batu?

¹⁶ Satani u eza ka mwa konela kaufela kuli a lu silafaze ilikuli Jehova a si ke a lu katelwa. (Sin. 12:12, 17) Milelo ye maswe ya Diabulosi ya iponelwa hande mwa lifasi le, le li tabela hahulu buhule ni mifilifili. Mazazi a, litaba za buhule ni maswaniso a mapunu li kona ku fumanwa ka bunolo ka ku itusisa likompyuta kamba mishini ye miñwi. Lu si ke lwa komiwa ki makilikicani a Satani ni kamuta. Kono lu likanyise walisamu Davida ya na ñozi kuli: “Ni ka tokomela ku zamaya mwa nzila ye lukile . . . Ni ka pila mwa ndu ya ka, ka pilu ye kenile.”—Samu 101:2.

17. (a) Ki kabakalañi Jehova ha patululanga libi ze patilwe? (b) Lu lukela ku tukufalelwa ku ezañi?

¹⁷ Kacenu, Jehova ha patululangi libi ze tuna ni muzamao wa bupumi sina mwa na li patululelanga fokuñwi kwakale. Nihakulicwalo, u bona lika kaufela mi ka nako ni ka nzila ya hae u bonahalisanga lika ze patilwe. Paulusi na ize: “Libi za batu ba bañwi ki ze bonahala kapili, li zibwa pili a katulo; mi za ba bañwi li ka bonwa mwamulaho.” (1 Tim. 5:24) Libaka le lituna le li tisanga kuli Jehova a patulule likezo ze maswe kikuli u lilato. Wa lata puteho mi u bata ku sileleza bukeni bwa yona. Hape u shemubanga ba ne ba ezize sibi kono ili ba ba bakile luli cwale. (Liprov. 28:13) Kacwalo, lu ikataze ku sebeleza Mulimu ka pilu ya luna kaufela ni ku hana lika kaufela ze silafaza.

 Mu Sebeleze Mulimu ka Pilu ya Mina Kaufela

18. Mulena Davida na bata kuli mwan’a hae a ikutwe cwañi ka za Mulimu?

¹⁸ Mulena Davida na bulelezi mwan’a hae Salumoni kuli: “U zibe Mulimu wa ndat’aho, mi u mu sebeleze ka pilu ya hao kaufela, ni ka ngana ye utwisisa; kakuli [Muñ’a] Bupilo u tatuba lipilu, mi u ziba milelo ni mihupulo kaufela.” (1 Makol. 28:9) Davida na sa bati fela kuli mwan’a hae a lumele kuli Mulimu u teñi. Na bata kuli Salumoni a itebuhe kuli Jehova u tokomela hahulu batanga ba Hae. Kana mwa itebuha ku Jehova kabakala ku tokomela batanga ba hae?

19, 20. Ka ku ya ka Samu 19:7-11, ki lika mañi ze ne tusize Davida ku sutelela ku Mulimu, mi lu kona ku likanyisa cwañi Davida?

¹⁹ Jehova wa ziba kuli batu ba lipilu ze sepahala ba ka sutelela ku yena ni kuli zibo ya ku ziba tulemeno twa hae to tunde i ka ba tusa ku ikutwa bukaufi ni yena. Kabakaleo Jehova u bata kuli lu mu zibe ni ku ziba tulemeno twa hae to tunde hahulu. Lu kona ku eza cwañi cwalo? Lu kona ku eza cwalo ka ku ituta Bibele ni ku fuyolwa ki yena mwa bupilo bwa luna.—Liprov. 10:22; Joa. 14:9.

²⁰ Kana mwa balanga Bibele ka zazi ni zazi kabakala kuli i zwa ku Mulimu, ni ku mu kupa kuli a mi tuse ku eza ze mu bala? Kana mwa utwisisa butokwa bwa ku pila ka likuka za Bibele? (Mu bale Samu 19:7-11.) Haiba ku cwalo, tumelo ya mina ku Jehova ni lilato la mina ku yena li ka zwelapili ku hula. Mi ni yena u ka sutelela hahulu ku mina, mi u ka zamaya ni mina inge u mi sweli kwa lizoho. (Isa. 42:6; Jak. 4:8) Kaniti Jehova u ka bonisa lilato la hae ku mina ka ku mi fuyola ni ku mi tusa ku bukeleza bulikani bwa mina ni yena ha mu nze mu zamaya mwa nzila ye sisani ye isa kwa bupilo.—Samu 91:1, 2; Mat. 7:13, 14.

Mu Kona ku Alaba Cwañi?

• Jehova u lu tatubelangañi?

• Ki lika mañi ze ne tisize kuli batu ba bañwi ba fetuhe lila za Mulimu?

• Lu kona ku bonisa cwañi kuli Jehova ki wa luli ku luna?

• Lu kona ku sebeleza cwañi Mulimu ka pilu ya luna kaufela?

[Lipuzo za Tuto]

[Siswaniso se si fa likepe 4]

Jehova u lu talimela cwañi sina ndate ya lilato?

[Siswaniso se si fa likepe 5]

Lu itutañi ku ze ne ezahezi ku Ananiasi?

[Siswaniso se si fa likepe 6]

Ki lika mañi ze ka lu tusa ku zwelapili ku sebeleza Jehova ka pilu ya luna kaufela?