Kana Mwa Hupula?

Kana mu ikozi ku bala limagazini za cwanoñu fa za Tawala ya Mulibeleli? Mu bone haiba mwa kona ku alaba lipuzo ze latelela:

• Lu kona ku bulela cwañi hande “puo ye kenile,” yona niti ya za Mulimu ni milelo ya hae? (Zef. 3:9, NW)

Sina mo lu kona ku itutela puo ye bulelwa, kuli lu bulele “puo ye kenile” hande, lu tokwa ku teeleza ka tokomelo, ku likanyisa babuleli ba likwala, ku peta mabizo a libuka za Bibele ni litimana ze ñwi za Bibele, ku lundulula lika ze lu ituta, ku bala ka ku tumusa, ku ituta milao, kamba mutala wa niti, ku ikataza ku eza zwelopili, ku toma nako ya ku ituta, ni ku itwaeza ku bulela puo ye kenile.—8/15, makepe 21-25.

• Taba ya “muhala wa mabonda a malalu” i sebeza cwañi mwa linyalo?

Pulelo ya “muhala wa mabonda a malalu” ki nguli. (Muek. 4:12) Mwa linyalo, i talusa munna ni musal’a hae, ili mabonda a mabeli, a’ bondilwe hamoho ni lubonda lwa butokwa, ili Mulimu. Ku ba ni Mulimu mwa linyalo ku fa munna ni musali m’ata a ku itiisa mwa matata ni ku fumana tabo.—9/15, likepe 16.

• “Ku beya mazoho” ko ku bulezwi kwa Maheberu 6:2 ku talusañi?

Ku bonahala kuli se si taluswa fo, haki ku keta maeluda ba Sikreste, kono ki ku fa limpo za moya za ku eza limakazo ka ku beya mazoho. (Lik. 8:14-17; 19:6)—9/15, likepe 32.

• Baokameli mwa puteho ba kona ku bonisa cwañi likute ku ba bañwi?

Nzila ye ñwi ya kona ku bonisa ka yona likute eluda ki ka ku tokolomoha ku kupa ba bañwi ku eza lika za sa koni ku eza yena. Hape, u bonisa likute ka ku ba bulelela libaka ha ba kupa ku eza nto ye ñwi kamba ha fa ketelelo ye ñwi.—10/15, likepe 22.

• Eluda wa Sikreste u kona ku itutañi ka mo mulisana wa Muisilaele na itusisezanga lusata?

Mulisana na zamaisanga mutapi wa hae ka ku itusisa lusata kamba mulamu. Lingu ha ne li kena kamba ku zwa mwa sakana, ne li ‘fitanga mwatas’a mulamu wa mulisana’ kuli a li bale. (Liv. 27:32) Ka ku swana, mulisana wa Sikreste u tokwa ku ziba hande mutapi wa Mulimu wa filwe ku babalela.—11/15, likepe 9.