Mu Utwisise ni ku Kuteka Buikalabelo Bo Bu Ipitezi Bwa Peta Jesu mwa Mulelo wa Mulimu
Mu Utwisise ni ku Kuteka Buikalabelo Bo Bu Ipitezi Bwa Peta Jesu mwa Mulelo wa Mulimu
“Ki na nzila, ni niti, ni bupilo; ha ku na mutu ya ka taha ku Ndate, konji ka na.”—JOA. 14:6.
1, 2. Ki kabakalañi ha lu swanela ku nyakisisa buikalabelo bo bu ipitezi bwa peta Jesu mwa mulelo wa Mulimu?
HAL’A lilimo-limo, batu ba bañata ba likile ka t’ata kuli ba zwe mubano mwahal’a ba bañwi, kono ki ba sikai fela ba ba konile ku eza cwalo. Batu ba sikai ba kona ku bulela kuli ba ipitezi ka linzila ze ñwi za butokwa. Kono Jesu Kreste, Mwan’a Mulimu, u ipitezi ka linzila ze ñata.
2 Ki kabakalañi ha lu swanela ku isa pilu kwa buikalabelo bo bu ipitezi bwa peta Jesu? Kakuli ku eza cwalo ku ka lu tusa ku ba ni bulikani bo bunde ni Ndata luna wa kwa lihalimu, Jehova! Jesu na ize: “Ki na nzila, ni niti, ni bupilo; ha ku na mutu ya ka taha ku Ndate, konji ka na.” (Joa. 14:6; 17:3) Ha lu nyakisiseñi ze ñwi za linzila zeo Jesu a li ya ipitezi ka zona. Ku nyakisisa linzila zeo ku ka ekeza kwa kutwisiso ni likute la luna kwa buikalabelo bwa peta Jesu mwa mulelo wa Mulimu.
‘Mwana wa Libanda’
3, 4. (a) Ki kabakalañi buikalabelo bwa peta Jesu bwa ku ba Mwana wa libanda ha bu mu bisa ya ipitezi? (b) Buikalabelo bwa na petile Jesu mwa musebezi wa pupo ne bu ipitezi cwañi?
3 Jesu hasi mwan’a Mulimu fela. Ki “Mwan’a Mulimu, wa libanda.” (Joa. 3:16, 18) Linzwi la Sigerike le li tolokilwe kuli ‘mwana wa libanda’ hape li kona ku tolokiwa sina ku “ipitela.” Fo, kikuli “ha ku na yo muñwi ya swana ni yena.” Jehova u na ni bana ba moya ba ba eza lule-lule. Cwale Jesu u ‘ipitezi’ ka mukwa ufi?
4 Jesu u ipitezi kakuli ki yena a nosi fela ya na bupilwe ki Ndat’ahe ka sibili. Ki mwana wa mweli. Mane ki “mweli ku ze bupilwe kamukana.” (Makolo. 1:15) Ki yena “toho ya libupiwa za Mulimu [kamba makalelo a zona].” (Sin. 3:14) Hape buikalabelo bwa na petile Mwana wa libanda mwa musebezi wa pupo ni bona bu ipitezi. Ne si Mubupi, kamba Musimululi, wa pupo. Kono Jehova na itusisize yena kwa ku bupa lika ze ñwi kaufela. (Mu bale Joani 1:3.) Muapositola Paulusi na ñozi kuli: “Kono ku luna, Mulimu ki a li muñwi, yena Ndate, yo linto kamukana li zwa ku Yena, ni luna lu li ku Yena; mi lu na ni Mulena a li muñwi fela, yena Jesu Kreste, ye linto kamukana li ezizwe ka yena, ni luna lu li ka yena.”—1 Makor. 8:6.
5. Mañolo a bonisa cwañi kuli Jesu u ipitezi?
5 Nihakulicwalo, Jesu u sa ipitezi ka linzila ze ñwi ze ñata. Mwa Mañolo, Jesu u biziswa ka malumbatina a mañata a bonisa buikalabelo bwa hae bo bu ipitezi bwa peta mwa mulelo wa Mulimu. Ha lu nyakisiseñi malumbatina a ketalizoho a biziswa Jesu mwa Mañolo a Sigerike a Sikreste.
“Linzwi”
6. Ki kabakalañi ha i li swanelo kuli Jesu u bizwa “Linzwi”?
6 Mu bale Joani 1:14. Ki kabakalañi Jesu ha bizwa “Linzwi,” kamba Logos? Lilumbatina le, li bonisa buikalabelo bwa na petile Jesu ku zwa fela fo a bupelwa mangeloi ni batu. Jehova na itusisize Mwan’a hae kwa ku fitisa litaba ni litaelo kwa mangeloi, sina fela Mulimu ha na itusisize yena kwa ku fitiseza batu fa lifasi litaba za Hae. Bupaki bo bu bonisa kuli Jesu ki Linzwi, kamba Mubuleli wa Mulimu, bu mwa manzwi a Kreste a na bulelezi Majuda ba ne ba mu teeleza ha na ize: “Tuto ya ka ha i zwi ku na, kono i zwa ku Ya ni lumile. Mutu h’a lata ku eza se si latwa ki Mulimu, u ka ziba tuto ya ka kamba i zwa ku Mulimu, kamba ni ipulelela za ka.” (Joa. 7:16, 17) Jesu u sa biziswa lilumbatina la “Linzwi la Mulimu” mane ni hamulaho wa ku kutela mwa kanya ya lihalimu.—Sin. 19:11, 13, 16.
7. Lu kona ku likanyisa cwañi buikokobezo bwa bonisa Jesu mwa buikalabelo bwa hae bwa ku ba “Linzwi”?
7 Mu nahane fela ze li talusa lilumbatina leo. Nihaike kuli Jesu ki yena ya butali hahulu ku fita libupiwa kaufela za Jehova, ha itingi fa butali bwa hae. U bulela za laelwa ki Ndat’ahe. Kamita u libisa tumbo ku Jehova ku fita ku yena muñi. (Joa. 12:50) Wo ki mutala o munde o lu lukela ku likanyisa kaufela luna! Ni luna lu filwe tohonolo ye tuna ya ku ‘zibahaza Evangeli ya kozo, ya litaba ze nde.’ (Maro. 10:15) Ku utwisisa mutala wa Jesu wa buikokobezo ku swanela ku lu susueza ku tokolomoha ku bulelanga litaba ze lu ikupulezi fela. Ha lu fitisa lushango lo lu pilisa lwa mwa Mañolo, ha lu lati ku bulela litaba ze ‘si ka ñolwa.’—1 Makor. 4:6.
“Yena Ye Li Amen”
8, 9. (a) Linzwi la “amen” li talusañi, mi ki kabakalañi Jesu ha bizwa “yena ye li Amen”? (b) Jesu na petile cwañi buikalabelo bwa hae bwa ku ba “yena ye li Amen”?
8 Mu bale Sinulo 3:14. Ki kabakalañi Jesu ha bizwa “yena ye li Amen”? Linzwi la Siheberu le li tolokilwe kuli “amen” li talusa kuli “ku be cwalo,” kamba “luli.” Linzwi la “amen” li simuluha fa linzwi la Siheberu le li talusa ku “sepahala.” Linzwi le li swana leo li itusisizwe kwa ku talusa busepahali bwa Jehova. (Deut. 7:9; Isa. 49:7) Cwale Jesu u ipitezi cwañi ha bizwa “yena ye li Amen”? Ha mu bone mo li alabela liñolo la 2 Makorinte 1:19, 20: “Mwan’a Mulimu, Jesu Kreste, ya bulezwi ku mina . . . , h’a si ka ba E ni Awa, kono ku yena ki E. Kakuli lisepiso za Mulimu kaufel’a zona ki E ku Yena; kabakaleo Amen ni yona i teñi ku Yena, kuli Mulimu a lumbekwe ki luna.”
9 Jesu ki “yena ye li Amen” kwa lisepiso za Mulimu kaufela. Bupilo bwa hae bo bunde bwa fa lifasi, ku kopanyeleza cwalo ni lifu la hae la ku ifana sina sitabelo, ne li tiisize ni ku konahalisa lisepiso za Jehova Mulimu kaufela kuli li talelezwe. Ka ku zwelapili ku sepahala, Jesu hape na bonisize kuli tamilikezo ya Satani ye ñozwi mwa buka ya Jobo, ya kuli batanga ba Mulimu ba kona ku mu latula ha ba amuhiwa tutu ya bona, ha ba nyanda ni ku likiwa, ki ya buhata. (Jobo 1:6-12; 2:2-7) Kwa libupiwa za Mulimu kaufela, Mwana wa mweli ki yena fela ya na kona ku fa kalabo ye sa koni ku hanyezwa ka za tamilikezo ya Satani. Hape Jesu na file bupaki bo bunde bwa ku yemela Ndat’ahe mwa taba ye tuna ye ama tukelo ya Jehova ya ku busa pupo kamukana.
10. Lu kona ku likanyisa cwañi Jesu mwa petela buikalabelo bwa hae bo bu ipitezi bwa ku ba “yena ye li Amen”?
10 Lu kona ku likanyisa cwañi Jesu mwa petela buikalabelo bwa hae bo bu ipitezi bwa ku ba “yena ye li Amen”? Ki ka ku zwelapili ku sepahala ku Jehova ni ku yemela bubusi bwa hae bwa pupo kamukana. Haiba lu eza cwalo, lu ka amuhela kupo ye kwa Liproverbia 27:11, ye li: “Mwan’aka u talife, mi u tabise pilu ya ka, mi ni ka kona ku alaba ya ni nyaza.”
“Muyemeli wa Bulikani Bo Bunca”
11, 12. Buikalabelo bwa Jesu bwa ku ba Muyemeli bu ipitezi cwañi?
11 Mu bale 1 Timotea 2:5, 6. Jesu ki yena “muyemeli ya fahali a Mulimu ni batu.” Ki yena “Muyemeli wa bulikani bo bunca.” (Maheb. 9:15; 12:24) Nihakulicwalo, Mushe ni yena u bulelwa kuli ki muyemeli—ili muyemeli wa bulikani bwa Mulao. (Magal. 3:19) Cwalehe buikalabelo bwa Jesu bwa ku ba Muyemeli bu ipitezi cwañi?
12 Mwa puo ya kwa makalelo, linzwi le li tolokilwe kuli “muyemeli” li itusiswanga mwa litaba za mulao. Li ama ku Jesu sina Muyemeli wa mulao wa bulikani bo bunca bo bu konahalisize kuli ku be ni sicaba se sinca, sa “Isilaele wa Mulimu.” (Magal. 6:16) Sicaba se ki Bakreste ba ba tozizwe, ba ba eza “buprisita bwa silena.” (1 Pit. 2:9; Ex. 19:6) Bulikani bwa Mulao ne bu palezwi ku tahisa sicaba se si cwalo, Mushe ha na li muyemeli.
13. Buikalabelo bwa Jesu bwa ku ba Muyemeli bu kopanyelezañi?
13 Buikalabelo bwa Jesu bwa ku ba Muyemeli bu kopanyelezañi? Jehova u itusisa teko ya mali a Jesu ku ba ba tiswa mwa bulikani bo bunca. Ka ku eza cwalo, Jehova u ba nga ka mulao kuli ba lukile. (Maro. 3:24; Maheb. 9:15) Mulimu wa kona ku ba kenya mwa bulikani bo bunca ka mulelo wa kuli ba be malena ni baprisita kwa lihalimu! Ka ku ba Muyemeli wa bona, Jesu u ba tusa ku zwelapili ku ba ni mayemo a kenile fapil’a Jehova.—Maheb. 2:16.
14. Ki kabakalañi Bakreste kaufela, ku si na taba ni sepo ya bona, ha ba swanela ku utwisisa ni ku kuteka buikalabelo bwa Jesu bwa ku ba Muyemeli?
14 Ku cwañi ka za ba ba siyo mwa bulikani bo bunca, ba ba na ni sepo ya ku pila ku ya ku ile fa lifasi, isiñi kwa lihalimu? Nihaike kuli bona hasi kalulo ya bulikani bo bunca, ba fumana tuso kwa bulikani bo. Ba swalelwa libi za bona mi ba beiwa ba ba lukile sina balikani ba Mulimu. (Jak. 2:23; 1 Joa. 2:1, 2) Ibe kuli lu na ni sepo ya ku pila kwa lihalimu kamba fa lifasi, mañi ni mañi wa luna u swanela ku utwisisa ni ku kuteka buikalabelo bwa Jesu bwa ku ba Muyemeli wa bulikani bo bunca.
“Muprisita Yo Mutuna”
15. Buikalabelo bwa Jesu bwa ku ba Muprisita Yo Mutuna bu shutana cwañi ni bwa banna ba bañwi ba ne ba sebelize sina baprisita ba batuna?
15 Banna ba bañata ne ba sebelize sina baprisita ba batuna kwakale, kono buikalabelo bwa Jesu bwa ku ba Muprisita Yo Mutuna kaniti bu ipitezi. Ka mukwa ufi? Paulusi u talusa kuli: “H’a tokwi, mo ne ba ezeza baprisita ba bañwi ba batuna, ku tahisa pili, ka zazi ni zazi, matabelo kabakala libi za hae, kihona a tahisa a sicaba. Se, u si ezize hañwi, mi ku felile, nako ye a ikezize sitabelo i li yena. Kakuli Mulao u beya fa buprisita bo butuna batu ba ba fokola; kanti linzwi la buitamo, le li bulezwi mwamulaho wa Mulao, li beile Mwana, ili ya petehile mwa linako ze sa feli.”—Maheb. 7:27, 28. *
16. Ki kabakalañi sitabelo sa Jesu ha si ipitezi luli?
16 Jesu ne li mutu ya petehile, sina mwa na inezi Adama pili a si ka eza kale sibi. (1 Makor. 15:45) Kacwalo, Jesu ne li yena fela mutu ya na kona ku fa sitabelo se si petehile, ili se si kwanile—sitabelo se ne si sa tokwi ku fiwa hape. Mwa Mulao wa Mushe, matabelo na fiwa zazi ni zazi. Matabelo ao kaufela ni sebelezo ya baprisita ne li muluti fela wa za na ka peta Jesu. (Maheb. 8:5; 10:1) Bakeñisa kuli Jesu wa kona ku peta lika ze ñata ku fita baprisita ba bañwi, ni kuli u ka zwelapili ku eza musebezi wa hae wa buprisita, kanti buikalabelo bwa hae bwa ku ba Muprisita Yo Mutuna bu ipitezi.
17. Ki kabakalañi ha lu swanela ku utwisisa ni ku kuteka buikalabelo bwa Jesu bwa ku ba Muprisita Yo Mutuna wa luna, mi lu kona ku eza cwañi cwalo?
17 Lu tokwa misebezi ya Jesu ka ku ba Muprisita yo Mutuna kuli a lu tuse ku zwelapili ku sepahala ku Mulimu. Kaniti lu na ni Muprisita Yo Mutuna yo munde! Paulusi na ñozi kuli: “Ye lu na ni yena, hasi muprisita yo mutuna ya sa koni ku lu utwela butuku mwa mifokolo ya luna; kono ki ya n’a likilwe mwa litaba kaufela, sina luna, a sa weli mwa sibi.” (Maheb. 4:15) Kaniti ku utwisisa ni ku kuteka buikalabelo bwa peta Jesu ku swanela ku lu susueza ku ‘lisela ku ipilela, kono lu pilele ya lu shwezi.’—2 Makor. 5:14, 15; Luka 9:23.
“Peu” Ye Ne Sepisizwe
18. Ne ku polofitilweñi Adama ha sa ezize sibi, mi hasamulaho ne ku patuluzwiñi ka za bupolofita bo?
18 Mwa simu ya Edeni, batu ha ne ba latehezwi ki lika kaufela, ili bulikani bo bunde ni Mulimu, bupilo bo bu sa feli, tabo, ni Paradaisi—Jehova Mulimu na sepisize Muliululi. Muliululi yo na talusizwe kuli ki “peu.” (Gen. 3:15) Peu ye ne sa zibahali yeo ya ba ona makanatelo a bupolofita bwa Bibele hal’a lilimo-limo. Peu yeo ne i ka simuluha ku Abrahama, Isaka, ni Jakobo. Hape ne i ka simuluha mwa lusika lwa Mulena Davida.—Gen. 21:12; 22:16-18; 28:14; 2 Sam. 7:12-16.
19, 20. (a) Ki mañi Peu ye ne sepisizwe? (b) Ki kabakalañi ha ku konwa ku bulelwa kuli peu ye ne sepisizwe hasi Jesu fela?
19 Peu ye ne sepisizwe yeo ne li mañi? Kalabo ya puzo ye, i kwa Magalata 3:16. (Mu bale liñolo le.) Kono hasamulaho, mwa kauhanyo ye swana, muapositola Paulusi u zwelapili ku bulelela Bakreste ba ba tozizwe kuli: “Cwale ha mu li ba Kreste, fohe mu ba lusika lwa Abrahama, mi mu ka ca sanda sa sepiso.” (Magal. 3:29) Haiba Kreste ki yena Peu ye ne sepisizwe, ku taha cwañi kuli ba bañwi ni bona ba be kalulo ya peu?
20 Bolule-lule ba ipapata kuli ba simuluha ku Abrahama, mane ba bañwi ba ikeza inge bapolofita. Bulapeli bo buñwi bu kanatela fa taba ya kuli bapolofita ba bona ba simuluha ku Abrahama. Kona kana kikuli bapolofita bao kaufela ki Peu ye ne sepisizwe? Ku tokwa. Sina mwa bulelela muapositola Paulusi ya na tusizwe ki moya wa Mulimu, hasi batu kaufela ba ba simuluha ku Abrahama ba ba kona ku ipapata kuli ki bona kalulo ya Peu ye ne sepisizwe. Baikulu ba Abrahama ba bañwi ne ba si ka itusiswa kwa ku fuyaula batu. Peu ye ne ka itusiswa kwa ku fuyaula batu ne i ka ba ya Isaka fela. (Maheb. 11:18) Kwa mafelelezo, ne li mutu a li muñwi fela, Jesu Kreste, wa situhulu sa Abrahama se si ñozwi mwa Bibele, ya na ka ba fela kalulo ya pili ya peu ye ne sepisizwe. * Ba bañwi kaufela ne ba ka ba kalulo ya bubeli ya peu ya Abrahama kabakala kuli ki “ba Kreste.” Kaniti, buikalabelo bwa peta Jesu bwa ku taleleza bupolofita bo, bu ipitezi luli.
21. Ki nto mañi ye mu itebuha ka za mo Jesu a petezi buikalabelo bwa hae bo bu ipitezi mwa mulelo wa Jehova?
21 Ki lika mañi ze lu itutile ka ku nyakisisa ka bukuswani buikalabelo bwa peta Jesu mwa mulelo wa Jehova? Ku zwa fela fa bupelwa, Mwan’a Mulimu wa libanda u bile ya ipitezi. Kono Mwan’a Mulimu ya ipitezi yo ya na tilo ba Jesu u zwezipili ku sebeza ka buikokobezo ka ku lumelelana ni Ndat’ahe, ili ku sa ipatela libubo. (Joa. 5:41; 8:50) Wo ki mutala o ipitezi luli ku luna kacenu! Sina Jesu, haike lu ikataze ku ‘eza linto kaufela kuli Mulimu a lumbekwe ka zona.’—1 Makor. 10:31.
[Litaluso za kwatasi]
^ para. 15 Caziba yo muñwi wa za Bibele u bulela kuli linzwi la Sigerike le li tolokilwe “hañwi, mi ku felile,” li talusa taba ya butokwa ya mwa Bibele ya kuli “ku ifana sitabelo kwa Kreste ku ipitezi mi ha tokwi ku ifana sitabelo hape.”
^ para. 20 Nihaike kuli Majuda ba mwa linako za baapositola ne ba nahana kuli bona ka ku ba bana ba Abrahama, ne ba ka ba sicaba se ne si ka shemubiwa, ne ba libelezi mutu a li muñwi ya na ka taha sina Mesia, kamba Kreste.—Joa. 1:25; 7:41, 42; 8:39-41.
Kana Mwa Hupula?
• Mu itutileñi ka za buikalabelo bo bu ipitezi bwa peta Jesu kwa malumbatina a hae? (Mu bone sikwenda.)
• Mu kona ku likanyisa cwañi mutala wa Mwan’a Jehova ya ipitezi?
[Lipuzo za Tuto]
[Mbokisi/Siswaniso se si fa likepe 15]
Malumbatina A Mañwi A’ Bonisa Buikalabelo Bo Bu Ipitezi Bwa Peta Jesu mwa Mulelo wa Mulimu
▪ Mwana wa Libanda. (Joa. 1:3) Jesu ki yena a nosi fela ya na bupilwe ki Ndat’ahe ka sibili.
▪ Linzwi. (Joa. 1:14.) Jehova u itusisa Mwan’a hae sina Mubuleli kwa ku fitisa litaba ni litaelo kwa libupiwa ze ñwi.
▪ Yena Ye Li Amen. (Sin. 3:14) Bupilo bo bunde bwa Jesu ha na li fa lifasi, ku kopanyeleza cwalo ni lifu la hae la ku ifana sina sitabelo, ne bu tiisize ni ku konahalisa lisepiso za Jehova Mulimu kaufela kuli li talelezwe.
▪ Muyemeli wa Bulikani Bo Bunca. (1 Tim. 2:5, 6) Ka ku ba Muyemeli wa mulao, Jesu u konahalisize kuli ku be ni sicaba se sinca, sa “Isilaele wa Mulimu,” sa Bakreste ba ba tozizwe, ba ba eza “buprisita bwa silena.”—Magal. 6:16; 1 Pit. 2:9.
▪ Muprisita Yo Mutuna. (Maheb. 7:27, 28) Jesu ne li yena fela mutu ya na kona ku fa sitabelo se si petehile, ili se si kwanile, se ne si sa tokwi ku fiwa hape. Wa kona ku lu kenisa kwa sibi ni ku lu lukulula kwa lifu le li tiswa ki sibi.
▪ Peu Ye Ne Sepisizwe. (Gen. 3:15) Ki mutu a li muñwi fela, Jesu Kreste, ya li kalulo ya pili ya peu ye ne sepisizwe. Ba bañwi kaufela ba ne ba tilo ba kalulo ya bubeli ya peu ya Abrahama ki “ba Kreste.”—Magal. 3:29.