A mu Bone Mutanga wa Jehova ya Katelwa!

“A mu bone mutanga wa ka . . . y’o katelwa moya wa ka.”—ISA. 42:1.

1. Batu ba Jehova ba swanela ku ezañi, sihulu nako ya Kupuzo ha i nze i atumela, mi ki kabakalañi?

NAKO ya ku hupula lifu la Kreste ha i nze i atumela, batu ba Mulimu ba swanela ku mamela kelezo ya muapositola Paulusi ya ku ‘talimela Jesu, yena Mutateki ni Mufelelezi wa tumelo’ ya luna. Paulusi naa ekelize, a li: “Mu mu lemuhe yena ya itiisize niha n’a hanyezwa cwalo ki baezalibi, kuli mu si ke mwa katala ni ku fela pilu.” (Maheb. 12:2, 3) Ku hupula mukwa wa Kreste wa ku sepahala ku isa kwa lifu la hae la sitabelo, ku ka tusa Bakreste ba ba tozizwe ni balikani ba bona ba lingu ze ñwi ku zwelapili ku sebeleza Jehova ka busepahali ni ku tokolomoha “ku fela pilu.”—Mu bapanye Magalata 6:9.

2. Ki lika mañi ze lu kona ku ituta kwa bupolofita bwa Isaya bo bu ama Mwanaa Mulimu?

² Ka moya wa hae, Jehova naa susumelize mupolofita Isaya ku ñola bupolofita bo buñata bo bu ama Mwanaa hae luli. Bupolofita bo, bu ka lu tusa ku ‘talimela Mutateki ni Mufelelezi wa tumelo’ ya luna, yena Kreste Jesu. * Bu talusa butu bwa hae, manyando a hae, ni ku pahamiswa kwa hae sina Mulena ni Muliululi wa luna. Bu ka ekeza kwa kutwisiso ya luna ya ku utwisisa mukiti wa Kupuzo, o lu ka eza unomwaha la Bune, ka la 9 April, lizazi ha se li likezi.

Mutanga Wa Zibahazwa

3, 4. (a) Mwa buka ya Isaya, linzwi la “mutanga” li talusa bomañi? (b) Bibele yona i zibahaza cwañi Mutanga ya bulezwi mwa Isaya, mwa likauhanyo za 42, 49, 50, 52, ni 53?

³ Linzwi la “mutanga” li fumaneha hañata mwa buka ya Isaya. Linzwi leo fokuñwi li talusa yena Isaya ka sibili. (Isa. 20:3; 44:26) Mi fokuñwi li talusa sicaba kaufela sa Isilaele, kamba Jakobo. (Isa. 41:8, 9; 44:1, 2, 21) Kono bupolofita bo bu ipitezi bo bu ñozwi mwa Isaya, mwa likauhanyo za 42, 49, 50, 52, ni 53, bo bu bulela za Mutanga, bu talusa mañi? Mañolo a Sigerike a Sikreste a zibahaza hande Mutanga wa Jehova ya talusizwe mwa likauhanyo zeo. Mane likande le liñwi le li mwa buka ya Likezo li bulela za nduna wa Muetopia ya naa bala bo buñwi bwa bupolofita bo, muta Filipi, mubuleli wa Evangeli, naa laezwi ki moya kuli a atumele nduna yo. Nduna yo ya naa bala taba ya Bibele ye ñozwi kwa Isaya 53:7, 8, naa buzize Filipi kuli: “Na ku lapela, ni bulelele [muñaa] taba ye bulelwa ki mupolofita; kikuli wa ipulela, kamba u bulela yo muñwi?” Honafo Filipi a mu taluseza kuli  Isaya naa bulela ka za Mesia, ili Jesu.—Lik. 8:26-35.

⁴ Jesu ha naa sa li mbututu, muuna ya naa lukile ya bizwa Simioni naa ize ka susumezo ya moya o kenile kuli “mwana, yena Jesu” naa ka ba “liseli le li bonisa macaba,” ka mo ku polofitezwi kwa Isaya 42:6 ni 49:6. (Luka 2:25-32) Hape ku shubulwa kwa Jesu fa busihu bwa muzeko wa hae ne ku bulezwi kale mwa bupolofita bwa Isaya 50:6-9. (Mat. 26:67; Luka 22:63) Hamulaho wa Pentekonta ya 33 C.E., muapositola Pitrosi naa zibahalize fo ku sweu kuli Jesu ki “Mutang’a” Jehova. (Isa. 52:13; 53:11; mu bale Likezo 3:13, 26.) Lu kona ku itutañi kwa bupolofita bo, bo bu bulela za Mesia?

Jehova U Luta Mutanga wa Hae

5. Mutanga naa lutilwe cwañi?

⁵ Bo buñwi bwa bupolofita bwa Isaya ka za Mutanga wa Mulimu bu talusa bulikani bo butuna bo ne bu li teñi mwahalaa Jehova ni Mwanaa hae wa mweli pili Mwana a si ka pila kale fa lifasi. (Mu bale Isaya 50:4-9.) Mutanga yena ka sibili u zibahaza kuli Jehova naa mu luta: “Habusile, ka zazi ni zazi, u zusa, e, u zusa zebe ya ka, kuli ni teeleze mo ku teeleleza balutiwa.” (Isa. 50:4) Mwahalaa nako yeo kaufela, Mutanga wa Jehova naa teeleza ku Ndatahe ni ku ituta ku yena, mi a ba mulutiwa ya ikokobeza. Kaniti ku lutiwa ki Mubupi wa linto kaufela ki tohonolo ye ipitezi!

6. Mutanga naa bonisize cwañi buikokobezo bwa hae bo bu petehile ku Ndatahe?

⁶ Mwa bupolofita bo, Mutanga u li Ndatahe ki “Mulena [Muñaa] Bupilo.” Taba yeo i bonisa kuli Mutanga naa itutile niti ya butokwa ya kuli Jehova ki yena Mubusi wa pupo kamukana. Ha naa talusa buikokobezo bwa hae bo bu petehile ku Ndatahe, Mutanga naa ize: “Mulena [Muñaa] Bupilo u ni tibuluzi lizebe, mi ha ni si ka hana, kamba ku sutela mwamulaho.” (Isa. 50:5) Naa ‘inzi ku Muñaa Bupilo a nze a mu sebeleza’ mwa pupo ya mahalimu ni lifasi ni ya batu. Mwana yo ya naa “sebeleza” Jehova naa nze a ‘tabile fapilaa hae kamita: naa tabela lifasi mo ku yahile batu mi naa wabelelwa ni bana ba batu.’—Liprov. 8:22-31.

7. Ki nto mañi ye bonisa kuli Mutanga naa na ni sepo ya kuli Ndatahe naa mu tusa mwa miliko ya hae?

⁷ Tuto ya naa filwe Mutanga ni lilato la hae la ku lata batu ne li mu tusize ha naa tile fa lifasi ni ku to lwaniswa maswe. Naa zwezipili ku tabela ku eza tato ya Ndatahe, niha naa nyandisizwe hahulu. (Samu 40:8; Mat. 26:42; Joa. 6:38) Mwa miliko kaufela ya naa ipumani ku yona fa lifasi, Jesu naa sepile kuli Ndatahe naa mu katelwa ni ku mu tusa. Sina mo ne ku sinulezwi mwa bupolofita bwa Isaya, Jesu naa kona ku bulela kuli: “Ya ka bonahalisa niti ya ka, u fakaufi; ya ka ni zekisa ki mañi? . . . A mu bone, Mulena [Muñaa] Bupilo ki Yena ya ni tusa.” (Isa. 50:8, 9) Kaniti, Jehova naa tusize Mutanga wa hae ya sepahala mwa bukombwa bwa hae kaufela fa lifasi, sina mo bu boniseza bupolofita bo buñwi bwa Isaya.

Bukombwa bwa Mutanga bwa fa Lifasi

8. Ki nto mañi ye paka kuli Jesu naa li yena “Muketiwa” wa Jehova, sina mo ne ku sinulezwi kwa Isaya 42:1?

⁸ Bibele i lu bulelela ze ne ezahezi Jesu ha naa kolobelizwe ka 29 C.E.: “Moya o Kenile wa shetumukela fahalimw’a hae . . . mi linzwi la zwa kwa lihalimu, la li: Ki wena Mwan’a ka ya latwa, ye ni katelwa.” (Luka 3:21, 22) Ka nzila yeo, Jehova naa zibahalize “Muketiwa” wa hae, ya bulezwi mwa bupolofita bwa Isaya. (Mu bale Isaya 42:1-7.) Halaa bukombwa bwa hae bwa fa lifasi, Jesu naa talelelize bupolofita bo ka nzila ye komokisa hahulu. Mwa likande la hae la Evangeli, Mateu naa kutezi manzwi a fumaneha kwa Isaya 42:1-4 mi naa ize manzwi ao naa talusa Jesu.—Mat. 12:15-21.

9, 10. (a) Jesu naa talelelize cwañi Isaya 42:3 halaa bukombwa bwa hae? (b) Kreste naa ‘zamaisize cwañi ka ku luka’ ha naa li fa lifasi, mi ki lili fa ka ‘tomela zamaiso ya ku luka mwa lifasi’?

⁹ Baluti ba bulapeli bwa Sijuda ne ba nyaziseza batu ba ne ba li babotana mwahalaa bona.  (Joa. 7:47-49) Babotana bao ne ba ezwa maswe mi ne ba kona ku bapiswa ni ‘mataka a fonyokile’ kamba ‘mamonyi’ a bata ku tima. Kono Jesu naa bonisize mufelañeke kwa babotana ni ku ba ne ba nyandiswa. (Mat. 9:35, 36) Naa memile batu ba ba cwalo, a li: “Mu tahe ku na mina kamukana ba ba katezi, ba ba imezwi, mi ni ka mi imulula.” (Mat. 11:28) Fahalimu a seo, Jesu naa ‘zamaisize ka ku luka,’ ili ka ku luta likuka za Jehova za se si lukile ni se si si ka luka. (Isa. 42:3) Jesu hape naa bonisize kuli Mulao wa Mulimu ne u lukela ku mamelwa ka kutwisiso ni ka sishemo. (Mat. 23:23) Mi hape Jesu naa ezize ka ku luka ka ku kutaza ku ba ba fumile ni babotana, ku si na saluluti.—Mat. 11:5; Luka 18:18-23.

¹⁰ Bupolofita bwa Isaya hape bu li “Muketiwa” wa Jehova u ka ‘toma zamaiso ya ku luka mwa lifasi.’ (Isa. 42:4) U ka eza cwalo honafa muta a sinya mibuso kaufela ya batu ni ku i yolisa ka puso ya hae ye lukile, ka ku ba yena Mulena wa Mubuso wa Mesia. U ka tahisa lifasi le linca, “mo ku yahile Ku Luka.”—2 Pit. 3:13; Dan. 2:44.

“Liseli” ni “Bulikani”

11. Jesu naa li yena “liseli la macaba” ka mukwa ufi mwa bukombwa bwa hae bwa fa lifasi, mi ki yena “liseli la macaba” ka mukwa ufi ni ka nako ya cwale?

¹¹ Kaniti Jesu naa bile “liseli la macaba” mi naa talelelize cwalo Isaya 42:6. Halaa bukombwa bwa hae bwa fa lifasi, naa tisize liseli la moya sihulu kwa Majuda. (Mat. 15:24; Lik. 3:26) Kono Jesu naa ize: “Ki na liseli la lifasi.” (Joa. 8:12) Naa bile liseli kwa Majuda ni kwa macaba isi feela ka ku tisa monyehelo ya kwa moya kono hape ni ka ku fa bupilo bwa hae bo bu petehile kuli a liulule batu kaufela. (Mat. 20:28) Ha saa zusizwe kwa bafu, naa laezi balutiwa ba hae kuli ba be lipaki za hae “ku isa kwa mafelelezo a lifasi.” (Mat. 20:28; Lik. 1:8) Mwa bukombwa bwa bona, bo Paulusi ni Barnabasi ne ba itusisize pulelo ya “liseli la macaba” mi ba bulela kuli pulelo yeo, ne i talusa musebezi wa ku kutaza o ne ba peta mwahalaa batu ba ne ba si Majuda. (Lik. 13:46-48; mu bapanye Isaya 42:6.) Musebezi wo u sa ezwa ni kacenu, banyani ba Jesu ba ba tozizwe ni balikani ba bona ha ba nze ba hasanya liseli la moya ni ku tusa batu ku lumela ku Jesu, yena “liseli la macaba.”

12. Jehova u beile cwañi Mutanga wa hae “ku swalisa bulikani ni sicaba”?

¹² Mwa bupolofita bo bu swana bo, Jehova naa bulelezi Mutanga wa hae ya ketilwe kuli: ‘Ni ka ku babalela mi ni ku beye ku swalisa bulikani ni sicaba.’ (Isa. 42:6) Satani naa tundamezi ku lika ku bulaya Jesu ni ku mu palelwisa ku taleleza bukombwa bwa hae fa lifasi, kono Jehova naa mu babalezi kamba ku mu sileleza ku fitela nako ya hae ya ku shwa. (Mat. 2:13; Joa. 7:30) Mi cwale Jehova a zusa Jesu kwa bafu mi a mu beya sina “bulikani,” kamba sepiso, kwa batu ba ba fa lifasi. Sepiso yeo neeli sisupo se si tiile sa kuli Mutanga wa Mulimu ya sepahala naa ka zwelapili ku ba “liseli la macaba,” ka ku lukulula ba ba inzi mwa lififi la moya.—Mu bale Isaya 49:8, 9. *

13. Jesu naa lukuluzi cwañi “ba ba inzi mwa lififi” mwa bukombwa bwa hae bwa fa lifasi, mi u zwelapili cwañi ku eza cwalo?

 ¹³ Ka ku lumelelana ni sepiso yeo, Mutanga wa Jehova ya ketilwe naa ka “tutubula meto a libofu, ku zwisa ba ba tamilwe mwa tolongo,” ni ku lukulula “ba ba inzi mwa lififi.” (Isa. 42:7) Mwa bukombwa bwa hae bwa fa lifasi, Jesu naa petile zeo ka ku patulula litaba za sihabo za bulapeli ze fosahalile ni ku zibahaza taba ye nde ya Mubuso. (Mat. 15:3; Luka 8:1) Kamukwaocwalo, a lukulula Majuda ba ne ba tilo ba balutiwa ba hae kwa bulapeli bwa buhata. (Joa. 8:31, 32) Ka nzila ye swana, Jesu u tusize batu ba bañata-ñata ba ba si Majuda ku ituta niti. U laezi balateleli ba hae kuli ba “ye . . . [ba] lute macaba kaufela,” ka ku ba sepisa kuli u ka ba ni bona “ku isa kwa mafelelezo a lifasi.” (Mat. 28:19, 20) Kreste Jesu u zamaiseza kwa lihalimu musebezi wa ku kutaza mwa lifasi kaufela.

Jehova Naa Pahamisize “Mutanga” wa Hae

14, 15. Ki kabakalañi Jehova ha naa pahamisize Mutanga wa hae, mi naa mu pahamisize cwañi?

¹⁴ Mwa bupolofita bo buñwi bo bu ama Mutanga wa hae Mesia, Jehova u li: “A mu bone, mutanga wa ka u ka konda, a hule, a pahame, a be mutu yo mutuna hahulu.” (Isa. 52:13) Kabakala kuli Mwanaa hae u ipeya ka busepahali kwatasaa bubusi bwa hae ni kuli naa sepahalile ha naa tahezwi ki muliko o taata ka ku fitisisa, Jehova naa mu pahamisize.

¹⁵ Muapositola Pitrosi naa ñozi cwana ka za Jesu: “Yena ya ile kwa lihalimu, ya inzi ku la bulyo la Mulimu; mi mangeloi, ni malena, ni mibuso, li beilwe mwa puso ya hae.” (1 Pit. 3:22) Muapositola Paulusi ni yena naa ñozi kuli: “A ikokobeza, a ipeya ku utwa ku isa kwa lifu, mane lifu la sifapano. Kabakaleo Mulimu u mu pahamisize hahulu ni ku fita, mi u mu file Libizo le li fahalimw’a mabizo kamukana; kuli ka Libizo la Jesu, mañwele kaufela a kubame, kwa lihalimu ni mwa lifasi ni mwatas’a lifasi, mi malimi kamukana a bulele kuli Jesu Kreste ki Mulena, ibe kanya ku Mulimu Ndate.”—Mafil. 2:8-11.

16. Jesu naa ‘pahamisizwe hahulu’ cwañi ka 1914, mi u petileñi ku zwa silimo seo?

¹⁶ Ka 1914, Jehova naa pahamisize hahulu Jesu ni ku fita. Naa mu “pahamisize hahulu” ha naa mu tomile fa lubona sina Mulena wa Mubuso wa Mesia. (Samu 2:6; Dan. 7:13, 14) Ku zwa silimo seo, Kreste u kalile ku “toma puso ya [hae] mwahal’a lila za [hae].” (Samu 110:2) Naa  kalile ku busa ka ku lundula Satani ni badimona ba hae, ili ku ba nepela fa lifasi. (Sin. 12:7-12) Mi cwale Kreste a lukulula banyani ba hae ba ba tozizwe ba ba sa siyezi fa lifasi kwa puso ya “Babilona yo mutuna,” sina Sirusi ha naa lukuluzi Majuda. (Sin. 18:2; Isa. 44:28) U zamaisize musebezi wa ku kutaza mwa lifasi kaufela o tisize kuli ku kubukanyiwe banyani ba hae ba kwa moya “ba ba sa siyezi,” ni bolule-lule ba “lingu ze ñwi,” bona balikani ba ba sepahala ba “mutapinyana.”—Sin. 12:17; Joa. 10:16; Luka 12:32.

17. Ki lika mañi ze lu itutile mwa ku nyakisisa bupolofita bwa Isaya bo bu ama “mutanga”?

¹⁷ Kaniti, ku ituta bupolofita bo bu tabisa bo bwa mwa buka ya Isaya ku lu tusize ku itebuha hahulu Mulena ni Muliululi wa luna, Kreste Jesu. Buikokobezo bwa hae sina Mwana mwahalaa bukombwa bwa hae bwa fa lifasi ne ku bonisize kuli naa lutilwe ki Ndatahe pili a si ka taha kale fa lifasi. U iponahalize sina “liseli la macaba” ka bukombwa bwa hae ni ka musebezi wa ku kutaza wa zamaisize ku to fita ni la kacenu le. Sina mo lu ka itutela mwa taba ye tatama, bupolofita bo buñwi bwa Mutanga ye li Mesia bu bonisa kuli naa ka nyanda ni ku toboha bupilo bwa hae kabakala luna, ili litaba ze lu swanela ku ‘lemuha,’ mukiti wa Kupuzo ya lifu la hae ha u nze u atumela.—Maheb. 12:2, 3.

[Litaluso za kwatasi]

Lundululo

• Ki mañi “mutanga” ya bulezwi mwa bupolofita bwa Isaya, mi lu ziba cwañi cwalo?

• Mutanga naa lutilwe cwañi ki Jehova?

• Jesu ki “liseli la macaba” ka mukwa ufi?

• Mutanga naa pahamisizwe cwañi?

[Lipuzo za Tuto]

[Siswaniso se si fa likepe 21]

Filipi naa zibahalize fo ku sweu kuli Jesu, ye li Mesia, ki yena “mutanga” ya bulezwi ki Isaya

[Siswaniso se si fa likepe 23]

Ka ku ba Mutanga wa Jehova ya ketilwe, Jesu naa bonisize mufelañeke kwa babotana ni ku ba ne ba nyandiswa

[Siswaniso se si fa likepe 24]

Jesu naa pahamisizwe ki Ndatahe ni ku tomiwa fa lubona sina Mulena wa Mubuso wa Mesia