Kana mu ‘Sikombwa sa Sishemo sa Mulimu’?
Kana mu ‘Sikombwa sa Sishemo sa Mulimu’?
“Mu latane ba bañwi ni ba bañwi ka lilato la mutu ni munyan’a hae, inze mu beyana kwapili ka ku fanana likute.”—MARO. 12:10.
1. Ki lisepiso lifi ze lu fumana mwa Linzwi la Mulimu?
LINZWI LA MULIMU li kuta-kutela ku lu sepisa kuli Jehova u ka lu tusa muta lu zwafa kamba ku lobeha lipilu. Ka mutala, ha mu bone manzwi a tiisa a, a li: “[Muñaa] Bupilo u tiisa ba ba bata ku wa kamukana, u inula ba ba kotobani.” “Ba ba lobehile lipilu, wa ba folisa, u tama litombo za bona.” (Samu 145:14; 147:3) Mane Ndataa luna wa kwa lihalimu yena ka sibili u li: “Na, [Muñaa] Bupilo Mulimu wa hao, ni ku sweli kwa lizoho la bulyo, mi ni ku bulelela, ni li: Si sabi, ni ka ku tusa.”—Isa. 41:13.
2. Jehova u tusa cwañi batanga ba hae?
2 Kono cwale Jehova, yena ya pila mwa mahalimu a sa bonahali, u ‘lu swala kwa lizoho’ ka mukwa ufi? U lu ‘inula cwañi ha lu kotobaniswa’ ki masitapilu? Jehova Mulimu u lu tusa cwalo ka mikwa ye fitana-fitana. Ka mutala, u fa batu ba hae ‘mata a matuna hahulu’ ka moya o kenile wa hae. (2 Makor. 4:7; Joa. 14:16, 17) Batanga ba Mulimu hape ba inulwa ki Linzwi la Mulimu le li tahile ka moya, yona Bibele, ili le li na ni maata. (Maheb. 4:12) Kana ku sa na ni nzila ye ñwi ya lu tiisa ka yona Jehova? Lu fumana kalabo mwa buka ya Pili ya Pitrosi.
“Sishemo sa Mulimu Se Si Taha ka Mikwa Ye Miñata”
3. (a) Ki manzwi afi a bulela muapositola Pitrosi ka za miliko? (b) Ki lika mañi ze nyakisiswa mwa kalulo ya mafelelezo ya liñolo la pili la Pitrosi?
3 Ha naa ñolela balumeli ba ba tozizwe, muapositola Pitrosi naa ize ba swanela ku taba kakuli ba libelezi mupuzo o mutuna. Kihona a ekeza kuli: “Mu na ni ku swabiswa cwale, ka nako ye nyinyani, ki miliko ya mifuta ye miñata.” (1 Pit. 1:1-6) Mu lemuhe pulelo ye li “mifuta ye miñata.” Pulelo yeo i bonisa kuli miliko i ka ba ya mifuta-futa. Kono Pitrosi ha yemeli fo, a sa tusi mizwale ba hae ku ziba nji ba ka kona ku itiisa mwa miliko ya mifuta-futa yeo. U bonisa kuli Bakreste ba kona ku ba ni sepo ya kuli Jehova u ka ba tusa ku itiisa mwa muliko ni muliko o ba ka kopana ni ona, ku si na taba ni mo u ka bela muliko wo. Sepiso yeo i fumaneha kwa mafelelezo a liñolo la Pitrosi, ili mo muapositola u nyakisisa litaba ze ama “mafelelezo a linto kamukana.”—1 Pit. 4:7.
4. Ki kabakalañi manzwi a kwa 1 Pitrosi 4:10 ha lu tiisa lipilu?
4 Pitrosi u li: “Mutu ni mutu, mw’a fezwi mpo ki Mulena, a sebeleze ba bañwi ka yona, sina ha ku lukela likombwa ze nde za sishemo sa Mulimu se si taha ka mikwa ye miñata.” (1 Pit. 4:10) Pitrosi hape u itusisa pulelo ye swana ye tolokilwe kuli “mikwa ye miñata” mwa timana ye. Za bulela fo kikuli, ‘Miliko i taha ka mikwa ye miñata, ye shutana-shutana, kono sishemo sa Mulimu ni sona si taha ka mikwa ye miñata, ye shutana-shutana.’ Ki kabakalañi pulelo yeo ha i li ye tiisa pilu? Pulelo yeo i talusa kuli muliko o ka lu tahela niha u ka ba wa mufuta ufi kamba ufi, sishemo sa Mulimu si ka lu tusa ku itiisa mwa muliko wo. Kono kana mu lemuhile mo si bonisezwa sishemo sa Jehova ku luna ka ku ya ka manzwi a Pitrosi? Ki ka Bakreste ka luna.
Mu “Sebeleze Ba Bañwi”
5. (a) Mukreste ni Mukreste u swanela ku ezañi? (b) Ki lipuzo lifi ze zuha?
5 Ha naa bulela ku ba mwa puteho ya Sikreste kaufela, Pitrosi naa ize: “Sihulu mu latane ka lilato le lituna.” Mi a ekeza, a li: “Mutu ni mutu, mw’a fezwi mpo ki Mulena, a sebeleze ba bañwi ka yona.” (1 Pit. 4:8, 10) Kacwalo mañi ni mañi mwa puteho u swanela ku tusa mwa ku tiisa Bakreste ka yena. Ka ku ba likombwa, lu filwe nto ya butokwa ye zwa ku Jehova, mi lu na ni buikalabelo bwa ku sebeleza ba bañwi ka yona nto yeo. Kacwalo, ki ifi nto ya butokwa ye lu filwe yeo? Pitrosi u alaba kuli ki “mpo.” Mi ki mpo mañi ona yeo? Lu itusisa yona cwañi mwa ku “sebeleze ba bañwi”?
6. Ki lifi ze ñwi za limpo ze ba filwe Bakreste?
6 Linzwi la Mulimu li li: “Mpo ye nde kaufela, ni mpo ye petehile kaufela, i zwa kwahalimu.” (Jak. 1:17) Kaniti, limpo kaufela za fa Jehova kwa batu ba hae li bonahalisa sishemo sa hae. Mpo ye ñwi ye ipitezi ya lu fanga Jehova ki moya o kenile. Mpo yeo i lu tusa ku ba ni tulemeno to tu tabisa Mulimu to tu cwale ka lilato, bunde, ni buishuwo. Mi tulemeno to tu cwalo tu lu susueza ku lata balumeli ka luna ka pilu ye na ni niti ni ku ba tusa ka nako ni nako. Hape butali ni zibo za niti ki ze ñwi za limpo ze nde ze lu fumana ka tuso ya moya o kenile. (1 Makor. 2:10-16; Magal. 5:22, 23) Mane maata a luna kaufela ni buikoneli, li kona ku ngiwa sina limpo ze swanela ku itusiswa kwa ku lumbeka ni ku kuteka Ndataa luna wa kwa lihalimu. Lu na ni buikalabelo bo lu filwe ki Mulimu bwa ku itusisa buikoneli bwa luna ni tulemeno twa luna kwa ku bonahalisa sishemo sa Mulimu kwa balumeli ka luna.
Mu “Sebeleze Ba Bañwi ka Yona” —Ka Mukwa Ufi?
7. (a) Pulelo ya kuli “mw’a fezwi” i bonisañi? (b) Ki lipuzo lifi ze lu lukela ku ipuza, mi ki kabakalañi?
7 Ka za limpo ze lu filwe, Pitrosi hape u bulela kuli: ‘Mutu ni mutu, mw’a fezwi mpo ki Mulena, a sebeleze ba bañwi ka yona.’ Pulelo ya kuli “mw’a fezwi” i bonisa kuli mañi ni mañi wa luna u filwe limpo, ili tulemeno ni buikoneli, ze kona ku ba ze shutana-shutana. Nihakulicwalo, mañi ni mañi u susuezwa ku ‘sebeleza ba bañwi ka yona,’ fo, kikuli mpo ifi kamba ifi ya filwe. Fahalimu a zeo, manzwi a kuli lu ‘sebeleze ba bañwi ka yona, sina likombwa ze nde’ ki taelo. Kacwalo, lu lukela ku ipuza kuli: ‘Kana luli naa itusisanga limpo ze ni filwe kwa ku tiisa balumeli ka na?’ (Mu bapanye 1 Timotea 5:9, 10.) ‘Kamba kana naa itusisanga buikoneli bwa ni file Jehova sihulu kwa ku itusa fela—mwendi ili ka ku ipatela sifumu kamba libubo?’ (1 Makor. 4:7) Haiba lu itusisa limpo za luna kwa ku ‘sebeleza ba bañwi,’ lu ka tabisa Jehova.—Liprov. 19:17; mu bale Maheberu 13:16.
8, 9. (a) Ki linzila lifi zeo Bakreste mwa lifasi kaufela ba sebeleza balumeli sina bona ka zona? (b) Mizwale ni likaizeli ba mwa puteho ya mina ba tusananga cwañi?
8 Linzwi la Mulimu li bonisa mikwa ye fitana-fitana ye ne ba sebelelize ba bañwi ka yona Bakreste ba mwa linako za baapositola. (Mu bale Maroma 15:25, 26; 2 Timotea 1:16-18.) Ka ku swana, Bakreste ba niti kacenu ba mamela ka tabo taelo ya ku sebeleza balumeli ka bona ka limpo ze ba filwe. Ha mu nyakisise linzila ze ñwi ze ba eza cwalo ka zona.
9 Mizwale ba bañata ba tandanga lihora ze ñata ka kweli ni kweli i nze ba itukiseza likalulo za mikopano. Kwa mikopano, mizwale bao ha ba fitisa litaba ze ñwi za butokwa ze ba fumani ha ne ba ituta Bibele, manzwi a bona aa butali a susuezanga puteho kaufela ku itiisa mwa miliko. (1 Tim. 5:17) Mizwale ni likaizeli ba bañata ba zibahala ka lilato ni mukekecima o ba bonisa kwa balumeli ka bona. (Maro. 12:15) Ba bañwi ba potelanga ba ba zwafile ni ku lapela ni bona. (1 Mates. 5:14) Ba bañwi ba hupulanga Bakreste ka bona ba ba tahezwi ki miliko ka ku ba ñolela manzwi a susueza. Mi ba bañwi bona ba tusanga ba ba palelwanga ku ya kwa mikopano ya puteho kabakala mapongo kamba busupali. Lipaki ba bañata-ñata ba tusanga balumeli ka bona ba ba ziyelehile ka ku ba yahela sinca mandu a bona a sinyizwe ki likozi. Lilato ni lituso ze fiwa ki mizwale ni likaizeli ba ba cwalo li bonahalisa “sishemo sa Mulimu se si taha ka mikwa ye miñata.”—Mu bale 1 Pitrosi 4:11.
Ki Ifi Nto ya Butokwa Hahulu?
10. (a) Paulusi naa iyakatitwe likalulo lifi ze peli za sebelezo ya hae ku Mulimu? (b) Lu kona ku likanyisa cwañi Paulusi?
10 Batanga ba Mulimu ha ba si ka fiwa feela limpo ze ba lukela ku itusisa kwa ku sebeleza balumeli ka bona kono hape ba filwe lushango lo ba lukela ku bulelela batu ba bañwi. Muapositola Paulusi naa lemuhile likalulo ze peli zeo za sebelezo ya hae ku Jehova. Naa ñolezi balumeli ba mwa puteho ya kwa Efese ka za mwa naa “abelezwi musebezi ki Mulimu, ni sishemo” sa naa filwe ki yena kuli ba tusiwe ka yena. (Maef. 3:2) Kono hape naa ize: “Mulimu [u] lu boni kuli lu swanelwa ku abelwa sebelezo ya Evangeli.” (1 Mates. 2:4) Sina Paulusi, ni luna lu ziba kuli lu filwe musebezi wa ku zibahaza Mubuso wa Mulimu. Ka ku tukufalelwa musebezi wa ku kutaza, lu ikataza ku likanyisa mutala wa naa tomile Paulusi wa ku shaela taba ye nde ka ku tundamena. (Lik. 20:20, 21; 1 Makor. 11:1) Lwa ziba kuli ku kutaza taba ye nde ya Mubuso kwa kona ku pilisa batu. Ka nako ye swana, hape lu ikataza ku likanyisa Paulusi ka ku bata linzila za ku fa ka zona “mpo ye ñwi ku za Moya” kwa balumeli ka luna.—Mu bale Maroma 1:11, 12; 10:13-15.
11. Lu swanela ku nga cwañi misebezi ya luna ya ku kutaza ni ku tiisa mizwale ba luna?
11 Kwa misebezi ya Sikreste ye mibeli yeo, ki ufi o li wa butokwa hahulu? Ku buza puzo yeo ku swana inge ku buza kuli, Kwa mafufa a nyunywani a mabeli, la butokwa fateñi ki lifi? Kalabo ya iponahalela hande. Nyunywani i tokwa ku itusisa mafufa a mabeli kaufela ona kuli i fufe hande. Ka ku swana, lu tokwa ku peta likalulo ze peli kaufela za sebelezo ya luna ku Mulimu kuli lu be Bakreste ba ba mamela kaufela ze tokwahala ku luna. Kacwalo, ha lu ngi misebezi ya luna ya ku kutaza taba ye nde ni ku tiisa balumeli ka luna sina misebezi ye shutana, kono lu i nga sina baapositola bo Pitrosi ni Paulusi mo ne ba i ngezi—sina misebezi ye zamaelela. Ka mukwa ufi?
12. Lu itusiswa cwañi ki Jehova?
12 Ka ku ba bakutazi ba taba ye nde, lu itusisa mikutalezo kaufela ye lu kona ku itusisa kuli lu fite batu kwa lipilu ka lushango lo lu susueza lwa Mubuso wa Mulimu. Kamukwaocwalo, lu sepa kuli lu ka ba tusa ku ba balutiwa ba Kreste. Kono hape lu itusisa buikoneli kaufela ni limpo ze ñwi ze lu na ni zona kuli lu tiise lipilu za balumeli ka luna ka manzwi a susueza ni ka likezo ze tusa—ili ze bonahalisa sishemo sa Mulimu. (Liprov. 3:27; 12:25) Ka ku eza cwalo, lu ba ni sepo ya kuli lu ka ba tusa ku zwelapili ku ba balutiwa ba Kreste. Mwa misebezi yeo kaufela—yona ya ku kutaza kwa nyangela ni ku ‘sebeleza ba bañwi’—lu na ni tohonolo ya ku itusiswa ki Jehova.—Magal. 6:10.
“Mu Latane Ba Bañwi ni Ba Bañwi”
13. Ne ku ka ezahalañi ha ne lu ka itulela ku ‘sebeleza ba bañwi’?
13 Paulusi naa susuelize balumeli ka yena kuli: “Mu latane ba bañwi ni ba bañwi ka lilato la mutu ni munyan’a hae, inze mu beyana kwapili ka ku fanana likute.” (Maro. 12:10) Kaniti ku lata mizwale ba luna ku lu susueza ku ba sebeleza ka pilu kaufela sina likombwa za sishemo sa Mulimu. Lu ziba kuli haiba Satani a lu palelwisa ku ‘sebeleza ba bañwi,’ u ka fokolisa swalisano ya luna. (Makolo. 3:14) Mi ku sa swalisana kona ku ka tisa kuli lu si ke lwa tukufalelwa musebezi wa ku kutaza. Satani wa ziba hande kuli u tokwa feela ku lu palelwisa ku peta kalulo i liñwi ya sebelezo ya luna, inge mutu ya loba lifufa li li liñwi la nyunywani, ilikuli lu si ke lwa peta musebezi wa luna.
14. Ki bomañi ba ba fumana tuso kwa buikatazo bwa luna bwa ku ‘sebeleza ba bañwi’? Mu fe mutala.
14 Ku ‘sebeleza ba bañwi’ ha ku tusi feela ba ba amuhela sishemo sa Mulimu kono ku tusa ni ba ba si bonahalisa ku ba bañwi. (Liprov. 11:25) Ka mutala, ha mu nyakisise mutala wa bo Ryan ni bo Roni, bo muuna ni musalaa hae ba kwa Illinois, U.S.A. Ha ne ba lemuhile kuli ñuli ya Hurricane Katrina ne i sinyize mandu a mañata a Lipaki ka bona, lilato la sizwale ne li ba susuelize ku lisela misebezi ya bona, ku siya muzuzu wa bona mo ne ba pila, ni ku leka tilela ye nee itusisizwe kale, mi ba lukisa tilela yeo hande, ni ku zamaya likilomita ze 1,400 ku liba Louisiana. Ne ba pilile kwateñi ka silimo si li siñwi i nze ba itusisa nako ya bona, maata, ni tutu ya bona kwa ku tusa mizwale ba bona. Bo Ryan, ba lilimo ze 29, ba li: “Ku tusa mwa musebezi wo ne ku ni sutelelize ku Mulimu. Ne ni iponezi mo Jehova a tokomelela batu ba hae.” Bo Ryan ba ekeza kuli: “Ku sebeza ni mizwale ba ba hulile ne ku ni lutile ze ñata ka za mwa ku tokomelela mizwale. Hape ne ni itutile kuli luna ba banca lu na ni ze ñata ze lu kona ku eza mwa kopano ya Jehova.” Bo Roni, ba lilimo ze 25, ba li: “Ni itebuha hahulu kuli ni na ne ni konile ku tusa ba bañwi. Ni ikutwa kuli ni tabile hahulu ku fita lili kaufela mwa bupilo bwa ka. Na ziba kuli mwa lilimo ze sa taha, ni ka zwelapili ku tusiwa kabakala musebezi o ne ni petile wo.”
15. Ki kabakalañi ha lu swanela ku zwelapili ku ba likombwa za sishemo sa Mulimu?
15 Kaniti ku mamela litaelo za Mulimu za ku kutaza taba ye nde ni ku tiisa balumeli ka luna ku tisa limbuyoti kwa batu kaufela. Batu be lu tusa ba ka tiiswa kwa moya mi ni luna lu ka fumana tabo ye tuna ye mwa ku fana. (Lik. 20:35) Puteho kaufela yona i ka hula mwa lilato mañi ni mañi ha iseza ba bañwi pilu. Hape lilato le lu bonisa ku ba bañwi li lu zibahaza kuli lu Bakreste ba niti. Jesu naa ize: “Se ba ka ziba batu kaufela kuli mu balutiwa ba ka ka sona, ki ha mu latana.” (Joa. 13:35) Fahalimu a zeo kaufela, Jehova Ndataa luna ya lilato u ka lumbekwa, batanga ba hae ba fa lifasi ha ba nze ba mu likanyisa ka ku lakaza ku tiisa ba ba mwa butokwi. Kabakaleo, lu swanela ku itusisa mpo ya luna ka ku ‘sebeleza ba bañwi, sina ha ku lukela likombwa ze nde za sishemo sa Mulimu’! Kana mu ka zwelapili ku eza cwalo?—Mu bale Maheberu 6:10.
Kana Mwa Hupula?
• Jehova u tiisa batanga ba hae ka mikwa ifi?
• Lu filwe buikalabelo mañi?
• Lu kona ku sebeleza balumeli ka luna ka mikwa ifi?
• Ki nto mañi ye ka lu tusa ku zwelapili ku itusisa mpo ya luna kwa ku ‘sebeleza ba bañwi’?
[Lipuzo za Tuto]
[Maswaniso a fa likepe 13]
Kana mwa itusisa “mpo” ya mina ka ku sebeleza ba bañwi kamba mu itusisa yona ka ku itabisa ili mina?
[Maswaniso a fa likepe 15]
Lu kutaza taba ye nde ku ba bañwi ni ku tusa Bakreste ka luna
[Siswaniso se si fa likepe 16]
Baitateli ba ba tusa ba ba ziyelehile ba itebuhiwa kabakala moya wa bona wa buitomboli