“Taha, u ni Latelele”

“Mutu h’a lata ku ni latelela, u na ni ku itoboha, a lwale sifapano sa hae ka zazi ni zazi, mi a ni siyale mwamulaho.”—LUKA 9:23.

1, 2. (a) Ki memo ifi ye nde ya naa file Jesu? (b) Mu amuhezi cwañi memo ya Jesu?

KWA mafelelezo a bukombwa bwa hae, Jesu naa kutaza mwa Perea, sibaka se si mwa buse bwa Jordani, kwa mutulo-upa wa Judea. Naa atumezwi ki mutangana ya naa buzize za naa swanela ku eza kuli a luwe bupilo bo bu sa feli. Jesu a mano lemuha kuli mutangana yo naa mamela Mulao wa Mushe, a fitisa memo ye ipitezi ku yena. Naa ize: “U ye, u lekise s’o sweli kaufela, u si fe babotana, mi u ka ba ni bufumu kwa lihalimu; ha u felize zeo, taha, u ni latelele.” (Mare. 10:21) Mu nahane fela—mutangana yo naa memilwe ku latelela Jesu, Mwana wa libanda wa Mulimu Muambakani-ya-Pahami!

² Mutangana yani naa si ka amuhela memo yeo, kono ba bañwi ne ba i amuhezi. Kwa makalelo, Jesu naa bulelezi Filipi kuli: “Ni latelele.” (Joa. 1:43) Filipi naa amuhezi memo yeo mi hasamulaho a ba muapositola. Jesu naa fitisize memo ye swana yeo ku Mateu, mi ni yena a i amuhela. (Mat. 9:9; 10:2-4) Kaniti, Jesu naa file memo ye swana kwa batu kaufela ba ba lata ku luka ha naa ize: “Mutu h’a lata ku ni latelela, u na ni ku itoboha, a lwale sifapano sa hae ka zazi ni zazi, mi a ni siyale mwamulaho.” (Luka 9:23) Kacwalo, mutu ufi kamba ufi wa kona ku latelela Jesu haiba luli wa lata ku eza cwalo. Kana mwa lata ku latelela Jesu? Buñata bwa luna lu amuhezi kale memo ya Jesu yeo, mi mwa bukombwa bwa mwa simu, lu fitisa memo ye swana yeo ku ba bañwi.

3. Ki lika mañi ze kona ku lu tusa ku sa tuhela ku latelela Jesu?

³ Kono ka bumai, ba bañwi ba ba tabelanga litaba za niti za Bibele ha ba zwelangipili ku ituta. Ba kutelanga mwamulaho mi kwa mafelelezo ba ‘yendukanga’ ni ku tuhela ku latelela Jesu. (Maheb. 2:1) Ki lika mañi ze kona ku lu tusa ku sa eza cwalo? Lu ka tusiwa haiba lu ipuza kuli: ‘Ki kabakalañi ha ne ni iketezi ku latelela Jesu? Ku latelela Jesu ku talusañi?’ Ku hupula likalabo za lipuzo zeo ku ka lu tusa ku tiisa katulo ya luna ya ku zwelapili ku zamaya mwa nzila ye nde, ye lu ketile. Hape ku ka lu tusa ku susueza ba bañwi ku latelela Jesu.

Ki Kabakalañi Ha Lu Swanela ku Latelela Jesu?

4, 5. Ki kabakalañi Jesu haa kona ku lu etelela?

⁴ Mupolofita Jeremia naa ize: “Wena [Muñaa] Bupilo, na ziba kuli nzila ya mutu ha i yo mwa mata a hae; mi mutu nih’a zamaya, h’a koni ku izamaisa ili yena.” (Jer. 10:23) Ze ezahezi li pakile kuli manzwi a Jeremia ki a niti. Ku bile ni bupaki bo buñata-ñata bo bu bonisa kuli batu ba ba si ka petahala ha ba koni ku ipusa ili bona. Lu amuhezi memo ya ku latelela Jesu kakuli lu itutile kuli ki yena ya kona ku ba Mueteleli wa luna ka nzila ye sa koni ku likanyiswa ki mueteleli ufi kamba ufi wa butu. Ha mu nyakisise lika ze ñwi ze konisa Jesu ku ba Mueteleli wa luna.

⁵ Nto ya pili kikuli, Jehova ka sibili ki yena ya naa ketile Jesu ku ba Mesia Mueteleli. Mi ki mañi ya ziba hande ku lu ketela Mueteleli ku fita Mubupi wa luna? Nto ya bubeli kikuli, Jesu u naa ni tulemeno to lu kona ku ikumbuta ni ku likanyisa. (Mu bale Isaya 11:2, 3.) Jesu ki mutala o petehile. (1 Pit. 2:21) Nto ya bulalu kikuli, Jesu u tokomela hahulu ba ba mu latelela, sina mwa naa boniselize ka ku ba shwela. (Mu bale Joani 10:14, 15.) Mi u bonisa kuli ki mulisana yo munde haa nze a lu etelela kuli lu be ni bupilo bo bu tabisa cwale ni kuli kwapili lu be ni bupilo bo bu sa feli. (Joa. 10:10, 11; Sin. 7:16, 17) Ka mabaka ao ni a mañwi, ne lu ezize  katulo ye butali ha ne lu iketezi ku latelela Jesu. Kono ku latelela Jesu ku kopanyelezañi?

6. Ku latelela Jesu ku kopanyelezañi?

⁶ Ku latelela Kreste haki taba feela ya ku ipulela kuli lu Bakreste. Kacenu, batu ba ba bato eza 2 bilioni ba ipulela kuli ki Bakreste, kono likezo za bona li bonisa kuli ba “sebezanga ze maswe.” (Mu bale Mateu 7:21-23.) Muta batu ba bañwi ba bonisa kuli ba tabela ku latelela Jesu, lu ba talusezanga kuli Bakreste ba niti ba pila bupilo bwa bona kaufela ka ku latelela lituto ni mutala wa Jesu—mi ba eza cwalo ka zazi ni zazi. Kuli lu utwisise taba yeo, ha lu nyakisiseñi lika ze ñwi ze lu ziba ka za Jesu.

Mu Likanyise Butali bwa Jesu

7, 8. (a) Butali kiñi, mi ki kabakalañi Jesu ha naa na ni hahulu butali? (b) Jesu naa bonisize cwañi butali, mi lu kona ku mu likanyisa cwañi?

⁷ Jesu naa bonisize tulemeno to tu ipitezi to tuñata, kono lu ka nyakisisa feela to tune: butali bwa hae, buikokobezo bwa hae, tukufalelo ya hae, ni lilato la hae. Pili, ha mu nyakisise butali bwa hae—bona buikoneli bwa hae bwa ku itusisa zibo ni kutwisiso kwa ku eza lika ze nde. Muapositola Paulusi naa ñozi kuli: “Ku [Jesu] ku patilwe maluwo kamukana a butali ni a zibo.” (Makolo. 2:3) Jesu naa fumani kai butali bo bu cwalo? Yena ka sibili naa bulezi kuli: “Ni bulela z’a ni lutile Ndate.” (Joa. 8:28) Butali bwa hae ne bu zwa ku Jehova, kacwalo ha lu komoki likatulo za Jesu ha ne li li ze nde.

⁸ Ka mutala, Jesu naa ketile ka butali mwa ku pilela bupilo bwa hae. Naa iketezi ku pila bupilo bo bu bunolo, ili ku isa mamelelo kwa mulelo u li muñwi fela: wona wa ku eza tato ya Mulimu. Naa itusisize nako ni maata a hae ka butali ilikuli a zwisezepili za Mubuso. Lu latelela mutala wa Jesu ka ku ikataza ku ba ni ‘liito le li bona hande’ ni ku pima ku ikimeza ka lika ze sa tokwahali ili ze katalisa ni ze patehisa. (Mat. 6:22) Bakreste ba bañata ba ngile mihato ya ku nolofaza bupilo bwa bona ilikuli ba kone ku tanda nako ye ñata mwa bukombwa. Ba bañwi ba konile ku kalisa sebelezo ya bupaina. Haiba mu ba bañwi ba ba ba ezize cwalo, mu ezize nto ye nde luli. Ku ‘bata pili mubuso wa Mulimu’ ku tahisa tabo ni buiketo.—Mat. 6:33.

Mu Be Ba Ba Ikokobeza Sina Jesu

9, 10. Jesu naa bonisize cwañi buikokobezo bwa hae?

⁹ Kalulo ya bubeli ya butu bwa Jesu ye lu ka nyakisisa ki buikokobezo bwa hae. Batu ba ba si ka petahala ha ba fiwanga maata, hañata ba ikutwanga ku ba ba butokwa ku fita ba bañwi. Kono Jesu yena naa siyo cwalo! Niha naa filwe musebezi o mutuna mwa ku tahisa kuli mulelo wa Jehova u petahale, Jesu naa si ka bonisa moya wa ku ikuhumusa ni hanyinyani. Mi lu susuezwa ku likanyisa buikokobezo bwa hae. Muapositola Paulusi naa ñozi kuli: “Mu be ni maikuto a n’a li teñi ni ku Jesu Kreste. Niha n’a na ni sibupeho sa Mulimu, Jesu h’a si ka li, ku likana ni Mulimu ki nto y’a ka hanelela, kono a itoboha ku s’a n’a li sona, ka ku nga sibupeho sa mutanga, ni ku ikeza ya swana sina batu.” (Mafil. 2:5-7) Ku eza cwalo ne ku talusañi?

¹⁰ Jesu naa ikozi tohonolo ye tuna ya ku pila ni Ndatahe mwa lihalimu, kono naa itatezi ku “itoboha ku s’a n’a li sona.” Bupilo bwa hae ne bu shimbululezwi mwa mba ya mwalyanjo wa Mujuda, mi a hula cwalo ka likweli ze 9 mwa mba ku fitela a pepwa sina mbututu ye tokwa pabalelo mwa lubasi lwa mubeti ya shebile. Mwa lubasi lwa Josefa, Jesu a zwelapili ku hula,  a nonoboka, mi a ba mutangana. Naa si na sibi. Kono ka nako kaufela ya bwanana bwa hae naa ipeile kwatasaa bashemi ba ne ba si ka petahala, ili ba ne ba na ni sibi. (Luka 2:51, 52) Bo luli ne li buikokobezo!

11. Ki lifi linzila ze lu kona ku likanyisa ka zona buikokobezo bwa Jesu?

¹¹ Lu likanyisa buikokobezo bwa Jesu ha lu amuhela ka tabo misebezi ye bonahala ku ba ya kwatasi. Sina ka mutala, mu nahane ka za musebezi wa ku kutaza taba ye nde. Musebezi wo u kona ku bonahala ku ba wa kwatasi, sihulu haiba batu ha ba lu isi pilu, ku lu sheununa, kamba ku lu lwanisa. Kono ka ku tiiseza mwa musebezi wa ku kutaza, lu tusa ba bañwi ku amuhela memo ya Jesu ya ku mu latelela. Mi ka nzila yeo lu ba tusa ku fumana bupilo. (Mu bale 2 Timotea 4:1-5.) Mutala o munwi ki wa ku babalela Ndu ya Mubuso ya luna. Ku eza cwalo ku kona ku kopanyeleza misebezi ya kwatasi ye cwale ka ku yumba manyalala, ku kolopa fafasi, ni ku kenisa limbuzi! Nihakulicwalo, lu ziba kuli ku babalela Ndu ya Mubuso ya luna—ili sibaka sa bulapeli bo bu kenile mwa silalanda sa luna—ki kalulo ya sebelezo ya luna ku Mulimu. Lu bonisa buikokobezo ha lu eza ka ku lata misebezi ye bonahala ku ba ya kwatasi mi ka nzila yeo lu hata mwa naa hatile Kreste.

Mu Be Ni Tukufalelo Sina Jesu

12, 13. (a) Jesu naa bonisize cwañi tukufalelo, mi ki nto mañi ye ne tisize kuli a eze cwalo? (b) Ki nto mañi ye ka tisa kuli lu tukufalelwe bukombwa?

¹² Ha mu nyakisise tukufalelo ya naa bonisize Jesu mwa bukombwa. Jesu naa ezize lika ze ñata ha naa li fa lifasi. Ku bonahala kuli kwa bwanana bwa hae, naa sebezanga sina mubeti hamoho ni Josefa ndatahe ya naa mu añuzi. Mwahalaa bukombwa bwa hae, Jesu naa ezize limakazo, ze kopanyeleza ku folisa bakuli ni ku zusa ba ba shwile. Kono musebezi wa hae o mutuna ne li wa ku kutaza taba ye nde ni ku luta batu ba ne ba lata ku teeleza ku yena. (Mat. 4:23) Sina balateleli ba hae, ni luna lu eza musebezi o swana. Lu kona ku latelela cwañi mutala wa hae? Nzila ye ñwi ki ka ku eza musebezi wo ka mabaka a naa tisize kuli Jesu a u eze.

¹³ Libaka le lituna le ne li tisize kuli Jesu a bulelele ba bañwi taba ye nde ni ku ba luta ki lilato la hae ku Mulimu. Kono hape Jesu naa lata litaba za niti za naa luta. Ku yena, litaba zeo ne li swana sina maluwo a butokwa hahulu mi naa tukufalezwi ku li taluseza ba bañwi. Luna ka ku ba baluti lu ikutwa sina yena mwa naa ikutwela. Mu nahane feela litaba ze ñwi za butokwa ze lu itutile mwa Linzwi la Mulimu! Lwa ziba taba ya  bubusi bwa pupo kamukana ni mo i ka tatululelwa. Lwa utwisisa hande ze a bulela Mañolo ka za muinelo wa bafu ni limbuyoti ze ka ba teñi mwa lifasi le linca la Mulimu. Nihaikaba kuli litaba zeo lu itutile zona cwanoñu fa kamba kale-kale, li sa li za butokwa. Li be za kale kamba ze nca, litaba zeo luli ki maluwo a butokwa hahulu. (Mu bale Mateu 13:52.) Ka ku kutaza ka mafulofulo, lu tusa ba bañwi ku lata lika za lu lutile Jehova sina luna mo lu li latela.

14. Lu kona ku likanyisa cwañi mulutelo wa Jesu?

¹⁴ Hape ha mu nyakisise mulutelo wa Jesu. Naa susuezanga bateelezi ba hae ku isa pilu kwa Mañolo. Hañata naa tahisanga sisupo sa butokwa ka ku bulela kuli: “Ku ñozwi kuli.” (Mat. 4:10; 21:13) Mwa manzwi a hae a ñozwi, naa amile kwa libuka ze fitelela licika za Mañolo a Siheberu ka ku nonga kamba ka ku sa nonga. Sina Jesu, ni luna lu itinga hahulu fa Bibele mwa bukombwa bwa luna mi lu likanga ka taata ku itusisa Mañolo fo lu konela kaufela. Ka ku eza cwalo, lu tusa ba lipilu ze nde ku iponela ili bona kuli lu luta mihupulo ya Mulimu, isiñi ya luna fela. Lwa tabelanga ha lu fumana mutu ya lumela ku bala Bibele ni ku ambola ni luna ka za butokwa bwa Linzwi la Mulimu ni taluso ya lona! Mi ba ba cwalo ha ba amuhela memo ya ku latelela Jesu, tabo ya luna i banga ye tuna ni ku fita.

Ku Latelela Jesu ku Talusa ku Lata Ba Bañwi

15. Ki kafi kalemeno ka ka ipitezi ka naa na ni kona Jesu, mi ku ka nahanisisa ku kona ku lu ama cwañi?

¹⁵ Kalulo ya mafelelezo ya butu bwa Jesu ye lu ka nyakisisa ya tabisa luli—lona lilato la hae la ku lata batu. Muapositola Paulusi naa ñozi kuli: “Lilato la Kreste li lu sweli.” (2 Makor. 5:14) Ha lu nahanisisa Jesu mwa latela batu kaufela ni mwa lu latela ka butu, lipilu za luna za tabanga luli mi lu susumezwanga ku latelela mutala wa hae.

16, 17. Jesu naa bonisize cwañi lilato ku ba bañwi?

¹⁶ Jesu naa bonisize cwañi lilato ku ba bañwi? Ku itatela ku toboha bupilo bwa hae bakeñisa batu ki yona nzila ye tuna ka ku fitisisa ya naa bonisize ka yona lilato la hae. (Joa. 15:13) Kono mwahalaa bukombwa bwa hae, Jesu naa bonisize lilato ka linzila ze ñwi hape. Ka mutala, naa utwelanga ba ne ba nyanda butuku. Ha naa boni Maria ni ba ne ba li ni yena ha ba lila Lazaro ya naa shwile, Jesu naa tabehile kwa pilu. Nihaike naa tuha a zusa Lazaro kwa bafu, naa tomohile hahulu pilu kuli mane “a lila.”—Joa. 11:32-35.

¹⁷ Kwa makalelo a bukombwa bwa hae, Jesu naa atumezwi ki mutu ya kula mbingwa ya naa ize: “Ha u lata, u na ni mata a ku ni kenisa.” Jesu naa ezize cwañi? Bibele i li: “A mu shwela makeke.” Mi cwale a eza nto ye ñwi ye komokisa hahulu. “A tambiketa lizoho, a mu swala, mi a li: Na lata, u kene. Honafo, mbingwa ya fela ku yena, mi a keniswa.” Mwa Mulao wa Mushe,  ba mbingwa ne ba ngiwa ku ba batu ba ba si ka kena, mi Jesu kaniti naa kona ku folisa muuna yo ku si na ku mu swala. Kono Jesu ha naa nze a folisa muuna yo wa mbingwa, naa mu sweli kuli a utwe mo ku utwahalela ku swaliwa ki mutu yo muñwi, mi mwendi fo, ne li lona lwa pili ku swaliwa hamulaho wa lilimo-limo. Jesu kaniti naa bonisize makeke a matuna!—Mare. 1:40-42.

18. Lu kona ku bonisa cwañi “mukekecima”?

¹⁸ Ka ku ba balateleli ba Kreste, lu laelwa ku bonisa lilato la luna ka ku ba ni “mukekecima.” (1 Pit. 3:8) Ku kona ku ba taata ku utwisisa mwa ikutwela mulumeli ka luna ya kula butuku bo bu sa foli kamba ya zwafile hahulu—sihulu haiba luna lwa li ku ba lu kule butuku bo kamba ku zwafa cwalo. Kono Jesu naa utwelanga bakuli butuku nihaike kuli yena a li ku ba a kule. Lu kona cwañi ku ba ni mukekecima sina Jesu? Ka ku teeleza ka pilu-telele bakuli ha ba lukuluha ku lu taluseza mo ba ikutwela. Hape lwa kona ku ipuza kuli, ‘Ne ni ka ikutwa cwañi kambe ki na ya mwa muinelo wa bona?’ Haiba lu itwaeza ku utwisisanga maikuto a ba bañwi, lu ka kona hande ku “[tiisa] ba lipilu ze shekesha.” (1 Mates. 5:14) Ka ku eza cwalo lu ka bonisa kuli lwa latelela Jesu.

19. Mutala wa Jesu u lu ama ka linzila lifi?

¹⁹ Kaniti ku na ni litaba ze ñata ze tabisa ze lu kona ku ituta mwa manzwi a Jesu Kreste ni likezo za hae! Ha lu nze lu ituta ze ñata ka za hae, lu ka bata hahulu ku mu likanyisa—mi hape lu ka bata hahulu ku tusa ba bañwi kuli ni bona ba eze cwalo. Kacwalo, ha lu ezeñi ka mo lu konela kaufela kuli lu tabele ku latelela Mesia Mulenaa luna—ka nako ya cwale ni ku ya ku ile!

Kana Mwa Kona ku Talusa?

• Lu kona ku bonisa cwañi butali sina mwa naa ezelize Jesu?

• Lu kona ku bonisa buikokobezo ka linzila lifi?

• Lu kona cwañi ku tukufalelwa bukombwa?

• Lu kona cwañi ku likanyisa Jesu mwa ku bonisa lilato ku ba bañwi?

[Lipuzo za Tuto]

[Mbokisi/Siswaniso se si fa likepe 5]

BUKA YE LU TUSA KU LIKANYISA KRESTE

Fa mukopano wa sikiliti wa 2007, ne ku zwisizwe buka ye na ni toho ya taba ye li “Come Be My Follower” mwa puo ya Sikuwa. Buka yeo i lukiselizwe ku tusa Bakreste ku ituta ka za Jesu, sihulu tulemeno twa hae ni likezo za hae. Hamulaho wa likauhanyo ze peli za makalelo, kalulo ya pili i talusa ka bukuswani tulemeno twa Jesu to tu ipitezi—buikokobezo bwa hae, bundume bwa hae, butali bwa hae, ku ipeya ku utwa kwa hae, ni buitiiso bwa hae.

Likalulo ze ñwi ze latelela li talusa za misebezi ya Jesu ya ku ba muluti ni mukutazi wa taba ye nde ni linzila ze ñwi za naa bonisize ka zona lilato la hae le lituna. Mwa buka yeo kaufela, litaba li talusizwe ka nzila ye tusa Mukreste ku likanyisa Jesu.

Lu na ni buikolwiso bwa kuli buka ye i ka susueza kaufela luna ku itatuba ni ku ipuza kuli: ‘Kana luli na latelela Jesu? Ni kona cwañi ku mu latelela hahulu?’ Buka ye hape i ka tusa “kaufela ba ba ketezwi bupilo bo bu sa feli” ku ba balateleli ba Kreste.—Lik. 13:48.

[Siswaniso se si fa likepe 4]

Jesu naa lumezi ku taha fa lifasi ni ku to pepwa sina mbututu. Ku eza cwalo ne ku tokwa kalemeno kafi?

[Siswaniso se si fa likepe 6]

Ki nto mañi ye ka tisa kuli lu tukufalelwe bukombwa?