“Ba Latelelanga Ngunyana”
“Ba Latelelanga Ngunyana”
“Ki ba ba latelelanga Ngunyana kai ni kai mw’a ya.”—SIN. 14:4.
1. Balutiwa ba niti ba Jesu ne ba ikutwile cwañi ka za ku mu latelela?
IBATO ba lilimo ze peli ni licika inze a li mwa bukombwa bwa hae, Jesu naa “luta mwa sinagoge, mwa Kapernauma.” Ba sino utwa kuli linzwi la hae li taata, “ba bañata kwa balutiwa ba hae ba kutela mwamulaho, ba tuhela ku mu latelela.” Jesu ha naa buzize baapositola ba hae ba 12 haiba ni bona ne ba bata ku ikela, Simoni Pitrosi a alaba, a li: “Mulena, lu ka ya ku mañi? U na ni manzwi a bupilo bo bu sa feli, mi luna lu lumezi mi lu zibile kuli ki Wena Kreste, Ya-Kenile wa Mulimu.” (Joa. 6:48, 59, 60, 66-69) Balutiwa ba niti ba Jesu ne ba si ka tuhela ku mu latelela. Ha se ba tozizwe ka moya o kenile, ba zwelapili ku latelela litaelo za Jesu.—Lik. 16:7-10.
2. (a) Ki mañi “mutanga ya sepahala, ya na ni kutwisiso,” kamba “sikombwa se si sepahala”? (b) Mutanga u file cwañi bupaki bo bunde bwa kuli u “latelelanga Ngunyana kai ni kai mw’a ya”?
2 Ku cwañi ka za Bakreste ba ba tozizwe mwa miteñi ya cwale? Mwa bupolofita bwa hae bwa “se si ka supa ku taha kwa [hae], ni ku fela kwa lifasi,” Jesu naa talusize kuli sitopa sa balateleli ba hae ba ba tozizwe ba fa lifasi ki “mutanga ya sepahala, ya na ni kutwisiso,” kamba “sikombwa se si sepahala.” (Mat. 24:3, 45; Luka 12:42) Ka sikwata, sitopa sa mutanga si file bupaki bo bunde bwa kuli si “latelelanga Ngunyana kai ni kai mw’a ya.” (Mu bale Sinulo 14:4, 5.) Ba sitopa sa mutanga ba zwelapili ku ba linjilulume za kwa moya ka ku sa isilafaza ka lituto ni mikwa ya “Babilona yo mutuna,” yona kopano ya lifasi ya bulapeli kamukana bwa buhata. (Sin. 17:5) Ha ku si ka fumanwa lituto za bulapeli za lishano “mwa milomo ya bona,” mi ‘ha ba na se ba nyazahala ka sona’ mwa lifasi la Satani. (Joa. 15:19) Kwapili, bomasialeti ba ba tozizwe fa lifasi ba ka “latelela” Ngunyana kwa lihalimu.—Joa. 13:36.
3. Ki kabakalañi ha ku li kwa butokwa ku sepa sitopa sa mutanga?
3 Jesu u ketile mutanga ya sepahala, ya na ni kutwisiso “ku lisa batanga ba hae,” fo kikuli ku lisa mañi ni mañi ya mwa sitopa sa mutanga, ili “ku ba fa lico ka nako ye lukela.” Hape u beile mutanga fa “bukombwa bwa z’a luwile kaufela.” (Mat. 24:45-47) “Z’a luwile” zeo li kopanyeleza “buñata bo butuna” bo bu sweli ku ekezeha bwa “lingu ze ñwi.” (Sin. 7:9; Joa. 10:16) Kana yo muñwi ni yo muñwi ya tozizwe ni ba “lingu ze ñwi” ha ba swaneli ku sepa mutanga ya ketilwe ku ba babalela? Ku na ni mabaka a mañata ha lu swanela ku sepa sitopa sa mutanga. Mabaka a mabeli a matuna ki a: (1) Jehova u sepile sitopa sa mutanga. (2) Jesu ni yena u sepile mutanga. Ha lu nyakisiseñi bupaki bo bu bonisa kuli Jehova Mulimu ni Jesu Kreste ba sepile hahulu mutanga ya sepahala, ya na ni kutwisiso.
Jehova U Sepile Mutanga
4. Ki kabakalañi ha lu kona ku sepa lico za kwa moya ze suliwa ki mutanga ya sepahala, ya na ni kutwisiso?
4 Ha mu nyakisise ze konisa mutanga ya sepahala, ya na ni kutwisiso ku sula lico za kwa moya ka nako ye lukela. Jehova u li: “Ni ka ku talifisa, ni ku lute nzila y’o swanezi ku zamaya.” Mi u ekeza kuli: “Ni ka ku eleza, meto a ka inz’a ku shalimile.” (Samu 32:8) Kaniti, Jehova u etelela mutanga. Kacwalo lwa kona ku sepa zibo, kutwisiso, ni ketelelo ze tomile fa Mañolo ze lu fiwa ki mutanga.
5. Ki nto mañi ye bonisa kuli moya wa Mulimu u sweli ku fa sitopa sa mutanga maata?
5 Jehova hape u fanga moya o kenile wa hae kwa sitopa sa mutanga. Nihaike kuli moya wa Jehova ha u bonahali, ze u tahisa ku be u zamaisa za bonahala. Mu nahane feela lika ze petilwe ki mutanga ya sepahala, ya na ni kutwisiso ka ku paka mwa lifasi kaufela ka za Jehova Mulimu, Mwanaa hae, ni za Mubuso. Balapeli ba Jehova ba sweli ku zibahaza taba ya Mubuso mwa linaha ni likwata za lioli ze fitelela 230. Kana taba yeo ha i bonisi bupaki bo bu sa koni ku haniwa bwa kuli moya wa Mulimu u sweli wa fa mutanga maata? (Mu bale Likezo 1:8.) Sitopa sa mutanga si tokwa ku ezanga likatulo ze tuna ze ñata kuli si kone ku lukiseza ni ku sulela batu ba Jehova lico za kwa moya mwa lifasi kaufela ka nako ye lukela. Ka ku eza likatulo zeo ni ku li peta, mutanga u bonisanga lilato, buishuwo, ni tulemeno to tuñwi twa muselo wa moya.—Magal. 5:22, 23.
6, 7. Jehova u sepile cwañi mutanga ya sepahala?
6 Kuli lu utwisise mo Jehova a sepezi mutanga ya sepahala, ha lu nyakisiseñi za sepisize ba ba mwa sitopa sa mutanga. Muapositola Paulusi naa ñozi kuli: “Tolombita i ka lila, mi bafu ba ka zuha s’e li ba ba sa boli; mi ni luna lu ka fetuha. Ki swanelo kuli se si bola si apale ku sa bola, mi se si shwa, si apale ku sa shwa.” (1 Makor. 15:52, 53) Balateleli ba ba tozizwe ba Kreste, ba ba sebeleza Mulimu ka busepahali ni ku shwa inze ba na ni mibili ye bola, ba zusiwa ku ba ba ba fita libupiwa za kwa moya ze na ni bupilo bo bu sa feli. Ba fiwa ku sa shwa—ili ku pila ku ya ku ile ni ku sa kona ku timezwa. Hape ba amuhela ku sa bola, ili ku fiwa mibili ye sa koni ku sinyeha mi mwendi ili ye kona ku ipilisa ili yona. Sinulo 4:4 i talusa ba ba zusizwe bao kuli ba inzi mwa mabona inze ba apezi likuwani za bulena za gauda kwa litoho za bona. Bakreste ba ba tozizwe ba libelezi ku fiwa kanya ya bulena. Kono ku sa na ni bupaki bo bu buñwi bo bu bonisa kuli Mulimu u ba sepile.
7 Sinulo 19:7, 8 i li: “Nako i tile ya linyalo la Ngunyana; mi munyaliwa wa hae u itukisize! Mi munyaliwa a fiwa ku apala za line ye nde, ye kenile; kakuli line ye nde yeo ki likezo ze lukile za balumeli.” Jehova u ketile Bakreste ba ba tozizwe kuli ba be munyaliwa wa Mwanaa hae kwapili. Limpo ze ba ka fiwa ki ze makaza luli—zona za ku sa bola, ku sa shwa, bulena, ni “linyalo la Ngunyana”! Limpo zeo ki bupaki bo bu susumeza bo bu bonisa kuli Mulimu u sepile ba ba tozizwe, ba ba “latelelanga Ngunyana kai ni kai mw’a ya.”
Jesu U Sepile Mutanga
8. Jesu u bonisa cwañi kuli u sepile balateleli ba hae ba ba tozizwe ka moya?
8 Ki bupaki mañi bo bu bonisa kuli Jesu u sepile hahulu balateleli ba hae ba ba tozizwe ka moya? Fa busihu bwa hae bwa mafelelezo fa lifasi, Jesu naa ezize sepiso kwa baapositola ba hae ba 11. Naa ba bulelezi kuli: “Mina mu tiiselize ni na mwa miliko ya ka; mihe ni ka mi fa mubuso, sina ndate h’a ni file ona, kuli mu ce mi mu nwe fa tafule ya ka, mwa mubuso wa ka; mi mu ka ina fa litulo za bulena, mu atule masika a Isilaele a lishumi ka a mabeli.” (Luka 22:28-30) Mubuso wo wa naa sepisize Jesu kwa baapositola ba 11 u ka fiwa ni kwa Bakreste kaufela ba ba tozizwe ba 144,000. (Luka 12:32; Sin. 5:9, 10; 14:1) Kana Jesu naa ka ba sepisa kuli u ka busa ni bona kambe naa si ka ba sepa?
9. “Z’a luwile [Kreste] kaufela” li kopanyelezañi?
9 Hape Jesu Kreste u ketile mutanga ya sepahala, ya na ni kutwisiso ku “mu beya fa bukombwa bwa z’a luwile kaufela”—ili maluwo kaufela a Mubuso fa lifasi. (Mat. 24:47) Maluwo ao a kopanyeleza miyaho ye kwa sibaka se situna sa tamaiso sa Lipaki za Jehova, hamoho ni liofisi za mitai mwa linaha ze shutana-shutana, Mandu a Mikopano, ni Mandu a Mubuso a mwa lifasi kaufela. Hape a kopanyeleza musebezi wa ku kutaza Mubuso ni ku tusa batu kuli ba be balutiwa. Kana ku na ni mutu ya kona ku fa mutu yo muñwi musebezi wa ku babalela ni ku itusisa maluwo a hae haiba haa sepi mutu yo?
10. Ki nto mañi ye bonisa kuli Jesu Kreste u inzi ni balateleli ba hae ba ba tozizwe?
10 Nakonyana a si ka ya kale kwa lihalimu, Jesu ya naa zusizwe kwa bafu naa iponahalize kwa balutiwa ba hae ba ba sepahala ni ku ba sepisa kuli: “A mu bone, na, ni inzi ni mina ka mazazi kaufela, ku isa kwa mafelelezo a lifasi.” (Mat. 28:20) Kana Jesu u talelelize sepiso yeo? Halaa lilimo ze 15 ze felile, palo ya liputeho za Lipaki za Jehova i ekezehile ku zwa ibato ba 70,000 ku yo fitelela 100,000—ili kekezeho ye fitelela 40 pesenti. Mi ki balutiwa ba ba kai ba ba ekelizwe? Balutiwa ba ba bato eza 4.5 milioni ne ba kolobelizwe halaa lilimo ze 15 ze felile—mi fo kikuli, ka zazi ni zazi, ne ku kolobezwa batu ba 800 ka ku ya ka avareji. Kulo ye tuna yeo i bonisa kuli Kreste u etelela balateleli ba hae ba ba tozizwe kwa mikopano ya puteho ya bona mi u sweli wa ba tusa mwa musebezi wa bona wa ku tusa batu kuli ba be balutiwa.
Mutanga Wa Sepahala mi U Na Ni Kutwisiso
11, 12. Mutanga u bonisize cwañi kuli wa sepahala ni kuli u na ni kutwisiso?
11 Kabakala kuli Jehova Mulimu ni Jesu Kreste ba sepile hahulu mutanga ya sepahala, ya na ni kutwisiso, ni luna lu swanela ku mu sepa luli! Esi mane mutanga u sepahalile kwa musebezi wa filwe. Ka mutala, magazini ya Tawala ya Mulibeleli se i hatisizwe ka lilimo ze 130. Mikopano ya puteho, ya mipotoloho, ni ya likiliti ya Lipaki za Jehova i zwelapili ku tiisa tumelo ya luna.
12 Hape mutanga ya sepahala u na ni kutwisiso bakeñisa kuli ha ikezezi lika pili Jehova a si ka fa kale ketelelo, kamba ku sa ipeya ku utwa muta Mulimu a fa ketelelo ka za taba ye ñwi. Ka mutala, ba bahulu ba bulapeli bwa buhata niha ba lumeleza mizamao ye maswe, ya buitati ya batu ba lifasi le, ba ba sa sabi Mulimu, mutanga yena u fa litemuso ze ama malaba a lifasi la Satani le li maswe. Mutanga wa kona ku fa litemuso ze talifisa, ili ka nako ye lukela kakuli u fuyaulwa ki Jehova Mulimu ni Jesu Kreste. Kacwalo lu lukela ku sepa hahulu sitopa sa mutanga. Kono lu kona ku bonisa cwañi kuli lu sepile mutanga ya sepahala, ya na ni kutwisiso?
‘Mu Ye’ Ni Batoziwa Ha Ba Nze Ba Latelela Ngunyana
13. Ka ku ya ka bupolofita bwa Zakaria, lu kona ku bonisa cwañi kuli lu sepile mutanga ya sepahala, ya na ni kutwisiso?
13 Buka ya Bibele ya Zakaria i bulela za “banna ba ba lishumi” ba ba atumela “munna wa Mujuda” ni ku bulela kuli: “Lu ka ya ni mina.” (Mu bale Zakaria 8:23.) Bakeñisa kuli “munna wa Mujuda” u bulelwa kuli “mina,” u yemela sikwata sa batu. Mwa miteñi ya luna, u yemela bomasiyaleti ba Bakreste ba ba tozizwe ka moya—ba ba li kalulo ya “Isilaele wa Mulimu.” (Magal. 6:16) “Banna ba ba lishumi, ba malimi kaufela a macaba” ba yemela buñata bo butuna bwa lingu ze ñwi. Sina feela Bakreste ba ba tozizwe ha ba latelela Jesu kai ni kai mwaa ya, ba buñata bo butuna ni bona ba “ya,” kamba ba zamaya hamoho ni mutanga ya sepahala, ya na ni kutwisiso. Ba buñata bo butuna ha ba swaneli ku swaba ku itibahaza kuli ki balikani ba “ba ba abezwi kwa pizo ya lihalimu.” (Maheb. 3:1) Jesu haa swabeli ku biza batoziwa kuli ki “banyani” ba hae.—Maheb. 2:11.
14. Banyani ba Kreste ba kona ku tusiwa cwañi?
14 Jesu Kreste u nga lika ze ezezwa banyani ba hae kuli li ezezwa yena. (Mu bale Mateu 25:40.) Cwale ba ba na ni sepo ya ku pila fa lifasi ba kona ku tusa cwañi banyani ba Kreste ba ba tozizwe ka moya? Sihulu ki ka ku ba tusa mwa musebezi wa ku kutaza Mubuso. (Mat. 24:14; Joa. 14:12) Nihaike kuli palo ya batoziwa fa lifasi i fukuzehile mwahalaa lilimo-limo ze felile, palo ya ba lingu ze ñwi yona i ekezehile. Ba ba na ni sepo ya ku pila fa lifasi ha ba eza musebezi wa ku paka, mi haiba ku konahala, ha ba sebeza sina bakutazi ba nako kaufela, ba tusa batoziwa ku peta musebezi o ba filwe wa ku luta batu ba macaba. (Mat. 28:19, 20) Hape nto ye ñwi ye sa swaneli ku keshebiswa ki ku tusa mwa musebezi wo ka ku fa linubu ka linzila ze fitana-fitana.
15. Mukreste ni Mukreste u swanela ku nga cwañi lico za kwa moya ze lu fiwa ka nako ye lukela ni likatulo ze ama kopano ze ezwa ki mutanga?
15 Ka ku ba Mukreste ni Mukreste, lu nga cwañi lico za kwa moya ze lu fiwa ki mutanga ya sepahala ka libuka ze tomile fa Bibele ni mikopano ya Sikreste? Kana lwa canga kwa lico zeo ni ku tabela ku mamela ze lu ituta? Lu nganga cwañi likatulo ze ama kopano ze ezwa ki mutanga? Ku mamela liketelelo ze fiwa ku fa bupaki bwa kuli lu na ni tumelo mwa litukiso za Jehova.—Jak. 3:17.
16. Ki kabakalañi Bakreste kaufela ha ba swanela ku teeleza kwa banyani ba Kreste?
16 Jesu naa ize: “Lingu za ka, li utwa linzwi la ka; na li ziba, mi za ni latelela.” (Joa. 10:27) Ku cwalo ni kwa Bakreste ba ba tozizwe. Ku cwañi ka za ba ba “ya” ni bona? Ni bona ba swanela ku teeleza ku Jesu. Ba lukela hape ku teeleza kwa banyani ba hae. Esi mane buikalabelo bo butuna bwa ku babalela batu ba Mulimu kwa moya bu filwe bona. Ku teeleza kwa linzwi la banyani ba Kreste ku kopanyelezañi?
17. Ku teeleza kwa sitopa sa mutanga ku talusañi?
17 Mutanga ya sepahala, ya na ni kutwisiso kacenu u yemelwa ki Sitopa Se Si Etelela, bona ba ba etelela ni ku okamela musebezi wa ku kutaza Mubuso mwa lifasi kaufela. Ba Sitopa Se Si Etelela ki maeluda ba ba na ni yeloseli, ili ba ba tozizwe ka moya. Mi sihulu ki bona ba ba kona ku taluswa kuli “ba lu zamaisa.” (Maheb. 13:7) Ha ba nze ba babalela bashaeli ba Mubuso ba ba bato ba 7,000,000 mwa lifasi kaufela ili mwa liputeho ze fitelela 100,000, baokameli ba ba tozizwe bao ba na ni ze ñata za ku eza mwa “musebezi wa Mulena.” (1 Makor. 15:58) Ku teeleza kwa sitopa sa mutanga ku talusa kuli lwa swalisana ni Sitopa Se Si Etelela.
Ba Ba Teeleza ku Mutanga Ba Fuyaulwa
18, 19. (a) Ba ba teeleza ku mutanga ya sepahala, ya na ni kutwisiso ba fuyaulwa cwañi? (b) Lu swanela ku ikatulela ku ezañi?
18 Ku zwa feela fo si ketezwi, sitopa sa mutanga ya sepahala, ya na ni kutwisiso si “sikululezi ba bañata kwa ku luka.” (Dan. 12:3) Bao ba kopanyeleza ba ba na ni sepo ya ku punyuha sinyeho ya lifasi le, le li maswe. Ba ba lukile mwa meeto a Mulimu ba fuyauzwi luli!
19 Ba ba teelelize kwa linzwi la mutanga ba ka fuyaulwa cwañi kwapili, muta ‘munzi o kenile, Jerusalema yo munca [wa ba 144,000], a taha ku zwa kwa lihalimu ku Mulimu, inze a itukisize sina munyaliwa ya ikabiselize muunaa hae’? Bibele i li: “Mulimu u ka ba ni bona, . . . mi u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.” (Sin. 21:2-4) Kacwalo, haike kaufela luna lu teeleze ku Kreste ni kwa banyani ba hae ba ba tozizwe, ili ba ba sepahala.
Mu Itutileñi?
• Ki bupaki bufi bo bu bonisa kuli Jehova u sepile mutanga ya sepahala, ya na ni kutwisiso?
• Ki nto mañi ye bonisa kuli Jesu Kreste u sepile hahulu sitopa sa mutanga?
• Ki kabakalañi ha lu swanela ku sepa sikombwa se si sepahala?
• Lu bonisa cwañi kuli lu sepile mutanga?
[Lipuzo za Tuto]
[Siswaniso se si fa likepe 25]
Kana mwa ziba ba ketile Jehova kuli ba be munyaliwa wa Mwanaa hae kwapili?
[Maswaniso a fa likepe 26]
Jesu Kreste u beile mutanga ya sepahala, ya na ni kutwisiso fa “bukombwa bwa z’a luwile kaufela”
[Siswaniso se si fa likepe 27]
Ha lu eza musebezi wa ku paka, lu tusa ba ba tozizwe ka moya