Sitopa sa bu-125 si Kwaza Sikolo sa Giliadi

Balumiwa ba Susuezwa ku ba Sina Jeremia

MUZWALE Geoffrey Jackson, yo muñwi wa ba Sitopa Se Si Etelela, naa ize, “Sitopa se sa Giliadi ki sa butokwa hahulu.” Naa bulela kwa batu ba 6,156 ba ne ba li teñi kwa mukiti wa ku feza sikolo wa sitopa sa bu-125 sa Sikolo sa Bibele sa Giliadi ka la 13 September, 2008. Sikolo sa Giliadi si lumezi balumiwa ba ba fitelela 8,000, ku kopanyeleza ni ba 56 ba sitopa se ba ne ba kwaza, kwa libaka ze kwa “mafelelezo a lifasi”!—Lik. 1:8.

Muzwale Jackson, muina-situlo wa tukiso yeo, na buzize kuli, “Kana ku sepahala ku ka kondisa bukombwa bwa mina?” Cwale a kolohanya lika zee ne ze tusa mutu kuli a be ya sepahala: ku ba ni mubonelo o munde wa lika, ku toma mutala o munde, ku toma tuto ya hae fa Linzwi la Mulimu, ni ku isa hahulu pilu kwa ku zibahaza libizo la Jehova.

David Schafer, ya sebeleza mwa Katengo ka Tuto, a fa ngambolo ye li, “Kana Mu Ka Utwisisa Lika Kaufela?” Na kolwisize baituti ba Giliadi kuli ba kona ku “utwisisa lika kaufela” ze tokwahala kuli ba sebeze sina balumiwa haiba ba zwelapili ku bata Jehova ni ku ipeya kwatasaa “mutanga ya sepahala, ya na ni kutwisiso” ka buikokobezo.—Liprov. 28:5; Mat. 24:45.

Mubuleli ya naa tatami, John E. Barr yo muñwi wa ba Sitopa Se Si Etelela, naa file ngambolo ye li, “Mu Si Ke Mwa Tuhelela Nto Ifi Kamba Ifi ku Mi Kauhanya kwa Lilato la Mulimu.” Muzwale Barr naa susuelize ba ne ba kwaza sikolo ni bashemi ba bona, inge mwa naa ka ezeza ndate ya lilato, mi susuezo yeo ne i felisize sabo ye ne ba kana ba bile ni yona ka za lika ze ne ba ka kopana ni zona balumiwa ba banca mwa libaka mo ba ka yo kutaleza. Na talusize kuli, “Ku ba mwa lilato la Mulimu, ki sibaka sa silelezo ni sa buiketo se lu kona ku ba ku sona mwa bupilo bwa luna.” Ha ku na nto ye kona ku kauhanya balumiwa kwa lilato la Mulimu konji haiba bona ba ikauhanya ku Mulimu.

Hamulaho, Sam Roberson wa Likolo le li Talima za Likolo za Teokratiki naa susuelize baputehi kuli ba “apale siapalo se sinde ka ku fitisisa.” Ka ku ituta za naa ezize Jesu ni ku li mamela, ba ne ba kwaza sikolo ba kona ku “[apala] Mulena Jesu Kreste.” (Maro. 13:14) Mubuleli ya na tatami, William Samuelson, muokameli wa Likolo le li Talima za Likolo za Teokratiki, naa bonisize se si tahisa kuli mutu a be ya kutekeha. Hasi mubonelo wa mutu kono ki mubonelo wa Mulimu o tahisa kuli mutu a be ya kutekeha.

Michael Burnett, yo muñwi wa baluti, naa buhisani ni baituti ka za ze ne ba kopani ni zona mwa bukombwa. Nihaike baituti ba bañata ne ba filwe likalulo za simu ze kutalizwe hañata-ñata ha ne ba li mwa Sikolo sa Giliadi kwa Patterson, mwa New York, ne ba fumani ba ne ba tabela taba ye nde. Gerald Grizzle ya sebeleza mwa Ofisi Ye Talima za Mikopano ya Sikiliti na buhisani ni mizwale ba balalu ba ne ba fumanehile kwa Sikolo sa Ba Ba mwa Tutengo twa Mitai. Ze ne ba bulezi ne li tusize ba ne ba kwaza sikolo sa Giliadi ku itukiseza mwa ku talimanela ni lika ze ne ba ka kopana ni zona kwa linaha li sili ko ne ba ka lumelwa.

Ngambolo ye li “Mu Be Sina Jeremia” ne i filwe  ki muzwale David Splane wa mwa Sitopa Se Si Etelela, ili ya na kwazize sikolo sa Giliadi mwa sitopa sa bu-42. Nihaike kuli Jeremia na ikalezwi za musebezi wa naa filwe, Jehova naa mu tiisize. (Jer. 1:7, 8) Mulimu u ka tiisa balumiwa ba banca ka nzila ye swana. Muzwale Splane naa ize, “Haiba ha mu utwani ni mutu yo muñwi, mu ine fafasi mi mu ñole tulemeno to tu lishumi to mu tabela hahulu ku mutu yo. Mi haiba ha mu koni ku fumana tulemeno to, mu zibe ha mu zibi hande mutu yo.”

Jeremia naa na ni buitomboli. Ha naa batile ku tuhela musebezi wa hae, naa lapezi, mi Jehova naa inzi ni yena. (Jer. 20:11) Muzwale Splane naa ize, “Ha mu ikutwa ku zwafa, mu bulelele Jehova ka za teñi. Mi mu ka komoka hahulu mwa ka mi tuseza Jehova.”

Kwa mafelelezo a tukiso, muina-situlo a hupulisa baputehi kuli, ba ne ba kwaza sikolo ba itutile linzila ze ñata ze ka ba tusa ku zwelapili ku ba batu ba ba sepahala. Balumiwa bao ha ba ka lemuhiwa ki batu kuli ba sepahala, lushango lo ba luta lu ka ba ni maata.—Isa. 43:8-12.

[Mbokisi fa likepe 22]

LITABA ZA SITOPA

Palo ya linaha ko ba zwa baituti: 6

Palo ya linaha ko ba lumezwi: 21

Palo ya baituti kaufela: 56

Avareji ya lilimo za ku pepwa: 32.9

Avareji ya lilimo za ku ba mwa niti: 17.4

Avareji ya lilimo za ku ba mwa sebelezo ya nako kaufela: 13

[Siswaniso se si fa likepe 23]

Sitopa sa bu-125 Se Si Felize Sikolo sa Giliadi sa Bibele

Mwa mukoloko o kwatasi, milaini i baliwa ku zwa kwapili ku kuta kwamulaho, mi mabizo a kolohanyizwe ku zwa ku la nzohoto ku ya ku la bulyo mwa mulaini ni mulaini.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.