Kana Mwa Hupula?

Kana mu ikozi ku bala limagazini za cwanoñu fa za Tawala ya Mulibeleli? Mu like ku alaba lipuzo ze tatama:

• Ki Kabakalañi ha ku li kwa butokwa ku ba ni busepahali bwa Sikreste?

Ku tiiseza mwa busepahali bwa luna ku lu tusa ku yemela bubusi bwa Jehova kabakala kuli lwa mu lata ni ku bonisa kuli Satani ki lihata. Hape Mulimu u kona ku lu atula ka ku ya ka busepahali bwa luna mi kacwalo busepahali ki bwa butokwa kuli sepo ya luna i talelezwe.—12/15, makepe 4-6.

• Ki afi malumbatina a mañwi a bonisa buikalabelo bwa peta Jesu mwa mulelo wa Mulimu?

Mwana wa libanda. Linzwi. Yena ye li Amen. Muyemeli wa bulikani bo bunca. Muprista yo Mutuna. Peu ye ne sepisizwe.—12/15, likepe 15.

• Lu kona ku ekeza cwañi kwa tabo ye lu fumana mwa bukombwa bwa luna?

Lwa kona ku lukisa pilu ya luna, ni ku bona mo lu kona ku tuseza ba bañwi. Lwa kona ku kutaza ka mulelo wa ku kalisa lituto za Bibele. Haiba lu sa isezwi pilu, lwa kona ku cinca mukutalezo wa luna ni ku ambola litaba ze ba tabela batu ba ba mwa sibaka sa luna sa ku kutaleza.—1/15, makepe 8-10.

• Lituto ze mwa Bibele li swanela ku ama cwañi mubonelo ni mikwa ya Mukreste ka za malilo?

Nihaike kuli Mukreste wa kona ku lila batu ba lata ba ba timezi, wa ziba kuli bafu ha ba na se ba ziba. Batu ba ba sa lumeli niha ne ba ka mu nyaza, u ambuka lizo ze tiswa ki tumelo ya kuli bafu ba kona ku tusa kamba ku holofaza ba ba pila. Kuli ba tibele matata, Bakreste ba bañwi ba ñolanga litaelo za bona za mo ba batela ku bulukelwa.—2/15, makepe 29-31.

• Kana “buka ya Ya-Lukile” ni “Buka ya Lindwa za [Muñaa] Bupilo” ki libuka za Bibele ze latehile? (Josh. 10:13; Num. 21:14)

Batili. Ku bonahala kuli neeli libuka ze nee si ka ñolwa ka susuezo ya moya wa Mulimu ze nee li teñi mwa linako za Bibele ili ze nee ba amile ku zona bañoli ba Bibele.—3/15, likepe 32.

• Ki kabakalañi Elia ni mutanga wa hae ha ne ba talimile kwa neku la liwate, Elia ha naa nze a lapelela pula? (1 Mal. 18:43-45)

Elia naa bonisize kuli naa ziba mupotoloho wa mezi. Malu a naa pangeha fahalimu a liwate naa ka fukisezwa fahalimu a naha, ni ku tahisa pula.—4/1, makepe 23-24.