Baana, Mu Likanyise Lilato La Kreste!

FA BUSIHU bwa mafelelezo fa lifasi pili a si ka shwa kale, Jesu naa bulelezi baapositola ba hae ba ba sepahala kuli: “Ni mi fa mulao o munca, kikuli mu latane; sina mo ni mi latezi, ni mina mu latane cwalo. Se ba ka ziba batu kaufela kuli mu balutiwa ba ka ka sona, ki ha mu latana.” (Joa. 13:34, 35) Kaniti, Bakreste ba niti ba swanela ku latana.

Ha naa bulela ka ku nonga kwa baana ba Sikreste, muapositola Paulusi naa ñozi kuli: “Banna, mu late basali ba mina, sina Kreste mw’a latezi Keleke mi a itobohile bakeñisa yona.” (Maef. 5:25) Muuna wa Sikreste u kona ku sebelisa cwañi kelezo ye mwa linyalo la hae, sihulu haiba musalaa hae ki mutangaa Jehova ya ineezi?

Kreste Naa Babalela Puteho

Bibele i bulela kuli: “Banna ba swanezi ku lata basali ba bona sina mubili wa bona. Ya lata musal’a hae, wa itata ili yena. Kakuli haisali, ha ku na mutu ya kile a toya nama ya hae; kono wa i fepa, wa i babalela sina Kreste mw’a ezeza Keleke.” (Maef. 5:28, 29) Jesu naa olisa hahulu balutiwa ba hae mi naa ba lata hahulu. Naa ba babalela. Nihaike kuli ne ba si ka petahala, naa ba ezanga ka musa. Bakeñisa kuli naa tabela ku ‘itahiseza puteho ye kanya fapilaa hae,’ naa isa hahulu pilu kwa mikwa ye minde ya balutiwa ba hae.—Maef. 5:27.

Sina feela Kreste mwa naa boniselize lilato kwa puteho, muuna ni yena u swanela ku bonisa lilato ku musalaa hae ka manzwi ni ka likezo za hae. Musali ya boniswanga lilato ki muunaa hae ka nako kaufela u ikutwanga kuli wa babalelwa mi u banga ya tabile. Kono musali ya pila mwa lapa la bumbombo mo ku na ni lika kaufela kono ili ya sa isezwi pilu ki muunaa hae haa koni ku ba ya tabile.

Muuna u bonisa cwañi kuli wa babalela musalaa hae? Ha ba li mwahalaa batu, wa zibahazanga musalaa hae ku ba bañwi ka likute mi wa mu lumbanga patalaza kabakala mwa swalisanela ni yena. Haiba musalaa hae u tusize kwa ku peta kalulo ye ñwi ya butokwa ye tusize lubasi ku kondisa lika, muunaa hae haa na ku zina-zina ku taluseza ba bañwi. Ka nako ye ba li ba babeli kwa mukunda, u ikutwa ku latiwa. Likezo ze cwale ka ku mu swala fa lizoho, ku mu menyeza, ku mu kumbata, ni ku swalisana ni yena li kana za bonahala ku ba ze nyinyani, kono li tahiseza musali ku ikutwa kuli wa latiwa hahulu.

“H’a Swabeli ku ba Biza Banyani ba Hae”

Kreste Jesu naa sa swabeli ku biza balateleli ba hae ba ba tozizwe kuli ki “banyani” ba hae. (Maheb. 2:11, 12, 17) Haiba mu muuna wa Sikreste, mu zibe kuli musalaa mina ni yena ki kaizelaa mina wa Sikreste. Buineelo bwa hae ku Jehova ki bwa butokwa hahulu ku fita linyalo la hae, ibe kuli naa kolobelizwe pili kamba hamulaho wa ku nyaliwa ku mina. Haiba muzwale ya zamaisa mukopano wa puteho a supa musalaa mina kuli a alabe, u ka mu biza ka swanelo kuli “Kaizeli.” Ni mina ki kaizelaa mina, isi feela kwa Ndu ya Mubuso kono ni fa lapa la mina. Ki kwa butokwa ku mu bonisa sishemo ni likute fa lapa sina feela mo ku belanga kwa Ndu ya Mubuso.

Haiba mu na ni buikalabelo bo buñwi bo mu peta mwa puteho, fokuñwi mu ka fumananga taata ku peta hande buikalabelo bwa mwa puteho ni bwa mwa lubasi. Swalisano ye nde  mwahalaa maeluda ni batanga ba bukombwa ni ku luta ba bañwi kuli ba lwale buikalabelo bwa puteho ku ka mi tusa ku lukuluha kuli mu be ni nako ya ku banga ni kaizeli ya mi tokwa hahulu, ili yena musalaa mina. Mu hupule kuli ku na ni mizwale ba bañwi ba ba kona ku eza misebezi ya puteho ye mu eza, kono ki mina mu nosi ba ba kopanyizwe hamoho ni musalaa mina mwa linyalo.

Ku tuha fo, ki mina toho ya musalaa mina. Bibele i bulela kuli: “Toho ya munna kaufela ki Kreste; mi munna ki toho ya musali.” (1 Makor. 11:3) Mu swanela ku sebelisa cwañi butoho bo? Mu swanela ku bu sebelisa ka lilato, isiñi ka ku kuta-kutela ku punda timana ye bonisizwe fahalimu ni ku hapeleza musalaa mina kuli a mi kuteke. Se si kona ku mi tusa ku sebelisa hande butoho ki ku likanyisa Jesu Kreste ka mo mu sebelisanela ni musalaa mina.—1 Pit. 2:21.

“Balikani ba ka ki mina”

Jesu naa bizize balutiwa ba hae kuli ki balikani. Naa ba bulelezi kuli: “Ha ni sa mi biza batanga, kakuli mutanga h’a zibi se si ezwa ki mulen’a hae; kono ni mi biza balikani, kakuli ni mi zibisize ze ni utwile kaufela ku Ndate.” (Joa. 15:13-16) Jesu ni balutiwa ba hae ne ba ambolisananga hande. Hape ne ba ezanga lika hamoho. ‘Jesu ni balutiwa ba hae’ ne ba bizizwe kwa mukiti wa linyalo kwa Kana. (Joa. 2:2) Ne ku na ni libaka ze ne ba tabela, inge cwalo simu ya Getsemani. Bibele i bulela kuli “Jesu n’a kopani mwateñi ni balutiwa ba hae hañata.”—Joa. 18:2.

Musalaa mina u swanela ku ikutwa kuli ki mina mulikanaa hae yo mutuna. Kwa swanela luli kuli mina baana ni basali ba mina mu ikole lika za mwa bupilo hamoho! Mu sebeleze Mulimu hamoho. Mu tabele ku ituta Bibele hamoho. Mu ezange lika hamoho, inge cwalo ku tambala, ku ambolisana, ni ku ca lico hamoho. Mu si ke mwa ba feela batu ba ba nyalani, kono mu be balikani ba ba latana hahulu.

Naa “ba Lata ku Feleleza”

Jesu naa ‘lata balutiwa ba hae ku feleleza.’ (Joa. 13:1) Baana ba bañwi ba palelwa ku likanyisa Kreste mwa taba ye. Mane fokuñwi ba kana ba yubeka ‘musali wa bunca bwa bona’ ni ku nyala ya bonahala bwanana.—Mala. 2:14, 15.

Ba bañwi ba ba swana sina bo Willi, ba likanyisa Kreste. Bakeñisa kuli musalaa bona naa totobeliswa ki mapongo, naa tokwa ku babalelwa ka lilimo ze ñata. Bo Willi ne ba ikutwile cwañi ka za taba ye? Ne ba bulezi kuli: “Nako kaufela ne ni nga musalaa ka kuli ki mpo ye zwa ku Mulimu mi ni konile ku mu nga sina mpo. Kwandaa zeo, lilimo ze 60 kwamulaho, ne ni sepisize kuli ni ka mu babalela mwa linako ze nde ni ze maswe. Ha ni na ku libala sepiso yani ni kamuta.”

Baana ba Sikreste, mu likanyise lilato la Kreste. Mu babalele musalaa mina ya saba Mulimu, kakuli ki kaizeli ni mulikanaa mina.

[Siswaniso se si fa likepe 20]

Kana musalaa mina ki mulikanaa mina yo mutuna?

[Siswaniso se si fa likepe 20]

‘Mu late musalaa mina’