Lipuzo ze Zwa Kwa Babali

Jesu naa kutalize mwa naha ya Isilaele kaufela. Cwalehe ki kabakalañi muapositola Pitrosi ha naa ñozi kuli Majuda ne ba bulaisize Jesu “ka ku sa ziba”?—Lik. 3:17.

Muapositola Pitrosi ha naa bulela kwa sikwata sa Majuda ka za mulatu wa bona wa ku bulaisisa Mesiya, naa ize: “Na ziba kuli mu ezize taba yeo ka ku sa ziba, nihaiba bazamaisi ba mina.” (Lik. 3:14-17) Majuda ba bañwi ne ba si ka utwisisa feela Jesu ni lituto za naa luta. Kono ba bañwi ne ba si ka mu zibi bakeñisa kuli ne ba sa tabeli ku tabisa Mulimu, ne ba na ni saluluti, muna, ni sitoyo se situna ku yena.

Ha mu nyakisise ka mo Majuda ne ba ngezi lituto za Jesu bakeñisa ku sa tabela ku tabisa Jehova. Hañata Jesu naa lutanga batu ka liswanisezo mi naa li talusanga kwa batu ba ne ba tabela ku ituta. Kono ba bañwi bona ne ba ikelanga feela ku si na ku ikataza hahulu ku utwisisa taluso ya liswanisezo zeo. Muta o muñwi balutiwa ba bañwi mane ne ba sitatalile bakeñisa pulelo ya naa itusisize Jesu. (Joa. 6:52-66) Balutiwa bao ne ba si ka lemuha kuli liswanisezo za Jesu ne li ba fa kolo ya ku cinca mubonelo ni likezo za bona. (Isa. 6:9, 10; 44:18; Mat. 13:10-15) Hape batu bao ne ba itibalize kuli ne ku polofitilwe ka za Mesiya kuli naa ka itusisa liswanisezo ha nzaa luta batu.—Samu 78:2.

Ba bañwi ne ba hanile lituto za Jesu bakeñisa saluluti. Ha naa luta mwa sinagoge ya mwa naha ya habo, kwa Nazareta, batu ne ba ‘komokile.’ Kono mwa sibaka sa ku lumela kuli Jesu ki yena Mesiya, ba kala ku buza lipuzo ka za kwa na simuluha, ba li: “Ki kakai kwaa li ngile zeo? . . . Ha lu li, ki yena mupangi, mwanaa Maria, muhulwanaa bo Jakobo, ni Jose, ni Juda, ni Simoni? Likaizeli za hae hasi ba, ba ku luna?” (Mare. 6:1-3) Batu ba kwa Nazareta ne ba nyaziselize lituto za Jesu bakeñisa kuli Jesu naa simuluha mwa lubasi lo lu shebile.

Baeteleli ba bulapeli bona ne ba nga cwañi lituto za Jesu? Buñata bwa bona ne ba sa isezi Jesu pilu ka mabaka a swana. (Joa. 7:47-52) Ni bona ne ba hanile lituto za Jesu bakeñisa muna, ka ku bona kuli batu ba bañata ne ba mu tabela. (Mare. 15:10) Mi ba bañata ba litulo ze tuna ne ba mu toile kabakala kuli naa ba nyazize bakeñisa buipi ni bupumi bwa bona. (Mat. 23:13-36) Jesu ka swanelo naa ba nyazize kakuli ne ba itimeza mitala, mi naa ize: “Bumai ki bwa mina baluti ba mulao! kakuli mu ngile sinotolo sa zibo; mina ha mu si ka kena [mwa Mubuso], mi ba ba bata ku kena mwa ba hanisa.”—Luka 11:37-52.

Jesu naa kutalize taba ye nde mwa Isilaele ka lilimo ze taalu ni licika. Hape naa lutile batu ba bañata ku eza musebezi o swana. (Luka 9:1, 2; 10:1, 16, 17) Jesu ni balutiwa ba hae ne ba petile hande musebezi wa bona kuli mane Bafalisi ne ba tongokile ba li: “A mu bone, naha kaufela i mu latelezi.” (Joa. 12:19) Kacwalo haki kuli buñata bwa Majuda ne ba sa zibi se siñwi ka za Jesu; ne ba ziba. Kono ne ba si ka “ziba” kuli Jesu ne li yena Mesiya. Ne ba ka kona ku ituta ze ñata ka za Mesiya ni ku mu lata hahulu, kono ne ba si ka eza cwalo. Ba bañwi ku bona ne ba swalisani ni ba ne ba bulaile Jesu. Kona libaka muapositola Pitrosi ha naa elelize ba bañata ku bona kuli: “Mu bake, mi mu sikuluhe; kuli libi za mina li takulwe; mi ku tahe linako za ku katuluha, ze zwa ku Mulena; mi a lume Jesu Kreste, ya naa bulezwi pili ku mina.” (Lik. 3:19, 20) Hañihañi Majuda ba bañata ba utwa kelezo yeo, hamoho cwalo ni “buñata bo butuna bwa baprisita.” Ne ba si ka eza lika hape ka ku sa ziba. Kono ne ba bakile mi Jehova a ba shemuba.—Lik. 2:41; 4:4; 5:14; 6:7.