Lipeu Za Taba Ye Nde Li Izo Fita Kwa Libaka Za Kwahule

TUVA ki naha ya kwa Russia. I fumaneha kwa mboela wa Siberia. Kwa mboela ni upa wa yona ki naha ya Mongolia. Batu ba bañata mwa Tuva ba pila mwa libaka za kwahule ze sa konwi ku fitwa ka bunolo ki bakutazi ba taba ye nde ya Mubuso. Nihakulicwalo, cwanoñu fa sikwata se siñwi sa batu ba kwa libaka za kwahule za Tuva ne si ile kwa muleneñi wa naha o bizwa Kyzyl, ku yo fumaneha kwa mukopano o no ezelizwe teñi. Bo Maria ki mapaina mwa Kyzyl mi ha ne ba utwile kuli sikwata seo ne si taha kwa mukopano, ba lemuha kuli yeo neikaba kolo ye nde ya ku kutaza ku bona taba ye nde.

Bo Maria ba kandeka ze ne ezahezi, ba li: “Fa sikolo fo ni luta ne ku lukisizwe mukopano wa ku luta sikwata seo mwa ku tuseza batu ba ba komilwe ki lika ze kola. Sikwata sa batu ba ba bato ba 50 ba kwa libaka za kwahule za Tuva ne si memilwe kwa mukopano wo. Sikwata seo ne li sa baluti, bocaziba ba mihupulo ya batu, batatubi ba mupilelo wa banana, ni ba bañwi cwalo.” Bo Maria ne ba ikutwile kuli mukopano wo ne u ka ba fa kolo ya ku kutaza kwa batu bao kono ne ba na ni butata bu li buñwi. Bo Maria ba li: “Ka sipepo, ni mutu wa maswabi, mi ni fumananga taata ku kutaza ka ku tandalelwa. Nihakulicwalo, ne ni lapezi ku Jehova kuli ni be ni bundume ni kuli ni itusise kolo yeo kwa ku fa bupaki.” Kana ne ba konile ku eza cwalo?

Bo Maria ba ekeza kuli: “Ne ni fumani magazini ya Awake! ye ne bulela ka za maswabi ni boi. Na lemuha kuli magazini yeo mwendi ne i ka tabelwa ki caziba wa mihupulo ya batu, kacwalo na i shimba kwa sikolo. Zazi leo yo muñwi wa baluti ba ne ba tile kwa mukopano fa sikolo a taha mwa ofisi ya ka, mi na mu fa magazini yeo. Muluti yo a i amuhela ka tabo. Mane a ni taluseza kuli ni yena ki mutu wa maswabi ni boi. Habusa na mu tiseza buka ya Questions Young People Ask—Answers That Work, Volyumu 1. Ni yona yeo a i amuhela ka tabo. Bakeñisa cisehelo ya hae, na lemuha kuli baluti ba bañwi mwendi ni bona ne ba ka tabela hatiso yeo. Kacwalo na isa kwa sikolo mbokisi ya libuka za Young People Ask ni lihatiso ze ñwi.” Ku si ka fita nako, lihatiso zeo kaufela za fela. Bo Maria ba kandeka ze ne ezahezi, ba li: “Baluti ba bañwi ba ne ba tile kwa mukopano hamoho ni muluti ye ne ni file buka ya Young People Ask ba taha mwa ofisi ya ka ku to buza kuli: ‘Kanti ko ku sweli ku fiwa libuka ki kakai?’” Ne ba sa zibi kuli ne ba tile ku mutu ya swanela!

Lizazi la mafelelezo la mukopano wa baluti bao ne li la Mukibelo. Bo Maria ne ba sa beleki zazi leo, kono ne ba siile lihatiso fa litafule mwa ofisi ya bona. Mi ne ba ñozi fa bodi kuli: “Kwa baluti, shangwe mwa kona ku ikungela kwa lihatiso ze ni siile fa litafule ni ku ngela kwateñi ba bañwi. Lihatiso ze nde hahulu zeo li ka mi tusa mwa musebezi wa mina ni ku tiisa mabasi a mina.” Ki lika mañi ze ne ezahezi? Bo Maria ba li: “Ha ne ni ile kwa ofisi zazi leo, na yo fumana kuli lihatiso ze ñata li ngilwe. Mi kapili-pili na yo nga libuka ni limagazini ze ñwi hape.” Mukopano wo ha ne u felile, bo Maria ne se ba file baluti bao limagazini ze 380, libuka ze 173, ni libroshuwa ze 34. Batu bao ha ne ba kutezi habo bona ili kwa libaka za kwahule, ne ba ile cwalo ni lihatiso ze ne ba filwe. Bo Maria ba li: “Ni ya tabile hahulu kuli lipeu za taba ye nde li izo fita kwa libaka za kwahule hahulu za Tuva!”—Muek. 11:6.

[Mapa ye fa likepe 32]

(Kuli mu bone mo i hatiselizwe luli, mu bone hatiso)

RUSSIA

TUVA REPUBLIC