Mu Amuhelange ka Buitebuho Mu Fange ka Pilu Kaufela

JEHOVA, yena Ndataa luna wa kwahalimu ya lilato, wa lu babalela. Linzwi la Mulimu li lu sepisa kuli Jehova u babalela batanga ba hae kaufela. (1 Pit. 5:7) Nzila ye ñwi ya lu babalela ka yona Jehova ki ka ku lu fa lituso ze shutana-shutana ze lu tusa ku mu sebeleza ka busepahali. (Isa. 48:17) Ha lu talimana ni matata a kalelwisa hahulu, Jehova u batanga kuli lu itusise lituso za fanile. Mulao wa na file Jehova ku Mushe u paka hande taba yeo.

Mwa Mulao wa Mushe, Jehova ka lilato na tomile litukiso za ku tusa ka zona “mubotana,” ya cwale ka ndiala, mbelwa, kamba muzwahule. (Liv. 19:9, 10; Deut. 14:29) Jehova wa ziba kuli ba bañwi kwa batanga ba hae ba kana ba tokwa tuso kwa balapeli ba bañwi. (Jak. 1:27) Kacwalo, ha ku na mutangaa Jehova ya swanela ku zina-zina ku amuhela tuso haiba a fiwa tuso ki mutu ya susuelizwe ki Jehova kuli a mu tuse. Nihakulicwalo, ha lu amuhela tuso, lu swanela ku i amuhela ka moya o swanela.

Linzwi la Mulimu hape li bonisa kuli batu ba Mulimu ba na ni kolo ya ku fana. Mu hupule taba ya “musali wa mbelwa, ya shebile” ya na boni Jesu mwa tempele mwa Jerusalema. (Luka 21:1-4) Ku si na ku kakanya, mbelwa yo na fumananga lituso za na lukisize Jehova ka lilato ili ze ne ñozwi mwa Mulao wa Mushe. Kono nihaike kuli ne li mubotana, mbelwa yo u hupulwa sina mutu ya na fanile lituso, isi sina mutu ya na amuhezi lituso. Bufani bwa hae ku si na kakanyo ne bu mu tahiselize tabo kakuli sina mwa na bulelezi Jesu, “ku na ni mbuyoti mwa ku fana, ye fita ye mwa ku fiwa.” (Lik. 20:35) Ka ku beya taba yeo mwa munahano, mu kona ku ‘fana’ cwañi ka nzila ye ka mi fumanisa tabo?—Luka 6:38.

‘Se ni ka Kutiseza Jehova ki Sifi?’

Walisamu na ize: “Se ni ka kutiseza [Muñaa] Bupilo ki sifi, kwa lituso za hae kaufela ku na?” (Samu 116:12) Walisamu yo na filwe lituso mañi ki Jehova? Jehova na mu tiisize “mwa ñalelwa ni mwa maswabi.” Mi Jehova na “silelelize moya wa [hae] kwa lifu.” Mi cwale walisamu yo na bata ku “kutiseza Jehova” se siñwi cwalo. Walisamu yo na ka lifañi? Na ize: “Ni ka lifa za buitamo bwa ka ku [Muñaa] Bupilo.” (Samu 116:3, 4, 8, 10-14) Na ikatulezi ku taleleza lisepiso za hae kaufela za na sepisize Jehova ni ku taleleza buitamo bwa hae kaufela ku yena.

Ni mina mwa kona ku eza cwalo. Ka mukwa ufi? Ka ku pila mupilelo o lumelelana ka nako kaufela ni milao ni likuka za Mulimu. Kacwalo, mu bone teñi kuli bulapeli bwa mina ku Jehova bu zwelapili ku ba yona nto ya butokwa ka ku fitisisa mwa bupilo bwa mina ni ku bona teñi kuli moya wa Mulimu wa mi etelela mwa linto kaufela ze mu eza. (Muek. 12:13; Magal. 5:16-18) Kono niti kikuli ha mu koni ku kutiseza Jehova lika kaufela za mi ezelize. Nihakulicwalo, mu ka ‘tabisa pilu ya Jehova’  haiba a bona kuli mu sweli ku ifana mwa sebelezo ya hae ka pilu ya mina kaufela. (Liprov. 27:11) Ki tohonolo ye tuna luli ku tabisa Jehova ka nzila yeo!

Mu Abane Mwa ku Tiisa Puteho

Ku si na ku kakanya, mwa lumela kuli mu tusizwe ki puteho ya Sikreste ka linzila ze ñata. Ka puteho, Jehova u mi kapwekile lico za kwa moya. Mu itutile niti ye mi lukuluzi kwa lituto za buhata za bulapeli ni kwa lififi la kwa moya. (Joa. 8:32) Ka mikopano ya puteho ni ka mikopano ye mituna ye lukisizwe ki “mutanga ya sepahala, ya na ni kutwisiso,” mu ipumanezi zibo ye isa kwa bupilo bo bu sa feli mwa paradaisi mo ku si ke kwa ba ni ze utwisa butuku ni manyando. (Mat. 24:45-47) Kana mwa kona ku bala lituso kaufela ze mu amuhezi—mane ni ze mu ka amuhela kwapili—ka puteho ya Mulimu? Cwalehe ki lifi ze mu kona ku kutiseza puteho?

Muapositola Paulusi na ñozi kuli: “Mubili kaufela u bupehile hande, u kopanyizwe hamoho ka malukuluhelo kamukana aa tusa lilama, u nzoo hula ka ku ya ka tikanyo ya mata aa filwe silama ni silama, mi u yahiwa mwa lilato.” (Maef. 4:15, 16) Nihaike kuli liñolo leo li ama sihulu kwa sitopa ba Bakreste ba ba tozizwe, sikuka sa lona si kono ku ama kwa Bakreste kaufela kacenu. Kaniti, mañi ni mañi mwa puteho wa kona ku abana mwa ku tiisa puteho. Lu kona ku eza cwalo ka linzila lifi?

Lu kona ku eza cwalo ka ku lika ka taata ka linako kaufela ku susueza ni ku katulusa ba bañwi kwa moya. (Maro. 14:19) Hape lwa kona ku “hulisa” puteho ka ku bonisa muselo wa moya wa Mulimu ha lu sebelisana ni balumeli ba bañwi. (Magal. 5:22, 23) Kwandaa zeo, hape lwa kona ku fumana linzila za ku ‘eza ka zona batu kaufela hande, sihulu banabahabo luna ba balumeli.’ (Magal. 6:10; Maheb. 13:16) Mañi ni mañi mwa puteho—mizwale ni likaizeli, banana ni ba bahulu—ba kona ku abana mwa ku ‘yaha puteho ka lilato.’

Mi kwandaa zeo, lwa kona ku itusisa buikoneli bwa luna, maata a luna, ni lika za luna kuli lu abane mwa musebezi wa ku pilisa batu o i sweli ku eza puteho. Jesu Kreste na ize: “Mu filwe fela.” Luna bo? Jesu na ize: “Mu fane fela.” (Mat. 10:8) Kacwalo mu abane ka ku tala mwa musebezi wa butokwa wa ku kutaza Mubuso ni ku tahisa balutiwa. (Mat. 24:14; 28:19, 20) Kana mu na ni mifokolo ye miñwi ye kona ku mi palelwisa ku eza cwalo? Mu hupule mbelwa ya shebile ya na talusize Jesu. Za na fanile ne li ze nyinyani hahulu. Niteñi Jesu na bulezi kuli na fanile ku fita ba bañwi kaufela. Na fanile linto kaufela za na kona ku fana ka ku ya ka muinelo wa hae.—2 Makor. 8:1-5, 12.

Mu Amuhelange ka Moya O Swanela

Nihakulicwalo, ka linako ze ñwi mu kana mwa tokwa ku fiwa tuso ki puteho. Ha mu talimana ni lisineneketo za muinelo wa cwale, mu si zina-zini ku amuhela tuso ifi kamba ifi ye mu kana mwa fiwa ki puteho. Jehova u ezize tukiso ya kuli baana ba ba swanela ili ba ba lilato ba “lise” puteho—mi baana bao ba kona ku mi tusa ha mu talimana ni miliko ni liñalelwa. (Lik. 20:28) Maeluda ni ba bañwi mwa puteho ba ka mi omba-omba, ku mi tiisa, ni ku mi sileleza ha mu li mwa miinelo ye taata.—Magal. 6:2; 1 Mates. 5:14.

Kono ha mu amuhela tuso ye ne mu tokwa, mu bone teñi kuli mwa i amuhela ka moya o swanela. Kamita mu amuhelange lituso ze mu fiwa ka buitebuho. Mu nge tuso ye mu fiwa ki balumeli ba bañwi sina poniso ya sishemo sa Mulimu se si si ka libelelwa. (1 Pit. 4:10) Ki kabakalañi ha mu swanela ku eza cwalo? Kakuli ha lu lati ku amuhela lituso mo ba li amuhelelanga ba bañata mwa lifasi—ku si na buitebuho.

Mu si ke Mwa Libelela ze Ñata

Mwa liñolo la na ñolezi puteho ya kwa Filipi, Paulusi na bulezi cwana ka za Timotea: “Ha ni na wa bubeli, konji yena, wa pilu ye swana sina ya ka, ka ku tokomela za mina.” Nihakulicwalo,  Paulusi hape na ize: “Kaufela ba ipatela za bona, isi za Jesu Kreste.” (Mafil. 2:20, 21) Ka ku hupula taba yeo ya na bulezi Paulusi, luna kacenu lu kona ku ambuka cwañi ku “ipatela” za luna feela?

Ha lu kupa kuli ba bañwi mwa puteho ba lu tuse ku tatulula matata a luna, ha lu swaneli ku ba libelela ku itusisa nako ni mamelelo ya bona kaufela ku luna. Kabakalañi? Mu nahane taba ye: Ku si na ku kakanya, ne lu ka itumela hahulu muzwale ha na ka lu fa tuso ye ñwi ha lu li mwa ziyezi. Kono kana ne lu ka kataza muzwale kuli a lu fe tuso? Batili ne lu si ke lwa eza cwalo. Ka nzila ye swana, nihaike kuli mizwale ba luna ba ba lilato ba tabelanga ku lu tusa, ha lu swaneli ku ba libelela kuli ba itusise nako ya bona kaufela kuli ba tuse luna. Ha lu swaneli ku eza cwalo kakuli nto ifi kamba ifi ye ba eza balumeli ba bañwi kuli ba lu tuse mwa butata bwa luna, lu bata kuli ba i eze ka pilu ye lata.

Ku si na kakanyo, mizwale ni likaizeli ba mina ba Sikreste kamita ba itukiselize ku mi tusa ka pilu ye lata. Kono ka linako ze ñwi ba kana ba palelwa ku mi tusa. Haiba ku ba cwalo, mu si ke mwa libala kuli Jehova u ka mi tusa mwa butata bufi kamba bufi bo mu ka talimana ni bona, sina mwa na tuselize walisamu.—Samu 116:1, 2; Mafil. 4:10-13.

Kacwalo, mu si ke mwa zina-zina ku amuhela ka buitumelo nto ifi kamba ifi ya mi fa Jehova—sihulu ha mu li mwa ziyezi kamba mwa ñalelwa. (Samu 55:22) Jehova u bata kuli mu amuhelange lituso za hae ka buitumelo. Nihakulicwalo, Jehova hape u bata kuli ni mina mu be ‘mufani ya tabile.’ Kacwalo, mu ikatulele “mwa pilu” ya mina kuli mu ka fa nto ifi kamba ifi ye mu kona ku fa kuli mu zwisezepili bulapeli bwa niti. (2 Makor. 9:6, 7) Haiba mu eza cwalo, mu ka amuhelanga lika ka buitebuho mi mu ka fanga ka pilu kaufela.

[Mbokisi/Siswaniso se si fa likepe 31]

‘Se ni ka kutiseza Jehova ki sifi, kwa lituso za hae kaufela ku na?’—Samu 116:12

▪ Mu fumane linzila za ku ‘eza batu kaufela hande’

▪ Mu susueze ni ku katulusa ba bañwi kwa moya

▪ Mu abane ka maata a mina kaufela mwa musebezi wa ku tahisa balutiwa