Kana ki na ya Naa Iketezi Bulapeli Bwa Ka Kamba ki Bashemi ba Ka?

MWA Poland, batu ba bañata ba bulelelanga Lipaki za Jehova kuli, “Ne ni pepezwi mwa bulapeli ona bo, mi ki mona mo ni ka shwela.” Taba yeo i bonisa kuli batu ba nga bulapeli sina nto ya ku yolanga feela. Kana batu ba mwa kalulo ye mu pila ku yona kona mo ba ngela bulapeli cwalo? Ki lika mañi ze tahiswanga ki mubonelo o cwalo wo? Mubonelo o cwalo u tahisezanga batu ku nga bulapeli sina nto ya ku ezeza feela mulao kamba sina feela sizo sa lubasi. Kana nto ye swana ya kona ku ezahala kwa Lipaki za Jehova ba ba amuhezi sanda se sinde sa kwa moya ku zwelela kwa bashemi ba bona kamba bokukwaa bona?

Taba yeo ne i si ka ezahala ku Timotea ya naa tusizwe ki bomahe ni bokukwaa hae ba basali ku ba ni tumelo ku Mulimu wa niti ni ku mu lata. Timotea naa zibile Mañolo a kenile “ku zwa kwa bwanana” bwa hae. Nako ha ne inze i ya, Timotea ni bomahe ni bokukwaa hae ne ba fitile fa ku ikolwisisa kuli bulapeli bwa Sikreste ne li bona bwa niti. Timotea naa ‘kolwisizwe’ ku lumela litaba za naa lutilwe mwa Mañolo ka za Jesu Kreste. (2 Tim. 1:5; 3:14, 15) Kacwalo, kacenu bashemi ba Sikreste niha ba lika ka taata ku tusa bana ba bona ku ba batanga ba Jehova, bana ka sibili ba swanela ku ba ni takazo ya ku ba batanga ba Jehova.—Mare. 8:34.

Mutu ni mutu u swanela ku kolwiswa kuli u fumani niti ka ku mu fa mabaka a tiile a bonisa cwalo, mi seo si ka mu tusa ku sebeleza Jehova ka ku susuezwa ki lilato ni ku zwelapili ku sepahala ku si na taba ni miinelo ya kana a ipumana ku yona. Seo si ka mu tusa ku ba ni tumelo ye tiile ye tomile mibisi.—Maef. 3:17; Makolo. 2:6, 7.

Ze ba Tokwa ku Eza Bana

Bo Albert, * ba ne ba huliselizwe mwa lapa la Lipaki ba li: “Ka nako ye telele se ni ikutwile kuli bulapeli bwa Lipaki za Jehova ki bona bwa niti, kono ne ni fumana taata ku lumela ze ne ba bulela ka za mo ni swanela ku pilela.” Haiba mu mikulwani, mwendi ni mina mu ikutwa cwalo. Mi haiba ku cwalo, mu eze buikatazo bwa ku nahanisisa hande mupilelo wo Mulimu a bata kuli mu pile ka ona, mi ku eza cwalo ku ka mi tusa ku ba ni takazo ya ku eza tato ya hae. (Samu 40:8) Bo Albert ba li: “Ne ni kalisize feela ku lapelanga. Sapili ne ni fumana taata ku eza cwalo. Ne ni tokwa ku ikapelezanga ku lapela. Hañihañi, na ikutwa kuli ne ni ka katelwa ki Mulimu haiba ni lika ku eza ze lukile. Seo sa ni fa maata a ku eza licinceho mwa bupilo bwa ka.” Ku eza bulikani ni Jehova ku lu tusa ku hulisa takazo ya ku eza za tokwa ku luna.—Samu 25:14; Jak. 4:8.

Ka mutala, ha mu nahane za papali ye mu  bapalanga, ye cwale ka papali ya mbola kamba ye ñwi feela. Haiba ha mu zibi milao ya papali yeo kamba ha mu zibi mwa ku i bapalela hande, ha mu na ku i tabela; mwendi mane i ka ba ye nyikwisa. Kono haiba mu ituta milao ya papali yeo ni ku fita fa ku ziba hande mo i bapalelwa, kana hasi niti kuli mu ka nyolelwanga ku bapala papali yeo, mane ni ku batanga kolo ya ku i bapalanga? Misebezi ya kwa moya ni yona i cwalo. Kacwalo, mu fumanange nako ya ku itukiseza mikopano ya Sikreste. Mu abanange teñi. Mane mwa kona ku susueza ba bañwi ka mutala wa mina ku si na taba ni lilimo za mina.—Maheb. 10:24, 25.

Ku bulela ku ba bañwi ka za tumelo ya mina ni kona ku tokwa kuli mu eze nto ye swana. Ha mu tokwi ku hapelezwa ku eza musebezi wo; mu swanela ku u eza ka ku susuezwa ki lilato. Mu ipuze kuli: ‘Ni tabelelañi ku bulela za Jehova ku ba bañwi? Ki mabaka afi aa ni susueza ku lata Mulimu?’ Jehova u swanela ku ba sina Ndate ya lilato ku mina. Jehova naa bulezi cwana ka ku itusisa Jeremia, naa ize: “Mu ka ni bata, mi mu ka ni fumana, ha mu ni bata ka lipilu za mina kaufela.” (Jer. 29:13, 14) Mu tokwa ku ezañi kuli mu bate Jehova cwalo? Bo Jakub ba li: “Ne ni na ni ku cinca munahanelo wa ka. Ku zwa feela kwa bwanana bwa ka, ne ni yanga kwa mikopano ni mwa bukombwa, kono misebezi yeo ne i fetuhile feela sina ya ku ezeza feela mulao. Ne ni kalile ku itebuha niti ha se ni zibile Jehova hande ni ku eza silikani ni yena.”

Ku swalisana ni batu ba bande ba ba kona ku mi yaha ku mi tusa hahulu ku ikola bukombwa bwa mina. Lishitanguti le liñwi le li tahile ka moya wa Mulimu li bulela kuli: “Ya kopana ni ba ba butali, ni yena u ka talifa.” (Liprov. 13:20) Kacwalo, mu eze bulikani ni batu ba ba na ni likonkwani za kwa moya ni ba ba fumana tabo mwa sebelezo ya Jehova. Bo Jola ba bulela kuli: “Ku swalisana ni mikulwani ba bañata ba ba iyakatwa lika za kwa moya ne ku ni susuelize hahulu. Ne ni kalisize ku abananga kamita mwa bukombwa ka tabo ye tuna.”

Ze ba Tokwa ku Eza Bashemi

Bo Jola ba bulela kuli: “Ni itumela hahulu kwa bashemi ba ka, ka ku ni luta ka za Jehova.” Kaniti, bashemi ba kona ku tusa hahulu bana ba bona ku eza liketo ze nde. Muapositola Paulusi naa ñozi kuli: “Mina bondate, mu . . . hulise [bana ba mina] ka ku ba lemusa, ni ka tuto ya Mulena.” (Maef. 6:4) Kelezo yeo ye tahile ka moya i bonisa kuli bashemi ba na ni buikalabelo bwa ku luta bana ba bona linzila za Jehova, isike mihupulo ya bona. Kacwalo, mwa sibaka sa ku susueza feela bana ba mina ku eza lika ze ne mu ka tabela, neikaba hande ha ne mu ka ba susueza kuli ba itomele sikonkwani sa ku pila ka ku lumelelana ni milelo ya Jehova.

Mwa kona ku luta bana ba mina manzwi a Jehova ni ku a ambolisananga ‘ha mu inzi mwa ndu ya mina, niha mu zamaya mwa nzila, niha mu yo lobala, niha mu zuha.’ (Deut. 6:6, 7) Bo Ewa ni bo Ryszard, ba ba na ni bana ba bashimani ba balalu, ha ba iheta kwamulaho ba li: “Ne lu ambolanga hahulu za mifuta ya sebelezo ya nako kaufela ye shutana-shutana.” Ki lifi ze ne zwile mwateñi? Ba zwelapili ku talusa kuli: “Bana ba luna ne ba bile ni takazo ya ku iñolisa mwa Sikolo sa Bukombwa sa Teokratiki ba sa li ba banyinyani,  ne ba bile bahasanyi, mi mafelelezo ba ikatulela ku kolobezwa isali bona. Hasamulaho kaufela bona ba kena mwa sebelezo ya nako kaufela.”

Bashemi ba tokwa hahulu ku tomela bana ba bona mutala o munde. Bo Ryszard ba li, “Ne lu lika hahulu ku ambuka ku ba ni mipilelo ye mibeli ye shutana ha lu li kwandu ni kwa puteho.” Kacwalo mu ipuze kuli: ‘Bana ba ka ba lemuhañi ka mo ni pilela bupilo bwa ka? Kana ba lemuha kuli luli na lata Jehova? Kana ba itemuhela taba yeo ku zwelela kwa litapelo za ka ni tuto ya ka ya ka butu? Kamba kana ba lemuha lilato la ka ku Jehova ku zwelela kwa mubonelo wa ka wa mo ni ngela sebelezo ya mwa simu, litaba za ku itabisa ka zona, kamba lika za kwa mubili, kamba ku zwelela ku ze ni bulelanga ka za batu ba bañwi ba mwa puteho?’ (Luka 6:40) Bana ba mina ba ka talimisisa hande bupilo bwa mina bwa ka zazi ni zazi ni ku bona nji ze mu bulela za lumelelana ni ze mu eza.

Ku kalimelanga bana ki nto ya butokwa hahulu ye tusa bashemi ku hulisa bana ba bona hande. Niteñi, Linzwi la Mulimu le li tahile ka moya li lu taluseza ku “luta mwana nzila yaa swanezi ku zamaya” ku yona. (Liprov. 22:6) Bo Ewa ni bo Ryszard ba li, “Ne lu itutanga Bibele ni yo muñwi ni yo muñwi wa bana ba luna.” Bashemi ki bona ba ba ka bona kamba ba tokwa ku itutanga ni bana ba bona a li muñwi ka a li muñwi. Kono ibe kuli ba atula ku ezanga cwalo kamba kutokwa, ba swanela ku nga mwana ni mwana sina mutu ya shutana ni ba bañwi. Kuli ba eze cwalo ba tokwa ku ba ni bunolo ni kutwisiso. Ka mutala, mwa sibaka sa ku bulelela feela bana ba mina kuli lipina ze ñwi li fosahalile, ne mu ka eza hande ku ba bonisa mwa ku ezeza liketo ze nde, mo likuka za Bibele li amela taba ye.

Bana ba mina ba kana ba ziba hande ze mu tokwa kuli ba eze, mi ba kana ba eza lika zeo. Kono mu swanela ku ba fita kwa lipilu. Mu hupule kuli “mulelo wa mwa pilu ya mutu u swana sina mezi a inzi kwatasi-tasi, ku yo a ka kwateñi, konji ya na ni ngana.” (Liprov. 20:5) Mu be ni temuho, mu batisise lisupo ze bonisa butata bo bu mwa lipilu za bana ba mina, mi mu nge muhato kapili-pili. Ku si na ku ba tama litaba, mu bonise kuli mwa iyakatwa bona, mi mu ba buze lipuzo ze swanela. Kono hape mu tokomele kuli ha mu buzi ka nzila ye tulile tikanyo. Buiyakato bwa mina bu ka ba  fita kwa lipilu mi bu ka mi konisa ku ba tusa hande.

Ze I Swanela ku Eza Puteho

Ka ku ba yo muñwi wa batanga ba Jehova, kana mwa kona ku tusa mikulwani ba mwa puteho ku itebuha sanda sa kwa moya se ba amuhezi? Ki niti kuli bashemi ki bona ba ba na ni buikalabelo bwa ku luta bana ba bona, kono ni ba bañwi mwa puteho, sihulu maeluda ba kona ku tusa bashemi. Sihulu ki kwa butokwa hahulu ku tusa mikulwani ili bao yo muñwi wa bashemi ba bona hasi Paki ya Jehova.

Ki lika mañi ze ba kona ku eza maeluda ilikuli ba tuse ba banca ku lata Jehova ni ku ikutwa kuli ki ba butokwa? Bo Mariusz, ba ba sebeza sina maeluda mwa puteho ye ñwi kwa Poland, ne ba kuta-kutezi halalu ku bulela kuli: “Maeluda ba swanela ku ambolanga ni ba banca.” Mi ne ba zwezipili ku talusa kuli, “Ha ba swaneli feela ku eza cwalo ha ku zuha matata, kono ni ka linako ze ñwi feela—inge cwalo ha ba li mwa bukombwa, hasamulaho wa mikopano, kamba ka nako ya ku ishumusa.” Mwa kona ku buza ba banca ku talusa mo ba ikutwela ka ku ba mwa puteho. Lingambolo ze cwalo li tusa ba banca ku sutelela hahulu kwa puteho ni ku ikutwa ku ba kalulo ya puteho.

Haiba mu maeluda, kana mu sweli mwa eza buikatazo bwa ku ziba mikulwani ba mwa puteho ya mina? Bo Albert, ba se ba bulezwi mwa taba ye, ka nako ya cwale ba sebeza sina maeluda, kono ne ba kopani ni miliko ye shutana-shutana ha ne ba sa li ba banca. Ba li, “Ka ku ba mukulwani, ne ni tokwa ku potelwanga ni nosi ki maeluda.” Maeluda hape ba kona ku bonisa buiyakato bwa bona kwa mikulwani ka ku ba lapelelanga kuli ba zwelepili ku eza hande kwa moya.—2 Tim. 1:3.

Ba banca ba tokwa ku abananga mwa misebezi ya puteho. Hakusicwalo, ba kana ba kalisa ku ndongwama likonkwani za lifasi. Mina ba bahulu, kana mwa kona ku sebezanga ni bona mwa bukombwa ni ku ba eza balikani? Mu bange ni nako ya ku ishumusa hamoho ni ba banca, mi ku eza cwalo ku ka tahisa kuli ba mi sepe ni ku twaelana ni mina. Ha ba iheta, bo Jola ba li: “Kaizeli yo muñwi wa paina naa ni iselize pilu. Neli yena mutu wa pili ye ne ni ile ni yena mwa bukombwa ka ku lata kwa ka.”

Keto ya Mina

Ba banca, mu ipuze kuli: ‘Likonkwani za ka ki lifi? Haiba ha ni si ka kolobezwa kale, kana ni itomezi sikonkwani sa kuli ni kolobezwe?’ Keto ya mina ya ku kolobezwa i swanela ku zwelela kwa pilu ya mina ye lata Jehova, ha i swanelwi ku ezwa feela sina sizo sa mwa lubasi lwa mina.

Haike Jehova a be Mulikanaa mina wa niti, mi niti ye mu itutile i be liluwo la mina la butokwa hahulu. Ka ku itusisa mupolofita Isaya, Jehova naa ize: “Si bilaeli kakuli ki Na Mulimu wa hao.” Jehova u ka ba ni mina ibile feela mwa zwelapili ku ba balikani ba hae. Kaniti, u ka mi “tiisa ka lizoho la [hae] la bulyo la niti ya [hae].”—Isa. 41:10.

[Litaluso za kwatasi]

[Siswaniso se si fa likepe 4]

Mu like ku lemuha ze mwa pilu ya mwanaa mina

[Siswaniso se si fa likepe 6]

Keto ya ku kolobezwa i swanela ku zwelela kwa pilu ya mina ye lata Jehova