Mo ne ni Fumanezi Tabo Mwa Bupilo

Ka mo li kandekezwi ki bo Gaspar Martínez

Ka linzila ze ñwi, ni ka li, likande la ka ki la mushimani wa mubotana wa mwahae ya naa izo fumana maluo mwa bukuwa. Kono mu ka lemuha kuli maluo a ne ni fumani haki ona a ne ni libelela.

NE NI hulezi mwahae mwa lilimo za ma-1930 ili mwa sibaka sa Rioja kwa mutulo wa Spain. Ha ne ni na ni lilimo ze lishumi, na tuhela sikolo, kono fo ne se ni itutile ku bala ni ku ñola. Na ni bahulwani ba ka ba babeli ni banyani ba ka ba balalu ne lu belekanga mwa simu, ku lisa lingu ni ku lima masimu a luna a manyinyani.

Bunjebwe ne bu tahisize kuli lu nge kuli maluo ki a butokwa hahulu. Ne lu shwelanga muna batu ba ne ba na ni maluo a mañata ku lu fita. Nihakulicwalo, yo muhulu wa keleke ya luna naa kile a bulela kuli “munzi wa luna u na ni balapeli ba bañata ku fita minzi ye miñwi kaufela ya mwa kalulo ya hae.” Naa si ka lemuha kuli hasamulaho ba bañata mwa munzi wa hesu ne ba ka zwa mwa bulapeli bwa Katolika.

Ku Bata Bulapeli Bwa Niti

Ne ni nyezi Mercedes, musizana wa mwa munzi wa hesu. Ku si ka fita nako, lwa pepa mwana wa mushimani. Ka 1957, lwa tutela kwa tolopo ye nee li bukaufi ya Logroño, mi hamulaho, lubasi lwa hesu kaufela lwa tutela kwa tolopo yeo. Kono kapili-pili na lemuha kuli bakeñisa kuli ne ni si ka ituta hahulu, ne ni si ke na fumana musebezi wo fumanisa mali a likani a ku utisa lubasi lwa ka. Na ikutwa kuli ne ni tokwa ketelelo. Mi na kala ku bala libuka mwa sifalana sa libuka sa fa silalanda, nihaike ne ni sa zibi luli ze ne ni bata mwa libuka zeo.

Hamulaho, na utwa za tukiso ya fa wayalesi ya ku ituta Bibele ka mañolo. Na eza cwalo mi ha ni feza feela lituto zeo, ba keleke ya Protesitanti ba ni atumela. Hamulaho wa linako li sikainyana ze ne ni fumanehile kwa keleke ya bona, na lemuha kuli ba bahulu ba keleke yeo ne ba itwanisa. Ne ni si ka kutela kwateñi hape, ka ku nahana kuli likeleke kaufela za swana.

Mayayu Haa Zwa Mwa Meto A Ka

Ka 1964, mutangana ya bizwa Eugenio a taha fa lapa la luna. Nee li yo muñwi wa Lipaki za Jehova, ili bulapeli bo ne ni si ka ziba kale za bona. Kono ne ni tabela ku ambola za Bibele. Ne ni nahana kuli ne ni ziba hande Mañolo. Na alaba lipuzo za hae ka ku itusisa mañolo a sikai a mwa Bibele a ne ni itutile mwa lituto za ka. Nihaike kuli ne ni likile ku yemela lituto ze ñwi za keleke ya Protesitanti, mwa pilu ya ka ne ni sa li kolwi luli.

Ha se ni ambozi ni Eugenio habeli ka nako ye telele, na itumelela kuli Eugenio naa itusisa Linzwi la Mulimu ka bukwala. Ne ni komokile  hahulu ku bona mwa naa sweli ku apulela mañolo ni ku a talusa, nihaike naa si ka ituta mi mane ne ni mu fita. Eugenio naa ni bonisize mwa Bibele kuli lu pila mwa mazazi a maungulelo ni kuli Mubuso wa Mulimu u tuha u tahisa paradaisi fa lifasi. Ne ni komokile hahulu ku utwa litaba zeo.—Samu 37:11, 29; Isa. 9:6, 7; Mat. 6:9, 10.

Ku si na ku zina-zina na lumela ku ituta Bibele. Na lemuha kuli ibatoo ba lika kaufela ze ne ni ituta ne li ze nca, mi ne li ni fitile kwa pilu. Ne ni na ni tibelelo ya bupilo bo bunde bwa kwapili, mi sepo yeo ya ni tahiseza tabo mwa bupilo. Cwale ne se ni fumani ze ne ni bata. Buikatazo bwa ka bwa ku bata sifumu ne bu bonahezi cwale kuli ki bwa mbango, mi naa tuhela ku bilaela hahulu za ku fumana musebezi wa masheleñi a mañata. Ne ni itutile kuli nihaiba makulanu ni lifu ka sibili li ka feliswa.—Isa. 33:24; 35:5, 6; Sin. 21:4.

Hona fo feela, na kala ku taluseza bahabo na lika ze ne ni ituta; na ba taluseza ka mafulofulo kuli Mulimu u sepisize ku tahisa paradaisi fa lifasi mi batu ba ba sepahala ba ka pila ku yona ku ya ku ile.

Lubasi Lwa Hesu ha lu Amuhela Niti

Ku si ka fita nako, lwa kala ku kopanelanga ka sikwata mwa ndu ya bo malume la Sunda ni la Sunda musihali kuli lu buhisanange lisepiso za mwa Bibele. Ne lu ezanga cwalo ka lihora ze peli kamba ze talu sunda ni sunda. Eugenio ha naa boni kuli sikwata se situna sa bana bahesu ne si tabela ku ituta Bibele, a kala ku potelanga lubasi ni lubasi.

Ne ku na ni bana bahesu ba bañwi mwa Durango, ili toloponyana yee li likilomita ze 120 ku zwa ko ne ni pila. Mwa toloponyana yeo ne ku si na Lipaki. Kacwalo hamulaho wa likweli ze talu, na ya fa pumulo ya mazazinyana mi na ba potela kuli ni ba taluseze za niti ye ne ni sa zo ituta. Ka nako yeo, ne lu kopananga hamoho manzibwana ni manzibwana sina sikwata sa batu ba ba batoo ba, ba lishumi, mi ne ni ambolanga ni bona ku fitela malungasiku. Kaufela bona ne ba teelezanga ka cisehelo. Pumulo ya ka ye kuswani ha ne i felile, na ba siyela Libibele ni lihatiso ze tomile fa Bibele. Mi ku zwa fo, ne lu ñolelananga.

Lipaki ha ne ba ile kwa toloponyana ya Durango mwa naa si ka kutaza kale mutu u sili kwandaa na, ba fumana batu ba 18 ba ba libelezi ka cisehelo ku ituta Bibele. Lipaki ba eza litukiso za kuli lubasi ni lubasi lu zamaisezwe tuto ya Bibele.

Kwa makalelo, Mercedes naa sa tabeli ku ituta niti. Ne si kuli naa zina-zina ku amuhela lituto za Bibele kono naa saba batu. Ka nako yeo, musebezi wa Lipaki za Jehova ne u kwalilwe mwa Spain. Kacwalo, Mercedes naa nahana kuli ba muuso ne ba ka leleka bana ba luna ba babeli kwa sikolo ni kuli ne lu ka toiwa ki batu kaufela. Kono ha naa boni kuli lubasi kaufela ne lu amuhela niti, ni yena a itakaleza ku ituta.

Mwa lilimo feela ze peli, ba 40 mwa lubasi lwa hesu ba ba Lipaki mi ba kolobezwa ka ku bonisa takazo ya bona ya ku sebeleza Mulimu. Kaniti lubasi lwa hesu ne lu na ni takazo ye swana ya ku sebeleza Mulimu. Ne ni ikutwile kuli ne ni petile nto ya butokwa hahulu mwa bupilo bwa ka. Ne lu kapwekilwe maluo a mañata a kwa moya.

Ha ne ni Nze ni Hula, Bupilo Bwa Fita fa ku Tabisa Hahulu

Ka lilimo ze 20 ze nee latelezi, ne ni belekile ka taata ku uta bana ba ka ba babeli ni ku tusa puteho ya hesu. Na ni bo Mercedes ha ne lu tutezi kwa Logroño, ne lu izo fumana kuli mwa tolopo yeo ya batu ba ba batoo ba 100,000 ne ku na ni feela Lipaki ba 20. Ku si ka fita nako, na fiwa buikalabelo bo buñata mwa puteho.

Ha ne ni na ni lilimo za buhulu ze 56, kampani ko ne ni beleka ya kwala ka sipundumukela fakitori mo ne ni belekela, mi kacwalo na zwiswa musebezi. Kamita ne ni lakazanga ku ba paina, kacwalo ha ne ni zwisizwe musebezi, na bona kuli yeo ki kolo ya ku ba paina wa kamita. Mali a ne ni filwe a ku tuheliswa musebezi ne li a manyinyani hahulu, mi kacwalo bupilo ne bu katalize luli Mercedes naa tusanga ka ku eza musebezi wa ku kenisa ni ku fiyela. Ne  lu konanga ku ipilisa mi ne lu si ka palelwa ku fumana lika ze tokwahala. Ni sa sebeza sina paina, mi Mercedes fokuñwi u sebezanga sina paina wa ku tusa, mi u ikola hahulu musebezi wa ku kutaza.

Lilimonyana kwamulaho, Mercedes naa fanga kalibe ya bizwa Merche limagazini za luna. Ha naa sa li mwanana, Merche naa kile a ituta Bibele. Merche naa balanga lihatiso za luna ka cisehelo, mi Mercedes naa lemuhile kuli Merche naa sa tabela ku ituta Bibele. Hamulaho, Merche a lumela ku ituta Bibele mi a eza zwelopili. Kono muunaa hae Vicente nee li cakolwa mi kacwalo naa sa inangi fa musebezi. Kacwalo naa palelwanga ku fumana mali a ku itusisa fa lapa; linyalo la bona ne li bonahala ku shekesha bakeñisa bucakolwa bwa hae.

Musalaa ka a kupa Merche kuli a taluseze Vicente kuli a ambole ni na, mi Vicente a eza cwalo. Hamulaho wa ku mu potela ka linako li sikai, a lumela ku zamaisezwa tuto ya Bibele. Vicente a kala ku cinca; mi fokuñwi naa sa nwangi ka mazazi a sikai. Hamulaho, naa tuhelanga ku nwa sunda mutumbi kamba nako ye fitelela fo. Mi kukumbuluka mane a tuhela ku nwa bucwala. Ponahalo ya hae ya cinca hahulu, mi lubasi lwa hae lwa swalisana. Ka nako ya cwale, yena ni musalaa hae ni mwanaa bona wa musizana, ba sweli ku sebeza ka taata ku tusa puteho ye nyinyani ya kwa Canary Islands ko se ba pila cwale.

Ku Iheta Kwa Bupilo bo Bunde bo ni Pilile

Nihaike kuli bahabo na ba bañwi ba ne ba itutile niti kwamulaho ba shwile, lubasi lwa hesu lu zwezipili ku hula, mi Mulimu u lu fuyauzi hahulu. (Liprov. 10:22) Kwa tabisa hahulu ku bona kuli ibatoo ba mañi ni mañi ya naa kalile ku ituta Bibele lilimo ze 40 ze felile, ku beya cwalo ni bana ni baikulu ba bona, ba zwezipili ku sebeleza Jehova ka busepahali!

Cwale ni na ni bahabo na ba bañata ba ba li Lipaki, mi buñata bwa bona ba sebeza sina maeluda, batanga ba bukombwa, ni mapaina. Mwanaka wa mweli ni musalaa hae ba sebeleza fa ofisi ya mutai wa Lipaki za Jehova mwa Madrid, kwa Spain. Ha ne ni bile Paki, ne ku na ni Lipaki ba ba batoo ba 3,000 mwa Spain. Cwale se ku na ni Lipaki ba ba fitelela 100,000. Ni ikola hahulu bupaina, mi ni itumela hahulu ku Mulimu kwa ku ni fumanisa tabo ka ku mu sebeleza. Nihaike kuli ha ni mutu ya itutile, fokuñwi ni sebezanga sina muokameli wa mupotoloho wa ku tusa.

Lilimonyana ze felile, ne ni fumani kuli munzi mo ne ni hulezi u siilwe matota. Bakeñisa bunjebwe, batu kaufela ne ba siile masimu ni mandu a bona ku yo bata mwa ku ipiliseza. Ka litohonolo, ba bañata kwa batu bao, ku beya cwalo ni na, lu fumani maluo a kwa moya. Lu itutile kuli ne lu bupilwe ku pila bupilo bo bunde ni kuli ku sebeleza Jehova ki kona ko ku tahisa tabo ye tuna mwa bupilo.

[Siswaniso se si fa likepe 32]

Ibatoo ba lubasi kaufela lwa Muzwale Martínez lo lu mwa niti