Kana mu ‘Tomile ni ku Tiya fa Mutomo’?

KANA mu kile mwa bona kota ye tuna ha i zukuzwa ki moya wa liñungwa? Kota yeo i zukuzwa ki moya wo mutuna, kono ha i wi. Kabakalañi? Kakuli kota yeo i na ni mibisi ye tiile ye tomile hande mwa mubu. Ni luna lwa kona ku swana ni kota yeo. Ha lu kopana ni litiko ze buhali sina moya wa liñungwa, lwa kona ku itiisa haiba lu zwelapili ku ‘toma ni ku tiya fa mutomo.’ (Maef. 3:14-17) Mutomo wo kiñi?

Linzwi la Mulimu li talusa kuli: ‘Jesu Kreste ki yena licwe le lituna la mwa lilulu’ fo i tomile puteho ya Sikreste. (Maef. 2:20; 1 Makor. 3:11) Luna ka ku ba Bakreste lu susuezwa ku ‘zamaya cwalo ku yena, lu nze lu tibisa mibisi ku yena, lu tomwa ku yena, lu tiya mwa tumelo.’ Ha lu ka eza cwalo, lu ka kona ku tiyela litwaniso kaufela za tumelo ya luna, ku kopanyeleza ni litwaniso ze swana ni ‘manzwi a ku shemba’ a tomile fa litaba za batu “ze si na tuso.”—Makolo. 2:4-8.

‘Bupala, ni Butelele, ni Butungi, ni Butelele Bwa ku ya Kwahalimu’

Kono lu kona ku cwañi ku “toma” ni ku “tiya mwa tumelo”? Nzila ye ñwi ya butokwa ya mo lu kona ku tomela ka yona, ki ka ku ituta ka tukufalelo Linzwi la Mulimu le li tahile ka moya o kenile. Jehova u bata kuli ‘lu utwisise hamoho ni balumeli kamukana, fo ku kuma bupala, ni butelele, ni butungi, ni butelele bwa ku ya kwahalimu’ bwa tumelo. (Maef. 3:18) Kacwalo ha ku na Mukreste ya swanela ku itinga fa kutwisiso ya fahalimu feela, ku kolwa ka ku ziba feela ‘litaba za matatekelo’ za mwa Linzwi la Mulimu. (Maheb. 5:12; 6:1) Kono kaufela luna lu swanela lu lakaza hahulu ku ekeza kwa kutwisiso ya luna ya litaba za niti za mwa Bibele.—Liprov. 2:1-5.

Kono fo ha ku talusi kuli lu tokwa ku ba ni zibo ye ñata kuli lu kone ku “toma” ni ku “tiya mwa tumelo.” Esi mane Satani ni yena wa ziba litaba ze mwa Bibele. Ku sa tokwahala nto ya butokwa. Lu tokwa ku ‘ziba lilato la Kreste le li fita zibo kamukana.’ (Maef. 3:19) Kono ha lu ka ituta ka libaka la kuli lwa lata Jehova ni ku lata niti, ku ekeza kwa zibo ya niti ya Linzwi la Mulimu ku ka tiisa tumelo ya luna.—Makolo. 2:2.

 Mu Like Kutwisiso ya Mina

Ka yona nako ye, ki kabakalañi ha mu sa liki kutwisiso ya mina ka za liniti li sikai za butokwa hahulu za mwa Bibele? Ku eza cwalo ku ka mi susueza kuli mane mu kone ku tukufalelwa hahulu ku ituta Bibele ka butu. Sina ka mutala, mu bale litimana za makalelo za liñolo la muapositola Paulusi ku ba kwa Efese. (Mu bone kakwenda ka ka li: “Ku ba Kwa Efese.”) Hamulaho wa ku bala litimana ze, mu ipuze kuli, ‘Kana na utwisisa taluso ya lipulelo ze mwa kalulo ya Bibele ze siyamisizwe mwa kakwenda?’ Ha lu li nyakisiseñi, iliñwi ka iliñwi.

Ku Ketiwa “Pili Lifasi li si ka Tomwa”

Paulusi naa ñolezi balumeli ka yena kuli: “[Mulimu] naa lelile pili ku ikañulela luna ka Jesu Kreste.” Kaniti, Jehova naa ikatulezi kuli u ka añula batu ba bañwi kuli ba be lubasi lwa hae lwa kwa lihalimu lo lu petehile. Bana ba Mulimu ba ba añuzwi bao ba ka busa sina malena ni baprisita ni Kreste. (Maro. 8:19-23; Sin. 5:9, 10) Ha naa lwanisize bubusi bwa Jehova lwa makalelo, Satani naa kananile kuli batu ba naa bupile Mulimu ne ba na ni bufokoli. Kacwalo ki nto ye swanela luli kuli Jehova u ketile ba bañwi mwahalaa batu kuli ba abane mwa musebezi wa ku tanyela bumaswe kaufela mwa pupo kaufela, ku kopanyeleza cwalo ni musimululi wa bumaswe, yena Satani Diabulosi. Kono Jehova naa si ka ketela cimo kuli ki batu bafi baa ka añula sina bana ba hae. Niteñi, Mulimu naa ikatulezi kuli ku ka ba ni sikwata, kamba sitopa, sa batu ba ba ka busa ni Kreste kwa lihalimu.—Sin. 14:3, 4.

Ki “lifasi” mañi la naa talusa Paulusi ha naa ñolezi Bakreste ka yena kuli ka sikwata, ne ba ketilwe “pili lifasi li si ka tomwa”? Na saa  talusi ka za nako pili Mulimu a si ka bupa kale lifasi kamba batu. Ha ne ku ka ba cwalo, u zibe ne ku si ke kwa lumelelana ni likuka ze lukile. Bo Adama ni Eva ne ba ka fiwa cwañi mulatu ka za likezo za bona haiba Mulimu naa ketile kale kuli ha ba na ku sepahala mane pili inge ba si ka bupwa kale? Kacwalo ki lili fo Mulimu naa ketezi ku bolosolela muinelo o ne ba tahisize bo Adama ni Eva ha ne ba swalisani ni Satani ha naa lwanisize bubusi bwa Mulimu? Jehova naa ezize cwalo, bashemi ba luna ba pili ha se ba kwenuhile kono pili lifasi la batu ba ba si ka petahala, ili le ne li kona ku liululwa li si ka ba kale teñi.

“Ka ku ya ka Bufumu Bwa Sishemo sa Hae”

Ki kabakalañi Paulusi ha naa bulezi kuli litukiso ze talusizwe mwa litimana za makalelo za Maefese ne li tile “ka ku ya ka bufumu bwa sishemo sa [Mulimu]”? Naa bulezi cwalo kuli a koñomeke kuli Jehova naa siyo mwa tamo ya ku liulula batu ba ne ba si ka sepahala.

Ka mo ku inezi feela, ha ku na mutu mwahalaa luna ya naa swanela ku liululwa. Kono bakeñisa kuli Jehova u lata hahulu batu, naa susuelizwe ku eza litukiso ze ipitezi za ku lu liulula. Ka ku ba batu ba ba si ka petahala ni ba ba li baezalibi, sina mwa naa bulelezi Paulusi, tiululo ya luna i tisizwe ki sishemo se situna sa Mulimu.

Kunutu ya Mulelo wa Mulimu

Kwa makalelo, Mulimu naa si ka patulula mwa naa ka tatululela butata bo ne bu tahisizwe ki Satani. Nee li “kunutu.” (Maef. 3:4, 5) Hamulaho, puteho ya Sikreste ha se i tomilwe, Jehova naa patuluzi litaba ka butungi ka mwa naa ka petela mulelo wa hae wa kwa makalelo ka za batu ni lifasi. Paulusi u talusa kuli: “Linako za naa tomile ha li se li petahalile,” Mulimu naa tomile [“zamaiso,” NW] ili tukiso ya ku zamaisa ka yona litaba ze nee ka tahisa kuli libupiwa za hae kaufela ze butali li swalisane.

Kalulo ya pili ya ku swalisana kwa libupiwa ne i kalile fa Pentekonta ya 33 C.E. Jehova ha naa kalisize ku kubukanya batu ba ne ba ka yo busa ni Kreste kwa lihalimu. (Lik. 1:13-15; 2:1-4) Kalulo ya bubeli ikaba ya ku kubukanya hamoho batu ba ba ka pila mwa paradaisi fa lifasi mwatasaa Mubuso wa Mesiya wa Kreste. (Sin. 7:14-17; 21:1-5) Linzwi la ‘zamaiso’ ha li ami kwa Mubuso wa Mesiya, kakuli Mubuso wo ne u si ka tomiwa kale, ku fitela 1914. Kono linzwi leo li ama ka mo Mulimu a zamaiseza lika kuli a pete mulelo wa hae wa ku kutisa swalisano mwahalaa libupiwa kaufela.

“Mwa ku Talifa, mu be ba ba Hulile”

Ku si na ku kakanya, ku ituta kamita ka butu ku ka mi tusa ku utwisisa hande ‘bupala, ni butelele, ni butungi, ni butelele bwa ku ya kwahalimu’ bwa niti. Nihakulicwalo, ha ku na kakanyo ka za kuli bupilo bwa luna bwa mipateho kacenu bu kona ku tahisa kuli Satani a fokolise kamba mane ku sinya mikwa ya luna ya ku ituta kamita. Mu si ke mwa mu lumeleza ku mi lyanganisa. Mu itusise “kutwisiso” yaa mi file Mulimu kuli “mwa ku talifa, mu be ba ba hulile.” (1 Joa. 5:20; 1 Makor. 14:20) Mu ikolwise kuli mwa utwisisa libaka la litaba ze mu lumela ni kuli kamita mu kone ku “ikalabela ku ya ka mi buza sepo ye li teñi ku mina.”—1 Pit. 3:15.

Mu nge kuli ne mu li mwa Efese ka nako ye ne li baliwa liñolo la Paulusi lwa pili. Kana manzwi a hae naa si ke a mi susueza ku hula mwa “zibo ya Mwanaa Mulimu”? (Maef. 4:13, 14) Naa ka mi susueza luli! Kacwalo, haike ni mina kacenu mu susuezwe ki manzwi a Paulusi a tahile ka moya o kenile. Ku lata hahulu Jehova ni ku ba ni zibo ye nepahezi ya Linzwi la hae ku ka mi tusa ku zwelapili ku ‘toma ni ku tiya fa mutomo’ wa Kreste. Ka ku eza cwalo, mu ka zwelapili ku tiyela muliko ufi kamba ufi wa ka mi tahiseza Satani, lifasi le li maswe le, li si ka fela kale.—Samu 1:1-3; Jer. 17:7, 8.

[Mbokisi/Siswaniso se si fa likepe 27]

“Ku ba Kwa Efese”

“Ku lumbwe Mulimu Ndatahe Mulenaa luna Jesu Kreste, ya lu fuyauzi ka limbuyoti kaufela za Moya, kwa lihalimu ku Kreste; mwaa naa lu ketezi ku yena pili, lifasi li si ka tomwa, kuli lu be ba ba kenile, mi lu tokwe litiba fapilaa hae. Ka lilato la hae naa lelile pili ku ikañulela luna ka Jesu Kreste, ka ku lata kwa hae, kuli ku lumbekwe kanya ya sishemo sa hae, saa lu file ka Mulatiwa. Ka yena lu liuluzwi ka mali a hae, mi lu swalezwi lifoso, ka ku ya ka bufumu bwa sishemo sa hae, saa lu file ka buñata bo bu tezi, mwa butali kaufela ni kutwisiso; u lu zibisize saa naa patile sa tato ya hae, saa naa lelile pili, ka ku lata kwa hae [‘naa tomile zamaiso,’ NW]; kikuli, linako zaa naa tomile ha li se li petahalile, a kubukanyeze linto kamukana ku Kreste, ni za kwa lihalimu ni za mwa lifasi.”—Maef. 1:3-10.