Lipuzo ze Zwa Kwa Babali

Kana kaizeli waa swanela ku apala se siñwi kwa toho haa toloka lingambolo za Bibele mwa puo ya bosusu kwa mikopano ya Sikreste, mikopano ya mwa mipotoloho kamba ya likiliti?

Kamita, musali wa Sikreste u swanela ku apalanga se siñwi kwa toho ha eza misebezi ye li buikalabelo bwa muunaa hae kamba muzwale wa mwa puteho. Ha eza cwalo, u kuteka sikuka sa naa bulezi muapositola Paulusi sa kuli, “musali kaufela haa lapela kamba a polofita a si na saa apezi kwa toho, u shubula toho ya hae” kakuli “muuna ki toho ya musali.” (1 Makor. 11:3-10) Kaizeli ha apala se siñwi kwa toho ka mukwa o swanela mwa miinelo ye cwalo, u bonisa kuli wa ipeya kwatasaa tukiso ya teokratiki ya mwa puteho ya Sikreste.—1 Tim. 2:11, 12. *

Kono ku cwañi haiba kaizeli u sweli ku toloka mwa puo ya bosusu muzwale haa nze a fa ngambolo? Niti ki kuli, kaizeli u sweli ku fitisa feela manzwi kwa bateelezi. Fo ku talusa kuli, haki yena ya luta kono ki muzwale; yena u tolokela feela muzwale. Kono ku toloka puo ya bosusu ku shutana hahulu ni ku toloka lipuo ze bulelwa. Lipuo ze bulelwa ha li tolokelwa batu, baputehi ba kona ku isa mamelelo ku mubuleli kono inge ba sweli ku teeleza ku mutoloki. Hape, ka ku sa swana ni ku toloka puo ya bosusu, likaizeli ba ba toloka lipuo ze bulelwa, hañata ha ba tokwangi ku tolokela fo ba bonahala hahulu. Ka linako ze ñwi, mane ba kona ku toloka inge ba inzi haiba ba lata, kamba haiba ba yemi, ba kona ku talimela ku mubuleli mwa sibaka sa ku talimela kwa baputehi. Kacwalo, ha ku tokwahali kuli kaizeli ya toloka puo ye bulelwa a apale se siñwi kwa toho.

Fahalimu a seo, kabakala lizwelopili za lipangaliko ze se itusiswa kwa ku toloka lingambolo mwa puo ya bosusu, hañata mutoloki ki  yena ya bonahalanga hahulu kwa baputehi. Hañata, siswaniso sa mutu ya sweli ku toloka si bonahalanga ka butuna fa sipangaliko se si cwale ka TV, mi mwendi mane mubuleli ka sibili haa bonahalangi kwa baputehi. Kacwalo, kaizeli ya sweli ku toloka puo ya bosusu naa ka eza hande ku bonisa kuli wa lemuha mayemo a hae a kuli ki mutoloki feela ka ku apala se siñwi kwa toho.

Ketelelo ye nca ye, i ama cwañi musebezi wa ku toloka lingambolo za mwa Sikolo sa Bukombwa sa Teokratiki, liponiso, likalabo ka nako ya Tuto ya Bibele ya Puteho, Mukopano wa Sebelezo, ni Tuto ya Tawala ya Mulibeleli mwa puo ya bosusu? Kana kaizeli ya toloka puo ya bosusu ka linako zeo ni yena u swanela ku apala se siñwi kwa toho? Ku bonahala kuli kaizeli haa tokwi ku apalanga se siñwi kwa toho mwa miinelo ye miñwi, kakuli baputehi kaufela ba swanela ku utwisisa kuli haki yena luli ya zamaisa mukopano. Ka mutala, haa tokwi ku apala se siñwi kwa toho ha toloka likalabo za baputehi, lingambolo za likaizeli, kamba liponiso. Kono kaizeli haa toloka lingambolo za mizwale ka nako ya mikopano yeo, kamba haa tolokela muzwale ya zamaisa Tuto ya Tawala ya Mulibeleli kamba muzamaisi wa Tuto ya Bibele ya Puteho, kamba haa toloka lipina mwa puo ya bosusu, u swanela ku apala se siñwi kwa toho. Ka nako ya mukopano, mwendi kaizeli u ka tokwa ku tolokela mizwale, likaizeli, banana, ni maeluda. Ka ku beya seo mwa munahano, naa ka eza hande ku apala se siñwi kwa toho mwahalaa nako ya mukopano kaufela.

[Litaluso za kwatasi]