Litapelo za Mina li mi Zibahaza Cwañi?
Litapelo za Mina li mi Zibahaza Cwañi?
“Wena ya utwa milapelo, batu kaufela ba ka ta ku Wena.”—SAMU 65:2.
1, 2. Ki kabakalañi batanga ba Jehova ha ba kona ku lapela ku yena inze ba na ni buikolwiso bwa kuli u ka ba utwa?
JEHOVA wa utwanga litapelo za batanga ba hae ba ba sepahala. Lwa kona ku kolwa kuli wa lu utwanga ha lu lapela ku yena. Lipaki za Jehova ba bañata-ñata niha ne ba ka lapela ku Mulimu ka nako ye swana, Jehova naa ka utwa tapelo ya mañi ni mañi wa bona.
2 Ka ku kolwa kuli Mulimu naa utwa likupo za hae, walisamu Davida naa opezi kuli: “Wena ya utwa milapelo, batu kaufela ba ka ta ku Wena.” (Samu 65:2) Litapelo za Davida ne li alabilwe bakeñisa kuli naa li mulapeli wa Jehova ya sepahala. Lu ka eza hande ku ipuza kuli: ‘Kana likupo za ka za bonisa kuli ni sepile Jehova ni kuli bulapeli bo bu kenile ki bwa butokwa hahulu ku na? Litapelo za ka li ni zibahaza cwañi?’
Mu Lapele ku Jehova ka Buikokobezo
3, 4. (a) Lu swanela ku lapelanga cwañi ku Mulimu? (b) Lu swanela ku ezañi haiba lu katazwa ki “mihupulo” ya sibi se situna se lu ezize?
3 Kuli Mulimu a alabe litapelo za luna, lu swanela ku lapela ku yena ka buikokobezo. (Samu 138:6) Lu swanela ku kupa Jehova kuli a lu tatube sina mwa naa ezelize Davida ha naa bulezi kuli: “U ni sefe Mulimu, mi u zibe pilu ya ka; u ni like, mi u zibe mihupulo ya ka. U bone haiba ku na ni mukwa o muñwi o maswe ku na, mi u ni zamaise mwa nzila ya bupilo bo bu sa feli.” (Samu 139:23, 24) Ha lu tokwi feela ku lapelanga ku Mulimu, kono hape lu swanela ku mu lumeleza kuli a lu tatube, mi lu tokwa ku utwa kelezo ye mwa Linzwi la hae. Jehova wa kona ku lu zamaisa mwa “nzila ya bupilo bo bu sa feli,” ili ku lu tusa ku pila ka nzila ye ka lu fumanisa bupilo bwa ku ya ku ile.
4 Ku cwañi haiba lu katazwa ki “mihupulo” ya sibi se situna se lu ezize? (Mu bale Samu 32:1-5.) Ku lika ku lwana ni lizwalo la luna ha li lu sisita kwa kona ku lu fokolisa kwa mubili sina feela kota ye letukiswa ki lizazi la mbumbi. Kabakala sibi sa hae, Davida naa felezwi ki tabo mi mwendi mane naa kulile. Kono ha naa ipulezi sibi sa hae ku Mulimu, naa imuluzwi luli! Mu nahane feela tabo ya naa bile ni yona Davida ha naa ikutwile kuli naa “swalezwi ku fosa kwa hae” ki Jehova. Ku ipulela sibi ku Mulimu kwa kona ku imulula mutu, mi tuso ya maeluda ba Sikreste i tusa sifosi ku kutisa sinca bulikani bwa hae ni Mulimu.—Liprov. 28:13; Jak. 5:13-16.
Mu Fitisange Likupo ku Mulimu ni ku Itumela ku Yena
5. Lu swanela ku ezangañi ha lu bilaezwa ki lika ze ñwi?
5 Haiba ku na ni lika ze ñwi ze lu bilaeza hahulu, lu swanela ku sebelisa kelezo ya Paulusi ye li: “Mu si ke mwa bilaela ka se siñwi; kono mwa linto kaufela mu zibise Mulimu se mu bata ka tapelo ni ka kupo ye na ni buitumelo.” (Mafil. 4:6) Sihulu lu tokwa ku kupanga Jehova kuli a lu tuse ni ku lu etelela ha lu li mwa kozi kamba ha lu nyandiswa.
6, 7. Ki kabakalañi ha lu swanela ku fitisanga buitumelo mwa litapelo za luna?
6 Haiba lu lapelanga feela ku Mulimu ha lu tokwa nto ye ñwi, lu bonisañi ka za bulikani bwa luna ni Jehova? Paulusi naa bulezi kuli lu swanela ku zibisa Mulimu se lu bata “ka kupo ye na ni buitumelo.” Kaniti, lu na ni mabaka a ku itumela sina Davida ya naa bulezi kuli: “Butuna ki bwa hao Muñaa Bupilo, ni maata, ni libubo, ni ku koma, ni bulena. Kakuli linto kamukana ze kwa lihalimu, ni ze mwa lifasi, ki za hao. Mubuso ki wa hao Muñaa Bupilo, kakuli u pahamezi ka bulena lika kaufela. . . . Mulimu wa luna, lwa ku lumba, lu bubeka Libizo la hao le li tumile.”—1 Makol. 29:11-13.
7 Jesu naa itumezi ku Mulimu kwa sico, ni kwa buhobe ni veine za naa itusisize ka nako ya Mulalelo wa Mulena. (Mat. 15:36; Mare. 14:22, 23) Kwandaa ku bonisanga buitumelo bo bu swana, lu swanela “ku itumela ku [Jehova]” kabakala “misebezi ye komokisa ya ezelize bana ba batu,” kabakala ‘likatulo za hae za niti,’ ni kabakala linzwi la hae, kamba lushango lo lu fumaneha mwa Bibele cwale.—Samu 107:15; 119:62, 105.
Mu Lapelelange ba Bañwi
8, 9. Ki kabakalañi ha lu swanela ku lapelelanga Bakreste ba bañwi?
8 Ku si na ku kakanya lwa itapelelanga, kono lu swanela ku lapelelanga ni ba bañwi mane nihaiba Bakreste be lu sa zibi ka mabizo. Nihaike kuli mwendi muapositola Paulusi naa sa zibi balumeli kaufela ba mwa Kolose, naa ñozi kuli: “Lu itumela ku Mulimu, Ndatahe Mulenaa luna Jesu Kreste, mwa litapelo ze lu nze lu mi lapelela. Lu utwile tumelo ya mina ku Jesu Kreste, ni lilato le mu na ni lona kwa balumeli kaufela.” (Makolo. 1:3, 4) Paulusi hape naa lapelezi Bakreste ba mwa Tesalonika. (2 Mates. 1:11, 12) Litapelo ze cwalo li bonisa se lu li sona luli ni mo luu ngela mizwale ni likaizeli ba luna ba Sikreste.
9 Litapelo za luna za ku lapelela Bakreste ba ba tozizwe ni ba “lingu ze ñwi” li bonisa kuli lwa itebuha kopano ya Mulimu. (Joa. 10:16) Paulusi naa kupile Bakreste ba bañwi kuli ba mu lapelele kuli a ‘fiwe maata a ku bulela kunutu ya evangeli.’ (Maef. 6:17-20) Kana ni luna lwa lapelelanga Bakreste ba bañwi cwalo?
10. Ku lapelelanga ba bañwi ku kona ku lu tusa cwañi?
10 Ku lapelelanga ba bañwi ku kona ku cinca mo lu baa ngela. Ku lapelela mutu ye lu sa lati, ku si na ku kakanya ku ka tahisa kuli lu kale ku mu lata. (1 Joa. 4:20, 21) Litapelo ze cwalo li yahisa ba bañwi mi li tahisa buñwi mwahalaa mizwale. Ku zwa fo, litapelo ze cwalo li bonisa kuli lu na ni lilato le li swana ni la Kreste. (Joa. 13:34, 35) Mi lilato ki kalulo ya muselo wa moya wa Mulimu. Kana lwa lapelanga ka butu ku Jehova ili ku mu kupa moya o kenile kuli u lu tuse ku ba ni muselo wa ona wa lilato, tabo, kozo, pilu-telele, musa, bunde, tumelo, buishuwo, ni buiswalo? (Luka 11:13; Magal. 5:22, 23) Haiba lwa ezanga cwalo, manzwi ni likezo za luna li ka bonisa kuli lu zamaya ni ku pila ka moya.—Mu bale Magalata 5:16, 25.
11. Ki kabakalañi ha mu kona ku bulela kuli ku lukile ku kupa ba bañwi kuli ba lu lapelele?
11 Haiba lu lemuha kuli bana ba luna ba sweli ku kukuezwa ku itusisa bupumi ha ba ñola litatubo kwa sikolo, lu swanela ku ba lapelela ni ku ba tusa ka ku itusisa Mañolo kuli ba be ni busepahali ni ku ambuka bumaswe kaufela. Paulusi naa taluselize Bakreste ba kwa Korinte kuli: “Ni lapela Mulimu kuli mu si ke mwa eza bumaswe ni hanyinyani.” (2 Makor. 13:7) Litapelo za buikokobezo ze cwalo li tabisa Jehova, mi li patulula ze nde ze mwa lipilu za luna. (Mu bale Liproverbia 15:8.) Lwa kona ku kupa ba bañwi kuli ba lu lapelele sina mwa naa ezelize muapositola Paulusi. Naa ñozi kuli: “Mu ni lapelele; lwa kolwa kuli lizwalo la luna ki le linde, ni kuli mwa lika kaufela lu lata ku eza se si lukela.”—Maheb. 13:18.
Litapelo za Luna li Patulula Lika ze Ñwi
12. Ki litaba mañi ze swanela ku ba za butokwa hahulu mwa litapelo za luna?
12 Kana litapelo za luna za bonisa kuli lu Lipaki za Jehova ba ba tabile ili ba ba na ni tukufalelo? Kana likupo za luna za lumelelana ni tato ya Mulimu, ya ku kutaza lushango lwa Mubuso, ku bubaniswa kwa bubusi bwa Jehova, ni ku keniswa kwa libizo la hae? Zeo ki zona litaba ze swanela ku ba za butokwa hahulu mwa litapelo za luna sina mo ku boniselizwe mwa tapelo ya Jesu ye li mutala, ye kala ka manzwi a li: “Ndataa luna ya kwa lihalimu, Libizo la hao a li be le li kenile; ku tahe mubuso wa hao; se si latwa ki Wena si ezwe mwa lifasi, mo si ezezwa kwa lihalimu.”—Mat. 6:9, 10.
13, 14. Litapelo za luna li patululañi ka za luna?
13 Litapelo za luna ku Mulimu li patulula milelo ya luna, lika ze lu lata, ni litakazo za luna. Jehova wa ziba lipilu za luna. Liproverbia 17:3 i bulela kuli: “Pizana ya ku shengunukisa ki ya silivera, mi lyangalilo ki la gauda; kono ya lika lipilu ki Muñaa Bupilo.” Mulimu wa bona ze mwa pilu ya luna. (1 Sam. 16:7) Wa ziba mo lu ikutwela ka za mikopano ya luna, bukombwa bwa luna, ni ka za mizwale ni likaizeli ba luna. Jehova wa ziba mo luu ngela “banyani” ba Kreste. (Mat. 25:40) Wa ziba ka za haiba lwa tabela luli ze lu lapelela kamba lu kuta-kutela feela manzwi. Bakeñisa kuli batu ba mwa nako ya hae ne ba na ni mubonelo o fosahalile ka za tapelo, Jesu naa bulezi kuli: “Ha mu lapela, mu si ke mwa bulela-bulela sina bahedeni; kakuli ba tumana kuli ba ka utwiwa ka ku bulela hahulu.”—Mat. 6:7.
14 Lipulelo ze lu itusisa mwa tapelo ni zona li bonisa mo lu itingezi ku Mulimu. Davida naa bulezi kuli: “[Jehova] ki Wena sisabelo sa ka, tawala ye tiile, sila ha si taha. Kabe ni ka ina mwa Tabernakele ya hao ku ya ku ile, ni sabele mwa mukunda wa mafufa a hao.” (Samu 61:3, 4) Mulimu haa lu ‘beya mwa Tabernakele ya hae’ ya swanisezo, lu ikola buiketo ni ku silelezwa ki yena. (Sin. 7:15) Kwa omba-omba luli ku sutelela ku Jehova ka tapelo inze lu na ni buikolwiso bwa kuli ‘wa lu lwanela’ ha lu tahelwa ki muliko ufi kamba ufi wa tumelo ya luna!—Mu bale Samu 118:5-9.
15, 16. Tapelo i kona ku lu tusa ku lemuhañi ka za takazo ya luna ya ku bata ku fumana buikalabelo mwa puteho?
15 Ku lapela ka busepahali ku Jehova ka za milelo ya luna kwa kona ku lu tusa ku lemuha niti ka za milelo yeo. Ka mutala, kana ku bata ku fiwa buikalabelo bwa ku okamela mwahalaa batu ba Mulimu ku tahiswa ki takazo luli ya ku bata ku tusa ni ku sebeza ka taata mwa ku zwisezapili za Mubuso? Kamba kana lu bata ku “ipeya kwapili” kamba mane ku “busa” ba bañwi? Ha ku swaneli ku ba cwalo mwahalaa batu ba Jehova. (Mu bale 3 Joani 9, 10; Luka 22:24-27.) Haiba lu na ni litakazo ze fosahalile, ku lapela ka busepahali ku Jehova Mulimu ku ka patulula litakazo zeo mi ku ka lu tusa ku li ambuka li si ka toma kale mibisi.
16 Basali ba Sikreste ba kana ba ba ni takazo ye tuna ya kuli baana ba bona ba sebeze sina batanga ba bukombwa kamba mane kuli kwapili ba sebeze sina baokameli, kamba maeluda. Likaizeli ba, ba kana ba sebeza ku likana ni maikuto a bona e ba bonisanga mwa litapelo za bona za kwa mukunda ka ku satalala ku pila mupilelo o munde. Ku eza cwalo ki kwa butokwa, kakuli mibulelelo ni muzamao wa lubasi lwa muuna li ama hahulu mwaa ngelwa mwa puteho.
Ku Yemela ba Bañwi Mwa Tapelo ya fa Nyangela
17. Ki kabakalañi ha lu tokwa ku lapelanga lu nosi kwa mukunda?
17 Jesu hañata naa zwanga mwa sicaba kuli a yo lapela ku Ndatahe kwa mukunda. (Mat. 14:13; Luka 5:16; 6:12) Ni luna lu tokwa nako ya ku lapelanga lu nosi kwa mukunda. Ha lu lapela ka ku iketa inze lu li mwa sibaka se si kuzize, lwa kona ku eza likatulo ze tabisa Jehova, mi ku eza cwalo ku ka lu tusa ku zwelapili inze lu tiile mwa bulapeli bwa luna ku yena. Niteñi, Jesu hape naa lapelelanga fa nyangela, mi ki kwa butokwa ku nyakisisa mo lu kona ku lapelela fa nyangela ka nzila ye nde.
18. Ki lisupo mañi ze ba swanela ku hupula mizwale ha ba yemela puteho mwa tapelo ya fa nyangela?
18 Kwa mikopano ya luna, baana ba ba sepahala ba yemelanga puteho mwa tapelo ya fa nyangela. (1 Tim. 2:8) Balumeli ka bona ba swanela ku bulela kuli “amen” kwa mafelelezo a tapelo ye cwalo ili ku talusa kuli “ku be cwalo.” Kono kuli ba kone ku bulela cwalo, ba swanela ku lumelelana ni ze bulezwi mwa tapelo. Ha ku na nto ye komokisa ka za tapelo ya Jesu ye li mutala. (Luka 11:2-4) Ku tuha fo, Jesu naa si ka bulela lika kaufela kamba matata kaufela a mutu ni mutu mwahalaa baputehi ba hae. Litaba za ka butu li swanela ku lapelelwa mwa tapelo ya kwa mukunda, isiñi mwa tapelo ya fa nyangela. Mi ha lu yemela sicaba mwa tapelo, lu swanela ku tokolomoha ku bulela litaba ze li likunutu mwa tapelo.
19. Lu swanela ku bonisanga moya o cwañi ka nako ya tapelo ya fa nyangela?
19 Ha lu yemelwa mwa tapelo ya fa nyangela, lu swanela ku bonisa sabo ya ku ‘saba Mulimu.’ (1 Pit. 2:17) Ku kana kwa ba ni nako ni sibaka se si swanela sa ku ezeza lika ze sa swaneli ku ezezwa fa mukopano wa Sikreste. (Muek. 3:1) Ka mutala, ha luu ngeni kuli mutu yo muñwi u kupa kuli batu kaufela ba swalane kwa mazoho ka nako ya tapelo ya fa nyangela. Ku eza cwalo ku kona ku foseza kamba ku lyanganisa ba bañwi, ku kopanyeleza cwalo ni baenyi ba litumelo li sili. Batu ba bañwi ba ba nyalani ba kona ku swalana kwa mazoho ka likute, kono haiba ba kumbatana ka nako ya tapelo ya fa nyangela, batu ba ba boni kezo yeo ba kana ba sitatala. Ba kana ba nahana kamba kuu nga kuli bo muuna ni musali bao ba isize mamelelo kwa lilato la mwa linyalo la bona ku fita ku bonisa likute ku Jehova. Bakeñisa kuli lu kuteka hahulu Jehova, ha lu ‘ezeñi linto kaufela kuli Mulimu a lumbekwe ka zona’ ni ku tokolomoha mikwa ye kona ku lyanganisa ba bañwi, ku ba komokisa, kamba ku ba sitatalisa.—1 Makor. 10:31, 32; 2 Makor. 6:3.
Ki Lika Mañi ze mu Swanela ku Lapelelanga?
20. Mu kona ku talusa cwañi liñolo la Maroma 8:26, 27?
20 Ka linako ze ñwi, lu kana lwa palelwa ku ziba za ku bulela mwa litapelo za luna. Paulusi naa ñozi kuli: “Ha lu zibi se lu lukela ku kupa; kono Moya [o kenile] isali ona wa lu lapelela, ka sitongo se si sa konwi ku taluswa. Mi [Mulimu] ya tatuba lipilu u ziba muhupulo wa Moya.” (Maro. 8:26, 27) Jehova naa tahisize kuli litapelo ze ñata li ñolwe mwa Mañolo. U amuhela likupo ze cwalo inge kuli ki luna ba ba li kupa mi kacwalo wa li alaba. Mulimu wa lu ziba mi wa ziba ni taluso ya lika za naa taluselize bañoli ba Bibele ku ñola ka ku itusisa moya wa hae. Jehova wa alabanga likupo za luna, moya wa hae ha u lu “lapelela.” Kono ha lu nze lu tekelela hande Linzwi la Mulimu, ku ka lu bela hahulu bunolo ku ziba lika za ku lapelela.
21. Lu ka nyakisisañi mwa taba ye tatama?
21 Sina mo se lu itutezi, litapelo za luna li patulula ze ñata ka za luna. Ka mutala, li kana za patulula ka za haiba lu na ni bulikani bo bu tiile ni Jehova ni mo lu zibela hande Linzwi la hae. (Jak. 4:8) Mwa taba ye tatama, lu ka nyakisisa litapelo ze ñwi ni milapelelo ye miñwi ya mwa Bibele. Ku nyakisisa Mañolo cwalo, ku kona ku ama cwañi mo lu atumelela Mulimu mwa tapelo?
Mu Kona ku Alaba Cwañi?
• Lu swanela ku lapelanga cwañi ku Jehova?
• Ki kabakalañi ha lu swanela ku lapelelanga balumeli ba bañwi?
• Litapelo za luna li kona ku patululañi ka za luna ni milelo ya luna?
• Lu swanela ku bonisanga moya o cwañi ka nako ya tapelo ya fa nyangela?
[Lipuzo za Tuto]
[Siswaniso se si fa likepe 4]
Kana mwa lumbanga Jehova ni ku itumela ku yena kamita?
[Siswaniso se si fa likepe 6]
Likezo za luna ka nako ya tapelo ya fa nyangela, kamita li swanela ku bonisa kuli lwa kuteka Jehova