Mu Itebuhe Mizwale ni Likaizeli ba Mina ba ba li Bosusu!

BATU ba Mulimu kacenu ki lubasi-tuna lwa mizwale ni likaizeli ba kwa moya, ili lo lu kalile ka baana ni basali ba kwaikale. Ba bañwi ku bona ki bo Samuele, Davida, Samisoni, Rahaba, Mushe, Abrahama, Sara, Nuwe, ni Abele. Mwahalaa batanga ba Jehova ba ba sepahala ku na ni bosusu ba bañata. Ka mutala, batu ba pili ba ne ba bile Lipaki za Jehova mwa Mongolia nee li bo muuna ni musalaa hae ba ba li bosusu. Mi kabakala ku sepahala kwa mizwale ni likaizeli ba luna ba ba li bosusu ba ba pila kwa Russia, ne lu winile muzeko mwa Kuta ye Tuna ya kwa Europe ye talimanga za litukelo za batu.

Mwa miteñi ya cwale, “mutanga ya sepahala, ya na ni kutwisiso” u lukisize lihatiso za mwa puo ya bosusu, mi u onga-ongile liputeho hamohocwalo ni mikopano ya mwa mipotoloho ni ya likiliti ya mwa puo yeo. (Mat. 24:45) Litukiso zeo li tusize hahulu bosusu. * Kono kana se mu nahanile mo bosusu ne ba konezi ku ituta ka za Mulimu wa niti ni ku eza zwelopili ya kwa moya ka nako ye ne ku si na litukiso zeo? Kana se mu nahanile ka za se mu kona ku eza kuli mu tuse bosusu ba ba pila mwa silalanda sa mina?

Litukiso za Mwa Miteñi ya Luna li si ka Ezwa Kale

Ku cwañi ha ne mu ka buza bosusu ba bañwi ba ba hulile kuli ba mi taluseze mo ne ba itutezi za Mulimu? Ba kona ku mi taluseza mo ne ba ikutwezi ha ne ba itutile lwa pili kuli Mulimu u na ni libizo, ni mo ku ziba niti yeo ne ku cincelize bupilo bwa bona ni ku ba tiisa ka lilimo-limo pili litukiso za ma-vidio kamba ma-DVD a mwa puo ya bosusu li si ka kala kale ku itusiswa ili ku ba tusa ku ituta niti ye tungile ya Mañolo. Ba kona ku mi taluseza mo ne i belanga mikopano ya Sikreste ka nako ye ne i sa eziwangi mwa puo ya bosusu kamba ye ne ku si na batoloki ba ku toloka mwa puo ya bosusu. Kabakala kuli ne ku si na batoloki ka nako yeo, mutu yo muñwi naa inanga kwatuko ni bona ni ku ba ñolela litaba ze bulelwa fa pepa kuli ba utwisise ze ambolwa. Muzwale yo muñwi ya li susu naa itutile niti ya Bibele ka nzila yeo ka lilimo ze 7, ili nako ye ne ku si na batu ba ba toloka puo ya bosusu.

Lipaki ba ba hulile ba ba li bosusu ba sa hupula mo ne ku belanga ha ne ba kutazanga hamoho ni ba bañwi ba mwa puteho kwa batu ba ba utwa. Mwa lizoho le liñwi ne ba swalanga kapampili ka ka ñozwi mutahisezo o bunolo o ne ba itusisa fa ndu ni ndu, mi ku le liñwi ne ba swalanga limagazini ze nca za Tawala ya Mulibeleli ni Mu Zuhe! Ne ku li taata ku zamaisa tuto ya Bibele ni susu yo muñwi ka ku itusisa feela lihatiso ze ñozwi ili zeo yena ni muituti ne ba sa koni ku utwisisa. Bosusu ba ba hulile mwendi ba sa hupula mo ne ba ikutwelanga ku zwafa haiba kuli mutu yo muñwi naa sa ba utwisisi, ili nto ye ne i ba palelwisa ku zwelapili ku talusa niti ya kwa moya. Mi ba ziba mo ku utwahalelanga ku ba ni lilato le lituna ku Jehova kono inge ba sa koni ku li bonisa ka buikolwiso. Kabakalañi? Kakuli ne ba sa zibi hande kuli kutwisiso ya bona ka za taba ye ñwi ne i lukile.

Ku si na taba ni matata ao kaufela, mizwale ni likaizeli ba luna ba ba li bosusu ba zwezipili ku tiiseza mwa busepahali bwa bona. (Jobo 2:3) Ba libelezi ku Jehova ka pilu ye tiile. (Samu 37:7) Mi cwale wa ba fuyaula hahulu ku fita mo ne ba hupulela buñata bwa bona.

Mu nyakisise buikatazo bwa naa ezize muzwale yo muñwi ya li susu, ili ya nyezi ni ya li  ndate. Ma-vidio a mwa puo ya bosusu a si ka ezwa kale, muzwale yo naa zamaisanga tuto ya lubasi kamita. Mwanaa hae u talusa kuli: “Ku zamaisa tuto ya lubasi kamita ne si nto ye bunolo ku bo ndate, kakuli ze ne ba lu luta kaufela ne li zwelela mwa lihatiso ze ñozwi. Hañata ne ba sa utwisisangi hande litaba ze ñozwi. Hape ni luna banana ne lu tahisanga kuli tuto i ba tatafalele. Haiba ha ba si ka talusa hande nto ye ñwi, ne lu akufanga ku ba bulelela. Kono ku si na taba ni zeo kaufela, ne ba zamaisanga tuto ya lubasi kamita. Ne ba ikutwa kuli ku lu luta za Jehova nee li nto ya butokwa hahulu ku fita maswabi e ne ba utwanga fokuñwi kabakala ku sa utwisisa hande Sikuwa.”

Mutala o muñwi ki wa muzwale Richard, ya mwa lilimo za ma-70, ya li susu ni sibofu, ili ya pila mwa Brooklyn, New York, U.S.A. Bo Richard ba zibahala hahulu ku ba ba kamita kwa mikopano ya Sikreste. Kuli ba fumanehe kwa mikopano, ba kwelanga sitima ba nosi, ni ku bala litishini kuli ba zibe fa ku tulukela. Nako ye ñwi ka nako ya maliha, ne ku nelile hahulu litwa mi mikopano ne i kansuzwi. Batu kaufela mwa puteho ne ba zibisizwe, kono ku bonahala kuli bo Richard ne ba si ka zibiswa. Mizwale ha ne ba lemuhile ze ne ezahezi, ba bata-bata bo Richard mi ba yo ba fumana kwa Ndu ya Mubuso inze ba yemi fa nde ku libelela kuli minyako i kwalulwe. Ha ne ba buzizwe libaka ha ne ba ile kwa Ndu ya Mubuso inge ku na ni litwa, ne ba alabile kuli: “Ni lata Jehova.”

Mu Kona ku Ezañi?

Kana mwa sibaka se mu pila ku na ni bosusu? Kana mwa kona ku ituta puo ya bosusu kuli mu kone ku ambolanga ni bona? Hañata bosusu ba banga ni musa ni pilu-telele ha ba luta ba bañwi puo ya bona. Mu kana mwa katana susu ha mu itamaela feela kamba ha mu li mwa bukombwa. Mu kona ku ezañi? Mu like ku ambola ni yena. Mu itusise liponiso za ka mazoho, maswaniso, mu ñole manzwi fa pepa, kamba mu itusise linzila zeo kaufela. Mutu yo niha ka bonahala kuli haa tabeli niti, mu taluseze Paki yo muñwi ya li susu kamba ya ziba puo ya bosusu ka za mutu yo. Susu yo u ka tabela hahulu lushango haiba a lu talusezwa mwa puo ya bosusu.

Mwendi mu sweli ku ituta puo ya bosusu mi mwendi mu kopana kwa puteho ye itusisa puo yeo. Mu kona ku fita cwañi fa ku ba likwala mwa ku itusisa liponiso za ka mazoho ni ku utwisisa hande puo ya bususu? Nihaike kuli mwendi mwa puteho ya mina ku na ni bahasanyi ba bañwi ba ba kona ku utwa, neikaba hande ku itusisanga puo ya bosusu ha mu ambola ni bahasanyi bao. Ku eza cwalo ku ka mi tusa ku nahana mwa puo ya bosusu. Ha mu nze mu itusisa puo ya bosusu, fokuñwi mu kana mwa kalisa ku bulela bakeñisa ku palelwa ku zwelapili ku itusisa liponiso za ka mazoho. Kono ha mu ituta puo ifi kamba ifi, mu swanela ku tundamena kuli mu zibe hande puo yeo ku si na taba ni matata e mu kana mwa fumana ha mu nze mu ituta yona.

Ku lika ka taata ku itusisa puo ya bosusu ku bonisa kuli lwa lata mizwale ni likaizeli ba luna ba ba li bosusu mi lwa ba kuteka. Mu nahane feela maikuto a ku zwafa e ba banga ni ona  bosusu zazi ni zazi kabakala ku sa kona ku utwa ze ba bulela batu ha ba li kwa mubeleko kamba kwa sikolo. Muzwale yo muñwi ya li susu naa bulezi kuli: “Zazi ni zazi batu kaufela ba ba ni potolohile ba ambolanga. Hañata ni ikutwanga buinosi, kamba mane ku nyema. Ha ni koni ku talusa luli mo ni ikutwelanga ka linako ze ñwi.” Mikopano ya luna i swanela ku ba libaka koo mizwale ni likaizeli ba luna ba ba li bosusu ba amuhela lico za kwa moya ni ku ikola sango se sinde ni ba bañwi.—Joa. 13:34, 35.

Lu swanela ku itebuha tukwata-nyana to tuñata twa bosusu ba ba kopananga hamoho ni liputeho za batu ba ba kona ku utwa. Bosusu bao ba tolokelwanga mikopano. Kuli ba kone ku utwisisa hande ze lutiwa, bosusu ba mwa puteho ba inelanga kwapili mwa Ndu ya Mubuso. Ku eza cwalo ku ba konisanga ku iponela hande mubuleli ni mutoloki ba sa siliwi. Se ku lemuhilwe kuli baputehi kaufela ba twaelanga kapili muezezo wo, mi ha ba ikutwangi ku filikanywa. Litukiso ze swana zeo, hape za eziwanga fa mikopano ya mwa mipotoloho ni ya likiliti ko ku kopananga likwata za bosusu. Mizwale ni likaizeli ba ba beleka ka taata mwa puteho ku toloka puo ya bosusu ba swanela ku babazwa kabakala musebezi o ba eza wa ku toloka puo yeo hande sina feela mwa naa ka ezeza mutu ya li susu.

Mwendi mu mwa puteho ye na ni sikwata sa bosusu, kamba ye na ni bosusu ba sikai feela ba ba tolokelwanga mikopano. Mu kona ku ezañi kuli mu bonise mizwale ba ba li bosusu kuli mwa iyakatwa bona? Mu ba meme kwa ndu ya mina. Haiba mwa kona, mu itute liponiso li sikai za mwa puo ya bona. Mu si ke mwa saba kuli mu ka palelwa ku ambola ni bona. Mu ka fumana nzila ya ku ambola ni bona, mi ku ba bonisa lilato le li cwalo ku ka mi tahiseza tabo ye mu si ke mwa libala. (1 Joa. 4:8) Ku na ni ze ñata ze lu kona ku ikola ka ku swalisana ni bosusu ba ba li Lipaki sina luna. Ki baamboli ba batuna, ba na ni kutwisiso ye tuna, mi ki ba lishea. Muzwale yo muñwi ili yo sibeli sa bashemi ba hae ki bosusu u talusa kuli: “Ni pilile bupilo bwa ka kaufela ni bosusu mi ni itutile ze ñata ku bona ze ni sa koni ku ba lifa. Lwa kona ku ituta ze ñata kwa mizwale ni likaizeli ba luna ba ba li bosusu.”

Jehova u lata balapeli ba hae ba ba sepahala ku kopanyeleza cwalo ni bosusu. Mutala wa bona wa tumelo ni buitiiso li ekeza kwa bunde bwa kopano ya Jehova. Haike lu itebuhe mizwale ni likaizeli ba luna ba ba li bosusu!

[Litaluso za kwatasi]

[Siswaniso se si fa likepe 31]

Bosusu ba ka tabela hahulu lushango lwa Mubuso haiba ba lu talusezwa mwa puo ya bosusu

[Maswaniso a fa likepe 32]

Mikopano ya luna i swanela ku ba libaka koo mizwale ni likaizeli ba luna ba ba li bosusu ba amuhela susuezo ya kwa moya