Mu Itebuhe Musebezi O mu Peta Mwa Puteho
Mu Itebuhe Musebezi O mu Peta Mwa Puteho
“Mulimu u beile lilama mwa mubili, se siñwi ni se siñwi mwaa latezi.”—1 MAKOR. 12:18.
1, 2. (a) Ki sika mañi se si bonisa kuli mañi ni mañi mwa puteho u na ni musebezi wa peta wa swanela ku itebuha? (b) Ki lipuzo mañi ze lu ka nyakisisa mwa taba ye?
KU KALA mwa mazazi a Isilaele wa kwaikale, Jehova u itusisize puteho kwa ku fepa batu ba hae kwa moya ni ku ba etelela. Ka mutala, Maisilaele ha se ba tuzi munzi wa Ai, Joshua “a bala litaba kaufela za mulao, za mbuyoti ni za sikuto, mo li ñolezwi mwa buka ya mulao . . . [A] i balela Kopano kaufela ya bana ba Isilaele.”—Josh. 8:34, 35.
2 Mwa miteñi ya baapositola, muapositola Paulusi naa taluselize Timotea, eluda wa Sikreste, kuli puteho ya Sikreste ki “Ndu ya Mulimu” mi ki “musumo ni sehezo ye seheza niti.” (1 Tim. 3:15) “Ndu” ya Mulimu kacenu ki kopano ya Bakreste ba niti mwa lifasi kaufela. Mwa kauhanyo 12 ya liñolo la hae la pili la naa ñolezi Bakreste ba kwa Korinte ka ketelelo ya moya o kenile, Paulusi u swaniseza puteho kwa mubili wa mutu. U talusa kuli lilama za mubili niha li peta misebezi ye shutana-shutana, kaufela zona ki za butokwa. Paulusi naa ñozi kuli: “Mulimu u beile lilama mwa mubili, se siñwi ni se siñwi mwaa latezi.” Mane u talusa kuli “lilama za mubili ze lu hupula kuli ha li na likute, ki zona ze lu kuteka ni ku fita.” (1 Makor. 12:18, 23) Kacwalo, musebezi waa peta mutu ya lukile mwa ndu ya Mulimu ha u fiti kamba ku fitiwa ki musebezi wa Mukreste yo muñwi ya sepahala. Misebezi yeo i shutana feela. Kacwalo lu kona ku lemuha cwañi musebezi o lu peta mwa kopano ya Mulimu ni ku itebuha wona? Ki lika mañi ze kona ku ama musebezi o lu peta mwa puteho? Lu kona ku eza cwañi kuli ‘ku zwelapili kwa luna ku lemuhiwe ki batu kaufela’?—1 Tim. 4:15.
Lu Kona ku Bonisa Cwañi Kuli Lwa Itebuha Musebezi O lu Peta Mwa Puteho?
3. Ki ifi nzila ye ñwi ye lu kona ku lemuha ka yona musebezi o lu peta mwa puteho ni ku bonisa kuli lwa itebuha musebezi wo?
3 Nzila ye ñwi ye lu kona ku lemuha ka yona musebezi o lu peta mwa puteho ni ku bonisa kuli lwa itebuha musebezi wo, ki ka ku sebelisana hande ni “mutanga ya sepahala, ya na ni kutwisiso” ni Sitopa se si Etelela se si yemela mutanga yo. (Mu bale Mateu 24:45-47.) Lu tokwa ku itatubanga kuli lu bone mo luu ngela litaelo ze lu amuhelanga ku zwelela kwa sitopa sa mutanga. Ka mutala, ka lilimo-limo, se lu amuhezi litaelo ze nongile ka za muapalelo ni ponahalo, ka za linzila za ku itabisa ka zona, ni ka za muitusisezo wa Intaneti o fosahezi. Kana lwa mamela likelezo ze nde zeo kuli lu silelezwe kwa moya? Ku cwañi ka za temuso ye lu filwe ya ku lapelanga sina lubasi kamita? Kana lu latelezi kelezo yeo ni ku toma nako ya ku lapelanga sina lubasi? Haiba lu makwasha, kana lwa banga ni nako ya ku ituta Mañolo lu nosi? Jehova u ka lu fuyola ka butu kamba sina lubasi haiba lu latelela ketelelo ya sitopa sa mutanga.
4. Lu swanela ku nyakisisangañi ha lu eza liketo za ka butu?
4 Batu ba bañwi ba kona ku nahana kuli lika ze cwale ka za ku itabisa ka zona, muapalelo ni ponahalo ki liketo za ka butu. Kono Mukreste ya ineezi ili ya itebuha musebezi wa peta mwa puteho, haa swaneli feela ku ñañelela fa mibonelo ya hae haa eza liketo. Sihulu u swanela ku nyakisisa mubonelo wa Jehova ka mo u patululezwi mwa Linzwi la hae, yona Bibele. Lushango lwa Bibele lu swanela ku ba ‘lumonyi lwa mwa mautu a luna, ni liseli la mwa nzila ya luna.’ (Samu 119:105) Hape lu ka eza hande ku nyakisisa mo liketo ze lu ezanga mwa litaba za ka butu li kona ku amela bukombwa bwa luna ni batu ba bañwi mwa puteho kamba ba kwande.—Mu bale 2 Makorinte 6:3, 4.
5. Ki kabakalañi ha lu swanela ku tokomela kuli lu si ke lwa kenelwa ki moya wa buipanguli?
5 “Moya o nzoo sebeza mwa bana ba ba ikanyisa” u atile hahulu kuli mane se u swana sina moya o lu buyela. (Maef. 2:2) Moya wo u kona ku lu tahiseza ku nahana kuli ha lu tokwi ku etelelwa ki kopano ya Jehova. Kaniti, ha lu swaneli ku ba sina Diotrefi, ya naa sa ‘amuheli ka likute nto ifi kamba ifi ku zwelela ku muapositola Joani.’ (3 Joa. 9, 10) Lu swanela ku tokomela kuli lu si ke lwa kenelwa ki moya wa buipanguli. Haike lu si ke lwa bulela kamba ku eza nto ye ñwi ye bonisa kuli lu kwenuhela batu ba itusisa Jehova kacenu. (Num. 16:1-3) Kono lu swanela ku itebuha tohonolo ya ku swalisana ni sitopa sa mutanga. Ha lu likeñi ka taata ku kuteka ba ba zamaisa mwa puteho ya luna ni ku ipeya kwatasaa bona.—Mu bale Maheberu 13:7, 17.
6. Ki kabakalañi ha lu swanela ku tatubanga miinelo ya luna ya ka butu?
6 Nzila ye ñwi ye lu bonisa ka yona kuli lwa itebuha musebezi o lu peta mwa puteho ki ka ku tatubanga miinelo ya luna ya ka butu ni ku lika ka mo lu konela kaufela ku lumba ‘musebezi wa luna’ ni ku tahisa tumbo ku Jehova. (Maro. 11:13) Ba bañwi ba kona ku sebeza sina mapaina ba kamita. Ba bañwi bona ba mwa sebelezo ya nako kaufela ye ipitezi sina balumiwa, baokameli ba maeto, mi ba bañwi ba sebeleza fa Betele. Mizwale ni likaizeli ba bañata ba sweli ku tusa mwa musebezi wa ku yaha Mandu A Mubuso. Buñata bwa batu ba Jehova ba sweli ku sebeza ka taata ku tusa mabasi a bona kwa moya ni ku sebeza ka mo ba konela kaufela mwa bukombwa sunda ni sunda. (Mu bale Makolose 3:23, 24.) Lwa kona ku kolwa kuli haiba lu itatela ku sebeleza Mulimu ni ku lika ka taata ku mu sebeleza ka moya wa luna kaufela, lu ka ba ni musebezi wa ku eza mwa kopano ya hae ka nako kaufela.
Lika ze Ama Musebezi O lu Peta Mwa Puteho
7. Mu taluse mo miinelo ya luna i kona ku amela musebezi o lu peta mwa puteho.
7 Ki kwa butokwa ku tatubanga miinelo ya luna, kakuli fokuñwi i kona ku ama musebezi o lu peta mwa puteho. Ka mutala, musebezi wa peta muzwale mwa puteho wa shutana ka miinelo ye miñwi ni musebezi wa peta kaizeli. Lilimo za luna za ku pepwa, buikangulo bwa luna, ni lika ze ñwi ni zona li ama ze lu kona ku peta mwa sebelezo ya Jehova. Liproverbia 20:29 ili: “Kanya ya micaha ki maata a bona, mi bunde bwa ba bahulu ki toho ye ize pululu.” Ba banca ba mwa puteho ba kona ku peta misebezi ye miñata ya kwa mubili kabakala maata a bona a bunca, haili ba bahulu bona ba tusa hahulu puteho kabakala butali bwa bona ni yeloseli ye ba na ni. Ni luna lu swanela ku hupulanga kuli kaufela ze lu kona ku eza mwa kopano ya Jehova li petahala kabakala sishemo sa Mulimu.—Lik. 14:26; Maro. 12:6-8.
8. Takazo i ama cwañi ze lu peta mwa puteho?
8 Mutala wa basizana ba babeli ba ba li bana ba mba u bonisa nto ye ñwi ye amanga liketo za batu ka za musebezi o ba ka peta mwa puteho. Sibeli sa bona ba felize sikolo se si pahami. Miinelo ya bona ya swana. Bashemi ba bona ba likile mo ba konela kaufela ku ba susueza ku kalisa sebelezo ya bupaina bwa kamita ha se ba felize sikolo. Ha ba feza sikolo, yo muñwi wa bona u kalisa sebelezo ya bupaina bwa kamita, mi yo muñwi yena u kena musebezi wa kwa mubili. Ki kabakalañi ha ne ba ezize liketo ze shutana? Ki kabakala takazo ya naa na ni mañi ni mañi wa bona. Kwa mafelelezo, mañi ni mañi naa ezize za naa tabela ku eza. Kana buñata bwa luna ha lu ezangi cwalo? Lu tokwa ku nahanisisanga ze lu bata ku peta mwa sebelezo ya Mulimu. Kana lwa kona ku sebeza ka taata ku ekeza ku ze lu sweli ku peta mwa sebelezo ya Mulimu nihaike kuli ku eza cwalo ku ama ku eza licinceho mwa miinelo ya luna?—2 Makor. 9:7.
9, 10. Lu swanela ku ezañi haiba ha lu na takazo ya ku eza ze ñata mwa sebelezo ya Jehova?
9 Ku cwañi haiba ha lu na feela takazo ya ku eza ze ñata mwa sebelezo ya Jehova mi lu tabela feela ku eza ze likani? Mwa liñolo la hae la naa ñolezi ba kwa Filipi, Paulusi naa talusize kuli: “Mulimu ki Yena ya sebeza ku mina kuli mu late mi mu eze, mwaa latela yena.” Kaniti, Jehova wa kona ku sebeza ku luna ili ku lu tusa ku ba ni takazo ya ku eza ze ñata mwa sebelezo ya Jehova.—Mafil. 2:13; 4:13.
10 Kana haki swanelo kuli lu kupe Jehova ku lu tusa ku lata ku eza tato ya hae? Mulena Davida wa Isilaele wa kwaikale naa ezize cwalo. Naa lapezi kuli: “Muñaa Bupilo, u ni bonise linzila za hao; u ni lemuse sikuka sa hao. U ni zamaise mwa niti ya hao, mi u ni lute, kakuli ki Wena Mulimu ya ni pilisa; ni talimezi ku Wena lizazi kaufela.” (Samu 25:4, 5) Ni luna lwa kona ku eza cwalo ka ku kupa Jehova kuli a lu tuse ku eza lika ze mu tabisa. Ha lu nahana mo Jehova Mulimu ni Mwanaa hae ba ikutwelanga ha lu eza lika ze ba tabela, lipilu za luna li talanga buitumelo. (Mat. 26:6-10; Luka 21:1-4) Buitumelo bo bu cwalo, bu ka lu susueza ku kupa Jehova kuli a lu tuse ku ba ni takazo ya ku eza zwelopili ya kwa moya. Mupolofita Isaya u lu tomezi mutala wa moya o lu swanela ku ba ni ona. Ha naa utwile Jehova ha buza kuli: “Ni ka luma mañi? Ku ka ya mañi bakeñisa luna?” mupolofita naa alabile kuli: “Ki na yo, u lume na!”—Isa. 6:8.
Lu Kona ku Eza Cwañi Zwelopili?
11. (a) Ki butokwi mañi bo bu li teñi bo bu tokwa mizwale kuli ba fite ku ze tokwahala kuli ba fiwe buikalabelo mwa kopano? (b) Muzwale u kona ku fita cwañi fa ku ba ni buikalabelo mwa puteho?
11 Mwa silimo sa sebelezo sa 2008, ne ku kolobelizwe batu ba 289,678, mi palo yeo i bonisa hande kuli ku na ni tokwahalo ye tuna ya mizwale ba ba swanela ku etelela. Muzwale u swanela ku ezañi ka za butokwi bo? Ka bukuswani, u swanela ku lika ka taata ku fita ku ze konisa za ka Mañolo ze tokwahala kwa baana ba ba swanela ku sebeza sina batanga ba bukombwa ni maeluda. (1 Tim. 3:1-10, 12, 13; Tite 1:5-9) Muzwale u kona ku sebeza cwañi ka taata kuli a fite ku ze tokwahala za ka Mañolo zeo? Ka ku abana ka mwa konela kaufela mwa bukombwa, ku tukufalelwa misebezi ya filwe ku peta mwa puteho, ni ku sebeza ka taata ku bolosola likalabo za hae kwa mikopano ya Sikreste, ni ku isa pilu kwa balumeli ba bañwi. Haa eza cwalo, u bonisa kuli wa itebuha musebezi wa peta mwa puteho.
12. Mikulwani ba kona ku bonisa cwañi kuli ba tukufalezwi niti?
12 Ki lika mañi ze ba kona ku eza mizwale ba banca, sihulu ba ba sa li mwa lilimo za ku nonoboka, kuli ba eze zwelopili mwa puteho? Ba kona ku sebeza ka taata kuli ba fite fa ku ba ni “butali ni kutwisiso ya za Moya” ka ku ituta Mañolo. (Makolo. 1:9) Ku itutanga Linzwi la Mulimu ka tukufalelo ni ku abananga hande mwa mikopano ya puteho ku ka ba tusa ku hula kwa moya. Micaha hape ba kona ku sebeza ka taata kuli ba kone ku kena mwa “munyako o mutuna wa musebezi o zwelapili” wa ku eza misebezi ye shutana-shutana mwa sebelezo ya nako kaufela. (1 Makor. 16:9) Ku ndongwama sebelezo ya Jehova kona mupilelo o munde ka ku fitisisa mi ku eza cwalo ku tahisanga limbuyoti ze tuna.—Mu bale Muekelesia 12:1.
13, 14. Ki linzila lifi zeo likaizeli ba kona ku bonisa ka zona kuli ba itebuha musebezi o ba peta mwa puteho?
13 Likaizeli ni bona ba kona ku bonisa kuli ba itebuha tohonolo ya bona ya ku abana ka butu mwa ku taleleza Samu 68:11. Kwa Samu yeo lu bala kuli: “Mulena a fa taelo, mi bana ba basizana ba ba tumisa litaba, ba eza mpi ye tuna.” Nzila ye ñwi yeo likaizeli ba kona ku bonisa ka yona kuli ba itebuha musebezi o ba peta mwa puteho ki ka ku abana mwa musebezi wa ku tahisa balutiwa. (Mat. 28:19, 20) Kacwalo, likaizeli ba bonisa kuli ba itebuha musebezi o ba peta mwa puteho ka ku sebeza ka taata mwa bukombwa ni ka ku itombola lika ze ñwi kuli ba eze musebezi wo.
14 Paulusi ha naa ñolela Tite, naa talusize kuli: “Basali ba ba hulile ni bona ba be ni mukwa o lukela ba ba kenile; . . . ba laye ze nde; kuli ba talifise likalibe, ba ba laye kuli ba late baana ba bona, ba late ni bana ba bona, ba be ni kutwisiso, ba ipabalele, ba itulele mwa mahae a bona inze ba sebeza, ba be ni musa, ba ipeye kwatasaa baana ba bona, kuli Linzwi la Mulimu li si ke la nyefulwa.” (Tite 2:3-5) Kaniti luli, likaizeli ba ba hulile ba na ni tuso ye tuna mwa puteho. Ka ku kuteka mizwale ba ba etelela ni ka ku eza liketo ze nde mwa bupilo ha ku taha ku za muapalelo ni ponahalo ni za ku itabisa ka zona, likaizeli bao ba tomela ba bañwi mutala o munde mi ba bonisa kuli ba itebuha musebezi o ba peta mwa puteho.
15. Kaizeli wa likwasha u kona ku ezañi kuli a tiyele bulutu?
15 Ka linako ze ñwi ku kona ku ba taata ku kaizeli wa likwasha ku lemuha musebezi wa peta mwa puteho. Kaizeli yo muñwi wa likwasha u talusa kuli: “Bukwasha bwa shwisanga bulutu ka linako ze ñwi.” Ha naa buzizwe ka za lika ze mu tusanga ku tiyela bulutu bo, naa bulezi kuli: “Tapelo ni ku ituta li ni tusize ku lemuha musebezi o ni peta mwa puteho. Ni itutanga litaba ze bonisa mwa nii ngela Jehova. Mi ni likanga ka taata ku tusa ba bañwi mwa puteho. Ku eza cwalo ku ni tusanga ku sa nahana feela za ka kono ni za bañwi.” Kwa Samu 32:8, Jehova naa bulelezi Davida kuli: “Ni ka ku eleza, meeto a ka inzaa ku shalimile.” Kaniti, Jehova u tabela batanga ba hae kaufela, ku kopanyeleza cwalo ni likaizeli ba makwasha, mi kaufela bona u ka ba tusa ku lemuha musebezi o ba peta mwa puteho.
Mu Zwelepili ku Itebuha Musebezi wa Mina Mwa Puteho
16, 17. (a) Ki kabakalañi ku amuhela memo ya Jehova ya kuli lu be kalulo ya kopano ya hae ha ku li keto ye nde hahulu ye lu kona ku eza? (b) Lu kona cwañi ku zwelapili ku itebuha musebezi wa luna mwa kopano ya Jehova?
16 Jehova ka lilato u hohile yo muñwi ni yo muñwi wa batanga ba hae kuli a be mulikanaa hae. Jesu naa ize: “Ha ku na mutu ya ka ta ku na, konji haa ka hohiwa ki Ndate ya ni lumile.” (Joa. 6:44) Mwahalaa batu ba ba eza libilioni mwa lifasi kaufela, Jehova u memile luna kuli lu be kalulo ya puteho ya hae kacenu. Ne lu ezize keto ye nde hahulu ha ne lu amuhezi memo yeo. Memo yeo i lu tusize ku ziba ze lu pilela. Mi lu ba ba tabile hakalo kuli lu na ni musebezi o lu peta mwa puteho!
17 Walisamu naa ize: “Muñaa Bupilo, ni lata Ndu ya hao.” Hape naa opezi kuli: “Liutu la ka li hata mwa sibaka se si lukile, mi ni ka lumbeka, Muñaa Bupilo, mwa mikopano.” (Samu 26:8, 12) Mulimu wa niti u file mañi ni mañi wa luna musebezi wa ku eza mwa kopano ya hae. Ka ku zwelapili ku latelela ketelelo ya Mulimu ni ku pateha mwa sebelezo ya hae, lu ka zwelapili ku itebuha musebezi wa luna o butokwa hahulu mwa tukiso ya Jehova.
Kana Mwa Hupula?
• Ki kabakalañi ha lu kona ku bulela kuli Bakreste kaufela ba na ni musebezi o ba peta mwa puteho?
• Lu bonisa cwañi kuli lwa itebuha musebezi o lu peta mwa kopano ya Mulimu?
• Ki lika mañi ze kona ku ama ze lu peta mwa puteho?
• Bakreste ba ba li mikulwani ni ba ba hulile ba kona ku bonisa cwañi kuli ba itebuha musebezi o ba peta mwa tukiso ya Mulimu?
[Lipuzo za Tuto]
[Maswaniso a fa likepe 16]
Mizwale ba kona ku ezañi kuli ba fite fa ku fiwa buikalabelo mwa puteho?
[Siswaniso se si fa likepe 17]
Likaizeli ba kona ku bonisa cwañi kuli ba itebuha musebezi o ba peta mwa puteho?