Kana Mwa Hupula?

Kana mu ikozi ku bala limagazini za cwanoñu fa za Tawala ya Mulibeleli? Ha mu bone nji mwa kona ku alaba lipuzo ze latelela:

• Mulimu u kona ku mi fumisa cwañi?

Kwakale, Jehova naa fuyauzi batu ba bañwi ba ba cwale ka Abrahama ni Salumoni ka ku ba fa bufumu. Kono bufumu bo ba tokwa hahulu Bakreste ni bo Mulimu a kona ku tusa mutu ku fumana bu kopanyeleza tumelo, kozo, buiketo, ni tabo.—10/1, makepe 12-15.

• Ki tuto mañi ye lu kona ku ituta kwa kezo ya Jesu ya ku yangwela Pitrosi ha naa tiba mwa liwate? (Mat. 14:28-31)

Haiba lu lemuha muzwale ya bonahala ku tokwa tumelo, lwa kona ku otolola lizoho la luna ka swanisezo ni ku mu tusa ku ba ni tumelo ye tuna.—9/15, likepe 8.

• Ki lika mañi za naa itombozi Jehova kuli lu liululwe?

Jehova naa utwile butuku Mwanaa hae ha naa nyandiswa ni ku sheununwa. Mi ka ku swanisezwa ki buitomboli bwa Abrahama bwa ku fana mwanaa hae, Jehova naa utwile butuku Mwanaa hae ha naa bulaiwa sina sikebenga.—9/15, makepe 28-29.

• Liproverbia 24:27 i luta tuto mañi ka za ku ‘yaha ndu’?

Muuna ya bata ku nyala u swanela ku itukiseza buikalabelo bo. Buikalabelo bo bu kopanyeleza ku itukiseza ku babalela lubasi ka ku lu fumanela lika za kwa mubili ni ku lu etelela mwa lika za kwa moya.—10/15, likepe 12.

• Bashemi ba kona ku ezañi kuli ba kone ku banga ni Nako ya ku Lapela Sina Lubasi?

Mu tome lizazi ni nako ye mu ka Lapelanga Sina Lubasi mi mu kumalele kwa tomahanyo yeo. Ku tuha fo, mu kete nako ye ñwi ye mu ka ezanga tuto haiba mu palelwa ku eza tuto ka nako ye mu tomile. 10/15, likepe 29.

• Ki kabakalañi kaizeli ya toloka lingambolo za Bibele mwa puo ya bosusu kwa mikopano ya Sikreste haa swanela ku apala se siñwi kwa toho?

Kabakala lizwelopili za lipangaliko ze se itusiswa kwa ku toloka lingambolo mwa puo ya bosusu, hañata mutoloki ki yena ya bonahalanga hahulu kwa baputehi. Hañata, siswaniso sa mutu ya sweli ku toloka si bonahalanga ka butuna fa sipangaliko se si cwale ka TV, mi mwendi mane mubuleli ka sibili haa bonahalangi kwa baputehi. Kacwalo, kaizeli ya sweli ku toloka puo ya bosusu naa ka eza hande ku bonisa kuli wa lemuha mayemo a hae a kuli ki mutoloki feela ka ku apala se siñwi kwa toho. 11/15 likepe 12-13.

• Jehova ni Jesu ba lu tomezi cwañi mitala ya ku ba ni mikwa ye minde?

Ku si na taba ni mayemo a Jehova a pahami, u ezanga batu ka sishemo ni ka likute. Ha naa ambola ku Abrahama ni Mushe, naa itusisize linzwi la Siheberu ili leo hañata li tolokiwanga kuli “shangwe.” (Gen. 13:14, NW; Ex. 4:6, NW) Mulimu hape wa teelezanga kwa batu. (Gen. 18:23-32) Jesu ni yena naa ezize cwalo, mi naa tabela ku tusa batu ba naa banga ni bona, mi mane hañata naa itusisanga mabizo a bona.—11/15, likepe 25.