Kana Mwa Kona ku Silela Mwa Masedonia?

MUAPOSITOLA PAULUSI naa amuhezi pono ha naa li mwa Troasi, ili tolopo ye nee fumaneha kwa likamba mwa Asia Minor. Muuna wa kwa Masedonia naa mu kupile kuli: “Silela mwa Masedonia, u too lu tusa.” Paulusi ha saa boni pono yeo, yena ni ba naa zamaya ni bona ba ‘kolwa kuli Mulimu u ba bizize kuli ba yoo bulelela Evangeli’ batu ba kwa Masedonia. Ne ku zwileñi mwateñi? Ha ba fita mwa Filipi, ona munzi wa pili mwa naha ya Masedonia, Lidia ni ba ndu ya hae ba ba balumeli. Ba bañwi mwa provinsi ya Roma yeo ya Masedonia ni bona ba ba balumeli.—Lik. 16:9-15.

Moya o swana wa tukufalelo wa iponelwa mwahalaa Lipaki za Jehova kacenu. Ba bañata ba itatezi ku tutela kwa libaka ze tokwa hahulu bashaeli ba taba ya Mubuso, mi ba ezize cwalo ka ku itifela lisinyehelo za bona. Ka mutala, bo Lisa ne ba bata ku isa hahulu pilu kwa bukombwa mwa bupilo bwa bona. Ne ba tutile ku zwa kwa Canada ku ya kwa Kenya. Bo Trevor ni bo Emily ba ba zwa kwa Canada ni bona, ne ba tutezi kwa Malawi ka mulelo wa ku yandulula bukombwa bwa bona. Bo Paul ni bo Maggie ba kwa England, ne ba lemuhile kuli nako ya bona ya ku tuhela musebezi ha ne i fitile, nee li kolo ye nde ya kuli ba eze ze ñata mwa sebelezo ya Jehova mi ba liba kwa Upa wa Africa. Kana ni mina mu na ni moya o swana wa buitomboli? Kana mwa kona ku lela za ku tutela ko ku na ni butokwi? Haiba ku cwalo, ki likuka mañi za mwa Bibele ni liakalezo ze tusa ze ka mi konisa ku peta mulelo wo?

Mu Itatube

Nto ye ñwi ye mu tokwa ku nyakisisa ki milelo ye mu bata ku tutela. Taelo ye tuna ka ku fitisisa  ya naa bulezi Jesu ki ye: “Lata Mulena Mulimu wa hao, ka pilu ya hao kaufela, ni ka moya wa hao kaufela, ni ka kutwisiso ya hao kaufela.” Mabaka e mu swanela ku yo sebeleza kwa naha i sili a swanela ku ba lilato la mina ku Mulimu ni takazo ya mina ya ku peta musebezi wa ku tahisa balutiwa. Jesu naa zwezipili kuli: “Wa bubeli o swana sina ona, u li: Lata wahenu mo u itatela.” Lu bonisa lilato la luna ku ba bañwi ka ku ba ni takazo ya ku ba tusa. (Mat. 22:36-39; 28:19, 20) Ku sebeleza mwa naha i sili hañata ku ama misebezi ye miñata ni moya wa buitomboli. Haki ku yo bona feela naha. Mu swanela ku susuezwa ki lilato. Bo Remco ni bo Suzanne ba kwa Netherlands, ili ba ba sebeleza mwa Namibia cwale, ba talusa kuli: “Se si lu inisize kwanu ki lilato.”

Bo Willie, ba ba li muokameli wa mupotoloho mwa Namibia, ba li: “Ba ba zwezipili ku sebeleza mwa kalulo ya simu ya mwa naha i sili ne ba si ka taha mwa kalulo yeo ka ku sepa kuli mizwale ba ka to ba babalela. Ne ba tile ka mulelo wa ku to sebeza hamoho ni mizwale ba mwa sibaka seo, ili ku to ba tusa mwa musebezi wa ku kutaza.”

Ha se mu tatubile milelo ya mina, mu ipuze kuli: ‘Ki yeloseli mañi ye ni na ni yona ye ka ni tusa mwa kalulo ya simu ya mwa naha i sili? Kana ni sikombwa ya buanyu? Ki lipuo mañi ze ni kona ku bulela? Kana na itakaleza ku ituta puo ye nca?’ Mu ikambote hande taba ye ni lubasi lwa mina. Mu kupe liakalezo kwa maeluda ba mwa puteho ya mina. Mi mu lapele ku Jehova ka za taba yeo. Ku itatuba ha buniti ko ku cwalo ku swanela ku mi tusa ku bona haiba luli mwa kona ku yo sebeleza mwa naha i sili ni kuli nji mu ikatulezi ku eza cwalo.—Mu bone tabanyana ye li,  “Mu Izibe Isali Mina.”

 Ko mu Kona ku yo Sebeleza

Paulusi naa bizizwe kwa Masedonia mwa pono. Kacenu, Jehova haa lu eteleli ka ku itusisa linzila ze cwalo. Kono ka ku bala magazini ye ni lihatiso ze ñwi, batu ba Mulimu ba tusiwa ku ziba likalulo ze ñata ze mwa butokwi bo butuna. Kacwalo, mu kale ka ku ñola mukoloko wa libaka ze mwa butokwi. Haiba ha mu si ka itukiseza ku ituta puo i sili kamba haiba ha mu bati ku yo inelela mwa naha i sili, mwa kona ku keta ku yo sebeleza kwa naha ko ku bulelwa puo ye mu ziba. Cwale mu batisise lika ze cwale ka mapampili a mi lumeleza ku pila mwa naha i sili, mo mu ka zamaela, silelezo, bupilo bwa kwateñi, ni lika ze cwale ka mo ku batela ni ku ciseza mwa naha yeo. Mwa kona ku tusiwa ka ku ikambota ni batu ba se baa ngile kale muhato wo. Mu lapele ku Mulimu ha mu nze mu nyakisisa taba yeo. Mu hupule kuli Paulusi ni ba naa zamaya ni bona ne ba ‘hanisizwe ki Moya o Kenile ku bulela Linzwi la Mulimu mwa Asia.’ Nihaike kuli ne ba likile ku ya mwa Bitinia, ‘Moya wa Jesu ne u si ka ba lumelela’ ku eza cwalo. Ka ku swana, ku kona ku fita nako kuli mu zibe sibaka ko mu kona ku yo tusa hahulu.—Lik. 16:6-10.

Ka nako ya cwale mwendi mu na ni libaka li sikai mwa munahano. Haiba mu nahana za ku yo sebeleza kwa naha i sili, mu ñolele kwa liofisi za mitai za Lipaki za Jehova za mwa linaha ko mu bata ku ya. Mu taluse misebezi ye mu ezize mwa kopano, mi mu buze lipuzo ze ñwi ze mu na ni, ze cwale ka za mupilelo wa mwa naha yeo, maino e mu kana mwa fumana, za lipatela, ni za misebezi ya kwa mubili ye mu kona ku fumana. Cwale mu fe liñolo kamba mañolo a mina ku ba katengo ka sebelezo ka mwa puteho ya mina. Ba ka ñola liñolo la ku mi babaza ni ku li lumela hamoho ni mañolo a mina kwa liofisi za mitai ze mu talusize. Likalabo ze mu ka amuhela li ka mi tusa ku ziba ko mu kona ku yo tusa hande.

Bo Willie, ba ba bulezwi kwa makalelo, ne ba bulezi kuli: “Hañata ba ba konile ku kondisa, ne ba potezi naha ye ne ba lela ku tutela ku yona pili ni ku yo bata libaka kone ba ka kona ku yo pila inze ba tabile. Muuna yo muñwi ni musalaa hae ne ba lemuhile kuli ne ba si ke ba kona ku yo pila mwa sibaka se si kwahule. Kacwalo ba yo ina mwa toloponyana mo ne ku na ni butokwi kono ili mo ne ba kona ku pila ka tabo.”

Ku Kopana ni Matata A Manca

Ku si na ku kakanya, ku tuta haenu ni ku ya kwa sibaka si sili ku ka mi tahiseza matata a mañwi. Bo lisa ba ba bulezwi kwa makalelo, ba li: “Ni ikutwanga hahulu bulutu.” Ba tusiwanga kiñi? Ba tusiwanga ki ku swalisana hahulu ni puteho ya mwa sibaka se sinca se ba pila ku sona. Ne ba itomezi sikonkwani sa ku ziba libizo la mañi ni mañi. Kuli ba kone ku eza cwalo, ne ba fitanga kwa mikopano ka ku itahanela, mi hamulaho ne ba siyalelanga ilikuli ba ambole ni mizwale ni likaizeli. Bo Lisa ne ba sebezanga ni ba bañwi mwa bukombwa, ne ba memelanga batu ba bañata kwa ndu ya bona, mi ne ba fumani balikani ba banca. Ba bulela kuli: “Ha ni inyazi kabakala  buitomboli bo ne ni ezize. Jehova u ni fuyauzi luli.”

Bana ba bona ha se ba hulile, bo Paul ni bo Maggie, ba tuta mwa sibaka sa bona mo ne ba pilile ka lilimo ze 30. Bo Paul ba li: “Ne lu si ka libelela kuli ku fukuza kwa libyana ne ku ka ba bunolo cwalo. Ku siya lubasi ne ku li taata hahulu ku fita mo ne lu nahanela. Ne lu lilile hahulu ha ne lu li mwa fulai. Ne ku li bunolo hahulu ku nahana kuli, ‘Ha lu swaneli feela ku tuta.’ Kono ne lu itingile ku Jehova. Ku fumana balikani ba banca ku mi tusa ku zwelapili ku tundamena mwa musebezi wa mina.”

Bo Greg ni bo Crystal ne ba iketezi ku tuta kwa Canada ni ku ya kwa Namibia bakeñisa kuli ne ba ziba Sikuwa, yona puo ye itusiswa mwa muuso wa Namibia. Kono hasamulaho, ne ba fitile fa ku lemuha butokwa bwa ku ituta puo ya mwa sibaka se ne ba pila ku sona. Ba li: “Ka linako ze ñwi, ne lu zwafanga. Kono ne lu konile ku utwisisa sizo sa batu ba mwa sibaka seo hamulaho feela wa ku ituta puo ya bona. Ku swalisana hahulu ni mizwale ba mwa sibaka seo, ne ku lu tusize ku twaela mupilelo wa mwa sibaka se sinca.”

Ku ba ni moya o cwalo wa buikokobezo ni buitateli hape ku kona ku tusa hahulu mizwale ba mwa sibaka se mu tutezi ku sona. Bo Jenny ba sa hupulanga mabasi a naa tutezi kwa Ireland, ko ne ba hulezi. Ba bulela kuli: “Batu bao ne ba tabela hahulu ku amuhela ba bañwi. Kaniti, ne ba tile ku to sebeza, isiñi ku to sebelezwa. Ne ba na ni tukufalelo ni tabo ye tuna kuli mane ni na, na lika ku yo sebeleza ko ne ku na ni butokwi.” Bo Jenny ni bo muunaa bona cwale ba sebeza sina balumiwa mwa naha ya Gambia.

Ku Fuyolwa ki Jehova “ku Fumisa Mutu”

Paulusi naa ikozi hahulu sebelezo mwa Masedonia! Hamulaho wa lilimo ze batoo ba ze lishumi, naa ñolezi mizwale ba kwa Filipi kuli: “Ni itumela ku Mulimu wa ka, kamita ha ni mi hupula.”—Mafil. 1:3.

Bo Trevor ni bo Emily, ba ne ba sebeleza mwa Malawi ba si ka memiwa kale kwa Sikolo sa Giliadi sa Bibele sa Watchtower, ni bona ba ikutwa sina mwa naa ikutwezi Paulusi. Ba li: “Fokuñwi ne lu kakanyanga ka za haiba ne lu eza nto ye lukile, kono ne lu li ba ba tabile. Ne lu swalisana hahulu mi ne lu ikutwa kuli Jehova naa lu fuyaula.” Bo Greg ni bo Crystal, ba ba bulezwi kwa makalelo ba biha kuli: “Ha ku na nto ye ñwi ye ne lu ka eza ye fita ze lu eza.”

Ki niti kuli, haki mañi ni mañi ya kona ku yo sebeleza kwa naha i sili. Ba bañwi ba kona ku eza hande ka ku tutela kwa sibaka sa mwa naha ya bona se si mwa butokwi bo butuna. Ba bañwi ba kona ku itomela likonkwani za ku yo tusa liputeho ze ñwi ze li bukaufi ni libaka ko ba pila. Sa butokwa ki ku eza mo mu konela kaufela ku sebeleza Jehova. (Makolo. 3:23) Kacwalo, mu ka iponela manzwi a tahile ka moya a, ha talelezwa ku mina: “Ku fuyolwa ki Muñaa Bupilo ku fumisa mutu; ku ipilaeza mwa pilu ha ku tusi se siñwi.”—Liprov. 10:22.

[Mbokisi/Siswaniso se si fa likepe 5]

 Mu Izibe Isali Mina

Kuli mu itatube ni ku bona haiba mwa kona ku yo sebeleza kwa naha i sili, mu nyakisise lipuzo ze latelela, mu eze cwalo ka tokomelo ni ka tapelo ilikuli mu bone luli nji mwa kona ku tuta. Litaba za kwamulaho ze see hatisizwe mwa Tawala ya Mulibeleli ni mwa Bukombwa Bwa Luna Bwa Mubuso za kona ku mi tusa ku eza cwalo.

• Kana ni mutu ya tiile kwa moya?—“Steps Toward Happiness” (October 15, 1997, likepe 6)

• Kana ni sikombwa ya buanyu?—“Mwa ku Kondiseza Musebezi wa Bupaina” (km 12/06, likepe 3)

• Kana na kona ku siya lubasi ni balikani ba ka ku yo pila ku sili?—“Coping With Homesickness in God’s Service” (May 15, 1994, likepe 28)

• Kana na kona ku ituta puo i sili?—“Ku Sebeleza Mwa Puteho ya Puo I Sili” (March 15, 2006, likepe 17)

• Kana ni na ni masheleñi e ni kona ku itusisa kwa ku tuta?—“Can You Serve in a Foreign Field?” (October 15, 1999, likepe 23)

[Siswaniso se si fa likepe 6]

Ku ba ni moya wa buikokobezo ni buitateli ku kona ku tusa hahulu mizwale ba mwa sibaka se mu tutezi ku sona

[Siswaniso se si fa likepe 7]

Ba ba taha ka mulelo wa ku to sebeza ki bona ba ba kondisanga