Mu Zwelepili ku ba ni Tabo Mwa Linako ze Taata
Mu Zwelepili ku ba ni Tabo Mwa Linako ze Taata
“Ba ba itiisa ku Wena [Jehova] ka sepo, u ba fe ku taba; u ba fe ku opela ka tabo kamita.”—SAMU 5:11.
1, 2. (a) Ki lika mañi ze ñwi ze tahisezanga batu matata a matuna kacenu? (b) Kwandaa matata aa tahelanga batu kaufela, Bakreste ba niti ba swanela ku tiyelañi?
LIPAKI ZA JEHOVA ni bona ba tahelwanga ki matata aa tahelanga batu kaufela. Batu ba Mulimu ba bañata se ba ipumani mwa likozi ze cwale ka bukebenga, lindwa, ni ku ezwa ka sobozi. Likozi za ka taho, bubotana, makulanu, ni mafu li tahisanga matata a matuna. Muapositola Paulusi naa ñozi hande kuli: “Lu ziba kuli mane ku too fita ku yona nako ye, ze bupilwe kaufela li tongiswa ki butuku, butuku bo bu swana ni bwa musali haa pepa.” (Maro. 8:22; Bibele ye Kenile, hatiso ya 1984) Hape lu katazwa ki ku sa petahala kwa luna. Sina Mulena Davida wa kwaikale, lu kana lwa bulela kuli: “Milatu ya ka ki ye mituna, ya ni fita, ya ni imela, sina mulwalo o bukiti.”—Samu 38:4.
2 Kwandaa matata aa tahelanga batu kaufela, Bakreste ba niti hape ba lwezi kota ya linyando ya swanisezo. (Luka 14:27) Kaniti, ka ku swana ni Jesu, balutiwa ba hae ba toilwe mi ba nyandiswa. (Mat. 10:22, 23; Joa. 15:20; 16:2) Kacwalo, kuli lu latelele Kreste, lu tokwa ku eza ka taata ni ku itiisa ha lu nze lu libelela limbuyoti za mwa lifasi le linca.—Mat. 7:13, 14; Luka 13:24.
3. Lu ziba cwañi kuli Bakreste ha ba tokwi ku pila bupilo bwa manyando kuli ba tabise Mulimu?
3 Kana seo si talusa kuli Bakreste ba niti ha ba pili bupilo bwa tabo ni nyakalalo? Kana bupilo bwa luna bu swanela ku ba feela bwa maswabi ni matata ku fitela lifasi li fela? Niti ki kuli, Jehova u bata kuli lu be ba ba tabile ha lu nze lu libelela talelezo ya lisepiso za hae. Bibele i kuta-kutela ku talusa balapeli ba niti kuli ki batu ba ba tabile. (Mu bale Isaya 65:13, 14.) Samu 5:11 i bulela kuli: “Ba ba itiisa ku Wena ka sepo, u ba fe ku taba; u ba fe ku opela ka tabo kamita.” Kaniti, kwa konahala ku ba ni tabo, mwangalwa, ni ku kolwa ka ze lu na ni niha lu li mwa matata. Ha lu nyakisiseñi mo Bibele i kona ku lu tuseza ku tiyela miliko ni ku zwelapili inze lu tabile.
Jehova ki ‘Mulimu ya Tabile’
4. Mulimu u ikutwanga cwañi libupiwa za hae ha li palelwa ku eza tato ya hae?
4 Ha luu ngeni mutala wa Jehova. Ka ku ba Mulimu ya Maata Ote, u na ni maata fahalimwaa pupo kaufela. Ha ku na saa tokwile mi haa tokwi tuso ya yo muñwi. Kono ku si na taba kuli u na ni maata a matuna ka ku fitisisa, Jehova u lukela ku ba ya naa swabile muta yo muñwi wa bana ba hae ba moya naa mu kwenuhezi ni ku ba Satani. Hape Mulimu u lukela ku ba ya naa swabile mangeloi a mañwi ha naa swalisani ni Satani mwa bukwenuheli bo. Hape mu nahane butuku bwa naa utwile Mulimu muta Adama ni Eva, ba ne ba li pupo ya hae ye ipitezi ya fa lifasi, ne ba mu kwenuhezi. Ku zwa feela ka nako yeo, batu ba ba eza libilioni ba ba simuluhile ku bo Adama ni Eva ba kwenuhezi zamaiso ya Jehova.—Maro. 3:23.
5. Ki lika mañi sihulu ze see utwisize Jehova bumaswe?
5 Bukwenuheli bwa Satani bu sa zwelapili. Ka lilimo ze batoo ba 6,000, Jehova u iponezi likezo za bulapeli bwa milimu, za mifilifili, za bubulai, ni za buhule. (Gen. 6:5, 6, 11, 12) Ku zwa fo, u ikutwezi mashano a maswe ni bunyefuli. Mane nihaiba balapeli ba Mulimu ba niti, ka linako ze ñwi ba mu utwisize butuku. Bibele i talusa kezahalo ye ñwi ye cwalo ka manzwi a: “Mwa lihalaupa ba mu shemaeta hañata-ñata! Mi mwa naheñi ba atisa ku mu swabisa! Ba kala hape ku lika Mulimu, ku sa kolwa Ya-Kenile wa Isilaele.” (Samu 78:40, 41) Butuku bwa utwanga Jehova muta batu ba hae ba mu fetuhela ki bo butuna luli. (Jer. 3:1-10) Kaniti, lika ze maswe li sweli za ezahala, mi Jehova u ikutwanga bumaswe ha li ezahala.—Mu bale Isaya 63:9, 10.
6. Mulimu u talimananga cwañi ni miinelo ye taata?
6 Niteñi, butuku ni maswabi za ikutwanga Jehova ha li mu ziyezangi. Ha se ku bile ni matata, Jehova kapili-pili saa ngile mihato ya ku fukuza kwa bumaswe bo bu tisizwe ki matata ao. Hape saa ngile mihato ye mituna ya ku tahisa kuli mulelo wa hae u talelezwe. Mihato ye minde yeo ya sweli kuu nga Jehova i bonisa kuli u nyolezwi nako yeo a ka bubanisa bubusi bwa hae ni ku kapweka limbuyoti balapeli ba hae ba ba sepahala. (Samu 104:31) Kaniti, ku si na taba kuli sa nyazizwe hahulu ki batu, Jehova u zwelapili ku ba ‘Mulimu ya tabile.’—1 Tim. 1:11; Samu 16:11.
7, 8. Lu kona ku likanyisa cwañi Jehova lika ha li fosahala?
7 Ki niti kuli, ha lu koni ku bapanya buikoneli bwa luna bwa ku tatulula matata ku bwa Jehova. Kono lwa kona ku likanyisa Jehova ha lu nze lu talimana ni matata. Ki niti kuli lwa kona ku ikutwa bumaswe lika ha li fosahala, kono ha lu swaneli ku zwelapili ku ikutwa cwalo. Bakeñisa kuli lu bupilwe ka siswaniso sa Jehova, lu na ni buikoneli bwa ku nahana hamohocwalo ni butali, ze lu konisa ku nyaka matata a luna ni kuu nga muhato wa ku a tatulula ha ku konahala.
8 Nto ye ñwi ya butokwa ye kona ku lu tusa ku tiyela matata a mwa bupilo ki ku lemuha kuli lika ze ñwi ha lu koni ku li tatulula ka maata a luna. Ku nahananga hahulu lika zeo ku kona ku lu zwafisa hahulu ni ku fita, mi ku kona ku felisa tabo ye tuna ye lu ikola mwa bulapeli bwa niti. Ha se luu ngile mihato ya ku tatulula butata bo buñwi, ki hande ku libala za butata bo ni ku iyakatwa ku eza lika ze ka lu tusa. Makande a mwa Bibele aa latelela a bonisa hande buniti bwa taba yeo.
Kutwisiso ki ya Butokwa
9. Anna naa bonisize cwañi kutwisiso?
9 Mu nyakisise mutala wa Anna, ya naa bile mahe mupolofita Samuele. Naa felezwi ki sepo kabakala ku sa pepa. Naa shendiwanga ni ku sheununwa bakeñisa kuli naa li mumba. Ka linako ze ñwi, Anna naa zwafanga hahulu kuli mane naa lilanga ni ku palelwa ku ca lico. (1 Sam. 1:2-7) Nako ye ñwi ha naa izo pota kwa Sibaka se si kenile sa Jehova, Anna naa “swabile mwa pilu ya hae, a lapela Muñaa Bupilo inzaa lila hahulu-hulu.” (1 Sam. 1:10) Anna ha saa bulezi maikuto a hae kaufela ku Jehova, muprisita yo muhulu Eli a mu atumela mi a li ku yena: “U zamaye ka kozo, mi Mulimu wa Isilaele a ku fe soo kupile ku Yena!” (1 Sam. 1:17) Ku si na ku kakanya, ka nako yeo Anna naa ikutwile kuli naa ezize za naa kona ku eza kaufela. Ha ku na sa naa kona ku eza ka za ku sa pepa kwa hae. Anna naa bonisize kuli naa na ni kutwisiso. Mi “kihaa ikela. Cwale a ca, mi mwa pata ya hae ha ku si ka bonwa maswabi hape.”—1 Sam. 1:18.
10. Paulusi naa bonisize cwañi kutwisiso ha naa talimani ni butata bwa naa sa koni ku tatulula?
10 Muapositola Paulusi ni yena naa bonisize kutwisiso ye swana ha naa talimani ni butata. Naa na ni butata bo ne bu mu nyandisize hahulu. Naa bu bizize kuli ki “muutwa mwa mubili.” (2 Makor. 12:7) Ku si na taba kuli butata boo nee li bo bu cwañi, Paulusi naa likile ka mwa naa konela kaufela ku bu tatulula; a lapela ku Jehova kuli a mu tuse. Paulusi naa lapezi hakai ku Jehova ka za butata bo? Halaalu. Mi ha saa lapezi lwa bulaalu, Mulimu naa mu patululezi kuli “muutwa mwa mubili” ha u na ku zwisiwa ku yena ka makazo. Paulusi naa utwile manzwi ao mi a isa mamelelo ya hae kwa ku sebeleza Jehova ka ku tala.—Mu bale 2 Makorinte 12:8-10.
11. Ku lapelanga ni ku fitisanga likupo ku Mulimu ku lu tusa cwañi ku tiyela matata?
11 Mitala ye ha i talusi kuli lu swanela ku tuhela ku lapelanga ku Jehova ka za lika ze lu kataza. (Samu 86:7) Mane Linzwi la Mulimu li lu eleza kuli: “Mu si ke mwa bilaela ka se siñwi; kono mwa linto kaufela mu zibise Mulimu se mu bata ka tapelo ni ka kupo ye na ni buitumelo.” Jehova u ka alaba cwañi litapelo ni likupo ze cwalo? Bibele i ekeza kuli: “Mi kozo ya Mulimu ye fita kutwisiso kaufela, i ka buluka lipilu za mina ni mihupulo ya mina ku Jesu Kreste.” (Mafil. 4:6, 7) Kaniti, mwendi Jehova haa na ku felisa butata bwa luna, kono wa kona ku alaba litapelo za luna ka ku sileleza mihupulo ya luna. Ha se lu lapezi ka za taba ye ñwi, lu kana lwa lemuha kozi ye tiswa ki ku bilaela hahulu.
Mu Tabele ku Eza Tato ya Mulimu
12. Ki kabakalañi ku zwafanga ka nako ye telele ha ku kona ku lu tahiseza kozi?
12 Liproverbia 24:10 i bulela kuli: “Ha u fokola mwa lizazi la ziyezi, maata a hao ki a manyinyani.” Lishitanguti le liñwi li bulela kuli: “Pilu ye inzi mwa maswabi, i loba mutu fahali.” (Liprov. 15:13) Bakreste ba bañwi ba zwafile hahulu kuli mane ba tuhezi ku balanga Bibele ni ku yeya Linzwi la Mulimu. Litapelo za bona see li za ku ezeza feela mulao, mi mane ba kana ba ikauhanya kwa balapeli ba bañwi. Kaniti, ku zwelapili inge lu zwafile ku kona ku lu tahiseza kozi.—Liprov. 18:1, 14.
13. Ki misebezi mañi ye kona ku lu tusa ku lwanisa maikuto a ku zwafa ni ku lu fa tabo?
13 Kwa neku le liñwi, ku ba ni mubonelo o munde ku kona ku lu tusa ku isa pilu kwa lika za mwa bupilo bwa luna ze kona ku lu fa tabo. Davida naa ñozi kuli: “Se ni tabela, ki ku eza tato ya hao, Mulimu wa ka.” (Samu 40:8) Lika ha li fosahala mwa bupilo bwa luna, ha lu swaneli ku tuhela ku lapela Mulimu. Mane se si kona ku lu tusa ku ambuka ndiulu ki ku abana mwa misebezi ye tahisa tabo. Jehova u lu taluseza kuli lwa kona ku fumana tabo ka ku balanga Linzwi la hae ni ku li nyakisisa kamita. (Samu 1:1, 2; Jak. 1:25) Lu amuhelanga “manzwi a mande” a kona ku lu susueza ni ku tabisa lipilu za luna ku zwelela mwa Mañolo A Kenile ni kwa mikopano ya Sikreste.—Liprov. 12:25; 16:24.
14. Ki sepiso mañi yaa lu file Jehova ye lu fa tabo ka nako ya cwale?
14 Mulimu u lu taluseza mabaka a mañata ha lu swanela ku ba ni tabo. Sepiso yaa lu file ya kuli u ka lu pulusa, kaniti i lu fa hahulu tabo. (Samu 13:5) Lwa ziba kuli ku si na taba ni ze lu tahela ka nako ya cwale, kwa mafelelezo Mulimu u ka fa ba ba mu bata mupuzo. (Mu bale Muekelesia 8:12.) Mupolofita Habakuki naa bonisize buikolwiso bo ha naa ñozi kuli: “Kakuli fo, likota za feiga ha li na ku tubula, ni za veine ha li na ku beya; olive i ka tokwahala kwa likota za olive, ni lico mwa masimu; lingu li ka fela mwa mafulisezo, ni likomu mwa milaka. Nihakulicwalo, ni ka tabela Muñaa Bupilo, ni wabelelwe Mulimu ya ni pilisa.”—Hab. 3:17, 18.
“Si Filwe Mbuyoti Sicaba Seo Muñaa Bupilo A li Mulimu wa Sona”
15, 16. Mu bulele limpo ze ñwi ze lu filwe ki Mulimu ili ze lu kona ku ikola ha lu nze lu libelela limbuyoti za kwapili.
15 Ha lu nze lu libelela nako ya kwapili ye tabisa ye lu sepisizwe, Jehova u bata kuli lu ikole lika ze nde zaa lu fa. Bibele i bulela kuli: “Ki mo ni lemuhezi kuli se si swanela mutu ku fita, ki ku tabela lika, ni ku eza za buiketo, ka mazazi a bupilo bwa hae; mi hape ni lemuhile kuli mutu kaufela nihaa ca lico, kamba a nwa, kamba a tabela saa fumani ka musebezi wa hae, ki mpo yaa filwe ki Mulimu.” (Muek. 3:12, 13) “Ku eza za buiketo” ku kopanyeleza ku ezeza ba bañwi lika ze nde. Jesu naa bulezi kuli ku na ni mbuyoti mwa ku fana, ye fita ye mwa ku fiwa. Ku eza likezo za sishemo ku mutu ye lu nyalani ni yena, kwa bana ba luna, kwa bashemi ba luna, ni ku bahabo luna ba bañwi ku lu tahiseza tabo ye tuna. (Liprov. 3:27) Ku ba ni makeke, silikani, ni ku swalelanga mizwale ni likaizeli ba luna ba kwa moya hape ku tahisa tabo, mi ku tabisa Jehova. (Magal. 6:10; Makolo. 3:12-14; 1 Pit. 4:8, 9) Mi ku peta bukombwa bwa luna ka moya wa buitomboli ku lu fumanisa limbuyoti.
16 Manzwi a mwa liñolo la Muekelesia aa bonisizwe fahalimu a bulela za lika ze ñwi zee lu fa munyaka mwa bupilo ze cwale ka ku ca ni ku nwa. Kaniti, niha lu li mwa miliko, lwa kona ku ba ni tabo kabakala limpo kaufela zaa lu file Jehova. Ku zwa fo, ha lu tokwi ku lifa se siñwi kuli lu ikole ku buha lizazi ha li likela manzibwana, sibaka se si kateleha, tufolofolo to tu bapala-bapala, ni lika ze ñwi ze tabisa za mwa pupo, kono lika zeo za kona ku lu makalisa ni ku lu tabisa. Ha lu nze lu nahanisisa lika zeo, lilato la luna ku Jehova la tiya, kakuli ki yena Mufani wa lika ze nde kaufela.
17. Ki lika mañi ze ka lu imulula ka ku tala kwa matata, mi ka nako ya cwale, lu omba-ombiwa ki nto mañi?
17 Kwa mafelelezo, ku lata Mulimu, ku utwa litaelo za hae, ni ku ba ni tumelo mwa sitabelo sa tiululo ku ka lu imulula ka ku tala kwa matata a bupilo a tiswa ki ku sa petahala mi ku ka lu fumanisa tabo ye sa feli. (1 Joa. 5:3) Ka nako ya cwale, lu omba-ombiwa ki ku ziba kuli Jehova wa ziba lika kaufela zee lu nyandisa. Davida naa ñozi kuli: “Ni ka taba, ni tabele sishemo sa hao; kakuli u shalimile maswabi a ka, u zibile butata bo bu ne bu kataza moya wa ka.” (Samu 31:7) Kabakala lilato la hae ku luna, Jehova u ka lu lukulula kwa manyando.—Samu 34:19.
18. Ki kabakalañi batu ba Mulimu ha ba swanela ku ba ni tabo mwahalaa bona?
18 Ha lu nze lu libelela talelezo ya lisepiso za hae, haike lu likanyise Jehova, Mulimu ya tabile. Maikuto a ku zwafa a si ke a lu palelwisa ku sebeleza Jehova. Ha lu tahelwa ki matata, haike lu etelelwe ki buikoneli bwa ku nahana ni butali. Jehova u ka lu tusa ku tiyela maikuto a maswe ni ku lu konisa kuu nga mihato kaufela ye ka lu tusa ku fukuza kwa manyando a tahiswa ki matata. Ha lu tabeleñi lika ze nde za kwa moya ni za kwa mubili zaa lu fa Jehova. Ka ku ba bukaufi ni Mulimu, lu ka kona ku ba ni tabo bakeñisa kuli “si filwe mbuyoti sicaba seo Muñaa Bupilo a li Mulimu wa sona.”—Samu 144:15.
Mu Itutileñi?
• Lu kona ku likanyisa cwañi Jehova ha lu talimana ni matata?
• Kutwisiso i kona ku lu tusa cwañi ku tiyela matata?
• Ka linako za matata, lu kona cwañi ku tabela ku eza tato ya Mulimu?
[Lipuzo za Tuto]
[Maswaniso a fa likepe 16]
Jehova wa utwanga bumaswe kabakala lika ze maswe ze sweli ku ezahala
[Manzwi a bañi ba siswaniso]
© G.M.B. Akash/Panos Pictures
[Maswaniso a fa likepe 18]
Jehova u lu file lika ze lu tusa ku zwelapili ku ba ni tabo