Mu Bonise Kuli mu Balateleli ba Kreste ba Niti

“Kota ye nde kaufela i beya miselo ye minde; mi kota ye maswe ha i koni ku beya miselo ye minde.”—MAT. 7:17.

1, 2. Balateleli ba Kreste ba niti ba shutana cwañi ni balateleli ba buhata, sihulu mwa nako ye ya maungulo?

JESU naa bulezi kuli batu ba ba ipapata ku mu sebeleza ba ka taluhanywa kwa balateleli ba hae ba niti ka miselo ya bona, ili lituto za bona ni muzamao wa bona. (Mat. 7:15-17, 20) Kaniti, batu ba amiwanga ki lika ze ba kenya mwa minahano ni mwa lipilu za bona. (Mat. 15:18, 19) Batu ba ba lutiwa mashano ha ba “koni ku beya miselo ye minde,” kono ba ba lutiwa niti ya kwa moya ba beya “miselo ye minde.”

² Mifuta yeo ye mibeli ya miselo se i fitile fa ku iponelwa hande mwa linako ze za maungulo. (Mu bale Daniele 12:3, 10.) Bakreste ba buhata ba na ni mubonelo o fosahezi ka za Mulimu mi hañata ba lapela ka buipi, kono ba ba na ni kutwisiso ya kwa moya ba lapela Mulimu “ka Moya ni ka niti.” (Joa. 4:24; 2 Tim. 3:1-5) Ba lika ka taata ku bonisa mikwa ye swana ni ya Kreste. Kono luna ka butu bo? Ha mu nze mu nyakisisa lisupo ze latelela ze ketalizoho ze zibahaza Bakreste ba niti, mu ipuze kuli: ‘Kana muzamao wa ka ni ze ni luta ba bañwi za lumelana hande ni Linzwi la Mulimu? Kana muzamao wa ka ni ze ni luta li tahisa kuli batu ba ba sweli ku bata niti ba i tabele?’

Mu Pile ka ku Lumelelana ni Linzwi la Mulimu

3. Jehova u tabiswa kiñi, mi ku eza cwalo ku amañi kwa Bakreste ba niti?

³ Jesu naa bulezi kuli: “Hasi batu kaufela ba ba li ku na: Mulena, Mulena, ba ba ka kena mwa mubuso wa kwa lihalimu; kono ku ka kena ya eza se si latwa ki Ndate ya kwa lihalimu.” (Mat. 7:21) Kaniti, Jehova haa tabiswi ki ku ipapata ku ba Mukreste, kono u tabiswa ki ku eza za swanela ku eza Mukreste. Kwa balateleli ba Kreste ba niti, ku eza cwalo ku ama mupilelo wa bona kaufela, ku kopanyeleza cwalo ni mo baa ngela masheleñi, mubeleko, za ku itabisa ka zona, lizo ni mikiti ya lifasi, linyalo ni liswalisano ze ñwi ni batu ba bañwi. Kono Bakreste ba buhata, ba latelela munahanelo ni mikwa ya lifasi, ili ze see bile ze maswe hahulu mwa mazazi a maungulo a.—Samu 92:7.

4, 5. Lu kona ku sebelisa cwañi manzwi a Jehova a fumaneha kwa Malaki 3:18 mwa bupilo bwa luna?

⁴ Kona libaka mupolofita Malaki ha naa ñozi kuli: “Mu ka kuta, mu lemuhe fo ku fapanezi ya lukile ni ya si ka luka, ya sebeleza Mulimu, ni ya sa mu sebelezi.” (Mala. 3:18) Ha mu nze mu nahanisisa manzwi ao, mu ipuze kuli: ‘Kana na swana ni batu ba lifasi kamba kana na shutana ni bona? Kana hañata ni satalalanga ku eza ze ba eza balikani ba ka, ibe kwa sikolo kamba kwa mubeleko, kamba kana na yemelanga likuka za Bibele ka ku tiya, mane nihaiba ku bulela ka za teñi ha ku tokwahala ku eza cwalo?’ (Mu bale 1 Pitrosi 3:16.) Ki niti kuli ha lu bati ku iponahalisa ku luka, kono lu swanela ku shutana ni batu ba ba sa lati Jehova ni ba ba sa mu sebelezi.

⁵ Haiba mu lemuha kuli mu tokwa ku eza licinceho ze ñwi mwa mupilelo wa mina, ki kabakalañi ha mu sa lapeli ka za teñi ni ku kupa maata a kwa moya ka ku itutanga Bibele kamita, ka tapelo, ni ka ku fumanehanga kwa mikopano? Ha mu sebelisa ze mu ituta mwa Linzwi la Mulimu, mu ka bonisa hahulu “miselo ye minde,” ye kopanyeleza ni “bupaki bo bu zwa mwa milomo ye lumba Libizo la [Mulimu].”—Maheb. 13:15.

 Mu Yemele Mubuso wa Mulimu

6, 7. Ki shutano ifi ye kona ku iponelwa mwahalaa Bakreste ba niti ni ba buhata ka za lushango lwa Mubuso?

⁶ Jesu naa ize: “Ni swanezi ku yoo bulelela ni minzi ye miñwi taba ye munati ya mubuso wa Mulimu; kakuli ki sona se ni lumezwi.” (Luka 4:43) Ki kabakalañi Jesu ha naa koñomekile hahulu Mubuso wa Mulimu mwa bukombwa bwa hae? Naa ziba kuli yena ka ku ba Mulena wa Mubuso wo, naa ka sebeza hamoho ni banyani ba hae ba ba zusizwe kwa bafu ili ba ba tozizwe ka moya ku felisa ze tahiseza batu matata—ili sibi ni Diabulosi. (Maro. 5:12; Sin. 20:10) Kacwalo, naa laezi balateleli ba hae kuli ba shaele Mubuso wo ku fitela mafelelezo muinelo wa lifasi le. (Mat. 24:14) Batu ba ba ipapata feela ku ba balateleli ba Kreste ha ba ezi musebezi wo, mi mane ha ba u koni. Kabakalañi? Ka mabaka a malaalu: Libaka la pili ki kuli, ha ba koni ku kutaza lika ze ba sa utwisisi. La bubeli ki kuli, buñata bwa bona ha ba na buikokobezo ni bundume bo bu ba tusa ku tiyela sheununo ni twaniso ye kona ku tahiswa ki ku taluseza bo lu yahile ni bona lushango lwa Mubuso. (Mat. 24:9; 1 Pit. 2:23) Mi la bulalu ki kuli, Bakreste ba buhata ha ba na moya wa Mulimu.—Joa. 14:16, 17.

⁷ Kono balateleli ba Kreste ba niti bona ba utwisisa seo Mubuso wa Mulimu u li sona ni se u ka peta. Hape ba beya za Mubuso wo mwa sibaka sa pili mwa bupilo bwa bona, ili ku u shaela mwa lifasi kaufela ka ku tusiwa ki moya wa Jehova. (Zak. 4:6) Kana mwa abananga kamita mwa musebezi wo? Kana mu sweli ku lika ku bolosola musebezi wa mina wa ku ba mushaeli wa Mubuso, mwendi ka ku tandanga nako ye ñata mwa bukombwa kamba ka ku ba hahulu ni buanyu mwa musebezi wo? Ba bañwi ba likile ku bolosola bukombwa bwa bona ka ku itusisa hande Bibele. Muapositola Paulusi ya naa na ni mukwa wa ku talusanga Mañolo ku ba bañwi naa ñozi kuli: “Linzwi la Mulimu ki le li pila, mi li na ni maata.”—Maheb. 4:12; Lik. 17:2, 3.

8, 9. (a) Ki lika mañi ze ezahezi ze bonisa butokwa bwa ku itusisanga Bibele mwa bukombwa bwa luna? (b) Lu kona cwañi ku ekeza kwa bukwala bwa luna mwa ku itusisa Linzwi la Mulimu?

⁸ Muzwale yo muñwi ha naa kutaza fa ndu ni ndu, naa balezi muuna wa Mukatolika liñolo la Daniele 2:44 ni ku mu taluseza mo Mubuso wa Mulimu u ka tahiseza kozo ni buiketo za niti. Muuna yo a alaba kuli: “Ni itumela hahulu kuli u apuzi Bibele ni ku ni bonisa ze li bulela liñolo ku fita ku ni bulelela feela ka mulomo.” Muzwale yo muñwi ha naa balezi liñolo musali yo muñwi wa bulapeli bwa Orthodox, musali yo naa buzize lipuzo ze nde ze ñata. Mwa taba ye hape, muzwale yo hamoho ni musalaa hae ne ba alabile ka ku itusisa Bibele. Mi hasamulaho, musali yo naa ize: “Kana mwa ziba libaka ha ne ni tabela ku bulela ni mina? Ki kabakala kuli ne mu tile kwa ndu ya ka ni Bibele mi ne mu balile mwateñi.”

⁹ Ki niti kuli lihatiso za luna ki za butokwa mi lu swanela ku li fanga mwa simu. Kono Bibele ki sona siitusiso se lu swanela ku itusisa hahulu. Kacwalo, haiba ha mu na mukwa wa ku itusisanga yona mwa bukombwa bwa mina, kiñi ku sa  itomela sikonkwani sa ku ezanga cwalo? Mwendi mwa kona ku keta mañolo a butokwa a sikai a talusa seo Mubuso wa Mulimu u li sona ni mo u ka feliseza matata a sweli ku bilaeza batu mwa silalanda sa mina. Mi cwale mu itukiseze ku bala mañolo ao ha mu nze mu kutaza fa ndu ni ndu.

Mu Tabele ku Bizwa ka Libizo la Mulimu

10, 11. Ka za ku itusisa libizo la Mulimu, Jesu u shutana cwañi ni batu ba bañata ba ba ipapata ku mu latelela?

¹⁰ “Mu lipaki za ka, ku bulela Muñaa Bupilo, mi ki Na Mulimu.” (Isa. 43:12) Jesu Kreste, Paki yo mutuna wa Jehova, naa ikutwile kuli ki tohonolo ku bizwa ka libizo la Mulimu ni ku li zibahaza. (Mu bale Exoda 3:15; Joani 17:6; Maheberu 2:12.) Mane bakeñisa kuli Jesu naa shaezi libizo la Ndatahe, naa bizizwe “Paki ye sepahala.”—Sin. 1:5; Mat. 6:9.

¹¹ Kono ka ku shutana, buñata bwa batu ba ba ipapata ku yemela Mulimu ni Mwanaa hae ba bonisize moya wa kashwau kwa libizo la Mulimu, mane ba li zwisize mwa Libibele za bona. Ka ku bonisa moya o swana, taelo ye ne i filwe cwanoñu fa kwa mabishopu ba Katolika ne i bulezi kuli “libizo la Mulimu le li yemelwa ki litaku zee ne za Siheberu ze tolokilwe sina YHWH ha li swaneli ku itusiswa kamba ku bulelwa” ka nako ya milapelo. * Munahanelo wo u fosahezi luli!

12. Batanga ba Jehova ne ba fitile cwañi fa ku zibahala hahulu sina batu ba Jehova ka silimo sa 1931?

¹² Ka ku likanyisa Kreste ni “lilu le lituna la lipaki” ba ne ba pilile pili Jesu a si ka taha kale, Bakreste ba niti ba tabela ku itusisa libizo la Mulimu. (Maheb. 12:1) Mane ka silimo sa 1931, batanga ba Mulimu ne ba fitile fa ku zibahala hahulu sina batu ba Jehova ka ku amuhela libizo la Lipaki za Jehova. (Mu bale Isaya 43:10-12.) Kacwalo ka nzila ye ipitezi, balateleli ba Kreste ba niti ne ba fitile fa ku ba sicaba se si bizwa ka ‘libizo la Mulimu.’—Lik. 15:14, 17.

13. Lu kona ku pila cwañi ka ku lumelelana ni libizo la luna le lu filwe ki Mulimu?

¹³ Lu kona ku pila cwañi ka ku lumelelana ni libizo la luna le li ipitezi? Nzila ye ñwi ye lu kona ku eza cwalo ka yona ki ka ku paka za Mulimu ka busepahali. Paulusi naa ñozi kuli: “Mutu ni mutu ya biza Libizo la [Jehova] u ka piliswa. Kono ba ka biza cwañi ye ba si na tumelo ku yena? Mi ba ka lumela ku yena cwañi, ba si ka utwa za hae? Mi ba ka utwa cwañi, mubuleli haa li siyo? Mi ba ka bulela cwañi, ha ba sa lumwi?” (Maro. 10:13-15) Hape, ka maseme lu swanela ku beya fa ngandaleza lituto za bulapeli bwa buhata za sweli ku tamelezwa Mubupi wa luna, ze cwale ka tuto ya lihele la mulilo, ili lituto ze bonisa inge kuli Mulimu ya lilato u na ni mikwa ye situhu ya Diabulosi.—Jer. 7:31; 1 Joa. 4:8; mu bapanye Mareka 9:17-27.

14. Batu ba bañwi ba ezizeñi ha ne ba ituta ka za libizo la Mulimu?

¹⁴ Kana mu ba ba tabile ku bizwa ka libizo la Ndataa mina wa kwa lihalimu? Kana mwa tusanga ba bañwi ku fita fa ku ziba libizo le li kenile leo? Musali yo muñwi wa kwa Paris, mwa France, naa utwile kuli Lipaki za Jehova ba ziba libizo la Mulimu, kacwalo a buza Paki yo muñwi ya naa kopani ni yena kuli a mu bonise libizo leo mwa Bibele ya hae. Ha saa balile Samu 83:18, a ba ni kutwisiso ye nde. A kala ku ituta Bibele mi cwale saa li kaizeli ya sepahala ya sebeleza mwa naha ye ñwi. Musali yo muñwi wa Mukatolika ya pila mwa Australia ha naa boni libizo la Mulimu lwa pili mwa Bibele, naa lilile kabakala tabo. Saa bile paina wa kamita ka lilimo ze ñata cwale. Cwanoñu fa, Lipaki ha ne ba bonisize musali wa kwa Jamaica libizo la Mulimu mwa Bibele ya hae, ni yena naa lotisize mioko ya tabo. Kacwalo, mu tabele ku bizwa ka libizo la Mulimu ni ku tusa batu kaufela ku ziba libizo la butokwa leo, sina mwa naa ezelize Jesu.

“Mu si ke Mwa Lata Lifasi”

15, 16. Bakreste ba niti baa nga cwañi lifasi, mi ki lipuzo mañi ze lu swanela ku ipuza?

¹⁵ “Mu si ke mwa lata lifasi, nihaiba ze mwateñi mwa lifasi; mutu haa lata lifasi, lilato la Ndate ha li yo ku yena.” (1 Joa. 2:15) Lifasi ni mibonelo  ya lona ya nama li lwanisa Jehova ni moya wa hae o kenile. Kacwalo, balateleli ba Kreste ba niti ha ba liki feela ku sa ba kalulo ya lifasi. Ba ikambusa kwa lifasi ha buniti bakeñisa kuli ba ziba kuli “ku lata za lifasi ki ku lwanisa Mulimu,” ku likana ni mwa naa bulelezi mulutiwa Jakobo.—Jak. 4:4.

¹⁶ Ku utwa manzwi a Jakobo ku kona ku ba taata mwa lifasi le, le li na ni miliko ye miñata. (2 Tim. 4:10) Kona libaka Jesu ha naa lapelezi balateleli ba hae kuli: “Ha ni ku lapeli kuli u ba zwise mwa lifasi, kono kuli u ba sileleze kwa bumaswe. Hasi ba lifasi, sina na ha ni si wa lifasi.” (Joa. 17:15, 16) Mu ipuze kuli: ‘Kana ni sweli ku lika ka taata ku sa ba wa lifasi? Kana ba bañwi ba ziba mayemo a ka ka za mikiti ni lizo ze si ka toma fa Mañolo hamohocwalo ni ze ñwi ili zeo mwendi ha li simuluhi kwa lituto za sihedeni kono li bonahalisa moya wa lifasi?’—2 Makor. 6:17; 1 Pit. 4:3, 4.

17. Ki lika mañi ze kona ku susueza batu ba lipilu ze nde kuli ba yeme kwa lineku la Jehova?

¹⁷ Ki niti kuli mayemo a luna aa tomile fa Bibele haa na ku tahisa kuli lu tabelwe ki lifasi, kono a kona ku tahisa kuli batu ba lipilu ze nde ba be ni takazo ya ku bata ku ziba libaka ha lu shutana ni ba bañwi. Kaniti, batu ba ba cwalo ha ba lemuha kuli tumelo ya luna i tomile ka ku tiya mwa Mañolo mi i ama mupilelo wa luna kaufela, ku swana inge ba bulelela batoziwa kuli: “Lu ka ya ni mina; kakuli lu utwile kuli Muñaa Bupilo u inzi ni mina.”—Zak. 8:23.

Mu Bonise Lilato la Sikreste la Niti

18. Ki lika mañi ze amiwa mwa ku bonisa lilato ku Jehova ni batu ba bañwi?

¹⁸ Jesu naa ize: “Lata Mulena Mulimu wa hao, ka pilu ya hao kaufela, ni ka moya wa hao kaufela, ni ka kutwisiso ya hao kaufela,” mi hape naa ize: “Lata wahenu mo u itatela.” (Mat. 22:37, 39) Lilato leo (a·gaʹpe mwa Sigerike) ki lilato le li ama ku ba ni buikalabelo, le li tomile fa sikuka, ni le li swanela, kono hañata li ama maikuto a tiile. Li kona ku ba le lituna hahulu. (1 Pit. 1:22) Li shutana hahulu ni buitati, kakuli li boniswanga ka manzwi ni ka likezo za ku iyakatwa ba bañwi.—Mu bale 1 Makorinte 13:4-7.

19, 20. Mu taluse ze ezahezi ze bonisa maata a lilato la Sikreste.

¹⁹ Ka ku ba kuli lilato ki kalulo ya muselo wa moya o kenile wa Mulimu, li konisa Bakreste ba niti ku eza lika ze ba sa koni ku eza batu ba bañwi, ze cwale ka ku tula saluluti sa mubala, ni ku  ketulula batu ba lizo ni likopano li sili. (Mu bale Joani 13:34, 35; Magal. 5:22) Batu ba ba swana sina lingu ba susuezwa ha ba bona lilato le li cwalo. Ka mutala, mutangana yo muñwi wa Mujuda wa kwa Israel ha naa fumanehile lwa pili kwa mukopano wa Sikreste, naa komokile hahulu ku bona mizwale ba ba li Majuda ni ma-Arab inze ba lapela Jehova hamoho. Seo ne si tahisize kuli a kale ku kopananga kamita mi a amuhela tuto ya Bibele. Kana mwa bonisanga mizwale ba mina lilato le li cwalo le li zwelela kwa pilu? Mi kana mwa amuhelanga hande batu ba banca ba ba taha kwa Ndu ya Mubuso ya mina, ku si na taba ni naha ko ba zwa, mubala wa litalo la bona, kamba mayemo a bona?

²⁰ Ka ku ba Bakreste ba niti, lu lika ka taata ku bonisa lilato kwa batu kaufela. Mwa El Salvador, muhasanyi yo muñwi wa mwanana naa itutanga Bibele ni musali-muhulu wa Mukatolika wa lilimo ze 87 ya naa tiile hahulu mwa keleke ya hae. Zazi le liñwi, musali yo naa kulile hahulu mi a swalwa mwa sipatela. Ha naa kutile kwa ndu, Lipaki ne ba tiloo mu potela ni ku to bona teñi kuli u na ni lico. Ne ba ezize cwalo ibatoo ba ka kweli i liñwi. Ha ku na mutu wa mwa keleke ya musali yo ya naa tiloo mu lekula. Ki lifi ze nee zwile mwateñi? Musali yo a sinya maswaniso a hae, a zwa mwa keleke ya hae, mi a kalisa ku ituta Bibele hape. Kaniti, lilato la Sikreste li maata! Li kona ku fita hahulu batu kwa lipilu ku fita mwaa kona ku ezeza manzwi a ku bulela feela ka mulomo.

21. Lu kona ku ba cwañi ni sepo ya bupilo bwa kwapili ye tiile?

²¹ Ona cwale-cwale fa, Jesu u ka taluseza batu kaufela ba ba ipapata ku mu sebeleza, kuli: “Ha ni si ka mi ziba haisali; mu zwe ku na, mina ba ba sebezanga ze maswe.” (Mat. 7:23) Kacwalo, ha lu beyeñi miselo ye lumbekisa Ndate hamohocwalo ni Mwana. Jesu naa ize: “Mutu kaufela ya utwa manzwi a ka ao, mi a ya ka ona, ni ka mu likanyisa ni muuna ya na ni ngana, ya yahile ndu ya hae fa licwe.” (Mat. 7:24) Kaniti, haiba lu bonisa kuli lu balateleli ba Kreste ba niti, lu ka shemubiwa ki Mulimu, mi lu ka ba ni sepo ya bupilo bwa kwapili ye tiile, inge ye tomile fa licwe!

[Litaluso za kwatasi]

Kana Mwa Hupula?

• Balateleli ba Kreste ba niti ba shutana cwañi ni ba buhata?

• Mu punde “miselo” ye miñwi ye zibahaza Bakreste ba niti.

• Kuli mu kone ku beya miselo ya Sikreste, ki likonkwani mañi ze mu kona ku itomela?

[Lipuzo za Tuto]

[Siswaniso se si fa likepe 13]

Kana mu na ni mukwa wa ku itusisanga Bibele mwa bukombwa bwa mina kamita?

[Siswaniso se si fa likepe 15]

Kana batu ba bañwi ba ziba mayemo a mina ka za mikiti ye si ka toma fa Mañolo?