Mu Lumbeke Mulimu ka Lizazi ni Lizazi la Bupilo Bwa Mina

WALISAMU Davida naa lapezi ku Jehova kuli: “U ni utwise mukekecima wa hao isali kakusasa . . . U ni bonise nzila ye ni swanezi ku ya ka yona.” (Samu 143:8) Ha mu zuhanga kakusasana ni ku itumela ku Jehova kwa ku mi fa bupilo mwa lizazi leo, kana mwa likanyisanga Davida ka ku kupa Jehova kuli a mi etelele ha mu eza liketo ni kuli mu eze likezo ze nde? Ku si na ku kakanya, mwa ezanga cwalo.

Ka ku ba batanga ba Jehova ba ba ineezi, ‘niha lu ca, niha lu nwa, niha lu eza nto ye ñwi,’ lu likanga ka taata ku eza “linto kaufela kuli Mulimu a lumbekwe ka zona.” (1 Makor. 10:31) Lwa ziba kuli mo lu pilela ka zazi ni zazi ku kona ku kutekehisa Jehova kamba ku mu shwaulisa. Hape lwa ziba kuli Linzwi la Mulimu li bulela kuli Satani u sweli ku tama banyani ba Kreste litaba—mi mane ni batanga ba Mulimu kaufela ba fa lifasi, mi u eza cwalo “musihali ni busihu.” (Sin. 12:10) Kacwalo, lu ikatulezi ku fa kalabo kwa litamilikezo za Satani ni ku tabisa pilu ya Jehova ka ku sebeleza Ndataa luna wa kwa lihalimu “musihali ni busihu.”—Sin. 7:15; Liprov. 27:11.

Ha lu nyakisiseñi ka bukuswani linzila ze peli za butokwa mo lu kona ku lumbekela Mulimu ka lizazi ni lizazi la bupilo bwa luna. Nzila ya pili i ama ku ziba lika za butokwa ku fita, mi ya bubeli i ama ku iyakatwa ba bañwi.

Ku Pila ka ku Lumelelana ni Sepiso ya Luna

Ha ne lu ineezi ku Jehova, ne lu bonisize takazo ya luna ye zwelela kwa pilu ya ku mu sebeleza. Hape ne lu sepisize Jehova kuli lu ka zamaya mwa linzila za hae ka ‘mazazi kaufela’—mane ku ya ku ile. (Samu 61:5, 8) Kacwalo, lu kona ku pila cwañi ka ku lumelelana ni sepiso yeo? Lu kona ku bonisa cwañi lilato la luna le li zwelela kwa pilu ku Jehova ka zazi ni zazi?

Linzwi la Mulimu li bonisa hande buikalabelo bwa bata Jehova kuli lu eze. (Deut. 10:12, 13) Bo buñwi bwa buikalabelo bo, bu bonisizwe mwa mbokisi ye fa likepe 22 ye na ni toho ya taba ye li , “Buikalabelo Bwa lu File Mulimu.” Misebezi yeo kaufela i zwa ku Mulimu mi kacwalo ki ya butokwa. Lu kona ku keta cwañi musebezi o lu swanela ku eza pili haiba ku na ni misebezi ye mibeli kamba ku fitelela ye lu tokwa ku eza ka nako ye swana?

Lu swanela ku eza pili misebezi ye ama sebelezo ya luna ku Mulimu, ili ye kopanyeleza ku ituta Bibele, ku lapela, mikopano ya Sikreste, ni bukombwa. (Mat. 6:33; Joa. 4:34; 1 Pit. 2:9) Niteñi, ha lu koni ku eza misebezi ya kwa moya lizazi mutumbi. Tomahanyo ya luna i swanela ku kopanyeleza mubeleko wa luna, sikolo, ni misebezi ye miñata ya fa lapa. Nihakulicwalo, lu swanela ku lika ka taata ku ba ni tomahanyo ye lu konisa ku eza mubeleko wa luna ni misebezi ye miñwi kono inge lu sa filikanyi sebelezo ya luna ku Mulimu, ye cwale ka ku fumaneha kwa mikopano ya Sikreste. Ka mutala, ha lu lela za ku ba ni pumulo, lu swanela ku bona teñi kuli ha lu na ku shuta poto ya muokameli wa mupotoloho, mukopano o ipitezi wa lizazi li li liñwi, mukopano wa mupotoloho kamba wa sikiliti. Ka linako ze ñwi, lwa kona ku eza misebezi ye miñwi ka nako ye swana. Ka mutala, lwa kona ku eza tukiso ya ku yo kenisanga Ndu ya Mubuso sina lubasi kamba ku itusisa nako ya musihali ya ku pumula ha lu li kwa mubeleko kamba kwa sikolo ku fa bupaki kwa balikani ba luna kamba be lu kena ni bona sikolo. Kaniti, nako kaufela fo lu tokwela ku eza keto mwa bupilo bwa luna—inge cwalo ku fumana musebezi, ku keta sikolo kwa ku yo kenela, kamba ku keta balikani—lu bata ku eza liketo ze lumelelana ni nto ya butokwa ka  ku fitisisa mwa bupilo bwa luna, ili ku lapela Jehova, Ndataa luna ya lilato.—Muek. 12:13.

Mu Iyakatwe ba Bañwi

Jehova u bata kuli lu iyakatwe ba bañwi ni kuli lu ba eze hande. Kono Satani u susueza moya wa buitati. Lifasi la hae li tezi batu ba ba li “baitati” ni “ba ba lata minyaka,” hamohocwalo ni ba ba “calela nama.” (2 Tim. 3:1-5; Magal. 6:8) Batu ba bañata ha ba iyakatwangi hahulu ka za mo likezo za bona li amela ba bañwi. “Misebezi ya nama” i bonahala kai ni kai.—Magal. 5:19-21.

Kono batu ba ba zamaiswa ki moya o kenile wa Jehova ba na ni mubonelo o shutana hahulu ni o atile mwa lifasi; bona ba bonisa lilato, musa, ni bunde ha ba sebelisana ni ba bañwi. (Magal. 5:22) Linzwi la Mulimu li lu bulelela kuli lu iyakatwange hahulu ze ba tokwa ba bañwi ku fita mo lu iyakatwela za luna. Kacwalo, lu swanela ku iyakatwa za ba bañwi, nihaike kuli lu tokwa ku tokomela kuli ha lu ikenyi mwa litaba za bona. (1 Makor. 10:24, 33; Mafil. 2:3, 4; 1 Pit. 4:15) Sihulu lu iyakatwa balumeli sina luna. Kono hape lu satalala ku tusa batu ba ba si balumeli. (Magal. 6:10) Kana mwa kona ku lika ku fumana kolo kacenu ya ku bonisa sishemo ku mutu ye mu ka katana?—Mu bone taba ye mwa mbokisi fa likepe 23 ye na ni toho ya taba ye li , “Mu Iyakatwe Bona.”

 Ha mu tokwi ku iyakatwanga feela ba bañwi ka linako ze ipitezi kamba mwa miinelo ye miñwi. (Magal. 6:2; Maef. 5:2; 1 Mates. 4:9, 10) Kono zazi ni zazi lu swanela ku lika ku lemuha miinelo ya ba bañwi ni ku itatela ku ba fa tuso, nihaike kuli mwendi ku eza cwalo ku kona ku ba taata. Lu bata ku fana nto ifi kamba ifi ye lu na ni—ibe nako, maluwo, yeloseli, ni butali. Jehova u lu sepisa kuli haiba lu ba ni bufani ku ba bañwi, ni yena u ka ba ni bufani ku luna.—Liprov. 11:25; Luka 6:38.

Ku Sebeleza Mulimu “Musihali ni Busihu”

Kana luli kwa konahala ku sebeleza Jehova “musihali ni busihu”? Kwa konahala, mi lu kona ku eza cwalo ka ku tukufalelwa ku eza misebezi kaufela ya bulapeli bwa luna ka nako kaufela. (Lik. 20:31) Lwa kona ku ba ni ze ñata za ku eza mwa sebelezo ya Mulimu ka ku bala ni ku yeya Linzwi la Mulimu ka zazi ni zazi, ka ku lapela ka ku sa lisela, ka ku lika ka taata ku fumanehanga kwa mikopano kaufela, ni ka ku fa bupaki fo lu fumanela kolo kaufela.—Samu 1:2; Luka 2:37; Lik. 4:20; 1 Mates. 3:10; 5:17.

Kana ka butu lu sweli ku sebeleza Jehova cwalo? Haiba lu sweli lwa eza cwalo, bupilo bwa luna bwa ka zazi ni zazi bu ka bonisa kuli lu na ni takazo ya ku tabisa Jehova ni ku fa kalabo kwa litamilikezo za Satani. Lu lika ka taata ku lumbeka Jehova mwa lika kaufela ze lu eza ni mwa miinelo kaufela ye lu ipumana ku yona. Lu lumeleza likuka za hae ku lu tusa ku ba ni mubulelelo ni muzamao o munde ni ku lu etelela mwa liketo ze lu eza. Lu bonisa kuli lwa itebuha pabalelo ya hae ni tuso ya lu fa ka ku mu sepa ka ku tala ni ku itusisa maata a luna kaufela ku mu sebeleza. Mi lu amuhela kelezo ni kalimelo ya hae ha lu palelwa ku latelela likuka za hae kabakala ku sa petahala.—Samu 32:5; 119:97; Liprov. 3:25, 26; Makolo. 3:17; Maheb. 6:11, 12.

Ha lu zweleñipili ku lumbeka Mulimu ka lizazi ni lizazi la bupilo bwa luna. Ka ku eza cwalo, lu ka fumanela mioya ya luna pumulo mi lu ka ikola pabalelo ye lilato ya Ndataa luna wa kwa lihalimu ku ya ku ile.—Mat. 11:29; Sin. 7:16, 17.

[Mbokisi/Maswaniso a fa likepe 22]

“Buikalabelo Bwa lu File Mulimu”

• Ku lapela hañata.—Maro. 12:12.

• Ku bala ni ku ituta Bibele, ni ku sebelisa ze lu ituta.—Samu 1:2; 1 Tim. 4:15.

• Ku lapela Jehova mwa puteho.—Samu 35:18; Maheb. 10:24, 25.

• Ku babalela mabasi a luna kwa mubili, kwa moya, ni mwa maikuto.—1 Tim. 5:8.

• Ku kutaza taba ye nde ya Mubuso, ni ku tahisa balutiwa.—Mat. 24:14; 28:19, 20.

• Ku ipabalela kwa mubili, kwa moya, ni mwa maikuto, ko ku kopanyeleza ku lukisanga nako ya ku ishumusa.—Mare. 6:31; 2 Makor. 7:1; 1 Tim. 4:8, 16.

• Ku tokomela misebezi ye lu filwe mwa puteho.—Lik. 20:28; 1 Tim. 3:1.

• Ku iyakatwa za ponahalo ya ndu ya luna ni Ndu ya Mubuso.—1 Makor. 10:32.

[Mbokisi/Siswaniso se si fa likepe 23]

Mu Iyakatwe Bona

• Muzwale kamba kaizeli wa musupali.—Liv. 19:32.

• Mutu ya kula kwa mubili kamba mwa maikuto.—Liprov. 14:21.

• Muzwale kamba kaizeli wa mwa puteho ya tokwa hahulu nto ye mu kona ku fa.—Maro. 12:13.

• Mutu ye mu pepwa ni yena.—1 Tim. 5:4, 8.

• Mulumeli sina mina ya shwezwi ki muuna kamba musalaa hae.—1 Tim. 5:9.

• Eluda ya beleka ka taata mwa puteho ya mina.—1 Mates. 5:12, 13; 1 Tim. 5:17.