Puso ya Satani I Tamehile ku Palelwa
Puso ya Satani I Tamehile ku Palelwa
“Ya maswe haa na ku pila mwa buiketo.”—MUEK. 8:13.
1. Ki kabakalañi katulo ya ba ba maswe ye taha ha i li taba ye omba-omba?
MWA nako ya kwapili, ba ba maswe ba ka atulwa. Ba ka tokwa ku ikalabela kabakala ze ba ezize. (Liprov. 5:22; Muek. 8:12, 13) Yeo ki taba ye omba-omba sihulu kwa batu ba ba lata ku luka ni ba ba ezizwe maswe ni ku nyandiswa ki batu ba ba maswe. Ya zwile mubano mwahalaa batu ba ba maswe ba ba ka atulwa ki ndatahe bumaswe, yena Satani Diabulosi.—Joa. 8:44.
2. Ki kabakalañi ha ne ku swanela ku fita nako kuli taba ye nee zuhile mwa Edeni i tatululwe?
2 Kwamulaho koo, mwa simu ya Edeni, Satani naa ikutwile butuna mi a tahiseza batu ku hana puso ya Jehova. Ze nee zwile mwateñi ki kuli bashemi ba luna ba pili ne ba swalisani ni Satani ku lwanisa tamaiso ye lukile ya Jehova mi ba fetuha baezalibi mwa meeto a Mulimu. (Maro. 5:12-14) Kaniti, Jehova naa ziba ze nee ka ba tahela kabakala kashwau ni bukwenuheli bwa bona. Niteñi, ne ku tokwahala kuli libupiwa ze butali kaufela li bone kozi yeo. Kacwalo, ne ku swanela ku fita nako kuli taba ye i tatululwe ni ku bonisa fo ku sweu kuli bakwenuheli bao ne ba fosize luli.
3. Lu swanela kuu nga cwañi mibuso ya batu?
3 Bakeñisa kuli batu ne ba hanile tamaiso ya Jehova, ne ba na ni ku itomela mibuso. Muapositola Paulusi ha naa ñolela balumeli ba mwa Roma, naa talusize mibuso ya batu yeo sina “ba ba beilwe fa bulena.” Mwa nako ya Paulusi, ba ba beilwe fa bulena sihulu nee li mubuso wa Roma o ne u etelezwi ki Mubusi Nero, ya naa busize ku zwa 54 C.E. ku isa 68 C.E. Paulusi naa bulezi kuli bulena bo bu cwalo “bu tomilwe ki Mulimu.” (Mu bale Maroma 13:1, 2.) Kana Paulusi naa talusa kuli lipuso za batu li yemela puso ya Mulimu? Batili. Naa talusa feela kuli Bakreste ba swanela ku kuteka “se si tomilwe ki Mulimu” ni ku amuhela babusi ba ba cwalo ibile feela kuli Jehova u lumelelize puso ya bona ku ba teñi.
Nzila ye Libisa Kwa Sinyeho
4. Mu taluse mabaka puso ya batu ha i tamehile ku palelwa.
4 Niteñi, puso ya batu ye zamaiswa ki Satani i tamehile ku palelwa. Kabakalañi? Kabakala kuli ha i si ka toma fa butali bwa Mulimu. Ki Jehova feela ya na ni butali bo bu petehile. Kacwalo, ki yena feela ya kona ku tahisa puso ye nde. (Jer. 8:9; Maro. 16:27) Ka ku sa swana ni batu ba ba ezanga lika ka ku lika-lika feela, Jehova kamita wa ziba nzila ye nde ya ku eza lika ka yona. Puso kaufela ye sa lateleli ketelelo ya hae i tamehile ku palelwa. Ka libaka leo li nosi—lu sa buleli mulelo o maswe wa babusi—mubusezo wa naa ketile Satani wa ku itusisa puso ya batu ne u tamehile ku palelwa ku kala feela kwa makalelo.
5, 6. Ki lika mañi mwendi ze nee tahiselize Satani ku lwanisa Jehova?
5 Mutu ya na ni ngana hañata haa kalisangi musebezi wa ziba kuli u ka pala. Haiba a ñañelela ku zwelapili ku eza musebezi wo, mafelelezo u ka iponela mafosisa a hae. Litaba ze ezahezi se li bonisize hañata-ñata kuli ki butoto ku lwanisa Mubupi ya maata ote. (Mu bale Liproverbia 21:30.) Niteñi, Satani ka ku pumiwa ki buikuhumuso ni maikuto a kuli ki yo mutuna, a kwenuhela Jehova. Kacwalo, ka ku sa nahana hande, Diabulosi naa ketile nzila ye nee kona ku mu libisa feela kwa sinyeho.
6 Moya wa buikanyiso wa Satani hasamulaho ne u bonisizwe ki mubusi wa Babilona ya naa itundumuzi kuli: “Ni ka kambamela kwa lihalimu, ni beye lubona lwa ka fahalimwaa linaleli za Mulimu, ni ine fa lilundu la mukopano kwa mafelelezo a Mutulo; ni ka pahama fahalimwaa malu, mane ni likane ni Muambakani-Ya-Pahami.” (Isa. 14:13-15) Musebezi wa butoto wa naa bata ku eza mubusi yo ne u palile, mi bulena bwa Babilona ne bu felile ka nzila ye swabisa. Ka ku swana, Satani ni lifasi la hae ba tuha ba yundiswa.
Ki Kabakalañi Mulimu Haa Tuhelezi Libupiwa Tukuluho?
7, 8. Ki lika mañi ze ñwi ze nde ze bile teñi Jehova haa tuhelezi bumaswe ka nakonyana?
7 Ba bañwi ba kana ba buza libaka Jehova ha naa si ka hanisa batu ku yema hamoho ni Satani ni kuli ba si ke ba latelela puso ya Satani ye nee tamehile ku pala. Ka ku ba Mulimu ya Maata Ote, naa kona ku eza cwalo luli. (Ex. 6:3) Kono naa si ka eza cwalo. Ka ku itusisa butali bwa hae, naa boni kuli ku sa ikenya mwa litaba za bukwenuheli bwa batu ka swalelele ne ku ka tahisa ze nde kwapili. Kwa mafelelezo, Jehova naa ka bubaniswa sina Mubusi ya lukile ni ya lilato, mi batu ba ba sepahala ne ba ka tusiwa ki katulo ya Mulimu yeo.
8 Batu ne ba si ke ba kena mwa makayamana kambe ne ba hanile kukuezo ya Satani ni ku hana ku itukulula kwa puso ya Mulimu. Niteñi, katulo ya Jehova ya ku tuhelela batu ku ipusa ka nakonyana i tahisize ze nde. I tahiselize batu ba lipilu ze nde ku lemuha butali bwa ku teeleza ku Mulimu ni ku mu sepa. Mwahalaa lilimo ze ñata-ñata ze felile, batu ba likile lipuso ze ñata, kono ha ku na ni ye kana ye bile ye nde. Taba yeo i tusize balapeli ba Mulimu ku ba ni buikolwiso bo bu tiile bwa kuli puso ya Jehova ki yona ye nde ka ku fitisisa. Ki niti kuli kezo ya Jehova ya ku lumeleza puso ye maswe ya Satani i tahiselize batu matata ku kopanyeleza cwalo ni balapeli ba Mulimu ba ba sepahala. Niteñi, ku tuhelela bumaswe ka swalelele hape ku tahisize ze nde kwa balapeli ba ba sepahala ba.
Bukwenuheli bo bu Lumbekisize Jehova
9, 10. Mu taluse mo puso ya Satani i lumbekiseza Jehova.
9 Ku tuhelela batu ku kukuezwa ki Satani ni ku ipusa ha ku si ka tahisa kuli puso ya Jehova i limbululwe. Kono mane ku bonisize bunde bwa puso ya Mulimu. Litaba ze ezahezi li bonisa buniti bwa manzwi a Jeremia, a naa bulezi ka ketelelo ya moya o kenile, a kuli batu ha ba na maata a ku itamaisa. (Mu bale Jeremia 10:23.) Mi hape, bukwenuheli bwa Satani bu file Jehova kolo ya ku bonisa mikwa ya Hae ye minde ka nzila ye iponahalela hande. Kamukwaufi?
10 Ze maswe ze zwile mwa puso ya Satani li tahisa kuli mikwa ya Jehova ye minde i kone ku iponelwa hande ku fita ni mo ne i ka bonahalela kambe ne ku si na bukwenuheli bwa Satani. Kamukwaocwalo, batu ba ba lata Mulimu ba fitile fa ku lemuha butuna bwa hae. Kaniti, puso ya Satani niha i lwanisana ni ya Jehova, niti kikuli i tusize ku lumbekisa Mulimu. I bonisize Jehova mwaa talimezi hande taba ya ku lwaniswa kwa bubusi bwa hae. Kuli lu utwisise hande taba ye, ha lu nyakisiseñi ka bukuswani mikwa ye miñwi ya Jehova ni ku bona mo puso ye maswe ya Satani i tahiselize Jehova ku bonisa mikwa ye minde yeo ka linzila ze ñwi.
11. Lilato la Jehova li bonisizwe cwañi?
11 Lilato. Mañolo a lu taluseza kuli “Mulimu u lilato.” (1 Joa. 4:8) Sapili, Mulimu naa bonisize lilato ha naa bupile batu. Ku zwa fo, mo lu bupezwi ka mukwa o sabisa ni o komokisa ku bonisa kuli Mulimu u lilato. Jehova hape ka lilato naa file batu lihae le linde mo ne ku na ni lika kaufela ze nee tokwahala kuli ba be ni tabo. (Gen. 1:29-31; 2:8, 9; Samu 139:14-16) Kono batu ha se ba tahezwi ki bumaswe, Jehova naa bonisize lilato la hae ka linzila li sili. Kamukwaufi? Muapositola Joani naa ñozi manzwi a naa bulezi Jesu, aa li: “Mulimu u latile lifasi hahulu, mane u li file Mwanaa hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.” (Joa. 3:16) Kana Mulimu naa ka bonisa lilato la hae kwa batu ka nzila ye ñwi ye fita ku luma Mwanaa hae wa libanda fa lifasi kuli a to liulula baezalibi? (Joa. 15:13) Ku bonisa lilato ka nzila ye tuna yeo hape ne ku tomezi batu mutala wa ku bonisa lilato la Mulimu la buitomboli mwa bupilo bwa bona bwa ka zazi ni zazi, sina mwa naa ezelize Jesu.—Joa. 17:25, 26.
12. Maata a Jehova a boniswa cwañi?
12 Maata. Ki Mulimu feela ya “Ya-Mata-Kaufela,” ya na ni maata a ku fa bupilo. (Sin. 11:17; Samu 36:9) Mutu haa pepwa, ka mubulelelo o muñwi, u swana feela inge pampili ye si ka ñolwa se siñwi. Haa shwa, u talize pampili yeo ka likatulo, likezo, ni ze ezahezi mwa bupilo bwa hae ze bonahalize butu ni mikwa ya hae. Litaba zeo za kona ku bulukiwa mwa munahano wa Jehova. Ka nako ye tomilwe, Jehova wa kona ku kutiseza mutu yo kwa bupilo hape, ka mwa naa inezi. (Joa. 5:28, 29) Kacwalo, nihaike kuli kwa makalelo Mulimu naa si ka lela kuli batu ba shwange, lifu li file Jehova kolo ya ku bonisa kuli mane u na ni maata a ku zusa nihaiba bafu. Kaniti, Jehova ki “Mulimu, Ya-Mata-Kaufela.”
13. Sitabelo sa Jesu ne si bonisize cwañi katulo ye lukile ya Jehova?
13 Katulo ye Lukile. Jehova haa pumi, mi haa koni ku eza ka ku sa luka. (Deut. 32:4; Tite 1:2) Kamita u kumalelanga kwa likuka za hae ze pahami za niti ni ze lukile, niha ikutwa bumaswe ha eza cwalo. (Maro. 8:32) Kaniti, Jehova naa utwile butuku bo butuna ha naa nza bona Mwanaa hae ya latiwa inze a shwa fa kota ya linyando inge kuli Jesu naa li munyefuli ya sa sepahali. Kono kabakala lilato la hae kwa batu ba ba si ka petahala, Jehova naa itatezi ku lumeleza kezo ye butuku yeo ku ezahala ilikuli a kumalele kwa sikuka sa hae se si petehile sa katulo ye lukile. (Mu bale Maroma 5:18-21.) Lifasi le li tezi sobozi ne li file Jehova kolo ya ku bonisa kuli ki yena simbule sa katulo ye lukile.
14, 15. Ki mwa linzila lifi ze ñwi mo Jehova a bonisize butali bwa hae bo butuna ni pilu-telele?
14 Butali. Bo Adama ni Eva ba mano eza sibi, Jehova naa patuluzi mwa naa ka feliseza bumaswe kaufela bo ne bu tahisizwe ki bukwenuheli bwa bona. (Gen. 3:15) Muhato wa kapili-pili wo, hamohocwalo ni mwa naa patululezi hanyinyani-hanyinyani litaba ka za mulelo wa hae wo kwa batanga ba hae, ne li bonahalisize hande butali bwa Jehova. (Maro. 11:33) Ha ku na se si kona ku palelwisa Mulimu ku tatulula hande litaba. Mwa lifasi le li tezi mizamao ye maswe, lindwa, kutokwa kutwisiso, ku sa utwa, kutokwa sishemo, sobozi, ni buipi, Jehova u bile ni kolo ye tuna ya ku bonisa libupiwa za hae seo butali luli bu li sona. Mulutiwa Jakobo naa ize: “Butali bo bu zwa kwahalimu, pili ki bo bu kenile, hape bu na ni kozo, ni musa, ni makeke, bu tezi sishemo, ni miselo ye munati, ha bu na sishweka, ha bu na muipo.”—Jak. 3:17.
15 Pilu-telele. Pilu-telele ya Jehova ne i si ke ya zibahala hahulu kambe kuli ne ku si na tokwahalo ya kuli a talime za matata a ku sa petahala kwa batu, ni libi ni bufokoli bwa bona. Jehova haa itatezi ku eza cwalo ka lilimo na lilimo u bonisa kuli u na ni pilu-telele ka mukwa o petehile, mi lu swanela ku itebuha hahulu taba yeo. Muapositola Pitrosi naa bulezi kuli lu swanela ku “[lemuha] kuli, ku iswala kwa Mulena, ki ku piliswa kwa batu.”—2 Pit. 3:9, 15.
16. Ki kabakalañi ku lata ku swalela kwa Jehova ha ku lu fa tabo ye tuna?
16 Ku Lata ku Swalela. Kaufela luna lu baezalibi, mi kaufela lu fosa mwa linto ze ñata. (Jak. 3:2; 1 Joa. 1:8, 9) Lu swanela ku itebuha hahulu kuli Jehova “haa katali” ku swalela, mi wa lata ku eza cwalo. (Isa. 55:7) Hape ha mu nyakisise taba ye: Bakeñisa kuli lu pepilwe lu li baezalibi, lwa ziba tabo ye tuna ye tahiswa ki ku swalelwa lifoso za luna ki Mulimu. (Samu 51:5, 9, 17) Ku swalelwa lifoso za luna ki Jehova ku tiisa lilato la luna ku yena mi ku lu susueza ku mu likanyisa ha lu sebelisana ni ba bañwi.—Mu bale Makolose 3:13.
Libaka Lifasi ha li Kula
17, 18. Puso ya Satani i palezwi ka linzila lifi?
17 Lifasi la Satani kaufela—lona le li tahisizwe ki puso ya hae—se li palezwi hañata-ñata mi li zwezipili ku palelwa mwahalaa lilimo na lilimo ze fitile. Ka 1991, mutende o bizwa The European ne u ize: “Kana lifasi la kula? Eni, kono haki Mulimu ya li kulisa—butuku bwa lifasi bu zwa kwa batu ba ba pila ku lona.” Yeo ki taba ya niti! Ka ku kukuezwa ki Satani, bashemi ba luna ba pili ne ba ketile puso ya butu ku fita ya Jehova. Mi ka ku eza cwalo, ne ba kalisize puso ye nee tamehile ku palelwa. Masitapilu ni matomola e ba ipumana ku zona batu mwa lifasi kaufela ki lisupo ze bonisa kuli puso ya butu i unjamwi ki butuku bo bumaswe.
18 Puso ya Satani i susueza moya wa buitati. Nihakulicwalo, buitati ha bu na ku tula lilato ni kamuta, ili lona fo ku tomile puso ya Jehova. Puso ya Satani i palezwi ku lukisa lika, ku tahisa tabo, kamba buiketo. Puso ya Jehova i zwelapili ku bubaniswa! Kana lu na ni bupaki bo bu bonisa cwalo mwa miteñi ya luna? Eni, mi lu ka bona seo mwa taba ye tatama.
Lu Itutileñi ka za Bubusi ha lu Balile . . .
[Lipuzo za Tuto]
[Siswaniso se si fa likepe 25]
Puso ya Satani ha i si ka tusa batu ni kamuta
[Manzwi a bañi ba maswaniso]
U.S. Army photo
WHO photo by P. Almasy
[Siswaniso se si fa likepe 26]
Jehova u na ni maata a ku zusa nihaiba bafu
[Siswaniso se si fa likepe 27]
Lilato la Jehova ni katulo ya hae ye lukile ne li bonisizwe ka sitabelo sa Mwanaa hae