Lipuzo ze Zwa Kwa Babali

Ki miinelo mañi ye kona ku tahiseza mutu ku nahana za ku kolobezwa sinca?

Kabakala miinelo ye miñwi, mutu ya kolobelizwe a kana a bata ku nahanisisa ka za haiba kolobezo ya hae ne i bile ya luli, mi a kana a nahana za ku kolobezwa sinca. Ka mutala, ka nako ya kolobezo, mwendi mutu yo naa pila mwa muinelo o muñwi kwa mukunda kamba naa na ni mukwa o muñwi o no kona ku tahisa kuli a zwisiwe mwa puteho kambe kuli naa kolobelizwe kale. Kana mutu yo naa kona ku ineela ku Mulimu inze a li mwa miinelo ye cwalo? Mutu yo naa kona feela ku ineela ku Jehova ha buniti kambe kuli naa tuhezi muzamao wa hae o sa lumelelani ni Mañolo. Kacwalo, mutu ya naa kolobelizwe inze a na ni muinelo o cwalo o maswe hahulu ili o no tibela zwelopili ya hae, a kana a nahana za ku kolobezwa sinca.

Ku cwañi ka za mutu ili yo ka nako ya naa kolobezwa naa sa ezi sibi kono naa tilo eza nto ye ñwi hamulaho wa kolobezo, ili nto ye nee tokwa katengo ka buatuli? Ku cwañi haiba a bulela kuli, naa si ka utwisisa ka ku tala sa naa eza ka nako ya naa kolobezwa ni kuli kolobezo ya hae ne i si ka ba ya luli? Maeluda ha ba kopana ni sifosi, ha ba swaneli ku honona kolobezo ya hae ni ku mu buza ka za haiba u ikutwa kuli buineelo ni kolobezo ya hae nee li za luli. Ha ni li , mutu yo naa utwile ngambolo ye tomile fa Mañolo ye bonisa taluso ya kolobezo. Naa alabile ka ku tiya lipuzo ze ama buineelo ni kolobezo. Mi naa cincize liapalo za hae ni ku nweliswa mwa mezi. Kacwalo, lwa swanela ku lumela kuli naa utwisisize ka ku tala butokwa bwa sa naa eza. Kabakaleo, maeluda ba ka mu nga sina mutu ya kolobelizwe.

Haiba mutu yo a tahisa taba ya ku kakanya kuli kolobezo ya hae nee li ya luli, maeluda ba kana ba libisa mamelelo ya hae kwa The Watchtower ya March 1, 1960, makepe 159 ni 160, ni ya February 15, 1964, makepe 123 ku isa 126, ili mo taba ya ku kolobezwa sinca i talusizwe ka butungi. Ku kolobezwa sinca ko ku tahiswa ki miinelo ye miñwi (ye cwale ka kutokwa kutwisiso ye likani ya Bibele ka nako ya naa kolobezwa mutu) ki keto ya ka butu.

Ki lika mañi ze ba swanela ku nyakisisa Bakreste ka za taba ya ku pila hamoho ni ba bañwi mwa ndu ye swana?

Mutu ni mutu u tokwa sibaka sa ku pila ku sona. Niteñi, kacenu batu ba bañata ha ba na mandu a bona beñi. Miinelo ya za mali ya mutu, buikangulo bwa hae, kamba lika ze ñwi li kona ku tahisa kuli mabasi a mwa mikowa, ku kopanyeleza cwalo ni bahabo ba bañwi ba pile hamoho. Mwa libaka ze ñwi za lifasi, banabahabo ba bañata ba kona ku pila mwa muzuzu u li muñwi mo ku si na hande mukunda.

Haki buikalabelo bwa kopano ya Jehova ku fa mukoloko o mutelele wa milao ye bonisa mandu a swanela e ba lukela ku pila ku ona batu kaufela ba mwa puteho ya lifasi kaufela. Bakreste ba susuezwa ku nahanisisa taba ye ka ku nyakisisa likuka za mwa Mañolo kuli ba zibe nji litukiso za bona za mwa ku pilela li lukile  mwa meeto a Mulimu kamba kutokwa. Ki lifi ze ñwi za likuka zeo?

Taba ya pili ye swanelwa ku nyakisiswa ki ya ze kona ku ezahala ku luna ni kwa buikangulo bwa luna bwa kwa moya haiba lu pila ni batu ba bañwi. Lu swanela ku ipuza kuli, Batu ba ki bomañi? Kana ki balapeli ba Jehova? Kana ba pila ka ku lumelelana ni likuka za Bibele? Muapositola Paulusi naa ñozi kuli: “Mu si ke mwa ipuma: Litwaelano ze maswe li sinya mikwa ye minde.”—1 Makor. 15:33.

Mañolo a talusa kuli Jehova u nyaza buhule ni bubuki. (Maheb. 13:4) Kacwalo, litukiso kaufela za malobalo ze lumeleza batu ba ba si ka nyalana ku pila hamoho sina muuna ni musali ba ba nyalani, ha li amuhelwi ki Mulimu. Mukreste haa lukeli ku pila mwa sibaka mo ku lumelezwa buhule.

Ku tuha fo, Bibele i susueza batu kaufela ba ba bata ku shemubiwa ki Mulimu kuli ba “sabe buhule.” (1 Makor. 6:18) Kacwalo, Bakreste ne ba ka eza hande ku ambuka litukiso kaufela za mwa ku pilela ze kona ku ba tahiseza muliko wa ku ikenya mwa muzamao o maswe. Ka mutala, mu nahane muinelo mo Bakreste ba sikai ba lobala mwa ndu ye swana. Kana tukiso ye cwalo ya kona ku kenya mutu mwa muliko? Ku cwañi haiba batu ba babeli ba ba si ka nyalana ba ipumana ba nosi bakeñisa kuli ba bañwi bo ba banga ni bona ha ba yo ka nakonyana? Ka ku swana, batu ba ba si ka nyalana ili ba ba tabelana ba kona ku tahelwa ki kozi ya ku ikenya mwa muzamao o maswe haiba ba pila mwa ndu ye swana. Lu bonisa butali ha lu ambuka miinelo ye cwalo.

Kamukwaoswana, ne ku si ke kwa ba hande kuli batu ba ba felisize linyalo la bona ka telekano ba zwelepili ku pila mwa ndu ye swana. Bakeñisa kuli ne ba twaezi ku pila sina muuna ni musali ba ba nyalani, ku kona ku ba bela hahulu bunolo ku fosa.—Liprov. 22:3.

Taba ye ñwi ya butokwa ye swanela ku nyakisiswa ki ya mo liketo za mutu li kona ku ngelwa mwa silalanda. Litukiso za mwa ku pilela za nga Mukreste kuli li lukile kono ili ze nyaziwa ki batu ba mwa silalanda li swanela ku tahiseza Mukreste yo ku eza se siñwi. Ni kamuta ha lu tabeli ku shwaulisa libizo la Jehova ka muzamao wa luna. Paulusi naa bulezi taba yeo cwana: “Mu si ke mwa fa mutu libaka la ku wa, nihaiba kwa Majuda kamba Magerike, kamba ku ba Keleke ya Mulimu; mo ni ezeza na, ha ni kolisa batu kaufela, ni sa yi ka ze ni swanela na feela; kono ni ya ka ze swanela ba bañata, kuli ba piliswe.”—1 Makor. 10:32, 33.

Ku fumana makundamo a swanela ni ku eza litukiso ze swanela za mwa ku pilela ku kona ku ba taata hahulu kwa batu ba ba tabela ku yemela likuka za Jehova ze lukile. Niteñi, Bakreste ba swanela ku ‘batisisa se si tabisa Mulena.’ Ba lukela ku ikolwisa kuli ha ku na nto ye swabisa ye sweli ku ezahala mwa malapa a bona. (Maef. 5:5, 10) Ku eza cwalo ku tokwa kuli Bakreste ba kupe ketelelo ya Mulimu ka tapelo ni kuli ba eze ze ba kona kaufela kuli ba silelezane kwa mubili ni mwa muzamao hamohocwalo ni ku sileleza libizo le linde la Jehova.