“Moya ni Munyaliwa ba li: Taha!”
“Moya ni Munyaliwa ba li: Taha!”
“Moya ni munyaliwa ba li: Taha! . . . Ya shwile linyolwa a tahe; ya lata, a nge feela kwa mezi a bupilo.”—SIN. 22:17.
1, 2. Lu swanela ku beya litaba za Mubuso mwa sibaka mañi mwa bupilo bwa luna, mi ki kabakalañi?
LU SWANELA ku beya litaba za Mubuso mwa sibaka mañi mwa bupilo bwa luna? Jesu naa susuelize balateleli ba hae kuli ba “bate pili mubuso,” mi naa ba kolwisize kuli ha ne ba ka eza cwalo, Mulimu naa ka ba fa ze ne ba tokwa. (Mat. 6:25-33) Naa swaniselize Mubuso wa Mulimu kwa pelela ye butokwa hahulu ya bata mulekisi, mi a mano i fumana, a “lekisa za hae kamukana, mi a i leka.” (Mat. 13:45, 46) Kacwalo, lu swanela ku nga musebezi wa ku kutaza Mubuso ni ku luta batu kuli ba be balutiwa ku ba wa butokwa hahulu.
2 Sina mo lu bonezi mwa litaba ze peli ze felile, ku bulela ka bundume ni ku itusisa Linzwi la Mulimu ka bukwala mwa bukombwa bwa luna ku bonisa kuli lu zamaiswa ki moya wa Mulimu. Moya wo hape u lu tusa hahulu ku abananga kamita mwa musebezi wa ku kutaza Mubuso. Ha lu boneñi mo u lu tuseza.
Batu Kaufela ba Memiwa!
3. Batu kaufela ba memiwa ku “taha” ku to nwa mezi a mufuta mañi?
3 Batu kaufela ba memiwa ka moya o kenile. (Mu bale Sinulo 22:17.) Memo yeo ki ya ku “taha” ku to feza linyolwa la na ni lona mutu ka ku nwa kwa mezi a ipitezi hahulu. Ao haki mezi-mezi feela. Ki niti kuli mezi tenyene ki a butokwa hahulu kwa libupiwa za fa lifasi kuli li pile, kono Jesu naa talusa mezi a mufuta u sili ha naa bulelezi musali wa Musamaria fa lisima kuli: “Ya nwa kwa mezi a ni ka mu fa, haa sa na ku shwa linyolwa, ku ya ku ile; mi mezi a ni ka mu fa, a ka fetuha ku yena liweluwelu la mezi a buba, ku isa kwa bupilo bo bu sa feli.” (Joa. 4:14) Mezi a ipitezi o ba memelwa batu ku to nwa, a fa bupilo bo bu sa feli.
4. Tokwahalo ya mezi a bupilo ne i tahile cwañi, mi mezi ao a yemelañi?
4 Tokwahalo ya mezi a bupilo ao ne i kalile ku ba teñi muta mutu wa pili, Adama, naa swalisani ni musalaa hae, Eva, ku shwaula ya naa ba bupile—Jehova Mulimu. (Gen. 2:16, 17; 3:1-6) Batu ba pili bao ne ba lunduzwi mwa simu ye nee li lihae la bona ilikuli Adama a si ke “a isa lizoho la hae, a koyola kwa kota ya bupilo, a ca mi a pila kamita.” (Gen. 3:22) Ka ku ba yena ko ba simuluha batu kaufela, Adama naa tahisize lifu kwa batu kaufela. (Maro. 5:12) Mezi a bupilo a yemela litukiso kaufela za ezize Mulimu kuli a yangwele batu ba ba utwa kwa sibi ni lifu ni ku ba fa bupilo bo bu sa feli ili bo bu petehile mwa Paradaisi fa lifasi. Litukiso zeo li tomile fa sitabelo sa tiululo sa Jesu Kreste.—Mat. 20:28; Joa. 3:16; 1 Joa. 4:9, 10.
5. Memo ya ku biza batu ku taha kuli ba “nge feela kwa mezi a bupilo” i zwelela ku mañi? Mu taluse.
5 Memo ya ku biza batu kuli ba tahe ba to nga “feela kwa mezi a bupilo” i zwelela ku mañi? Litukiso kaufela za bupilo ze ba fiwa batu ka ku tala ka Jesu mwahalaa nako ya Puso ya Kreste ya Lilimo ze Sikiti, li swanisezwa kwa “nuka ya mezi a bupilo, ye benya sina kristale.” Nuka yeo i taluswa ku ba “ye zwa mwa Lubona lwa Mulimu ni lwa Ngunyana.” (Sin. 22:1) Kacwalo, Jehova, yena Mufi wa bupilo, ki yena Liwelu-welu la mezi a fa bupilo. (Samu 36:9) Ki Yena ya fa mezi ao ka ku itusisa “Ngunyana,” yena Jesu Kreste. (Joa. 1:29) Nuka ya swanisezo yeo ki tukiso ya Jehova ya ku felisa ka yona manyando kaufela a tahezi batu kabakala ku sa utwa kwa Adama. Kaniti, Jehova Mulimu ki yena Musimululi wa memo ya kuli, “taha.”
6. “Nuka ya mezi a bupilo” i kalile ku buba lili?
6 Nihaike kuli “nuka ya mezi a bupilo” i ka buba ka ku tala mwahalaa Lilimo ze Sikiti za Puso ya Kreste, i kalile ku buba mwa “lizazi la Mulena,” le ne li kalisize ka nako yeo “Ngunyana” naa filwe bulena mwa lihalimu ka 1914. (Sin. 1:10) Kacwalo, litukiso ze ñwi za bupilo ne li kalisize ku ba teñi hamulaho wa fo. Litukiso zeo li kopanyeleza lushango lo lu mwa Bibele, kakuli lushango lo, lu taluswa ku ba “mezi.” (Maef. 5:26) Batu kaufela ba memiwa kuli ba ‘nge kwa mezi a bupilo’ ka ku utwa taba ye nde ya Mubuso ni ku pila ka ku lumelelana ni yona. Kono ki mañi ya eza musebezi luli wa ku mema batu mwa lizazi la Mulena?
“Munyaliwa” U li: “Taha!”
7. Ki bomañi mwa “lizazi la Mulena” ba ne ba li ba pili ku kala ku mema batu ku “taha,” mi ne ba mema bomañi?
7 Ba sitopa sa munyaliwa—bona Bakreste ba ba toziwe ka moya—ki bona ba pili ku kala ku mema batu ku “taha.” Ba mema bomañi? Munyaliwa haa buleli kuli “Taha!” ku i li yena. Manzwi a hae u a bulelela batu ba ba na ni sepo ya ku fumana bupilo bo bu sa feli fa lifasi, hamulaho wa ku lwanwa kwa “ndwa ya lizazi le lituna la Mulimu Ya-Mata-Kaufela.”—Mu bale Sinulo 16:14, 16.
8. Ki lika mañi ze bonisa kuli Bakreste ba ba tozizwe se ba ezize musebezi wa Jehova wa ku mema batu ku kala feela ka 1918?
8 Balateleli ba Kreste ba ba tozizwe se ba ezize musebezi wa ku mema batu ku kala feela ka 1918. Mwa silimo seo, ngambolo ya nyangela ye nee na ni toho ya taba ye li , “Millions Now Living May Never Die” (Bolule-lule ba ba Pila Cwale ba kana ba sa Shwi) ne i file batu sepo ya kuli batu ba bañata ba ka fumana bupilo mwa paradaisi fa lifasi hamulaho wa ndwa ya Armagedoni. Ngambolo ye ñwi ye ne i filwe fa mukopano wa sikiliti wa Baituti ba Bibele kwa Cedar Point, Ohio, U.S.A., ka 1922, ne i susuelize bateelezi ku ‘zibahaza Mulena ni mubuso wa hae.’ Susuezo yeo ne i tusize bomasiyaleti ba sitopa sa munyaliwa ku mema batu ba bañata. Ka 1929, The Watchtower ya March 15, ne i na ni taba ye li , “Gracious Invitation” (Memo ye Musa) ili ye ne i tomile fa liñolo la Sinulo 22:17. Taba yeo ne i na ni manzwi a li: “Sitopa sa bomasiyaleti ba ba sepahala, si swalisani [ni Muambakani-ya-Pahami] mwa ku biza batu ka memo ye musa mi si li , ‘Taha.’ Lushango lo, lu swanela ku shaelwa kwa batu ba ba lata ku luka ni niti. Lu swanela ku shaelwa honafa.” Ni kacenu le, sitopa sa munyaliwa si zwelapili ku mema batu.
“Ya Utwa A Bulele, A li: Taha!”
9, 10. Batu ba ba utwa memo ba memilwe cwañi kuli ni bona ba bulele kuli, “Taha”?
9 Ku cwañi ka za batu ba ba utwa memo ya kuli “taha”? Ni bona ba memiwa ku bulela kuli, “Taha!” Ka mutala, The Watchtower ya August 1, 1932, ne i bulezi cwana fa likepe 232: “Haike Bakreste ba ba tozizwe ba susueze batu kaufela ba ba ka abana mwa musebezi wa ku bulela taba ye nde ya mubuso. Batu bao ha ba tokwi ku ba batoziwa ba Mulena kuli ba shaele lushango lwa Mulena. Lipaki za Jehova ba tabe ka ku ziba kuli ka nako ya cwale, ba lumelelizwe ku isa mezi a bupilo kwa sikwata sa batu ba ba kana ba punyuha Armagedoni ni ku fiwa bupilo bo bu sa feli fa lifasi.”
10 Ka ku koñomeka buikalabelo bwa batu ba ba utwa memo bwa kuli ni bona ba bulele kuli, “Taha!” The Watchtower ya August 15, 1934, fa likepe 249, ne i bulezi kuli: “Ba sitopa sa bo Jonadabi ba swanela ku ya hamoho ni ba sikwata se si swaniseza Jehu, ili sona sa Bakreste ba ba tozizwe, ba nze ba zibahaza lushango lwa mubuso niha ba si lipaki za Jehova ba ba tozizwe.” Ka 1935, “buñata bo butuna” bo bu bulezwi kwa Sinulo 7:9-17 ne bu fitile fa ku zibahala. Batu bao ne ba tusize hahulu mwa musebezi wa ku fitisa memo ya Mulimu kwa batu. Ku zwa feela nako yeo, batu ba ba zwelapili ku ekezeha, ba buñata bo butuna bwa balapeli ba niti, ili ba se ba fitelela 7,000,000 cwale, ba amuhezi memo yeo. Hamulaho wa ku utwa lushango ni ku itebuha lona, ba fitile fa ku ineela ku Mulimu, ku kolobezwa mwa mezi, ni ku swalisana ni sitopa sa munyaliwa mwa musebezi wa ku mema batu ba bañwi kuli ba ‘tahe ba to nwa feela kwa mezi a bupilo.’
“Moya” U li: “Taha!”
11. Mwa lilimo za mwanda wa pili C.E., moya o kenile ne u tusize cwañi mwa musebezi wa ku kutaza?
11 Jesu ha naa kutaza mwa sinagoge mwa Nazareta, naa apuzi buka ya mupolofita Isaya mi a bala, a li: “Moya wa Mulena u fahalimwaa ka, kakuli u ni tozize, kuli ni bulelele babotana Evangeli; u ni lumile ku folisa ba ba lobehile lipilu, ku zibisa ba ba hapilwe kuli ba lukuluhile, ni ba ba shwile meeto kuli ba filwe ku bona, ba ba nyandiswa, ni ba kutise ba lukuluhile, mi ni zibise mwaha wa Mulena, wa sishemo.” Mi cwale Jesu a bonisa kuli manzwi ao a ama ku yena, ka ku bulela kuli: “Kacenu liñolo leo li ezahezi, mu nze mu ikutwela.” (Luka 4:17-21) Jesu a si ka kambamela kale kwa lihalimu, naa bulelezi balutiwa ba hae kuli: “Mu ka amuhela maata, Moya o Kenile ha u ka ta ku mina; mi mu ka ba lipaki za ka . . . ku isa kwa mafelelezo a lifasi.” (Lik. 1:8) Mwa lilimo za mwanda wa pili, moya o kenile ne u tusize hahulu mwa musebezi wa ku kutaza.
12. Moya wa Mulimu u tusa cwañi mwa musebezi wa ku mema batu kacenu?
12 Moya o kenile wa Mulimu u tusa cwañi mwa musebezi wa ku mema batu kacenu? Jehova ki yena Simbule sa moya o kenile. U itusisa moya wo ku kwalula lipilu ni minahano ya ba sitopa sa munyaliwa kuli ba utwisise Linzwi la hae, yona Bibele. Moya u ba susueza ku mema batu ba bañwi ni ku talusa niti ya Mañolo kwa batu ba ba na ni sepo ya ku pila ku ya ku ile mwa Paradaisi fa lifasi. Ku cwañi ka za batu ba ba amuhela memo yeo ni ku ba balutiwa ba Jesu Kreste, mane ni ku mema batu ba bañwi hape? Moya wa sebeza ni ku bona. Ha se ba kolobelizwe ‘ka Libizo la Moya o Kenile,’ ba kala ku pila ka ku lumelelana ni ketelelo ya moya wo ni ku itinga ku wona kuli u ba tuse. (Mat. 28:19) Hape, ha mu nahane ka za lushango lo ba sweli ku kutaza Bakreste ba ba tozizwe ni ba buñata bo butuna ba ba sweli ku ekezeha. Lushango lo, lu zwa mwa Bibele—ili buka ye ñozwi ka ketelelo ya moya wa Mulimu. Kamukwaocwalo, memo ya ku biza batu i fiwa ka tuso ya moya o kenile. Mane lu etelelwa ki wona moya wo. Taba yeo i swanela ku ama cwañi nako ye lu tandanga mwa musebezi wa ku mema?
Ba “Zwelapili ku Bulela Kuli: ‘Taha!’”
13. Ki sifi se si taluswa ka pulelo ya kuli “Moya ni munyaliwa ba zwelapili ku bulela kuli: ‘Taha!’”?
13 “Moya ni munyaliwa” ha ba bulela kuli, “Taha!” ha ba memi feela hañwi. Linzwi la mwa puo ya kwa makalelo le li itusizwe fa, li fa muhupulo wa kezo ye zwelapili. Kona libaka Bibele ya New World Translation i bala kuli: “Moya ni munyaliwa ba zwelapili ku bulela kuli: ‘Taha!’” Seo si bonisa kuli memo ya Mulimu i sweli ku fitiswa kwa batu ka nako kaufela. Ku cwañi ka za batu ba ba utwa ni ku amuhela memo yeo? Ni bona ba bulela kuli: “Taha!” Ba buñata bo butuna bwa balapeli ba niti ba bulelwa kuli ba sweli ku “sebeleza [Jehova] musihali ni busihu mwa Tempele ya hae.” (Sin. 7:9, 15) Ba mu sebeleza cwañi “musihali ni busihu”? (Mu bale Luka 2:36, 37; Likezo 20:31; 2 Matesalonika 3:8.) Mitala ya mupolofita wa musali Anna ya naa li musupali ni muapositola Paulusi, i bonisa kuli ‘sebelezo ya musihali ni busihu’ i talusa ku eza bukombwa ka ku sa lisela ni ka buikatazo bo butuna.
14, 15. Daniele naa bonisize cwañi butokwa bwa ku lapela Mulimu kamita?
14 Mupolofita Daniele ni yena naa bonisize butokwa bwa ku lapela Mulimu kamita. (Mu bale Daniele 6:4-10, 16.) Naa si ka cinca tomahanyo ya hae ya kwa moya—wona mukwa wa hae wa ku lapelanga ku Mulimu “halalu ka lizazi, . . . sina mwa naa ezezanga sapili.” Naa si ka tuhela ku lapelanga ku Mulimu nihaiba ka kweli iliñwi, ku eza cwalo niha ne ku tahisize kuli a nepelwe mwa musima wa litau. Likezo za hae ne li bonisize fo ku sweu kwa bashalimeli kuli ha ku na nto ye ñwi ye butokwa hahulu ku fita ku lapela Jehova kamita!—Mat. 5:16.
15 Daniele ha saa tandile busihu bu li buñwi mwa musima wa litau, mulena ka sibili a ya kwa musima, mi a huwa kuli: “Mawe Daniele! wena mutanga wa Mulimu Ya-Pila, kikuli Mulimu wa hao, yo sebeleza ka ku tundamena, u konile ku ku lamulela kwa litau?” Kapili-pili Daniele a alaba, a li: “Mulena, u pile kamita. Mulimu wa ka u lumile lingeloi la hae, mi li tibile milomo ya litau kuli li si ke za ni eza kozi, kakuli ni fumanwi ni si na mulatu fapilaa hae. Mi ni fapilaa hao, mulena, ha ni si ka eza se siñwi se si maswe.” Jehova naa fuyauzi Daniele kabakala sebelezo ya hae ya “ka ku tundamena.”—Dan. 6:19-22.
16. Mutala wa Daniele u swanela ku lu tahiseza ku ipuza lipuzo mañi ka za mo lu abanela mwa bukombwa?
16 Daniele naa itatela ku shwa ku fita ku tuhela tomahanyo ya hae ya kwa moya. Luna bo? Ki buitomboli mañi bo lu sweli ku eza kamba bo lu itatela ku eza kuli lu shaele taba ye nde ya Mubuso wa Mulimu ka ku tundamena? Ha lu swaneli ku fitisa kweli lu si ka bulela ka za Jehova ku ba bañwi. Haiba ku konahala, kana ha lu swaneli ku satalala ku abananga mwa bukombwa sunda ni sunda? Nihaiba nji lu na ni mapalelwi a kwa mubili mi lu kona feela ku kutaza ka mizuzu ye 15 mwa kweli, lu swanela ku biha musebezi wo. Kabakalañi? Kabakala kuli lu tabela ku zwelapili ku swalisana ni moya ni munyaliwa mwa musebezi wa ku bulela kuli, “Taha!” Kaniti, lu bata ku eza mo lu konela kaufela kuli lu zwelepili ku ba bahasanyi ba Mubuso ba kamita.
17. Ki linzila lifi ze lu fa tohonolo ya ku fitisa memo ya Jehova kwa batu ze sa swaneli ku lu bolomoka?
17 Lu swanela ku fitisanga memo ya Jehova kwa batu fo lu fumanela kolo kaufela, isiñi feela ka linako ze lu tomile za ku ezanga bukombwa bwa fa nyangela. Lu na ni tohonolo ye tuna ya ku mema batu ba ba shwile linyolwa kuli ba ‘tahe ba to nga feela kwa mezi a bupilo’ ka linako ze ñwi li sili, inge cwalo ha lu leka-leka, ha lu li mwa musipili, ha lu li kwa pumulo, ha lu beleka, kamba ha lu ya kwa sikolo. Bazamaisi niha ba lika ku palelwisa musebezi wa ku kutaza, lu zwelapili ku kutaza ka maseme—mwendi inge cwalo ka ku sa kutazanga fa mandu kaufela a mwa kalulo ye swana fa lizazi li li liñwi kamba ka ku eza hahulu bukombwa bwa ka ku tandalelwa.
Mu Zwelepili ku Bulela Kuli: “Taha!”
18, 19. Mu bonisa cwañi kuli mwa itebuha tohonolo ya ku ba ya sebeza ni Mulimu?
18 Ka lilimo ze fitelela 90 cwale, moya ni munyaliwa ba zwezipili ku bulelela mutu kaufela ya shwile linyolwa la mezi a bupilo kuli, “Taha!” Kana mu utwile memo ya bona ye nde yeo? Haiba ku cwalo, mu susuezwa ku mema batu ba bañwi.
19 Ha lu zibi kuli memo ye lilato ya Jehova i ka zwelapili ku fitiswa kwa batu ka nako ye kuma kai, kono ku amuhela memo yeo ka ku bulela kuli, “Taha!” ku lu tahiseza ku ba ba ba sebeza ni Mulimu. (1 Makor. 3:6, 9) Yeo ki tohonolo ye tuna! Haike lu boniseñi kuli lwa itebuha tohonolo yeo mi “lu tiseze Mulimu sitabelo sa milumbeko” ka ku kutazanga kamita. (Maheb. 13:15) Haike luna ba ba na ni sepo ya ku pila fa lifasi, lu swalisane ni sitopa sa munyaliwa ka ku zwelapili ku bulela kuli, “Taha!” Mi haike batu ba bañata ba “nge feela kwa mezi a bupilo”!
Mu Itutileñi?
• Ki bomañi ba ba memiwa ku “taha”?
• Ki kabakalañi ha ku konwa ku bulelwa kuli memo ya kuli, “taha” i zwelela ku Jehova?
• Moya o kenile u tusa cwañi mwa musebezi wa ku fitisa memo ya kuli, “taha”?
• Ki kabakalañi ha lu swanela ku lika ka taata ku abananga mwa bukombwa kamita?
[Lipuzo za Tuto]
[Chati/Maswaniso a fa likepe on page 16]
(Kuli mu bone mo i hatiselizwe luli, mu bone hatiso)
Mu Zwelepili ku Bulela Kuli, “Taha!”
1914
Bahasanyi ba 5,100
1918
Batu ba bañata ba ka fumana bupilo mwa Paradaisi fa lifasi
1922
“Mu zibahaze, mu zibahaze, mu zibahaze, Mulena ni mubuso wa hae”
1929
Bomasiyaleti ba ba sepahala ba bulela kuli, “Taha!”
1932
Kwandaa ba ba tozizwe, batu ba bañwi ni bona ba memiwa ku bulela kuli, “Taha!”
1935
“Buñata bo butuna” bwa zibahala
1934
Ba sikwata sa bo Jonadabi ba memiwa ku kutaza
2009
Bahasanyi ba 7,313,173