Mu Hanyeze Mashano A Satani

‘MU SI ke mwa pumiwa. Mulimu wa mina haa na ku mi tusa. Mu koze, ku si cwalo mu ka tahelwa ki kozi!’ Lo ki lona lushango lo Rabishake, numwana wa Mulena wa Asirya ya bizwa Senakeribi, naa taluselize bayahi ba Jerusalema. Limpi za mulena yo ne li ambekile naha ya Juda. Manzwi a numwana ao, naa lelezwi ku felisa sepo ya batu ba mwa Jerusalema ni ku ba sabisa ka mulelo wa kuli ba koze.—2 Mal. 18:28-35.

Maasirya ne ba zibahala ka lunya ni situhu. Ne ba sabisanga lila za bona ka ku ba taluseza mo se ba kile ba nyandiseza maswe lihapwa za bona. Ka ku ya ka muituti wa litaba ze ezahezi ya bizwa Philip Taylor, Maasirya ne ba itusisanga “mukwa wa ku sabisa lihapwa za bona ni ku li taluseza mashano ilikuli ba li luwe ni kuli ba bembe lila za bona ka ku li nahanisa kuli li ka ezwa maswe.” Mashano ki silwaniso se situna. Taylor u li , mulelo wa mashano ki ku “sinya minahano ya batu.”

Bakreste ba niti ba na ni ndwa ye sa ‘lwani ni mali ni nama, kono ye lwana ni mioya ye lunya,’ zona libupiwa za moya ze nee kwenuhezi Mulimu. (Maef. 6:12) Muzamaisi wa libupiwa zeo ki Satani Diabulosi. Ni yena u itusisa mukwa wa ku sabisa batu ni ku itusisa mashano.

Satani u ipapata kuli wa kona ku tahiseza mañi ni mañi wa luna ku tuhela busepahali bwa hae. Mwa mazazi a toho ya lusika Jobo, Satani naa bulelezi Jehova Mulimu kuli: “Mutu sa sweli kaufela wa si fana, kuli a pilise bupilo bwa hae!” Ka mubulelelo o muñwi naa talusa kuli, haiba mutu a sineneketwa hahulu, mafelelezo u ka tuhela busepahali bwa hae ku Mulimu. (Jobo 2:4) Kana Satani u bulela niti? Kana kaufela luna lu na ni maciñekelo fo lu kona ku tuhelela busepahali bwa luna—fo lu kona ku yubekela likuka ze lu latelela ilikuli lu zwelepili ku pila? Satani u bata kuli lu nahane cwalo. Kacwalo, hanyinyani-hanyinyani u itusisa mashano kuli a lu suñe muhupulo wo. Ha lu nyakisiseñi linzila ze ñwi za eza cwalo ka zona ni mo lu kona ku mu hanyeleza.

“Ba Simuluha Mwa Liluli”

Satani naa itusisize Elifazi, yo muñwi wa balikani ba Jobo ba ne ba tile ku to mu potela, ku yemela taba ya kuli batu ha ba na maata a ku hanyeza Satani. Ka ku talusa batu kuli “ba pila mwa mandu a lizupa,” naa bulelezi Jobo kuli: “Ba simuluha mwa liluli, . . . ba pyatiwa inge lifele. Ba pila ku zwa nako ya kakusasana ku isa kwa manzibwana, mi ba tokwahala; ba shwelela ku ya ku ile, ku si na temuho ni ye kana.”—Jobo 4:19, 20.

Mwa mañolo a mañwi a Bibele, lu swaniselizwe kwa “lipiza za lizupa,” ili lika ze si ka tiya. (2 Makor. 4:7) Lwa fokola bakeñisa sibi ni ku sa petahala ko lu hozize. (Maro. 5:12) Ka i li luna feela, Satani u kona ku lu lwanisa ka bunolo. Kono ka ku ba Bakreste, lu na ni matiyelo. Ku si na taba ni mifokolo ya luna, lu ba butokwa mwa meeto a Mulimu. (Isa. 43:4) Ku zwa fo, Jehova wa fanga moya o kenile ku ba ba u kupa ku yena. (Luka 11:13) Moya wa hae u lu fa ‘maata a matuna hahulu,’ ili ku lu tusa ku talimana ni matata afi kamba afi a lu tahiseza Satani. (2 Makor. 4:7; Mafil. 4:13) Haiba lu hanyeza Diabulosi, “ka ku tiya mwa tumelo,” Mulimu u ka lu tiisa ni ku lu matafaza. (1 Pit. 5:8-10) Kacwalo, ha lu swaneli ku saba Satani Diabulosi.

 Mutu U “Nwa Bumaswe”

Elifazi naa buzize kuli: “Mutu, kikuli a ka ba ya kenile? Mi ya pepilwe ki musali, a ka ba ya lukile?” Mi a alaba kuli: “Bona! Mbali Mulimu haa sepi ba ba kenile ba hae. Mi lihalimu ha li si ka kena mwa meeto a hae. Hahulu-hulu u ka palelwa ku sepa mutu ya maswe, ya sinyehile, yena mutu ya nwa bumaswe inge mezi!” (Jobo 15:14-16) Elifazi naa taluseza Jobo kuli Jehova u nga mutu kaufela ku ba ya si ka luka. Diabulosi hape u koma batu ka ku ba tahiseza mihupulo ye fosahalile. U bata kuli lu bilaele ka za mafosisa e lu kile lwa eza kwamulaho, kuli lu inyazange hahulu, ni kuli lu ikutwe kuli ha lu koni ku liululwa. Hape u bata kuli lu nahane kuli Jehova u libelela ze ñata hahulu ku luna ni kuli mukekecima wa hae, ku lata ku swalela kwa hae, ni tuso ya lu fa ha li koni ku kwahela milatu ya luna.

Ki niti kuli kaufela luna lu “ezize sibi, mi [lu] kauhezwi kwa kanya ya Mulimu.” Ha ku na mutu ya si ka petahala ya kona ku kwanisa lipimo za Jehova ze petehile. (Maro. 3:23; 7:21-23) Kono seo ha si talusi kuli ha lu na tuso ku yena. Jehova wa ziba kuli “noha ya kale, ye bizwa Diabulosi ni Satani,” ki yona ye bata ku lu koma ka ku itusisa muinelo wa luna wa sibi. (Sin. 12:9, 10) Ka ku ziba kuli “lu liluli feela,” Mulimu wa lu utwisisa hande mi haa lu “zekisi ka nako ni nako.”—Samu 103:8, 9, 14.

Haiba lu tuhela ku eza bumaswe ni ku atumela Jehova ka pilu ye bakile ha buniti, u ka lu “swalela” ka ku tala. (Isa. 55:7; Samu 51:17) Bibele i bulela kuli libi za luna “niha li ka ba ze fubelu sina mali, li ka fetuha ze sweu sina litwa.” (Isa. 1:18) Kacwalo, haike lu ikatuleleñi ku sa tuhela ku eza tato ya Mulimu.

Mwa muinelo o lu li ku ona wa buezalibi, ha ku na nto ye lu kona ku eza ye kona ku lu tahiseza ku ba ni mayemo a mande ku Mulimu. Bo Adama ni Eva ne ba bolomokilwe ki bupetehi ni sepo ya bupilo bo bu sa feli, mi ni luna kaufela lu amilwe. (Maro. 6:23) Kono kabakala lilato la hae le lituna kwa batu, Jehova naa ezize tukiso ya ku swalela ka yona libi za luna haiba lu ba ni tumelo mwa sitabelo sa tiululo sa Mwanaa hae, Jesu Kreste. (Mat. 20:28; Joa. 3:16) Tukiso yeo ne i bonisize “sishemo” se situna sa Mulimu! (Tite 2:11) Lwa kona ku swalelwa libi za luna! Kacwalo, lu si ke lwa lumeleza Satani ku lu nahanisa kuli ha lu koni ku swalelwa.

“U Swale fa Masapo A Hae ni fa Nama ya Mubili wa Hae”

Satani naa pihile kuli Jobo naa ka tuhela busepahali bwa hae ha naa ka latehelwa ki buikangulo bwa hae. Diabulosi na lwanisize Jehova ka ku bulela kuli: “U swale fa masapo a hae ni fa nama ya mubili wa hae; fohe, u ka bona kana a si ke a ku nyefula inzaa li fapilaa hao.” (Jobo 2:5) Ku si na ku kakanya, Sila sa Jehova si ka taba haiba si lu tahiseza maikuto a kuli ha lu na tuso kabakala mifokolo ya luna.

Niteñi, Jehova haa na ku lu hana muta lu palelwa ku eza lika kaufela ze ne lu ezanga mwa sebelezo ya hae. Ku cwañi haiba mulikanaa  luna u taselizwe ni ku holofazwa? Kana lu ka mu nga kuli haa sa li wa butokwa hahulu bakeñisa kuli haa sa kona ku lu ezeza lika kaufela za naa lu ezezanga? Kutokwa! Lu ka zwelapili ku mu lata ni ku iyakatwa yena—sihulu haiba naa holofalizwe ka nako ya naa lika ku lu ezeza nto ye ñwi. Kana ha lu libeleli Jehova ku eza nto ye swana? Bibele i bulela kuli: “Mulimu hasi ya si ka luka, kuli a libale misebezi ya mina, ni lilato le mu bonisize kwa Libizo la hae.”—Maheb. 6:10.

Mañolo a bulela za “musali wa mbelwa, ya shebile” ili yo mwendi naa file kemelo kwa bulapeli bwa Mulimu ka lilimo ze ñata. Jesu ha naa boni musali yo inzaa beya “tuhafu to tubeli twa penny” mwa pulukelo ya tempele, kana naa mu ngile ku ba ya si na tuso hamoho ni nubu ya hae? Batili, naa mu lumbile ka ku eza za naa kona ku eza kaufela ku likana ni miinelo ya hae kuli a fe kemelo kwa bulapeli bwa niti.—Luka 21:1-4.

Haiba lu zwelapili ku sepahala, lwa kona ku kolwa kuli bulikani bwa luna ni Jehova bu ka zwelapili ku ba bo bu tiile, ku si na taba ni matata kaufela e lu ipumana ku wona kabakala ku sa petahala, inge cwalo busupali kamba butuku. Mulimu haa na ku yumba simulamu basepahali ba hae kabaka feela la kuli matata e ba ipumana ku wona a ba palelwisa ku eza ze ñata mwa sebelezo ya hae.—Samu 71:9, 17, 18.

Mu Apale “Kuwani ya Busole, Ili ku Piliswa”

Lu kona ku isileleza cwañi kwa mashano a Satani? Muapositola Paulusi naa ñozi kuli: “Mu tiyele ku Mulena, ni mwa maata a hae a sa palelwi ki se siñwi. Mu swale lilwaniso kaufela za Mulimu, kuli mu kone ku tiya kwa lunya lwa Diabulosi.” Se siñwi sa lilwaniso za moya zeo ki “kuwani ya busole, ili ku Piliswa.” (Maef. 6:10, 11, 17) Kabakala mashano a Satani, lu swanela ku bona teñi kuli lwa apala kuwani yeo ka nako kaufela. Kuwani ya busole i silelezanga lisole kwa toho. “Sepo ya ku piliswa” ye lu na ni yona—bona buikolwiso bwa luna bwa kuli lisepiso za Mulimu ka za lifasi le linca li ka talelezwa—i ka sileleza minahano ya luna kwa mashano a Satani. (1 Mates. 5:8) Lu swanela ku bona teñi kuli sepo yeo i tiile ka nako kaufela ka ku tukufalelwa ku itutanga Mañolo ka butu.

Jobo naa tiyezi litasezo za Satani ze situhu ni ze maswe hahulu. Tumelo ya Jobo ya kuli zuho i ka ba teñi ne i li ye tiile hahulu kuli mane nihaiba mifumbo ya ku bulaiwa ne i si ka mu zwafisa. Kono naa bulezi ku Jehova kuli: “Wena noo ka biza, mi ne ni ka ku alaba; mi noo ka shukelwa ku bona hape musebezi wa mazoho a hao.” (Jobo 14:15) Jobo niha naa ka shwa kabakala ku zwelapili ku tiiseza mwa busepahali bwa hae, naa sepile kuli lilato la Mulimu kwa batanga ba Hae ba ba sepahala ne li ka tahisa kuli Mulimu a ba bize kwa bafu.

Haike ni luna lu be ni buikolwiso bo bu cwalo ku Mulimu wa niti. Jehova wa kona ku felisa kozi ifi kamba ifi yeo Satani ni bayemeli ba hae ba kana ba lu tahiseza. Hape, mu hupule kuli Paulusi u lu omba-omba kuli: “Mulimu wa sepahala, mi haa na ku lumela kuli mu likwe ki ze mi fita; kono hamoho ni muliko u ka mi fa nzila ya ku zwa ku ona, kuli mu kone ku itiisa ku ona.”—1 Makor. 10:13.

[Siswaniso se si fa likepe 20]

Jehova wa itebuha sebelezo ya mina ya ka busepahali

[Siswaniso se si fa likepe 21]

Ka nako kaufela, mu apale kuwani ya busole, ili ku piliswa