Mu Zamaye ka Moya Kuli mu Pile ka ku Lumelelana ni Buineelo Bwa Mina

“Mu zamaye ka Moya, mi mu si ke mwa eza se si lakazwa ki nama.”—MAGAL. 5:16.

1. Ki likolobezo mañi ze ne ezahezi ka lizazi la Pentekonta?

BALATELELI ba Jesu ne ba bulezi lipuo li sili ka lizazi la Pentekonta ya 33 C.E. hamulaho wa ku kolobezwa ka moya o kenile. Ne ba bonahalisize mpo ye makaza ya moya. (1 Makor. 12:4-10) Mpo yeo ni ngambolo ya na file muapositola Pitrosi ne li amile cwañi batu? Ba bañata ne ba ‘tabehile mwa lipilu.’ Pitrosi na ba susuelize kuli ba bake ni ku kolobezwa, mi ba eza cwalo. Bibele i li: “Ba ba amuhezi linzwi la hae, ba kolobezwa; mi mwa lizazi leo, balutiwa ba ekelezwa batu ba ba batilo eza 3,000.” (Lik. 2:22, 36-41) Sina mwa na laelezi Jesu, ne ba kolobelizwe mwa mezi ka libizo la Ndate, ni la Mwana, ni la moya o kenile.—Mat. 28:19.

2, 3. (a) Mu taluse shutano ye mwahalaa ku kolobezwa ka moya o kenile ni ku kolobezwa ka libizo la moya o kenile. (b) Ki kabakalañi batu kaufela ba ba bata ku ba Bakreste ba niti kacenu ha ba tokwa ku kolobezwa mwa mezi?

² Kono kana ku na ni shutano ye mwahalaa ku kolobezwa ka moya o kenile ni ku  kolobezwa ka libizo la moya o kenile? Eni. Batu ba ba kolobezwa ka moya o kenile ki bana ba Mulimu ba ba pepilwe sinca ili ba ba tozizwe ka moya. (Joa. 3:3) Ba toziwa kuli kwapili ba yo ba malena ni baprisita mwa Mubuso wa Mulimu wa kwa lihalimu, mi kaufelaa bona ki lilama za mubili wa moya wa Kreste. (1 Makor. 12:13; Magal. 3:27; Sin. 20:6) Kacwalo kolobezo yeo ya ku kolobezwa ka moya o kenile ki yona ya na ezize Jehova ka lizazi la Pentekonta ni hasamulaho, ili ka nako ya na keta batu ba ba ka ca sanda ni Kreste. (Maro. 8:15-17) Kono ku cwañi ka za ku kolobezwa mwa mezi ka libizo la moya o kenile, ili kolobezo ye eziwanga fa mikopano ye ipitezi ya lizazi li li liñwi, ya mipotoloho, ni ya likiliti ya batu ba Jehova mwa miteñi ya luna?

³ Bakreste ba niti ba kolobezwanga mwa mezi kuli ba bonise kuli ba ineezi ka ku tala ku Jehova Mulimu. Ba ba amuhezi pizo ya lihalimu ba kolobezwanga cwalo. Kono baana ni basali ba bañata-ñata ba mwa miteñi ya luna ba ba na ni sepo ya ku pila ku ya ku ile fa lifasi ni bona ba tokwa ku kolobezwa mwa mezi. Ku si na taba kuli mutu u na ni sepo ifi, u tokwa ku kolobezwa ka libizo la Ndate, ni la Mwana, ni la moya o kenile kuli a amuhelwe ki Mulimu. Kacwalo Bakreste kaufela ba ba kolobelizwe ba libelelwa ku ‘zamaya ka Moya.’ (Mu bale Magalata 5:16.) Kana mu zamaya ka moya ni ku pila ka ku lumelelana ni buineelo bwa mina?

Se ku Talusa ku ‘Zamaya ka Moya’

4. Ku ‘zamaya ka Moya’ ku talusañi?

⁴ Ku ‘zamaya ka Moya’ ku talusa ku lumeleza moya o kenile ku sebeza ku mina, ili ku u tuhelela ku mi zamaisa ku ze mu eza ka zazi ni zazi. Magalata kauhanyo 5 i bonisa shutano ye mwahalaa ku zamaiswa ki moya o kenile ni ku zamaiswa ki litakazo za nama.—Mu bale Magalata 5:17, 18.

5. Ku zamaiswa ki moya o kenile ku kopanyeleza ku ambuka misebezi ye cwañi?

⁵ Haiba mu zamaiswa ki moya o kenile, mu ka bata ku ambuka misebezi ya nama. Misebezi yeo i kopanyeleza ‘ku buka, buhule, mikwa ye masila, bubelete, ku lapela milimu, buloi, sitoyo, lifapano, lifufa, buhali, likañi, likauhano, lituto za buhata, muna, butahwa, ni ku ca maswe.’ (Magal. 5:19-21) Ha mu ambuka zeo, mu “bulaya misebezi ya mubili ka Moya.” (Maro. 8:5, 13) Ku eza cwalo ku ka mi tusa ku tukufalelwa za moya ni ku latelela ketelelo ya ona, ku fita ku ituhelela ku zamaiswa ki litakazo za nama.

6. Mu fe mutala o bonisa se mu tokwa ku eza kuli mu bonise muselo wa moya.

⁶ Moya o kenile ha u nze u sebeza ku mina, mu bonisa tulemeno to tu tabisa Mulimu, ili “muselo wa Moya.” (Magal. 5:22, 23) Kono mwa ziba kuli ku eza cwalo ku tokwa ku ikataza. Mu nyakisise mutala wa mulimi ya lima simu ya hae. Kuli licalo za hae li konde, li tokwa kambalala ni mezi; zeo ha li siyo ha koni ku libelela ku kutula se siñwi. Lu kona ku bapisa moya o kenile ni kambalala. Lu tokwa moya o kenile kuli lu bonise muselo wa ona. Kono kana ku na ni sa kona ku kutula mulimi a sa sebezi ka taata? (Liprov. 10:4) Kaniti, ha mu lukisa hande pilu ya mina mu ka bonisa hahulu muselo wa moya o kenile. Kacwalo, mu ipuze kuli, ‘Kana na lumelezanga moya o kenile  ku tahisa muselo wa ona ka ku sebelisana ni ona?’

7. Ki kabakalañi ku ituta ni ku yeya ha ku li kwa butokwa haiba mu bata ku bonisa muselo wa moya o kenile?

⁷ Kuli ba be ni kutulo ye nde, balimi hape ba tokwa ku selaelanga licalo za bona. Kuli mu bonise muselo wa moya, mu tokwa mezi a yemela niti ye mwa Bibele ili a fumanehanga kwa mikopano ya Sikreste kacenu. (Isa. 55:1) Mwendi se mu taluselize batu ba bañata kuli Mañolo A Kenile a tahile ka moya o kenile. (2 Tim. 3:16) Hape, sitopa sa mutanga ya sepahala ya na ni kutwisiso si lu tusa ku utwisisa mezi a kenile a yemela niti ye mwa Bibele. (Mat. 24:45-47) Taba yeo i lu tusa ku ziba se lu tokwa ku eza. Kuli lu zamaiswe ki moya o kenile, lu swanela ku balanga ni ku yeya Linzwi la Mulimu. Haiba mu sweli mwa eza cwalo, mu likanyisa mutala o munde wa bapolofita be ne ba ‘batile ni ku buziseza’ litaba ze ne ba filwe. Mane ni mangeloi a tabela hahulu ku ziba liniti ze zwa ku Mulimu ze ama Peu ye ne sepisizwe ni puteho ya Bakreste ba ba tozizwe.—Mu bale 1 Pitrosi 1:10-12.

Mu Kona ku Zamaiswa Cwañi ki Moya?

8. Ki kabakalañi ha mu tokwa ku kupa Jehova kuli a mi fe moya wa hae?

⁸ Kuli mu zamaiswe ki moya, ha mu swaneli feela ku itutanga Mañolo ni ku yeya. Mu tokwa ku kupanga Jehova kuli a mi tuse ni ku mi etelela. Wa kona ku “eza hahulu ni ku fita ze lu ka kupa ni ze lu ka hupula.” (Maef. 3:20; Luka 11:13) Kono mu kona ku alaba cwañi haiba mutu yo muñwi a mi buza kuli, “Ni swanela ku kupelangañi Mulimu haiba nji wa ziba ‘se ni tokwile ni si ka si kupa kale’?” (Mat. 6:8) Le liñwi la mabaka kikuli, ha mu kupa moya o kenile, mu bonisa kuli mu itingile ku Jehova. Ka mutala, haiba mutu yo muñwi a taha ku mina ku to kupa tuso, mu ka lika ka mo mu konela kaufela ku mu tusa, mi le liñwi la mabaka e mu ka mu tuseza kikuli u mi kupile tuso, ili ku bonisa kuli u mi sepile. (Mu bapanye Liproverbia 3:27) Ka ku swana, Jehova wa tabelanga ha mu mu kupa moya wa hae mi u ka mi fa ona.—Liprov. 15:8.

9. Ku fumanehanga kwa mikopano ya Sikreste ku kona ku mi tusa cwañi ku zamaiswa ki moya wa Mulimu?

⁹ Nzila ye ñwi ye mu kona ku zamaiswa ka yona ki moya o kenile ki mikopano ya luna ya puteho, ya mipotoloho, ni ya likiliti. Ku lika ka taata ku fumanehanga ku yona ni ku teeleza ki kwa butokwa. Ku eza cwalo ku ka mi tusa ku utwisisa linto “ze tungile za Mulimu.” (1 Makor. 2:10) Hape mu ka tusiwa haiba mu alabanga kwa mikopano. Mu hupule mikopano ye mu fumanehile ku yona mwahalaa lisunda zee ne ze felile. Ne mu yemisize hakai lizoho la mina kuli mu alabe, ilikuli mu bonise tumelo ya mina? Kana ku na ni fo mu tokwa ku sebeleza fa taba ye? Haiba ku na ni, mu ikatulele ku eza licinceho mwa lisunda za kwapili. Jehova u ka bona kuli mwa lata ku alaba mi u ka mi fa moya wa hae o kenile, ili o ka mi tusa ku fumana tuso ye tuna ni ku fita kwa mikopano ye mu fumanehanga ku yona.

10. Ku zamaya ka moya ku kopanyeleza ku fa ba bañwi memo ifi?

¹⁰ Ku zamaya ka moya hape ku kopanyeleza ku amuhela memo ye lu bala kwa Sinulo 22:17, ye li: “Moya ni munyaliwa ba li: Taha! Mi ni yena ya utwa a bulele, a li: Taha! Mi ya shwile  linyolwa a tahe; ya lata, a nge feela kwa mezi a bupilo.” Moya o sebeza ka ku itusisa sitopa sa munyaliwa, u sweli ku memela batu kwa mezi a bupilo. Haiba mu amuhezi memo ya kuli: “Taha!” kana ni mina mu tukufalezwi ku bulela kuli, “Taha!”? Ki tohonolo ye tuna luli ku ba ni kabelo mwa musebezi wo wa ku tusa batu kuli ba piliswe!

11, 12. Moya o kenile u tusa cwañi mwa musebezi wa ku kutaza?

¹¹ Musebezi wa butokwa wo u sweli wa petiwa cwale ka ketelelo ya moya o kenile. Bibele i lu taluseza ka za mo moya o kenile ne u susumelelize balumiwa mwa miteñi ya baapositola ku yo kutaleza mwa libaka ze nca. Muapositola Paulusi ni balikani ba hae ne ba ‘hanisizwe ki moya o kenile ku yo bulela Linzwi la Mulimu mwa Asia,’ mi ne u ba hanisize ku ya kwa Bitinia. Ha lu zibi hande mo ne u ba haniselize moya ku ya kwa libaka zeo, kono kwa iponelwa hande kuli moya ne u etelezi Paulusi ku ya kwa sibakatuna sa Europe. Na boni pono ya muuna wa kwa Masedonia ya na kupa tuso.—Lik. 16:6-10.

¹² Ni kacenu, moya wa Jehova u sweli wa etelela musebezi wa ku kutaza mwa lifasi kaufela. Jehova ha eteleli musebezi wo ka ku itusisa lipono, kono u zamaisa batoziwa ka moya o kenile. Mi moya u susueza mizwale ni likaizeli ku eza musebezi wa ku kutaza ni ku luta batu ka mo ba konela kaufela. Ku si na ku kakanya, se mu kalile kale ku eza musebezi wa butokwa wo. Kana mwa kona ku ekeza kwa tabo ya mina mwa musebezi o tabisa wo?

13. Mu kona ku ipeya cwañi kwatasaa ketelelo ya moya o kenile? Mu fe mutala.

¹³ Mwa kona ku ipeya kwatasaa ketelelo ya moya o kenile ka ku sebelisa litaba ze ba fiwanga batu ba Mulimu. Mu nyakisise mutala wa musizana wa kwa Japan ya bizwa Mihoko. Ka ku ba paina yo munca, na ikutwa kuli na sa koni hande ku eza misipili ya makutisezo; na ikutwa kuli na sa zibi mwa ku bulelela ka nzila ye hoha mamelelo ya muñaa ndu. Ibato ba ka nako yeo, Bukombwa Bwa Luna Bwa Mubuso ne bu file liakalezo ze tusa za mwa ku ezeza misipili ya makutisezo ka bukuswani. Mi hape ne ku hatisizwe broshuwa ya A Satisfying Life—How to Attain It (Mwa ku Fumanela Bupilo bo bu Kolwisa). Broshuwa yeo ne i tusize hahulu batu ba mwa Japan. Mihoko na sebelisize liakalezo za mwa ku itusiseza broshuwa yeo, sihulu liakalezo za mwa ku ezeza misipili ya makutisezo ka bukuswani. Hamulahonyana wa fo, a kalisa ku ituta Bibele ni batu ili bao mwendi ne ba hanile ku ituta sapili. U li: “Ne ni bile ni lituto ze ñata hahulu—ka nako ye ñwi ne li ze 12! Mi ne ni taluselize ba bañwi kuli ba libelele ku fitela ni kalisa ku ituta ni bona.” Kaniti, ha mu zamaya ka moya ili ka ku latelela ketelelo ye ba fiwa batanga ba Jehova, mwa kona ku kutula ka buñata.

Mu Itinge fa Moya wa Mulimu

14, 15. (a) Batu ba ba si ka petahala ba kona cwañi ku pila ka ku lumelelana ni buineelo bwa bona? (b) Mu kona ku fumana cwañi balikani ba bande?

¹⁴ Ka ku ba sikombwa se si ketilwe, mu na ni bukombwa bwa ku peta. (Maro. 10:14) Mu kona ku ikutwa kuli ha mu koni ku lwala buikalabelo bo. Kono ya mi konisa ki Mulimu, sina mwa koniseza ba ba tozizwe. (Mu bale 2 Makorinte 3:5.) Mwa kona ku pila ka ku lumelelana ni buineelo bwa mina ka ku eza ze mu kona kaufela ni ku itinga fa moya wa Mulimu.

 ¹⁵ Ki niti kuli haki nto ye bunolo kuli luna batu ba ba si ka petahala lu pile ka ku lumelelana ni buineelo bwa luna ku Mulimu wa luna ya petehile, Jehova. Butata bo mu kona ku talimana ni bona ki bwa kuli batu ba bañwi be ne mu swalisananga ni bona, ba kona ku komokiswa ki mupilelo wa mina o munca mi ba kona ku mi “bulela maswe.” (1 Pit. 4:4) Kono mu si libali taba ya kuli mu bile ni balikani ba banca, mi balikani ba mina ba butokwa hahulu ki Jehova ni Jesu Kreste. (Mu bale Jakobo 2:21-23. *) Hape ki kwa butokwa ku ziba mizwale ni likaizeli ba mwa puteho ya mina, ili ba bañwi ba “banabahabo mina” ba mwa lifasi kamukana. (1 Pit. 2:17; Liprov. 17:17) Ka moya wa hae, Jehova u ka mi tusa ku fumana balikani ba ba ka zwelapili ku mi susueza ku eza hande.

16. Ki kabakalañi ha mu kona ku ikutwa kuli ‘mo mu lata ki mwa mifokolo,’ sina mwa na ikutwezi Paulusi?

¹⁶ Niha mu na ni balikani ba bande mwa puteho, ku sa kona ku mi bela taata ku talimana ni matata a zazi ni zazi. Fokuñwi mu kona ku talimana ni butata bo bu mi lyanganisa, kuli mane mu ikutwa kuli mu mwa kazuma ka ka si na mwaalo. Ka nako yeo, mu tokwa hahulu ku kupa Jehova kuli a mi fe moya wa hae o kenile. Muapositola Paulusi na ñozi kuli: “Nako ye ni fokola, ki yona nako ye ni na ni maata.” (Mu bale 2 Makorinte 4:7-10; 12:10.) Paulusi na ñozi kuli moya wa Mulimu wa kona ku tusa batu mwa mifokolo ya bona, ku si na taba kuli ki ye cwañi. Kacwalo, moya wa Mulimu wa kona ku mi tiisa ha mu ikutwa ku fokola ni ha mu tokwa tuso. Paulusi na ñozi kuli ‘mwa na lata ne li mwa mifokolo.’ Ne li ka nako ya na fokola ha na ikutwanga kuli moya o kenile ne u sebeza ku yena. Ni mina mwa kona ku ikutwa cwalo!—Maro. 15:13.

17. Moya o kenile u kona ku mi libisa cwañi ko mu ya?

¹⁷ Lu tokwa moya wa Mulimu kuli lu kone ku pila ka ku lumelelana ni buineelo bwa luna ku yena. Mu nge kuli mu bazamaisi ba sisepe se si zamaya ka moya. Mulelo wa mina ki wa ku sebeleza Jehova kamita. Moya o kenile u swana sina moya o fuka o mu bata kuli u mi libise kwa mafuwekelo inze mu iketile. Ha mu bati ku kubyaniswa ki moya wa lifasi la Satani. (1 Makor. 2:12) Ka mubulelelo wa swanisezo, mu tokwa ku lemuha moya o fukela ko mu libile ni ku bapula masila a sisepe kuli moya wo u mi libise ko mu ya. Moya wo ki moya o kenile. Ka Linzwi la Mulimu ni kopano ya hae ye zamaiswa ki moya, moya o kenile u ka mi libisa mwa nzila ye lukile.

18. Mu ikatulezi ku ezañi ka nako ya cwale, mi ki kabakalañi?

¹⁸ Haiba mu kalile kale ku ituta ni Lipaki za Jehova ni ku ikola siango ni bona, kono ha mu si ka nga kale mihato ya butokwa ya ku ineela ni ku kolobezwa, mu ipuze kuli, ‘Ki kabakalañi ha ni sa zina-zina?’ Haiba mwa lemuha mo u tuseza moya o kenile ku peta tato ya Jehova kacenu ni mo u sebeleza, mu nge mihato ye mu itutile kuli ki ye lukile. Jehova u ka mi fuyola hahulu. U ka mi fa hahulu moya wa hae o kenile. Haiba se ku fitile lilimo ze ñata ku zwa fo ne mu kolobelelizwe, ku si na ku kakanya mu iponezi mo u mi tuselize moya o kenile. Mu iponezi mo Mulimu a kona ku mi tiiseza ka moya wa hae. Mulimu wa kona ku zwelapili ku mi tiisa cwalo, mane ku ya ku ile. Kacwalo, mu ikatulele ku zwelapili ku zamaya ka moya o kenile.

[Litaluso za kwatasi]

Kana Mwa Hupula?

• Ku ‘zamaya ka Moya’ ku talusañi?

• Ki lika mañi ze kona ku mi tusa ku zwelapili ku ‘zamaya ka Moya’?

• Mu kona ku pila cwañi ka ku lumelelana ni buineelo bwa mina?

[Lipuzo za Tuto]

[Siswaniso se si fa likepe 15]

Ku lukisa hande pilu ya mina ku tokwa buikatazo

[Maswaniso a fa likepe 17]

Kana mu zamaiswa ki moya wa Mulimu?