Mu Zwelepili ku ba ni “Pilu ye Sweu” Mwa Linako ze Taata Ze

HA NA ama kwa likezo za buhule ze swabisa ze ezizwe cwanoñu fa mwa Keleke ya Katolika kwa Italy, mubihi wa makande wa Mukatolika ya bizwa Vittorio Messori na bulezi kuli ha ku na ya kona ku hana taba ya kuli ku ipuluka ki nto ye taata mwa Keleke [ya Katolika] kacenu. U zwelapili ku bulela kuli: “Mi butata bo ha bu konwi ku tatululwa ka ku felisa mulao o hanisa baeteleli ba likeleke ku nyala, kakuli 80 pesenti ya litaba zeo i ama batu ba ba ezanga kalombe—ili litaba ze ama baprisita ba ba lobalanga baana ba bañwi kamba bashimani.”—Mutende wa La Stampa.

Ku si na ku kakanya, ku ata kwa bumaswe ki sisupo sa kuli lu pila mwa “mazazi a maungulelo” a lifasi le. (2 Tim. 3:1-5) Ku likana ni mo li boniseza lipiho za babihi ba makande, bumaswe bo ha bu eziwi ki batu-tu feela kono hape bu eziwa ki ba ba ipiza kuli ki batu ba Mulimu. Lipilu za bona ze silafezi li ba susuezanga ku eza likezo ze maswe. (Maef. 2:2) Kona libaka Jesu ha na bulezi kuli “mwa pilu ki mo ku zwa mihupulo ye maswe, ni lipulao, ni ku buka, ni busholi, ni lisebo za buhata, ni linyefulo.” (Mat. 15:19) Kono Jehova Mulimu u bata kuli batanga ba hae ba late “ku ba ni pilu ye sweu.” (Liprov. 22:11) Kacwalo, Mukreste u kona cwañi ku zwelapili ku ba ni pilu ye kenile mwa linako ze taata ze?

Ku ba ni “Pilu ye Kenile” ku Talusañi?

Mwa Bibele, linzwi la “pilu” hañata ha li itusiswangi kwa ku talusa pilu tenyene. Buka ye ñwi i bulela kuli linzwi la mwa Bibele le li tolokilwe kuli pilu li talusa “mutu wa mwahali” ni kuli pilu ya mutu “ki yona nto ye butokwa ku Mulimu, ili fo bu tomile bulikani bwa hae ni Mulimu, mi ki yona ye susumezanga mutu ku eza likezo ze nde kamba ze maswe.” Pilu i talusa mwa inezi mutu luli. Sina mo i taluseza buka yeo, pilu ki yona nto ya tatubanga Jehova kwa batanga ba hae mi ki yona ya butokwa ku yena.—1 Pit. 3:4.

Mwa Bibele, linzwi la ku “kena” li kona ku itusiswa kwa ku talusa nto ye si ka tala masila. Kono hape li itusiswanga kwa ku talusa muzamao o lukile ni bulapeli bo bu lumelelwa ki Mulimu. Mwa Ngambolo ya fa Lilundu, Jesu na ize: “Mbuyoti ki ya ba ba na ni pilu ye kenile.” Na talusa batu ba ba kenile mwahali. (Mat. 5:8) Lika ze ba lata, ze ba lakaza, ni milelo ya bona, ki ze nde. Buitumelo bwa bona ku Jehova kwa lika za ba ezelize bu ba susumeza ku mu lata ka pilu ya bona kaufela, ili ka lilato la niti, le li si na buikeziso. (Luka 10:27) Kana ha mu tabeli ku ba ba ba kenile ka nzila yeo?

Ku Zwelapili ku ba ni “Pilu ye Kenile” ku Kona ku ba Taata

Mutangaa Jehova ha swaneli feela ku ba ni “mazoho a si na milatu,” kono hape u swanela ku ba ni “pilu ye kenile.” (Samu 24:3, 4) Kono ku zwelapili ku ba taata kuli batanga ba Mulimu kacenu ba tiiseze ku ba ni “pilu ye kenile.” Satani ni lifasi le li busiwa ki yena, ni mibili ya luna ye si ka petahala, li lu susuezanga hahulu ku ikauhanya ku Jehova. Kuli lu hanyeze lisusuezo zeo, lu tokwa hahulu ku lata “pilu ye sweu” ni ku zwelapili ku ba ni yona. Lu ka silelezwa ha lu eza cwalo mi lu ka tusiwa ku zwelapili ku ba balikani ba Mulimu. Lu kona cwañi ku zwelapili ku ba ni pilu ye kenile?

 Kwa Maheberu 3:12, lu fumana temuso ye li: “Banabahesu mu tokomele, mwendi yo muñwi ku mina a ka ba ni pilu ye na ni bumaswe, ye sa lumeli, mane a kauhane ni Mulimu-Ya-Pila.” Ha lu koni ku zwelapili ku ba ni “pilu ye kenile” haiba lu ba ni pilu “ye sa lumeli.” Ki mihupulo ifi ya hasanyize Satani Diabulosi kuli a fokolise tumelo ya batu ku Mulimu? Mihupulo yeo i kopanyeleza tuto ya ku ipilaula, tuto ya kuli ha ku na likuka sakata za muzamao o lukile ni o si ka luka, ni mihupulo ye susueza batu ku kakanya taba ya kuli Mañolo A Kenile a tahile ka moya wa Mulimu. Lu swanela ku tokomela kuli lu si ke lwa keluswa ki mihupulo ye lubeta ye cwalo. (Makolo. 2:8) Ku balanga Bibele ka zazi ni zazi ni ku nahanisisa ze lu bala ku lu sileleza hahulu kwa mihupulo ye cwalo. Zibo ye nepahezi ya Linzwi la Mulimu i ka tiisa lilato la luna ku Jehova ni ku ekeza kwa kutwisiso ya luna ya ku utwisisa mwa sebelisanela ni batu. Ku ba ni lilato le li cwalo ni kutwisiso ye cwalo ku ka lu tusa hahulu ku hanyeza mihupulo ye fosahezi ni ku tiisa tumelo ya luna ku Jehova kuli lu kone ku zwelapili ku ba ni pilu ye kenile.—1 Tim. 1:3-5.

Ha lu Katazwa ki Litakazo za Nama

Litakazo za nama ni takazo ya bufumu ki ze ñwi za lika ze lu kona ku talimana ni zona ili ze tisa kuli ku be taata ku zwelapili ku ba ni “pilu ye sweu.” (1 Joa. 2:15, 16) Lilato la mali kamba takazo ya ku ikubukanyeza bufumu li kona ku sinya pilu ya Mukreste, ili ku mu susueza ku eza lika ze lwanisana ni tato ya Mulimu. Bakreste ba bañwi ha ba si ka sepahala kwa mubeleko, ba pumile batu ba bañwi, kamba mane ku uzwa mali kamba lika ze ñwi.—1 Tim. 6:9, 10.

Kono ha lu saba ku foseza Jehova, ha lu lata ku luka, ni ha lu ikatulela ku ba ni lizwalo le linde, lu bonisa kuli lwa lata “pilu ye sweu.” Lilato leo li lu tusa ku zwelapili ‘ku eza se si lukela mwa lika kaufela.’ (Maheb. 13:18) Ha lu eza se si lukile, lu kona ku fa bupaki bo bunde ka busepahali bwa luna. Paki wa kwa Italy ya bizwa Emilio, ya li mumatisi wa mbasi, na fumani sikwama mo ne ku na ni mali a eza ma-euro a 470 (ibato ba K3,270,000). Balikani ba  hae ba beleka ni bona ne ba komokile ha na isize sikwama seo ku muzamaisi wa hae, mi muzamaisi yo a si fa muñaa sona. Balikani ba bañwi ba Emilio ne ba tabisizwe hahulu ki za na ezize kuli mane ba kala ku tabela Bibele mi ba kalisa ku ituta yona. Kacwalo, batu ba 7 ba ba zwa mwa mabasi a mabeli ba amuhezi niti. Kaniti, busepahali bo bu tahiswa ki pilu ye kenile bu kona ku susumeza ba bañwi ku lumbeka Mulimu.—Tite 2:10.

Nto ye ñwi ye kona ku silafaza pilu ya Mukreste ki mubonelo o si ka luka wa somano. Pilu ya Mukreste i kona ku sinyiwa ki mubonelo o ba na ni batu ba bañata wa kuli ku eza somano mutu a si ka kena kale mwa linyalo, ku buka, kamba ku eza kalombe ku lukile. Mutu ya eza buhule u kona ku pila ka bupumi; u kona ku eza lika ze lukile kono inze a sweli ku pata sibi sa hae. Mutu ya cwalo ha na “pilu ye sweu.”

Gabriele na kolobelizwe ha naa na ni lilimo za buhulu ze 15 mi honafo a kalisa ku eza bupaina. Kono hasamulaho a kalisa ku tandanga nako ni balikani ba ba maswe kwa manwelo a bucwala ka nako ya busihu. (Samu 26:4) Kacwalo a kalisa ku pila ka mizamao ye maswe ni ka bupumi, mi a zwisiwa mwa puteho ya Sikreste. Kalimelo yeo ye zwa ku Jehova ne i mu tusize ku itekula. Gabriele ha iheta, u li: “Ne ni kalisize ku ezanga lika kaufela ze ne ni sa ezangi hahulu sapili. Na kala ku balanga Bibele ka zazi ni zazi inze ni ikataza ku utwisisa za na ni bulelela Jehova, ni ku ituta ka tokomelo libuka ze tomile fa Bibele. Ne ni iponezi mo ku tabiseza ku eza tuto ya ka butu ni mo ni kona ku tiisezwa ka ku bala Bibele ni ku lapela ka taata.” Ku eza cwalo ne ku tusize Gabriele ku lisela mizamao ya hae ye maswe ni ku kalisa sinca bulikani bwa hae ni Jehova.

Cwale Gabriele hape se a li paina hamoho ni musalaa hae. Ze ne ezahezi ku yena li bonisa kuli ku ituta Bibele ni lihatiso za “mutanga ya sepahala, ya na ni kutwisiso,” kwa kona ku tusa mutu ku ba ni pilu ye kenile ni ku hana mizamao ye maswe.—Mat. 24:45; Samu 143:10.

Ku ba ni “Pilu ye Sweu” ha lu li Mwa Muliko

Batanga ba Mulimu ba bañwi ba zwafisizwe ki lisineneketo ze zwa kwa balwanisi, butata bwa ku tokwa mali, kamba ku kula butuku bo butuna. Mi ka linako ze ñwi ba lembwalile. Mulena Davida ni yena na kile a ikutwa cwalo. Na ñozi kuli: “Bupilo bwa ka bu ya kwatasi, pilu ya ka i felelwa ki sepo.” (Samu 143:4) Kiñi se ne si mu tusize ku itiisa mwa linako ze cwalo? Davida na kengeezi lika zeo Mulimu na ezelize batanga ba Hae mi hape na nahanisisize mwa na piliselizwe yena ka sibili. Na yeyile za na ezize Jehova kabakala libizo la Hae le lituna. Davida na nahanile misebezi ya Mulimu. (Samu 143:5) Kamukwaoswana, haiba lu kengeela ka za Mubupi wa luna ni za lu ezelize zote ni za sweli ku lu ezeza, lu ka tusiwa ni ha lu li mwa miliko.

Haiba lu fosezwa, kamba haiba lu ikutwa kuli lu foselizwe, lu kona ku filikana. Ku buluka sikoto kwa pilu ku kona ku tisa kuli lu nyemele mizwale ba luna. Ku kona ku tahisa kuli lu ikauhanye ku ba bañwi ni ku sa ba iseza hahulu pilu. Kono kana ku eza cwalo ku ka bonisa kuli lu bata ku ba ni “pilu ye sweu”? Kaniti, kuli lu be ni “pilu ye sweu,” lu tokwa ku tokomela mo lu sebelisanela ni mizwale ba luna ni mo lu ezeza ha ku na ni lifapano.

Mwa lifasi mo ku na ni batu ba ba zwelapili ku pila ka mizamao ye maswe, luna ka ku ba Bakreste ba niti lwa shutana ni bona kakuli lu lata “pilu ye sweu.” Lu pila bupilo bo bunde kabakala mombecima o lu na ni, ili o tiswa ki ku eza tato ya Mulimu. Nto ya butokwa hahulu kikuli lu na ni bulikani bo bunde ni Mubupi wa luna, Jehova Mulimu, ya lata batu ba ba na ni “lipilu ze kenile.” (Samu 73:1) Kaniti, lu ka ba mwahalaa batu ba ba tabile ili ba ba “ka bona Mulimu” ha nze a fuyola batu ba ba lata “pilu ye sweu,” ku likana ni mwa na sepiselize Jesu.—Mat. 5:8.