Ba Banca—Mu Tiise Takazo ya Mina ya ku Sebeleza Jehova
Ba Banca—Mu Tiise Takazo ya Mina ya ku Sebeleza Jehova
“U hupule Mubupi wa hao mwa mazazi a bucaha bwa hao.”—MUEK. 12:1.
1. Banana ba mwa Isilaele ne ba memilwe kuli ba ezeñi?
LILIMO ze bato ba 3,500 kwamulaho, mupolofita wa Jehova Mushe na laezi baprisita ni baana-bahulu ba Isilaele kuli: “[Mu pute] sicaba, baana ni basali ni bana, . . . kuli ba utwe, mi ba itute ku saba Muñaa Bupilo Mulimu wa mina, mi ba tokomele ku eza litaba kaufela za milao yeo.” (Deut. 31:12) Mu lemuhe kuli batu be ne ba laezwi ku kopana kuli ba lapele hamoho ne li baana, basali, ni banana. Kaniti, banana ni bona ne ba li teñi mwahalaa batu be ne ba bulelezwi ku utwa, ku ituta, ni ku latelela litaelo za Jehova.
2. Jehova na iyakatitwe cwañi ba banca be ne ba li mwa puteho ya Sikreste ya makalelo?
2 Mwa miteñi ya baapositola, Jehova na iyakatwa ba banca be ne ba li mwahalaa sicaba sa hae. Ka mutala, na susumelize muapositola Paulusi kuli mwa mañolo a mañwi a na ñolezi liputeho, a ñole mwateñi litaelo ze ne ba tokwa ku mamela ba banca. (Mu bale Maefese 6:1; Makolose 3:20.) Ba banca ba Sikreste be ne ba mamezi likelezo ze cwalo ne ba zwezipili ku ekeza kwa buitebuho bwa bona ku Ndataa bona ya kwa lihalimu ya lilato mi ne ba fuyozwi ki yena.
3. Ba banca ba bonisanga cwañi takazo ya bona ya ku sebeleza Mulimu kacenu?
3 Kana ba banca kacenu ba memiwa ku to kopana kuli ba lapele Jehova? Eni! Kacwalo, batu kaufela ba Mulimu ba tabelanga ku bona ba banca ba bañata-ñata ba ba li batanga ba Mulimu mwa lifasi kaufela inze ba mamela kelezo ya Paulusi ye li: “A lu babalelane, kuli lu susumezane mwa lilato ni mwa misebezi ye minde. Lu si ke lwa tuhela liputeho za luna, mo ba ezeza ba bañwi; kono lu kutazane, sihulu ka ku bona kuli lizazi le lituna li sutelezi.” (Maheb. 10:24, 25) Hape banana ba bañata ba kutazanga taba ye nde ya Mubuso wa Mulimu hamoho ni bashemi ba bona. (Mat. 24:14) Mi ba banca ba ba eza lule-lule ba bonisanga lilato la bona le lituna ku Jehova silimo ni silimo ka ku kolobezwa mi ba fuyolwanga ka ku ba balutiwa ba Kreste.—Mat. 16:24; Mare. 10:29, 30.
Mu Amuhele Memo Honafa
4. Ba banca ba swanela ku ba ni lilimo ze kai kuli ba amuhele memo ya ku sebeleza Mulimu?
4 Liñolo la Muekelesia 12:1 li bulela kuli: “U hupule Mubupi wa hao mwa mazazi a bucaha bwa hao.” Ba banca, mu swanela ku ba ni lilimo za buhulu ze kuma kai kuli mu amuhele memo ye nde yeo ya ku lapela ni ku sebeleza Jehova? Mañolo ha si ka toma lilimo. Kacwalo, mu si ke mwa nahana kuli ha mu koni ku teeleza ku Jehova ni ku mu sebeleza kabakala kuli mu sa li banana hahulu. Ku si na taba kuli mu na ni lilimo ze kai, mu susuezwa ku amuhela memo yeo honafa.
5. Bashemi ba kona ku tusa cwañi bana ba bona ku hula mwa niti?
5 Buñata bwa mina mu tusiwa ku hula mwa niti ki yo muñwi wa bashemi ba mina kamba kaufelaa bona. Ka nzila yeo, mu swana sina Timotea ya bulezwi mwa Bibele. Ha na sa li yo munyinyani, bo mahe bo Eunise ni bo kukwaa hae bo Loisi ne ba mu lutile mañolo a kenile. (2 Tim. 3:14, 15) Mwendi ni mina bashemi ba mina ba sweli ku mi hulisa ka ku itutanga ni mina Bibele, ku lapelanga ni mina, ku yanga ni mina kwa mikopano ya puteho ni mikopano ye mituna ya batu ba Mulimu, ni ku yanga ni mina mwa sebelezo ya mwa simu. Kaniti, bashemi ba mina ba na ni buikalabelo bo bu butokwa hahulu bwa ku mi luta linzila za Mulimu ili bo bu zwa ku Jehova ka sibili. Kana mwa itebuha lilato le ba mi bonisa ni pabalelo ya bona?—Liprov. 23:22.
6. (a) Ka ku ya ka Samu 110:3, Jehova u tabela ku lapelwa cwañi? (b) Ki lika mañi ze lu ka nyakisisa cwale?
6 Nihakulicwalo, ha mu nze mu hula, Jehova u bata kuli mina ba banca “mu lemuhe se si latwa ki Mulimu kana ki sifi, se sinde, se si kateleha, se si petehile,” sina mwa na ezelize Timotea. (Maro. 12:2) Haiba mu eza cwalo, mu ka fumanehanga kwa mikopano ni ku kutazanga, isi ka libaka la kuli bashemi ba mina ba bata kuli mu eze cwalo, kono ili ka libaka la kuli mu bata ku eza tato ya Mulimu. Haiba mu sebeleza Jehova ka ku lata, u ka tabela. (Samu 110:3) Kacwalohe, mu kona ku bonisa cwañi kuli mu bata ku tiisa takazo ya mina ya ku teeleza ku Jehova ni ku mamela litaelo za hae? Lu ka nyakisisa linzila ze talu za butokwa ze mu kona ku eza cwalo ka zona. Linzila zeo ki ku ituta, ku lapela, ni ku ba ni muzamao o munde. Ha lu nyakeñi linzila zeo i liñwi ka i liñwi.
Mu Zibe Jehova Sina Mulimu ye mu Kona ku ba ni Bulikani ni Yena
7. Jesu na tomile cwañi mutala wa ku ituta Mañolo, mi na tusizwe cwañi ku eza cwalo?
7 Nzila ya pili ye mu kona ku bonisa ka yona kuli mu bata ku tiisa takazo ya mina ya ku sebeleza Jehova ki ka ku balanga Bibele ka zazi ni zazi. Mwa kona ku kolwisa linyolwa la mina la ku ziba za Mulimu ni ku fumana zibo ya Bibele ya butokwa ka ku balanga Linzwi la hae. (Mat. 5:3) Jesu na tomile mutala. Nako ye ñwi, ha naa na ni lilimo ze 12, bashemi ba hae ne ba mu fumani mwa tempele “a inzi fahalaa baluti, a ba teeleza, a ba buza.” (Luka 2:44-46) Ha na sa li mwanana, Jesu na nyolezwi ku ziba Mañolo mi na a utwisisa. Na tusizwe cwañi ku eza cwalo? Ku si na ku kakanya, bo mahe, bo Maria, ni bo ndatahe be ne ba mu añuzi, bo Josefa, ne ba mu tusize hahulu. Ne ba li batanga ba Mulimu be ne ba lutile Jesu za Mulimu ku zwa kwa bwanana bwa hae.—Mat. 1:18-20; Luka 2:41, 51.
8. (a) Bashemi ba swanela ku kalisa lili ku luta bana ba bona ku lata Linzwi la Mulimu? (b) Mu kandeke ze ezahezi ze bonisa butokwa bwa ku luta bana ku zwa kwa bwanana.
8 Kamukwaoswana, bashemi ba bañata ba ba saba Mulimu kacenu, ba lemuha butokwa bwa ku luta bana ba bona kuli ba late niti ya mwa Bibele ku zwa kwa bwanana bwa bona. (Deut. 6:6-9) Kaizeli wa Sikreste ya bizwa Rubi na kalile ku luta mwanaa hae wa mweli Joseph hamulaho feela wa ku pepwa kwa hae. Zazi ni zazi na mu balelanga mwa Buka Ya Ka ya Makande a Bibele. Joseph ha na nzaa hula, bo mahe ne ba mu tusize ku peta mañolo a shutana-shutana. Kana Joseph na tusizwe ki tuto yeo? Hamulaho feela wa ku ituta ku bulela, Joseph na kona ku kandeka makande a mañata a mwa Bibele. Mi ha na li wa lilimo ze ketalizoho, na file ngambolo ya hae ya pili mwa Sikolo sa Bukombwa sa Teokratiki.
9. Ki kabakalañi ku balanga Bibele ni ku yeya ze mu bala ha ku li kwa butokwa?
9 Ba banca, kuli mu eze zwelopili mwa sebelezo ya mina ku Jehova, mu swanela ku ba ni mukwa wa ku balanga Bibele ka zazi ni zazi mwa bunca bwa mina, mane ni ha se mu hulile. (Samu 71:17) Ki kabakalañi ku balanga Bibele ha ku kona ku mi tusa ku eza zwelopili? Mu lemuhe za na bulezi Jesu mwa tapelo ya hae ku Ndatahe ha na ize: “Bupilo bo bu sa feli, kikuli ba ku zibe, Wena, Mulimu a nosi wa niti.” (Joa. 17:3) Kaniti, ha mu nze mu ituta hahulu ka za Jehova, mu ka na mu mu nga sina Mulimu ye mu kona ku ba ni bulikani ni yena mi lilato la mina ku yena li ka tiya. (Maheb. 11:27) Kacwalo, nako kaufela ha mu bala Bibele, mu like ku ziba ze ñata ka za Jehova. Mu ipuze kuli: ‘Taba ye i ni lutañi ka za Jehova sina Mulimu ye ni kona ku ba ni bulikani ni yena? Taba ya mwa Bibele ye, i bonisa cwañi kuli Mulimu wa ni lata ni ku ni babalela?’ Ku yeyanga lipuzo ze cwalo ku ka mi tusa ku ziba mwa nahanela Jehova, mwa ikutwela, ni za tokwa ku mina. (Mu bale Liproverbia 2:1-5.) Ka ku swana ni Timotea, mu ka ‘kolwiswa’ ki ze mu ituta mwa Mañolo, mi mu ka susumezwa ku lapela Jehova ka ku itatela.—2 Tim. 3:14.
Tapelo mo I Tiiseza Lilato la Mina ku Jehova
10, 11. Ku lapelanga ku mi tusa cwañi ku tiisa takazo ya mina ya ku sebeleza Mulimu?
10 Nzila ya bubeli ye mu kona ku tiisa ka yona takazo ya mina ya ku sebeleza Jehova ka pilu kaufela ki ka ku lapelanga ku yena. Mwa Samu 65:2, lu bala kuli: “Wena ya utwa milapelo, batu kaufela ba ka ta ku Wena.” Nihaiba ka nako yeo Maisilaele ne ba li sicaba se ne si itamile bulikani ni Mulimu, mazwahule be ne ba tahanga kwa tempele ya Jehova ne ba kona ku lapela ku yena. (1 Mal. 8:41, 42) Mulimu ha ketululi. Batu ba ba mamela litaelo za hae ba na ni buikolwiso bwa kuli u ka ba utwa. (Liprov. 15:8) Kaniti, “batu kaufela” ba kopanyeleza ni mina banana.
11 Mwa ziba kuli bulikani sakata bu tiiswanga ki ku ambolisana hande. Ku si na ku kakanya, mwa tabelanga ku bulelela mulikanaa mina yo mutuna mihupulo ya mina, lipilaelo za mina, ni maikuto a mina. Ka ku swana, ha mu lapela ka ku zwelela kwatasaa pilu, mu ambola ni Mubupi wa mina yo mutuna. (Mafil. 4:6, 7) Mu bulelelange Jehova maikuto a mina luli sina mo mu kona ku a bulelela ku mushemi ya lilato kamba ku mulikanaa mina yo mutuna. Mane ku na ni swalisano ye tuna ye mwahalaa mulapelelo wa mina ni mo mu ikutwela ka za Jehova. Mu ka lemuha kuli bulikani bwa mina ni Jehova ha bu nze bu tiya, litapelo za mina li ka zwelapili ku ba ze na ni taluso.
12. (a) Litapelo ze na ni taluso li kopanyelezañi? (b) Ki nto mañi ye ka mi tusa ku ziba kuli Jehova u fakaufi ni mina?
12 Kono mu hupule kuli manzwi feela ha tahisi kuli tapelo i be ni taluso. Hape mu tokwa ku talusa maikuto a mina luli. Ha mu lapela, manzwi a mina a bonise kuli mwa lata hahulu Jehova, mwa mu kuteka hahulu, ni kuli mu mu sepile ka ku tala. Ha mu nze mu lemuha mwa alabela litapelo za mina Jehova, mu ka iponela hande hahulu kuli Jehova “u fakaufi ni ba ba mu lapela kaufela.” (Samu 145:18) Kaniti, Jehova u ka sutelela ku mina, ili ku mi tiisa kuli mu kone ku hanela Diabulosi ni ku eza liketo ze nde mwa bupilo.—Mu bale Jakobo 4:7, 8.
13. (a) Kaizeli yo muñwi na tusizwe cwañi kabakala ku ba ni bulikani ni Mulimu? (b) Bulikani bwa mina ni Mulimu bu kona ku mi tusa cwañi ku itiisa ha mu kukuezwa ki litaka?
13 Mu nyakisise mwa na tiiselizwe Cherie kabakala ku ba ni bulikani bo bu tiile ni Jehova. Ha na li kwa sikolo sa sekondari, na winanga mipuzo bakeñisa kuli na ezanga hande mwa lituto za hae ni mwa lipapali. Ha na felize sikolo, na sepisizwe ku lifelwa mali a ku yo ituta kwa sikolo se si pahami. Cherie u li: “Sepiso yeo ne i ni kenyize mwa muliko, mi baluti ni bana ba sikolo ba bañwi ne ba ni susuelize hahulu kuli ni i amuhele.” Nihakulicwalo, na lemuhile kuli ku ndongwama tuto ye pahami ne ku ka tokwa kuli a itusisange nako ya hae ye ñata kwa ku ituta ni ku itukiseza lipapali, mi na ka siyalelwa ki nako ye nyinyani ya ku sebeleza Jehova. Cherie na ezizeñi? U li: “Hamulaho wa ku lapela ku Jehova, na hana sepiso yeo mi na kalisa ku sebeza sina paina wa kamita.” Ka nako ya cwale sa bile paina ka lilimo ze ketalizoho. U talusa kuli: “Ha ni inyazi. Ku ziba kuli ne ni ezize keto ye tabisa Jehova ku ni tahiseza tabo. Kaniti, haiba mu bata pili Mubuso wa Mulimu, linto ze ñwi kamukana mu ka li ekelezwa kwateñi.”—Mat. 6:33.
Muzamao O Munde U Bonisa Kuli mu na ni “Pilu ye Kenile”
14. Ki kabakalañi muzamao wa mina o munde ha u li wa butokwa mwa meeto a Jehova?
14 Nzila ya bulalu ye mu kona ku bonisa ka yona kuli mu sebeleza Jehova ka ku itatela ki ka muzamao wa mina. Jehova u fuyolanga ba banca ba ba zwelapili ku ba ni muzamao o kenile. (Mu bale Samu 24:3-5.) Samuele ha na sa li mutangana, na hanile ku likanyisa mizamao ye maswe ya bana ba Muprisita yo Muhulu Eli. Muzamao o munde wa Samuele ne u lemuhilwe ki ba bañwi. Bibele i li: “Mwanana, yena Samuele na nzaa hula, a tabelwa ki Muñaa Bupilo ni batu.”—1 Sam. 2:26.
15. Ki afi mabaka a mañwi ha mu zwelapili ku ba ni muzamao o munde?
15 Lu pila mwa lifasi le li tezi batu ba ba itata, ba ba ikuhumusa, ba ba sa utwi bashemi, ba ba sa itumeli, ba ba hana za Mulimu, ba ba na ni buhali, ba ba inuneka, ba ba lata minyaka isi Mulimu—mi ye ki ye miñwi feela ya mikwa ya na talusize Paulusi. (2 Tim. 3:1-5) Kacwalo ku kona ku ba taata hahulu kuli mu be ni muzamao o munde mwa lifasi le li maswe le. Kono nako ni nako ha mu eza se si lukile ni ku hana ku latelela mizamao ye maswe ya lifasi, mu bonisa kuli mu yemela Jehova mwa taba ya bubusi ye ama pupo kamukana. (Jobo 2:3, 4) Hape mu ka ba ni tabo ye tiswa ki ku ziba kuli mu eza za mi kupa Jehova ka kupo ye nde ye li: “Mwanaka u talife, mi u tabise pilu ya ka, mi ni ka kona ku alaba ya ni nyaza.” (Liprov. 27:11) Mi hape ku ziba kuli Jehova wa mi katelwa ku ka tiisa takazo ya mina ya ku mu sebeleza.
16. Kaizeli yo muñwi na tabisize cwañi pilu ya Jehova?
16 Kaizeli wa Sikreste ya bizwa Carol na kumalezi likuka za Bibele ha na sa kena sikolo a sa li mwanana, mi muzamao wa hae o munde ne u lemuhilwe ki ba bañwi. Ne ku ezaheziñi? Carol na sheununwanga ki baituti ba na banga ni bona mwa kilasi i liñwi, bakeñisa kuli lizwalo la hae le ne li lutilwe ki Bibele ne li sa mu lumelezi ku ikenya mwa mikiti ya pumulo ni mikiti ya naha. Ha na sheununwanga cwalo, linako ze ñwi na banga ni kolo ya ku taluseza ba bañwi tumelo ya hae. Hamulaho wa lilimo, Carol na amuhezi kadi ye ne zwa ku musali yo muñwi ya na banga ni yena mwa kilasi i liñwi, ya na ñozi kuli: “Ne ni ku batanga kuli ni itumele ku wena. Ne ni lemuhile muzamao wa hao o munde ni mutala o no tomile ka ku ba Mukreste wa mwanana, hamohocwalo ni mo ne u hanelanga ka ku tiya ku ikenya mwa mikiti ya pumulo. Ne li wena wa pili ye ne ni kopani ni yena kwa Lipaki za Jehova.” Mutala wa Carol ne u susumelize hahulu mulikanaa hae yo ya na kenanga ni yena sikolo kuli mane hamulaho na kalile ku ituta Bibele. Mwa kadi yeo ya na lumezi ku Carol, na ñozi kuli na sa bile Paki ya kolobelizwe ka lilimo ze fitelela 40! Ka ku swana ni Carol, mina ba banca ba ba kumalela likuka za Bibele ka bundume kacenu mwa kona ku susumeza ba lipilu ze na ni niti ku ziba Jehova.
Ba Banca ba ba Lumbeka Jehova
17, 18. (a) Mu ikutwa cwañi ka za ba banca ba mwa puteho ya mina? (b) Ba banca ba ba saba Mulimu ba ka ikolañi kwapili?
17 Kaufelaa luna ba ba mwa kopano ya Jehova ya mwa lifasi kaufela, lu tabile hahulu ku bona kuli ku na ni ba banca ba bañata-ñata ba ba tukufalezwi mwa bulapeli bwa niti! Ba banca bao ba tiisa takazo ya bona ya ku lapela Jehova ka ku balanga Bibele ka zazi ni zazi, ka ku lapelanga, ni ka ku ba ni muzamao o lumelelana ni tato ya Mulimu. Ba banca ba ba eza hande cwalo ba tabisa bashemi ba bona hamohocwalo ni batu kaufela ba Jehova.—Liprov. 23:24, 25.
18 Kwapili, ba banca ba ba sepahala ba ka ba mwahalaa batu ba ba ka punyuha ni ku kena mwa lifasi le linca la sepisize Mulimu. (Sin. 7:9, 14) Mwa lifasi leo, ba ka ikola limbuyoti ze ñata-ñata ha ba nze ba zwelapili ku ekeza kwa buitebuho bwa bona ku Jehova, mi ba ka kona ku mu lumbeka ku ya ku ile.—Samu 148:12, 13.
Kana Mwa Kona ku Talusa?
• Ba banca ba kona ku swalisana cwañi ni ba bañwi mwa bulapeli bwa niti kacenu?
• Kuli mu fumane tuso kwa ku bala Bibele, ki kabakalañi ku yeya ha ku li kwa butokwa?
• Ku lapelanga ku mi tusa cwañi ku sutelela ku Jehova?
• Muzamao o munde wa Mukreste u kona ku petañi?
[Lipuzo za Tuto]
[Siswaniso se si fa likepe 5]
Kana mu na ni mukwa wa ku balanga Bibele ka zazi ni zazi?